Mwezi gwe 10

Hali amango onachiyunva oku bikukomerere kukenga si? Intyo kubyaliberere Mwami Daudi, bobola asalira Mungu ntya: “Ontabale ngwarhe enyorha y’okuba tayari kukukenga.” (Zb. 51:12) Daudi alizigiire Yehova. Aliko chiro akaba ntyo, kuguma nerhu, naye birhaliri byamuyorohera kukenga mango maguma. Bulagurhe? Ech’oburhanzi, rhwashokwere engeso y’okurhakenga. Echa kabiri, Shetani anarhushumika buli mango, yirhuba bigamba kuguma naye. (2 Ko. 11:3) Echa kasharhu, rhuzungulukirwe n’abantu bagwerhe engeso y’okurhakenga, k’okuderha, “eroho lili lyakola zene omu bana b’ebigamba.” (Efe. 2:2) Rhurhakwanene kulwisa engeso y’okujira echaha konyine, aliko kandi rhukwanene kulwisa akahidiko ka Ibilisi n’egulu lyage bali barhulerhera yirhurhakenga. Rhukwanene kujira okwerhu koshi yirhukenga Yehova na balala ahere oburhwali. w23.10 buk. 6 chi. 1

Bichi rhwakayiga kugerera echisomerene cha Yesu ch’okuhindamula amenji mw’edivayi? Rhwayigire engeso y’obwirhohye. Yesu arhachihalaga eju y’echola chisomerene; olekere nantyo ntamango achigerere achishurha omu chifuba oku bilolere ebyajiraga. Ahali h’okujira ntyo, agenderera kuchirhohya n’okuleka Eshe y’ehabwage erenge n’obukuze bwoshi. (Yoh. 5:19, 30; 8:28) Rhukayiganya Yesu omu kugenderera kuba berhohye nerhu, rhurhachibanda omu chifuba nerhu oku bilolere ebi rhwajirire. Choshi-choshi rhwakaba yirhwayeneza omu kasi ka Yehova, rhurhachibandaga omu chifuba oku birhulolere rhwabo rhwenyine, s’aliko oku lukengo rhugwerhe l’okukolera Mungu mwinja bwenene. (Yer. 9:23, 24) Rhukwanene kumuhereza olukengo akwanene. Nta chintu n’echiguma chinja rhwakayeneza buzira oburhabale bwa Yehova. (1 Ko. 1:26-31) Amango rhuli berhohye, rhurhalonza kuchiha erenge oku bintu binja rhwakolere abandi. Rhunayunva rhutoshekere n’okumenya oku Yehova ali abona n’okusiimiswa n’ebi rhuli rhwajira. (Huzanya na Matayo 6:2-4; Ebr. 13:16.) Kweri, rhunasiimisa Yehova amango rhuli rhwayiganya Yesu omu kuyerekana obwirhohye.​—1 Pe. 5:6. w23.04 buk. 4 chi. 9; buk. 5 chi. 11-12

Eroho lichesibwa lyaliyerekeze entumwa Paulo ahire Abakristu omurhima bayinje balonza enyungu z’abandi. Nka gurhe rhwakakolesa elyola hano amango rhuli oku mbuganano? Amango rhuli rhwayibuka oku kuguma nerhu, abandi nabo balonzeze kuhaana ebishubizo oku mbuganano. Waza kw’echila. Amango oli waganira nabera bawe, ka waderha binene naho nabo banaja bagwarha rozo lugeke l’okuderha? Nanga chiro! Olonzeze nabo basangire oku nganiro. K’onakuguma rhulonzeze bantu banene bahaane ebishubiszo nk’oku byakagalikana. Kweri, njira nguma rhwakahebamo bene-berhu na bali-berhu omurhima, kuli kubahereza orozo baderhe oku bilolere obwemere bwabo. (1 Ko. 10:24) Rhujage rhwayinja rhwahana rhwahaana ebishubizo birhalehere y’abandi nabo bagwarha akasanzi k’okushubiza. Chiro amango wamahaana echishubizo chiyufuhire, omenye waderha binene ku buli wazo. Nka wamaderha ku buli chintu chili omu chifungo, abandi barhachigwarha echibaderha. w23.04 buk. 22-23 chi. 11-13

Rhukwanene kuyibuka oku, kuli kw’akamaro bwenene rhugenderere kurhabala abandi ahanene kugerera akasi k’okuhubiri. Rhukwanene kuba tayari kuhindamuka omu kasi kerhu k’amahubiri. Rhunabugana abantu barhagwerhe amawazo mali kuguma banarhengere omu micho elengene. Entumwa Paulo aliri tayari kuhindamuka, n’omufano gwage gwakarhuyigiriza bintu binene. Yesu abaga ashimikire Paulo abe “ntumwa oku mashanja.” (Ro. 11:13) Naho, Paulo ahubiri Abayahudi, Abagiriki, abasomi, abantu barhahunukire balamire omu mavilaje, abarhwali, n’abami. Paulo “aba byoshi oku bantu be mbero zoshi.” (1 Ko. 9:19-23) Aliri awaza bwenene oku bilolere abantu aliri aganira nabo okuntu bakulaga, n’enyigirizo baliyemerere, n’echola chamurhabala kuhindamuka n’okuganira na buli muntu omu njira yakamurhabala abe mwira wa Mungu. Nerhu rhwakagwarha amalehe menja omu kasi k’amahubiri, amango rhuli tayari kuhindamuka, n’okuchihangana kuwaza okuntu rhwakarhabala buli muntu omu njira ekwanene. w23.07 buk. 23 chi. 11-12

Obwirhonzi burhali buzamba s’aliko eli misi. Bunarhuma rhwagwarha emisi, n’okurhuma rhwayorha rhurhulerere amango rhuli rhwahurana ehali ekomere. Obwirhonzi chili chiguma omu bigabi ‘by’etunda ly’eroho.’ (Gal. 5:22, 23) Echinwa ch’Echigiriki chitafusiribwe “bwirhonzi,” mango maguma chaliri chakoleswa omu kuderha efarasi y’elubala barhungire ahambuga. Wazaga oku efarasi y’elubala yalekere ebihage. Chiro akaba efarasi yalekere ebihage, echiherhe emisi yayo. Rhwabo nka bantu, nka gurhe rhwakagwarha obwirhonzi rhunagwarhe n’emisi? Rhurhakagala oku misi yerhu rhwenyine. Birhuhemere rhusalire, rhuheme Mungu eroho lyage, arhurhabale rhukuze eyola ngeso nyinja bwenene. Hali bantu banene bagalire kuba berhonzi. Banene mu bene-berhu bayerekene obwirhonzi amango abantu baliri bachihangana kubahambarira, n’echola charhabere bantu banene bagwarhe amawazo menja oku bilolere Abahamirizi.​—2 Ti. 2:24, 25. w23.09 buk. 15 chi. 3

Omu chibonekezi chisomeze bwenene, entumwa Yohana alibwene bashamuka 24 omu mbingu bali baharamya Yehova. Baliri bakuuza Mungu n’okuderha oku akwanene kuhabwa, “obukuuze n’olukengo n’obuhashe.” (Ufu. 4:10, 11) Bamalayika bemana nabo bagwerhe empanvu zinene z’okuhereza Yehova olukengo. Bali omu mbingu haguma naye n’echola charhumire bagala kumumenya bwinja. Banabona engeso zage kugerera ebyanajira. Amango alibabona ebijiro bya Yehova, echola chinabashunika bamuhereze obukuuze. (Yob. 38:4-7) Nerhu rhukwanene kukuuza Yehova omu masala merhu, rhwakajira ntyo omu kumubwira ebirhunazigira oku bimulolere na bulagurhe rhunamukenga. Amango oli wasoma n’okuyiga Ebiblia, ochihangane kurhegera engeso za Yehova zinakusimisa ahanene woyo wenyine. (Yob. 37:23; Ro. 11:33) N’abuzinda oje wabwira Yehova okuntu woyo wenyine oli wachiyunva eju y’ezola ngeso. Kandi rhwakakuuza Yehova bulala anarhurhabala rhwewe n’abandi Bakristu, k’okuderha, bene-berhu na bali-berhu.​—1 Sa. 2:1, 2. w23.05 buk. 3-4 chi. 6-7

Omu mwaka gwa 1919, olubaga lwa Mungu lurhalichirhegekerwe na Babiloni Mukulu. M’ogola mwaka, “omuja mwimana onakengukire” ashimikwa, n’okuhwanza kujira okwage koshi omu kurhabala abantu b’emirhima minja bahwanze kulambagira omu “Njira y’Obuchesibwa.” (Mt. 24:45-47; Isa. 35:8) Akasi abandi babaga bakolere mira omu kurhabala kurheganya elyola barabara, kalirhabere abantu bahwanze kubalama mw’elyola barabara lizibu-zibu yibayiga binene oku bilolere Yehova n’emihigo yage. (Mez. 4:18) Kandi bakagalire kulama nk’oku amakanuni ma Yehova maderhere. Yehova arhalilangalire oku abantu bage bakagalire kuhindamula ebintu byoshi chaligumira. Aliko agenderera kuchesa olubaga lwage kubuya-buya. Nji rhwagwarha busiime bunene bwenene amango rhwagala kusimisa Mungu werhu mu buli chintu rhwakajira! Buli barabara liba likenere okulikwiziza buli mango yiliyorha likwirire. Kurhenga omu mwaka gwa 1919, akasi k’okukwiziza “Enjira y’Obuchesibwa” kagenderere, n’echola charhabere bantu banene barhenge omu Babiloni Mukulu. w23.05 buk. 17 chi. 15; buk. 19 chi. 16

Ebaraza Lirhambwire lyowe lyonyine lyahwanzize kukoomeza abagwasi omu komite zoshi ze Baraza Lirhambwire. Abola bagwasi bemana bali bakola ngabane zinene bwenene omu lubaga lwa Yehova. Bali barheganywa bwinja yibagenderera kukola akasi k’okushishikala entama za Kristu. Amango Abakristu bashigwa bayorhere nji baba bamaja embingu hofi n’obuzinda bw’amalibuko makulu, abantu ba Yehova hanola oku gulu nji bagenderera kumuharamya oku bwimana. Kugerera obwerekezi bwa Yesu Kristu, abakozi ba Mungu ntacho nji babula. Omu kuderha okuli, rhumenyere oku mw’akola kasanzi echigusho ch’amashanja, Ebiblia eyirikire Gogu w’omu Chihugo cha Magogu, nji charhera abantu ba Mungu. (Eze. 38:18-20) Aliko, rhumenyere oku echola chirhero cha bisanzi bigeke ntacho nji chahikako; chirhakabuza abantu ba Mungu kugenderera kuharamya Yehova. Rhuchizerere kweri oku nji rhwayokolwa! Omu chibonekezi, entumwa Yohana alibwene “bantu kamama” b’omu zindi ntama za Kristu. Babwira Yohana okw’abola “bantu kamama” abwene barhengere “omu malibuko makulu.” (Ufu. 7:9, 14) Bobola, rhumenyere bwinja oku Yehova nj’abayokola! w24.02 buk. 5-6 chi. 13-14

Bichi rhwakajira yirhugwarha eroho lichesibwa? Rhwakasalira omu kulihema, rhwanasoma Echinwa cha Mungu, n’okuba haguma n’olubaga lwage luyerekezwe n’eroho lyage. Okujirantyo kwarhurhabala rhuyerekane “etunda lye roho.” (Gal. 5:22, 23) Mungu anahereza eroho lyage lichesibwa balala bonyine banagenderera kugwarha amawazo n’olugenzi luchere. Arhakagenderera kurhuhereza eroho lyage lichesibwa amango rhuli rhwagenderera kuwaza oku bintu birhachere n’oku bikola. (1 Te. 4:7, 8) Yirhugenderera kugwarha eroho lichesibwa, kandi “rhurhakwanene kusuzagura amalebi.” (1 Te. 5:20) Mu olola lwalindiko echinwa “Amalebi” chiderhere oku buli burhumwa Yehova anarhuha kugerera eroho lyage lichesibwa, biheberhwemo obulebi bulolere olusiku lwa Yehova n’okumenya oku ebisanzi biyorhere bigehere bwenene. Rhurhalonzeze kuwaza oku, olusiku lwa Yehova changwa e Armagedoni nji erhahika mu mano mango rhulamiremo. Ahali h’okujira ntyo, rhwanayerekana oku rhuchizerere oku yayinja hano hofi-hofi, changwa kuyiheba hofi omu bwenge bwerhu, omu kuchigendesa bwinja, n’oku genderera kugwarha binene by’okukola haguma “nebijiro by’obushwekerezi ku Mungu.”​—2 Pe. 3:11, 12. w23.06 buk. 12 chi. 13-14

Gurhe rhukwanene kujira rhwabo nka Bakristu, amango amafoto m’epornografi mamachilerha oku telefone, oku tablete changwa oku televiziyo yerhu, buzira kumenya? Rhukwanene kuyasa amesho merhu ohohan’aho. Byakarhuyorohera kujirantyo, akaba rhumenyere oku echintu ch’akamaro bwenene rhugwerhe buli bwira bwerhu haguma na Yehova. Chiro n’efoto zirhali z’epornografia zakarhuma rhwagwarha amawazo m’obubaraga. Bulagurhe rhukwanene kuchilanga kuzo? Bulala rhurhalonzeze chiro kuwaza changwa kujira echintu choshi choshi ch’obubaraga. (Mt. 5:28, 29) Omushamuka muguma w’omu Thailand oyirikirwe David adere ntya: “Nanchibaza: ‘Chiro akaba amafoto marhali m’epornografi, ka byakasiimisa Yehova nkala nagenderera kumalola?’ Amawazo mali nk’amola mantabere njire ebintu by’obwengehe.” Okuyubaha echintu choshi-choshi chakarhuma Yehova agaya, kwarhurhabala rhukole oku bwengehe. Okuyubaha Mungu “g’omurhondero g’obwengehe.” w23.06 buk. 23 chi. 12-13

“Ebyumba byandani” byakashushanya n’ebibaga byerhu. Amango m’amalibuko makulu, Yehova arhulaganyize oku nji arhulanga nka rhugenderere kumukolera haguma na bene-berhu na bali-berhu omu buguma. Bobola, rhukwanene kukola bwenene zene yirhugwarha obuzigire bukomere ku bene-berhu na bali-berhu. Rhukajira ntyo nji rhwafuma amola malibuko! “Olusiku lukulu lwa Yehova” nji maba mango m’ebibazo bikomere bwenene oku bantu boshi. (Sef. 1:14, 15) Abantu ba Yehova nabo nji bahurana ebibazo. Aliko, rhukachirheganya zene, nji rhwagala kuyorha rhurhulerere n’okurhabala abandi. Nji rhwagala kulembera ebibazo byoshi-byoshi nji rhwakaba rhugwerhe. Amango bene-berhu na bali-berhu nji baba bali balibuzwa, nji rhwajira okwerhu koshi yirhubahereza oburhabale, omu kubayereka olukogo n’okubaha ebibakenere. Kandi nka rhuyigire kuzigira bene-berhu na bali-berhu zene, nji rhwabayereka obuzigire omu mango mayinjire. Naho Yehova nji arhugisha omu kurhuhereza akalamo k’esiku n’amango omu gulu amalibuko n’ebinjira byoshi nji byaba byayibagirwe.​—Isa. 65:17. w23.07 buk. 7 chi. 16-17

Echinwa cha Mungu chinazigana kuderha oku balume bemana, nka bantu bagwerhe emisi. Aliko chiro na balala baliri bachiyunva bagwerhe misi minene, barhaliri bachiyunva bagwerhe emisi amango moshi. Omufano, mu mango maguma, Omwami Daudi aliri achiyunva “akomeere nka musozi,” aliko omu mandi mango, aliri achiyunva azambire “n’okugwarha obuba.” (Zb. 30:7) Eroho lichesibwa lyalihere Samsoni emisi erhalukire ey’olugero lw’abantu. Alirhegerere oku buzira emisi erhengerere emwa Mungu, “akabulire emisi n’okuba kuguma n’abandi bantu boshi.” (Amu. 14:5, 6; 16:17) Yehova yiwaliri aha abola balume bemana eyola misi. Entumwa Paulo alimenyere oku naye alikenere emisi erhengerere emwa Yehova. (2 Ko. 12:9, 10) Aliri alwisa ebibazo by’amagala. (Gal. 4:13, 14) Mango maguma, byalimukomerere kujira ebintu binja. (Ro. 7:18, 19) Na mango maguma, aliri achiyunva agwerhe omulago n’okuchiyunva ayubahire eju y’eby’akamuhikire. (2 Ko. 1:8, 9) Aliko, amango Paulo aliri achiyunva azambire, aliri agwarha emisi. Nka gurhe? Yehova alihere Paulo emisi alikenere y’agenderera kulembera ebigeregezo. w23.10 buk. 12 chi. 1-2

Akaba hali amango rhunalwisa amawazo m’okuchiyunva oku ntacho rhumalire, rhwakayibuka oku Yehova yenyine yiwarhukulwire emwage. (Yoh. 6:44) Anabona engeso zerhu zinja, ezi rhwabo rhurhakabona, anab’amenyere omurhima gwerhu. (2 Ny. 6:30) Bobola, rhwakachizera Yehova amango amaderha oku rhuli bantu b’akachiro. (1 Yo. 3:19, 20) Embere rhuyige okuli, baguma murhwabo balijirire ebintu bibi bichiri byabalumisa omurhima. (1 Pe. 4:3) Abantu bakolere Yehova oku bwimana bakachigenderera kulwisa obuzamba. Gurhe si woyo? Hali amango onachiyunva oku Yehova arhakakubabalira? Akaba ntyo ku biri, byakakuheba omurhima okumenya okw’abandi bakozi ba Yehova bemana, baliri balwisa enkengero zili nk’ezola. Omufano, entumwa Paulo aliri achiyunva kubi amango aliri awaza oku kurhashinganana kwage. (Ro. 7:24) Kweri, Paulo alihungamire ebyaha byage anabatizwa. Chiro akaba ntyo, aderhere oku yiwaliri “mudorho oku zindi ntumwa” n’okw’aliri munyabyaha “w’oburhanzi.”​—1 Ko. 15:9; 1 Ti. 1:15. w24.03 buk. 27 chi. 5-6

Echintu ch’oburhanzi rhwakayiga kugerera omufano gw’Omwami Yehoashi g’okurhola esimikiro mbi ch’echila: Birhuhemere rhuchishoge abera bazigiire Yehova banalonzeze kumusimisa, n’abola bera barhurhabala kujira ebintu binja. Rhwakajira obwira n’abantu bashajire changwa abali misole kurhwabo. Oyibuke oku Yehoashi aliri mudorho kulusha mwira wage Yehoyada. Okubilolere okuntu onachishoga abera, ochibaze ntya: ‘Banantabala si kukomeza obwemere bwani mu Yehova? Banampeba si omurhima ndame kuguma n’oku amakanuni ma Mungu maderhere? Banaderha si eju ya Yehova n’enyigirizo zage z’okuli z’akachiro? Banayerekana oku bakengere amakanuni ma Mungu si? Banambwira si ebi nkwanene kuyunviriza, changwa banampa amahano amango imakenere?’ (Mez. 27:5, 6, 17) Okuderha okuli, nka bera bawe barhazigiire Yehova, eyibarhagwerhe kamaro. Aliko akaba bera bawe bazigiire Yehova, omenye oku bakurhabala amango moshi!​—Mez. 13:20. w23.09 buk. 9-10 chi. 6-7

Alfa ye herufi y’oburhanzi y’olufabe lwe Chigiriki na omega ye herufi y’obuzinda. Omu kuchiyirika “Alfa na Omega,” Yehova alonzeze kurhurhabala rhumenye oku, amango amarhondera chintu chilebe anachiyeneza. Amango Yehova amala kulema Adamu na Eva, ababwira omuhigo gwage gurhanzi oku bilolere abantu n’egulu. Aderha ntya: “Muburhe munabe banene, muyunjuze egulu munalirhegeke.” (Mwa. 1:28) Amango Yehova arhonderesa omuhigo gwage aliri nk’oli aderha “Alfa.” Akasanzi nji kayinja, amango oluburho lwa Adamu na Eva lunakenga lushinganyanya nji lwayunjula oku gulu n’okulihindamula libe paradizo. Mw’agola mango mayinjire Yehova nj’aba nka amaderha “Omega.” Amango Yehova amala kulema “embingu n’egulu na buli chintu chilimo,” aderha chintu chilebe y’ayerekana oku omuhigo gwage gukwanene kuyenera loshi loshi. Yehova aderha oku olusiku lwa mushanvu luli luchesibwa. Ko kuderha gurhe? Echola chiyerekene oku, omuhigo gwa Yehova oku bantu n’egulu nji gwayenera oku buzinda b’olusiku lwa mushanvu.​—Mwa. 2:1-3. w23.11 buk. 5 chi. 13-14

Olugenzi lukomere kurhenga e Babiloni kuja e Izraeli lwakamalire myezi ene ntya, aliko Yehova alibalaganyize oku ebibazo byakababuzize kugaluka byakakulirweho. Abayahudi bemana balimenyere oku, enyungu bakapatire omu kugaluka e Izraeli, zakalushire echintu choshi-choshi bakalekene nacho omu Bibiloni. Emigisho minja bwenene bakapatire yaliheberwemo okushuba kuhwanza kuharamya Yehova. Chiro akaba oku haliri mahekalu marhalukire 50 mabapagani, nta hekalu lya Yehova chiro n’eliguma lyaliri omu Babiloni. Nta mazabahu maliri eyola munda, Abaizraeli bakahanireko enterekero nk’oku Esheria ya Musa yalihemere, na nta badahwa baliriho bakanire ezola nterekero emwa Yehova. Kandi, mw’eyola vile mwaliri bantu banene bwenene, baliri baharamya bamungu b’obubeshi kulusha balala baliri bakenga Yehova changwa amakanuni mage. Bobola ebihumbi by’Abayahudi balizigiire Yehova baligwerhe enyorha y’okugaluka omu chihugo chabo n’eyomunda bakagalire kugalula emparamyo echere. w23.05 buk. 14-15 chi. 3-4

Kandi rhukenere oburhabale bw’eroho lichesibwa lya Mungu yirhugenderera kuchigendesa “nka bana b’omwangaza.” Bulagurhe? Bulala birhayorohere kuyorha rhuchere mu linola gulu libi. (1 Te. 4:3-5, 7, 8) Eroho lichesibwa lyakarhurhabala kulwisa amawazo m’abantu ba mu linola gulu, barhali babona ebintu nk’oku Yehova anabibona. Eroho lichesibwa lyakarhurhabala kandi kuyerekana “engeso zoshi zoshi z’obwinja n’okunali.” (Efe. 5:9) Njira nguma rhwakagwarha mwe roho lichesibwa, kuli kulihema omu sala. Yesu aliderhere oku Yehova “aha eroho lichesibwa balala bamuhemalyo.” (Lu. 11:13) Kandi rhunapata eroho lichesibwa amango rhuli rhwakuuza Yehova haguma n’abandi oku mbuganano z’Echikristu. (Efe. 5:19, 20) Eroho lichesibwa lya Mungu lyarhurhabala rhulame omu njira emusimisize. w24.03 buk. 23-24 chi. 13-15

Okenere kugwarha engeso y’okulindira bwenene. Akaba ntyo kubili. Osalire y’ogwarha eloya ngeso. Okulindira (kulembera) chili chigabi ch’etunda lye roho. (Gal. 5:22, 23) Bobola rhwakasalira yirhugwarha eroho lichesibwa, kandi rhwakasalira Yehova arhurhabale rhuyerekane ebyola bigabi by’etunda lye roho. Akaba yirhwahurana ehali eli yarhuma okulindira kwerhu kwageregezwa “rhwakagenderera kuhema” eroho lichesibwa lirhurhabale rhugenderere kulindira. (Lu. 11:13) Kandi rhwakahema Yehova arhurhabale yi rhubona ebintu nk’oku naye anabibona. Naho enyuma y’okusalira, birhuhemere rhujire okwerhu koshi yi rhulembera buli lusiku. Akaba rhuli rhwagenderera kusalira yirhulembera n’okugenderera kuchihangana kuyerekana okulembera, Yehova nj’arhurhabala yirhuba bantu bakagala kulembera bwenene chiro akaba oku rhurhaliri bantu banalindira bwenene omu mango magerere. Kwakurhabala kandi kukengera bwenene oku mifano eli omu Biblia. Ebiblia ederhere oku mifano minene y’abantu baliyerekene okulindira. Okukengera kw’eyola mifano, kwarhurhabala rhumenye mu njira zihe rhwakayerekanamo okulembera. w23.08 buk. 22 chi. 10-11

Yesu alirhabere entumwa Petro achizere oku Yehova amushishikala. Amango Yesu afuuka, ahereza Petro n’ezindi ntumwa orozo l’okushuba kuyirha efi kugerera echisomerene. (Yoh. 21:4-6) Buzira ngangane, echola chisomerene chali yemezeze Petro oku Yehova akamushishikere oku bintu by’omubiri akalagirire. Nkabaga agola mango, entumwa Petro aliyibukire ebinwa Yesu aderhaga oku Yehova ashishikala balala “bagenderere kurhanga kulonza Obwami.” (Mt. 6:33) Ebyola byoshi byalirhabere Petro ahebe akasi k’okuhubiri oku nafasi y’oburhanzi omu kalamo kage, si arhali akasi k’okurhega efi. Alikolere akasi k’okuhubiri oku bushiru oku Pentekose omu mwaka gwa 33 N.K.Y., n’echola chalirhabere ebihumbi by’abantu bayemere emyazi minja. (Mdo. 2:14, 37-41) Enyuma waho arhabala Abasamariya n’abantu b’amandi mashanja bayemere Kristu. (Mdo. 8:14-17; 10:44-48) Kweri, Yehova alikoleseze Petro omu bulyo busomeze omu kulerha abantu ba buli buuko omu chibaga chage. w23.09 buk. 20 chi. 1; buk. 23 chi. 11

Myaka ebiri ntya enyuma Abababiloni bamala kulimbula evile ye Yerusalemu. Mwami Nebukadneza we Babiloni aliyubahisizwe n’ebilorho alorhaga oku bilolere echishushanyo chizibu-zibu bwenene. Ahaana erhegeko oku abengehe bage baheberwemo na Danieli oku bamubwire ebilorho byage nabichi biderhere, akaba barhakagalire kujirantyo akabayirhire boshi. (Da. 2:3-5) Danieli alikwanene kujira juba-juba na nka arhajiraga ntyo bantu banene bakafire. Danieli “aja kubona mwami n’okumuhema amuhereze akasanzi y’amufasiriya ebilorho byage.” (Da. 2:16) Ebyola byalihemere obushiru n’obwemere. Ebiblia erhayerekene oku hali amandi mango Danieli achigerere kufasiriya ebilorho. Ahema bera bage “basalire Mungu w‘embigu abayereke olukogo oku bilolere eyola siri.” (Da. 2:18) Yehova ashubiza kw’agola masala. Kugerera oburhabale bwa Yehova, Danieli afasiriya ebilorho bya Nebukadneza. Danieli na bera bage barhachibayirhaga. w23.08 buk. 3 chi. 4

Waza oku nyungu abanalindira banagwarha. Amango rhugwerhe engeso y’okulindira, rhwakagwarha obusiime kandi eyi rhunarhulerere. Rhukagwarha engeso y’okulindira, rhwagwarha amagala menja n’obwenge bwerhu bwakola bwinja. Amango rhuli rhwalembera abandi, rhwasiimira obwira bukomere haguma nabo. Echibaga cherhu chagwarha obuguma bugenderere. Amango muntu mulebe amarhuhambarira, rhurhagwarha oburhe juba-juba, echola charhabala ebintu bimenye byabiha kulusha. (Zb. 37:8, amahugulo m’eshishi; Mez. 14:29) Aliko, ahanene rhwanaba eyirhuli rhwayiganya Darha w’embingu n’okushuba kumuyegera bwenene. Engeso y’okulindira eli nyinja bwenene bulala yakarhulerhera enyungu rhweshi! Chiro akaba oku buli mango birhaba biyorohere okuyerekana engeso y’okulindira, kugerera oburhabale bwa Yehova rhwakagenderera kukuza eyola ngeso. Kandi oku rhunali rhwalingiriza omu kulembera egulu lihya-hya, rhwakachizera oku “elisho lya Yehova linayinja lyalolereza balala banamuyubaha, balala bali balingiriza obuzigire bwage bwimana.” (Zb. 33:18) Rhweshi rhujage rhwahigirira kugenderera kugwarha engeso y’okulindira. w23.08 buk. 22 chi. 7; buk. 25 chi. 16-17

Yakobo ayerekene oku omulume oli nk’oyola akabonekene oku agwerhe obwemere, aliko ebijiro byage birhaliyerekene oku agwerhe obwemere. (Yak. 2:1-5, 9) Omu mufano gwa kabiri, Yakobo aganirire oku muntu wabonaga ‘mwene-wabo changwa mwali-wabo okeneere omwambaro changwa akalyo’ aliko nta burhabale amuhereze. Chiro oyola muntu akaderhere oku agwerhe obwemere, ebijiro byage biyerekene oku nta bwemere agwerhe. (Yak. 2:14-16) Yakobo ayerekene omufano gwa Rahabu nka muntu waliyerekene obwemere kugerera ebijiro. (Yak. 2:25, 26) Rahabu aliri ayunva baderha oku bilolere Yehova analirhegerere gurhe aliri arhabala Abaizraeli. (Yos. 2:9-11) Ebijiro byage byaliyerekene oku aligwerhe obwemere. Eju y’obola bwemere, alanga Baizraeli babiri baliri baperereza amango akalamo kabo kaliri omu buhanya. Ewazo liri ahala liri oku Rahabu na Abrahamu bombi baliyirikirwe banya-kunali, chiro akaba oku barhaliri bashinganyanya, barhanalikulikire Esheriya ya Musa. Omufano gwa Rahabu gwarhuyigirize oku bili by’akamaro bwenene okuyerekana oku rhugwerhe obwemere kugerera ebijiro byerhu. w23.12 buk. 5-6 chi. 12-13

Rhwewe nka Bakristu, rhurhalonzeze kumenya enyigirizo z’omusinji ze Biblia konyine. Kugerera oburhabale bwe roho lichesibwa lya Mungu, rhugwerhe enyorha y’okuyiga “chiro n’ebintu bikomeere by’omu Chinwa cha Mungu.” (1 Ko. 2:9, 10) Bulagurhe orhakahwanza kujira efunzo lyawe-lyawe lyarhuma wayegera Yehova? Omufano, wakahumba bwenene wanabona gurhe Mungu aliyerekene obuzigire bwage oku bakozi bage b’omu siku zagerere, na gurhe nawe ali akuyereka obola buzigire. Kandi, wakayiga okuntu Yehova alilonzeze Abaizraeli bamuharamye n’okuhuzanya echola n’okuntu nerhu alonzeze rhumuharamye zene. Changwa nkabaga, wakayiga oku bilolere obulebi buderhere oku ebi Yesu ayenezaga omu kalamo kage n’akasi kage kamahubiri hanola oku gulu. Wakapata busiime bunene oku bilolere okuyiga kw’eyola myazi amango wamapata oburhabale burhengere omu Index des Publications changwa Musaada Wakutafuta Habari (Oburhabale b’Okulonza Emyazi). Okuhumba bwenene omu funzo lyawe lye Biblia kwakomeza obwemere bwawe n’okukurhabala “opate obumenyi bwa Mungu.”​—Mez. 2:4, 5. w23.10 buk. 18-19 chi. 3-5

Echinwa entumwa Petro akolesaga “bunene” chitafsiribwe chinwa oku chinwa “kulambula.” Echigabi cha kabiri ch’ogola mustari, chiyerekene enyungu obola buzigire bunene bunalerha. Bunashukulira ebyaha bya bene-berhu na bali-berhu. Rhwakawaza omu njira eli nkeyila: Rhufarhe obuzigire bwerhu na fune ebiri, nka chiraka chakalambulwa, rhuchilambule rhunagenderere kuchilambula kugera aha chashukulira arhali chaha chiguma, changwa bibiri, s’aliko “byaha binene.” “Okushukulira” eli njira y’okuyerekana oku rhwababalire. Kuguma n’oku echiraka ch’akashukulira ezinga, obuzigire bwakashukulira obuzamba n’okurhashinganana kwa bene-berhu na bali-berhu. Obuzigire rhugwerhe oku bandi bukwanene kuba bukomere bwenene, yirhugala kubabalira oku rhashinganana kw’aberhu Bakristu k’okuderha chiro n’amango bikomere kujira ntyo. (Kol. 3:13) Amango rhwamagala kubabalira abandi, rhwanayerekana oku obuzigire bwerhu bukomere n’oku rhulonzeze kusimisa Yehova. w23.11 buk. 11-12 chi. 13-15

Mwami Yosiya amango agwarha myaka 26, ahwanza kukwiziza ehekalu. Amango baliri bakola akola kasi, babona “echitabu che sheriya ya Yehova ahanaga kugerera Musa.” Amango mwami ayunva eby’eyola Sheriya ederhere, aho han’aho ahindamula ebintu n’okukenga ebiyandikirwemo. (2 Ny. 34:14, 19-21) Wakasiima kusoma Ebiblia oku kahunda si? Nkabaga oliwachihangana kuyisoma buli lusiku. Oliwasiimira ebilimo si? Oliwabika si mandiko malebe makakurhabala woyo bwawe-bwawe? Amango Yosiya agwarha myaka 39 ntya, ajira amagosa marhumaga afa. Alichilangalire yewe yenyine ahali h’okuhema Yehova obwerekezi. (2 Ny. 35:20-25) Bichi omufano gwage gurhuyigirize? Chiro rhwakaba rhugwerhe myaka enga changwa rhwamayiga Ebiblia mu myaka engana gurhe, rhukwanene kugenderera kulonza Yehova. Ebyola biheberemo oku salira oku kahunda yirhupata obwerekezi bwage, okuyiga Echinwa chage, n’okuyunviriza amahano ma Bakristu bakulire ekiroho. Echola charhuma rhurhachiyinja rhwajira amagosa makoomere n’okurhurhabala rhugwarhe busiime bunene.​—Yak. 1:25. w23.09 buk. 12 chi. 15-16

Ebiblia eshambere ku bakazi banene benja balizigire Yehova banamukolera. Baliri bayerekana engeso nk’okugwarha “olugero omu ngeso zabo” n’okuba “banihirwa omu bintu byoshi.” (1 Ti. 3:11) Oku bwindi, bali-berhu bakabona abandi bali-berhu omu bibaga byabo bakayiganya omufano gwabo. Bali-berhu muchili misole wee, ka hali bali-berhu muyinji bagwerhe omufano gwinja mwakayiganya? Mulolereze engeso zabo zinja. Naho muje mwawaza gurhe mwakayerekana engeso zili nk’ezola. Omukristu okulire ekiroho akwanene kuyerekana engeso y’akamaro y’obwirhohye. Amango omukazi ali mwirhohye, anagwarha obwira bukomere haguma na Yehova na haguma n’abandi. Omufano, omukazi ozigiire Yehova, anashigikira oku bwirhohye akanuni k’obwimangizi Eshe w’embingu ahebereho. (1 Ko. 11:3) Akola kanuni kanakola omu kuntu echibaga n’omulala biba bipangirwe. w23.12 buk. 18-19 chi. 3-5

Yehova ahemere omulume azigire mukage n’okumuyenezeza eby’akenere, okuba mwira wage mwinja, n’okumurhabala agwarhe obwira bukomeere haguma na Yehova. Engeso n’obufundi rhwabaga n’oku kukuza obuhashe b’okuwaza, oku kenga abakazi, okuba munihirwa, by’akurhabala kuba mulume mwinja. Waba ey’ogwerhe byoshi okeneere y’oyeneza engabane zawe nka mulume oshabire na rhwe ly’omulala. Enyuma y’okushaba, nkabaga wakaba eshe w’abana. Bichi omufano gwa Yehova gw’akakuyigiriza y’oba muzere mwinja? (Efe. 6:4) Yehova abwira Omugala, Yesu, embere z’abantu oku amuzigiire anamuyemerere. (Mt. 3:17) Nka wamaba eshe w’abana, ochihangane kubwira abana bawe buli mango oku obazigiire. Buli mango ogende wababwira koko oku bintu binja bakolere. B’eshe w’abana banayiganya omufano gwa Yehova, banarhabala abana babo bakuze engeso z’Echikristu zarhuma baba balume changwa bakazi bakulire ekiroho. Wakachirheganya zene oku ngabane y’okuba muzere mwinja, omu kuyerekana obuzigire oku bantu b’omulala gwawe, omu chibaga, n’omukubashishikala. Kandi oyige kubabwira oku obazigiire n’oku bali bakachiro emwawe.​—Yoh. 15:9. w23.12 buk. 28-29 chi. 17-18

Chiro akaba rhuli bakozi ba Yehova bemana, rhuchili rhwahurana ebibazo bikomere n’amalwala kuguma n’abandi bantu boshi. Nkabaga kandi rhwakaba eyi rhulirhwalembera obupinzani, amalibuko malerherwe na balala bashombere abantu ba Mungu. Chiro akaba oku Yehova arharhulanga oku bibazo bili nk’ebyola, arhulaganyize okw’arhurhabala. (Isa. 41:10) Kugerera oburhabale bwage rhwakagenderera kulanga obusiime bwerhu, okurhola esimikiro zinja, n’okuyorha bemana emwage chiro akaba yirhwahurana ehali zikomere bwenene. Yehova alaganyize kw’arhuha ebye Biblia eyirikire “murhula gwa Mungu.” (Flp 4:6, 7) Ogola murhula kuli kuyunva omuntu arhulerere omu bwenge n’omu murhima, bulala agwerhe obwira bukomere haguma na Yehova. Ogola murhula “guchubukire byoshi omuntu akagala kuyunva;” guli gw’akamaro bwenene orhakalola. Hali amango wachigerere wasalira Yehova birhengere oku murhima na buzinda wachiyunva wamarhulera? Walichiyunvirhe ntyo bulala Yehova alikuhere “omurhula gwage. w24.01 buk. 20 chi. 2; buk. 21 chi. 4

Obuzigire ku Mungu bunashunika abantu bage bamusingize n’omurhima goshi. Mwami Daudi alimenyere ok’okusingiza ezino lya Yehova kuli kusingiza Yehova yewe yenyine. Amango rhwamayunva ezino lya Yehova, rhwanawaza ali muntu wanyabachi, rhwanawaza oku bilolere engeso zage zoshi zinja bwenene, n’oku bintu byoshi binja bwenene alemere. Daudi alilonzeze kukolera ezino ly’Eshe nka lichesibwa n’oku lisingiza. Alilonzeze kukolesa “byoshi bili omu mubiri gwage” k’okuderha omurhima gwage goshi. Intyo kon’oko, Abalawi nabo baliyerekene olwiganyo lwinja omu kusingiza Yehova. Baliyemerere okubwirhohye oku barhaherhe ebinwa bikwanene omu kusingiza Yehova okw’akwanene koshi. (Ne. 9:5) Buzira ngangane, ebinwa bili nk’ebyola by’obwirhohye binarhengere okumurhima binasimisa omurhima gwa Yehova. w24.02 buk. 9 chi. 6

Orhawazaga oku wagambirwe amango orhahikire omuhigo gwawe n’okubona nka birhakagalikene oku guhikira. (2 Ko. 8:12) Oleke echintu chilebe chakubuzize kuhikira omuhigo gwawe chikuyigirize bintu bilebe. Ogenderere kuyibuka omuhigo warhangire kuyeneza. Ebiblia ederhere oku “Mungu arhali arhali ndyalya mpu ayibirire akasi kenyu.” (Ebr. 6:10) K’okuderha oku nawe orhakwanene kuyibirira ebiwayeneze. Echola chakurhabala kukuza obwira bwawe haguma na Yehova, okubwira abandi oku bimulolere, nkabaga n’okubatizwa. Oku wanachihanganire kuhikira emihigo yawe y’ekiroho omu mango magerere, kuwanachihangana kujira amaja-mbere y’ohikira omuhigo gwawe gwa mu ganola mango. Kugerera oburhabale bwa Yehova, rhwakahikira omuhigo gwerhu. Orhegere kangana gurhe Yehova ali akurhabala, kandi akurhabala ogwarhe obusiime amango oli wakola y’ohikira emihigo yawe. (2 Ko. 4:7) Akaba orhaluhire, wapata eyindi migisho minene bwenene.​—Gal. 6:9. w23.05 buk. 31 chi. 16-18

Yehova analonza enjira z’okuyereka abantu bage kw’abazigire n’okw’asimisizwe nabo. Ebiblia eyerekene turu 2, aha Yehova y’abwira Yesu okw’ali Mugala muzigirwa anamuyemerere. (Mt. 3:17; 17:5) Nka wakasima oyunve Yehova y’akubwira okw’akuyemerere? Yehova arhaganira nerhu bunu oku bwindi, aliko rhunaganira naye kugerera Ebiblia. Amango rhwamasoma ebinwa by’obuzigire Yesu abwiraga abanafunzi bage, rhwanaba nka rhuli rhwayunva Yehova arhubwira ebyola binwa. Yesu aliyigire oborhere bw’Eshe oku bushinganyanya. Bobola, amango rhwamasoma okuntu Yesu aliyemerere abanafunzi bage bemana barhali bashinganyanya, rhwakachapa omu bwenge nka rhwabo rhu Yehova yarhubwira ebyola binwa. (Yoh. 15:9, 15) Amango rhuherhe ebibazo, echola chirhayerekene oku rhurhayemererwe na Mungu. Aliko, rhugwerhe orozo l’okuyereka Yehova kangana gurhe rhumuzigire, na kangana gurhe rhumulangalire.​—Yak. 1:12. w24.03 buk. 28 chi. 10-11