Etẹwẹ Ovi Towe Na Dọ?

MẸJITỌ LẸ: To zinjẹgbonu 15 janvier 2010 tọn mẹ to weda 16-20, mí na ayinamẹ dọ mì ni nọ basi zepọn hẹ ovi mìtọn lẹ. Hosọ ehe bẹ ayinamẹ lẹ hẹn he na gọalọna mì nado wleawuna ovi jọja mìtọn lẹ dote na yé nido sọgan pehẹ avùnnukundiọsọmẹnu lẹ to wehọmẹ. Mì sọgan yí yé zan to Sinsẹ̀n-Bibasi Whẹndo tọn mìtọn whenu.

OVI Kunnudetọ Jehovah tọn lẹ tọn nọ pehẹ avùnnukundiọsọmẹnu susu lẹ. Wehọmẹvigbẹ́ yetọn lẹ nọ saba kanse yé nuhewutu yé ma nọ tindo mahẹ to nuwiwa delẹ mẹ, taidi tohàn jiji, hùnwhẹ jijizan tọn, po nuwiwa gbọjẹwhenu tọn lẹ po. Eyin visunnu kavi viyọnnu towe wá pannukọn kanbiọ mọnkọtọn lẹ, nawẹ e na na gblọndo gbọn?

Ovi Klistiani tọn delẹ nọ dọ poun dọ: “N’ma sọgan wàmọ. E jẹagọdo sinsẹ̀n ṣie.” Ovi enẹlẹ jẹna pipà na teninọ nujikudo tọn yetọn. Gblọndo yetọn sọgan hẹn mẹhe kanhose lọ ma nado kanhose yinukọn dogọ. Etomọṣo, Biblu dotuhomẹna mí nado “nọ wleawu to whepoponu nado yiavunlọ to mẹlẹpo nukọn he to nukanbiọ [mí gando] whẹwhinwhẹ́n” nuyise mítọn lẹ tọn go. (1 Pita 3:15) Mọwiwà bẹ nususu hẹn hugan nado dọ poun dọ, “N’ma sọgan wàmọ.” Eyin mẹdelẹ tlẹ jẹagọdo mí, mẹdevo lẹ sọgan jlo nado yọ́n whẹwhinwhẹ́n he to godona nudide mítọn lẹ.

Ovi Kunnudetọ lẹ tọn susu wẹ ko yí owe lẹ taidi Plọnnu sọn Mẹplọntọ Daho lọ Dè zan nado dọhodo kandai Biblu tọn lẹ ji na wehọmẹvigbẹ́ yetọn lẹ. Kandai ehelẹ sọgan gọalọ nado basi zẹẹmẹ nuhewutu ovi Kunnudetọ lẹ tọn nọ wà onú delẹ kavi ma nọ wà onú delẹ tọn. Wehọmẹvi delẹ ko yí sọwhiwhe do dotoaina otàn Biblu tọn lẹ, podọ plọnmẹ Biblu susu ko bẹjẹeji to aliho ehe mẹ. E sọgan vẹawuna wehọmẹvi devo lẹ nado dotoaina otàn Biblu tọn dopo blebu. E sọgan vẹawu taun na wehọmẹvi lẹ nado mọnukunnujẹ kandai Biblu tọn delẹ mẹ adavo yè basi zẹẹmẹ gigọ́ na yé gandego. To whenue họntọn Minhee owhe 11 mẹvi de tọn basi oylọna ẹn nado wá hùnwhẹ jijizan tọn de tẹnmẹ, e gblọnna họntọn lọ dọmọ: “Biblu ma dọna mí nado nọ basi hùnwhẹ jijizan tọn lẹ. Biblu dọ dọ Johanu Baptizitọ yin hùhù to hùnwhẹ jijizan tọn de whenu.” Ṣigba Minhee flindọ, e taidi dọ họntọn emitọn ma mọnukunnujẹ gblọndo lọ mẹ.

To whedelẹnu, yẹdide kavi kandai de didohia wehọmẹvi devo lẹ to owe mítọn lẹ mẹ nọ gọalọ. Etẹwẹ lo eyin aṣẹpipa wehọmẹ tọn ma kẹalọyi dọ ovi lẹ ni nọ má owe sinsẹ̀n tọn lẹ na wehọmẹvi devo lẹ? Be ovi mítọn lẹ sọgan dekunnu po kọdetọn dagbe po etlẹ yin to whenue yé ma tindo owe depope ya? Nawẹ mì sọgan gọalọna ovi mìtọn lẹ nado yiavunlọna yise yetọn gbọn?

Mì Nọ Basi Zepọn lẹ hẹ Yé

Eyin mẹjitọ lẹ nọ yí adà wehọmẹvigbẹ́ lẹ tọn wà to whenue yé to zepọn basi hẹ ovi yetọn lẹ to whégbè, ehe sọgan gọalọ. Dile ovi lẹ to tintẹnpọn nado yiavunlọna yise yetọn, e na yọ́n dọ mẹjitọ lẹ ni nọ pà yé na vivẹnudido yetọn bo do lehe yé sọgan hẹn hoyijlẹdohogo yetọn pọnte dogọ do podọ nuhewutu ehe do yin nujọnu hia yé. Di apajlẹ, mì na yé ayinamẹ nado nọ zan hogbe he wehọmẹvigbẹ́ yetọn lẹ sọgan mọnukunnujẹemẹ lẹ. Joshua, visunnu owhe ṣinẹnẹ mẹvi de dọ dọ wehọmẹvigbẹ́ emitọn lẹ ma nọ mọnukunnujẹ hogbe delẹ mẹ taidi “ayihadawhẹnamẹnu” po “nugbonọ-yinyin” po. Enẹwutu, e to dandannu glọ nado nọ zan hogbe he bọawu lẹ nado yihojlẹdohogo hẹ yé.—1 Kọl. 14:9.

Wehọmẹvi he kàn kanbiọ sè delẹ sọgan hẹn ojlo bu eyin gblọndo he yin nina yé dite. Ovi Kunnudetọ lẹ tọn sọgan hẹn ojlo lọ dote gbọn hodọdopọ po hoyijlẹdohogo hẹ yé po dali. Haneul, viyọnnu owhe ao mẹvi de dọ dọ, “Wehọmẹvigbẹ́ ṣie lẹ nọ yiwanna hodọdopọ, e ma yin zẹẹmẹ bibasi.” Nado dọhodopọ hẹ wehọmẹvigbẹ́ de, nọ kàn kanbiọ sè, podọ enẹgodo nọ yí sọwhiwhe do dotoai dile e to linlẹn etọn lẹ dọtọ́n.

Hodọdopọ he tin to odò ehelẹ do lehe ovi Klistiani lẹ tọn sọgan yihojlẹdohogo hẹ wehọmẹvigbẹ́ yetọn lẹ do hia. E ma yin dandan nado plọn hodọdopọ ehelẹ do tamẹ—ovi lẹ gbọnvo na yede, podọ ninọmẹ voovo lẹ nọ biọ dọ yè ni dọ nuhe gbọnvo. Enẹwutu, ovi Kunnudetọ tọn de dona mọnukunnujẹ linlẹn tangan lọ mẹ, diọ ẹ do hogbe etọn titi mẹ, podọ to enẹgodo dọ ẹ to aliho he sọgbe hẹ ninọmẹ lọ po wehọmẹvigbẹ́ etọn lẹ po tọn mẹ. Eyin mì tindo ovi he tin to owhe wehọmẹ-yìyì tọn mẹ lẹ, mì basi wadohia do hodọdopọ ehelẹ ji hẹ yé.

Ovi lẹ pinplọn nọ biọ whenu po vivẹnudido po. E na yọ́n dọ mẹjitọ Klistiani lẹ ni nọ do nunọwhinnusẹ́n Biblu tọn lẹ do ahun ovi yetọn lẹ tọn mẹ bo nọ diọlinlẹnna yé nado nọgbẹ̀ sọgbe hẹ nunọwhinnusẹ́n enẹlẹ.—Deut. 6:7; 2 Tim. 3:14.

To Sinsẹ̀n-Bibasi Whẹndo tọn mìtọn he bọdego whenu, mì tẹ́n zepọn bibasi hẹ ovi mìtọn lẹ do hodọdopọ he yin awuwlena to weda ehelẹ ji pọ́n. Mì pọ́n lehe e sọgan tindo kọdetọn dagbe do. Hẹn do ayiha mẹ dọ yanwle lọ ma yin nado plọn nuhe yin didọ kavi hogbe lẹ do tamẹ. Na nugbo tọn, mì sọgan basi zepọn ninọmẹ de tọn whlasusu, bo nọ diọ gblọndo lẹ bo pọ́n lehe ovi mìtọn lẹ yinuwa do to whenue mì diọ gblọndo dopodopo. Dile yé to tintẹnpọn nado basi zẹẹmẹ nuyise yetọn lẹ tọn, mì gọalọna yé nado wleawuna lẹnpọn dagbe po zinzin po. Eyin mì to mọwà, mì na plọn ovi mìtọn lẹ lehe yé na yiavunlọna nuyise yetọn lẹ to klasigbẹ́, kọmẹnu po mẹplọntọ yetọn lẹ po nukọn do dile ojlẹ to yìyì.

[Apotin/Yẹdide to weda 4, 5]

HÙNWHẸ JIJIZAN TỌN LẸ

Marie: Nawẹ Jean. N’jlo na basi oylọna we nado wá hùnwhẹ jijizan ṣie tọn.

Jean: A wanu nado flin mi, Marie. Be a sọgan dọ nuhewutu a jlo na basi hùnwhẹ jijizan towe tọn na mi ya?

Marie: Nado dù jijizan ṣie wẹ ma. Kavi hiẹ ma nọ dù towe wẹ?

Jean: Lala, n’ma nọ wàmọ.

Marie: Etẹwutu? Homẹ omẹ ṣie lẹ tọn hùn to whenue n’yin jiji.

Jean: Nudopolọ wẹ e yin na omẹ ṣie lẹ. Homẹ yelọsu tọn hùn to whenue n’yin jiji. Ṣigba n’ma lẹndọ enẹ yin whẹwhinwhẹ́n de na mi nado nọ dù jijizan to whemẹwhemẹ. Mẹsusu nọ lẹndọ yewlẹ wẹ yin nujọnu hugan to whenue yé to hùnwhẹ jijizan yetọn tọn basi. Ṣigba be Jiwheyẹwhe ma wẹ yin nujọnu hugan lọ ya?

Marie: Be n’ma dona nọ dù jijizan ṣie dọ wẹ a te ya?

Jean: Marie, nudide towe wẹ enẹ yin. Ṣigba lẹnnupọndo ehe ji. To whenuena e yindọ mẹsusu yiwanna nado mọ nunina lẹ yí to hùnwhẹ jijizan yetọn tọn whenu, Biblu dọ dọ ayajẹ sù to nunamẹ mẹ hú to mimọyi mẹ. Kakati nado nọ na ayidonugo míde to azán jijizan mítọn tọn lẹ ji, be e ma na yọ́n nado nọ lẹnnupọndo mẹdevo lẹ ji podọ nado nọ dopẹna Jiwheyẹwhe egbesọegbesọ bo ma nọ nọte kakajẹ hùnwhẹ jijizan tọn bibasi whenu whẹpo do wàmọ ya?

Marie: N’ma ko lẹnnupọndo enẹ ji pọ́n. Be e dohia dọ mẹjitọ towe lẹ ma nọ na we nunina depope wẹ ya?

Jean: Gbau, yé nọ na mi. Ṣigba mẹjitọ ṣie lẹ ma nọ nọte kakajẹ azán jijizan ṣie tọn ji. Yé nọ na mi nunina lẹ sọn ojlẹ de mẹ jẹ devo mẹ dile e jlo yé do. Todin Marie, be a jlo na yọ́n lehe hùnwhẹ jijizan tọn bẹjẹeji gbọn ya?

Marie: Dọna mi bo.

Jean: Eyọn, to osọ n’na pìntàn ojlofọndotenamẹ tọn de na we gando hùnwhẹ jijizan tọn de he yin bibasi to owhe susu lẹ die wayi go.

TOHÀN JIJI

Abigaïl: Claire, naegbọn a ma nọ ji tohàn?

Claire: A wanu nado kanse. Whẹpo n’na na gblọndo, be a sọgan dọ nuhewutu a nọ ji tohàn na mi ya?

Abigaïl: N’yiwanna otò ṣie wutu wẹ be.

Claire: Homẹ yẹnlọsu tọn hùn nado nọ nọ̀ otò ehe mẹ, ṣigba n’ma lẹndọ otò de pọnte hugan devo.

Abigaïl: Na yẹn tọn, n’lẹndọ otò ṣie wẹ yọ́n hugan.

Claire: N’nọ tẹnpọn to whepoponu nado pọ́n nulẹ hlan dile Jiwheyẹwhe nọ wà do. Podọ Biblu dọ dọ Jiwheyẹwhe ma nọ hò mẹnukuntapọn. E yiwanna gbẹtọvi lẹpo mahopọnna otò he mẹ yé wá sọn. Enẹwutu wẹ n’ma na ji tohàn gbede.

Abigaïl: Be e ma yin hójlẹ a te niyẹn?

Claire: Lala, e ma yin yẹn kẹdẹ wẹ nọ pọ́n nulẹ hlan to aliho ehe mẹ. Biblu donù jọja delẹ go he tindo numọtolanmẹ dopolọ. E yin bibiọ to yé si nado sẹ̀n yẹhiadonu otò tọn de, ṣigba yé ma wàmọ dile etlẹ yindọ yè sìn-adán okú tọn na yé.

Abigaïl: Nugbo wẹ ya? N’ma ko sè onú mọnkọtọn pọ́n.

Claire: Eyin e jlo we, mí na dọhodeji to gbọjẹwhenu.

TONUDIDỌ WEHỌMẸ TỌN LẸ

Joël: Thomas, mẹnu wẹ jẹ nado yin afọzedaitọ klasi mítọn tọn?

Thomas: N’ma to mẹdepope ji.

Joël: Etẹwutu?

Thomas: Na n’ko de nukọntọ dagbe hugan lọ. Taidi Klistiani de, n’ko dopà nado hodo Jesu. Enẹwutu n’ma sọgan de nukọntọ devo. Ṣigba, be a yọ́n nuhewutu n’do lẹndọ ewọ wẹ yin Nukọntọ pipé lọ ya?

Joël: N’ma yọnẹn, podọ n’masọ jlo na yọnẹn.

Thomas: Eyọn, eyin e jlo we nado yọnẹn to whedepopenu, homẹ ṣie na hùn nado dọna we.

[Yẹdide]

“Nawẹ Jean. N’jlo na basi oylọna we nado wá hùnwhẹ jijizan ṣie tọn”

[Yẹdide to weda 3]

“Etẹwutu a ma nọ ji tohàn?”