Ang Pagtamod sang Biblia

Easter—Para Bala Ini sa mga Cristiano?

ANO ang imo pagtamod sa East­er? Para sa seis anyos nga si Al­ex­an­dra gikan sa Can­a­da, nagakahulugan ini sing sinalusalo. ‘Ginaagda ka sang imo mga abyan agod magkaon sing cake,’ siling niya. ‘Ginasulatan mo ang East­er bun­ny kon bala gindalhan ka niya sing tsokolate nga mga itlog.’ Para sa iban, ang okasyon nagakahulugan sing pila ka ekstra nga mga adlaw sang pahuway gikan sa trabaho ukon eskwelahan, isa ka malawig nga talipuspusan sang semana. Apang para sa madamo, ang East­er amo ang labing importante nga relihiosong piesta sang tuig, nga nagasaulog sang pagkabanhaw ni Jesucristo pagligad sang tatlo ka adlaw nga ginpatay sia. Apang paano ginatamod sang Dios ang East­er? May kapin pa bala sa sini sang sa pagsaulog sang pagkabanhaw ni Cristo? Kon luyag naton nga mahamut-an sang Dios, dapat nga mahibaloan naton ini.

Indi maduhaduhaan nga ang pagkabanhaw ni Cristo importante gid kag amo ang sentro sang pagtuo sang mga Cristiano. Ginpadaku ina ni apostol Pablo sang magsulat sia: “Kon si Cristo wala mabanhaw, nian walay pulos ang amon pagwali, kag walay pulos ang inyo pagtuo. Dugang pa, kon wala mabanhaw si Cristo, ang inyo pagtuo walay pulos; yara pa kamo sa inyo mga sala.” (1 Corinto 15:14, 17) Gani agod mangin kalahamut-an ang aton pagsimba sa Dios, dapat kita magtuo sa pagkabanhaw ni Jesus.

Apang ang East­er indi lamang pagsaulog sang pagkabanhaw ni Cristo. Ginkuha sang mga tawo ang kahulugan sang Biblia para sa okasyon kag gindugang ang mga simbulo kag mga kinabatasan nga naghalin sa dumaan nga mga tawo nga nag-alagad sa dimatuod nga mga dios. Halimbawa, binagbinaga ang kilala nga emblema sang East­er sa iban nga mga pungsod—ang koneho. “Ginagamit anay sang dumaan nga mga pagano ang koneho subong simbulo sang bugana nga bag-ong kabuhi sang tigpamulak nga panahon. . . . Ang una nga rekord nga ang koneho gingamit nga simbulo sang East­er masapwan sa Alemanya sang mga 1572,” siling sang The Catholic Encyclopedia for School and Home. Subong man, ang paggamit sing hot ­cross bun, sing masili sing duag nga mga itlog, ukon sing tsokolate nga mga lingganay kon panahon sang East­er naghalin sa pagano nga relihion. Kag daw indi mapatihan nga ang ngalan gid nga East­er (ginagamit sa iban nga mga hambal) may kaangtanan sa isa ka pagano nga diosa. Ang The Westminster Dictionary of the Bibles nagasiling nga ang East­er “sang primero gid isa ka piesta kon tigpamulak bilang pagpadungog sa Teutoniko nga diosa sang kapawa kag tigpamulak nga nakilal-an sa An­glo-Sax­on subong Eastre. Sang ikawalo nga siglo ang ngalan ginsaylo sang mga An­glo-Sax­on sa Cristianong piesta nga gintuyo sa pagsaulog sang pagkabanhaw ni Cristo.”

Ining pagano nga ginhalinan lapnag nga ginakilala kag may malig-on nga pamatuod. Ang pamangkot amo, Importante bala ini? Sanglit ang East­er ginapangangkon nga nagapadungog kay Cristo, wala bala ginasapak sang Dios ang kamatuoran nga ang mga puni sini, kag bisan ang ngalan gid, may kaangtanan sa pagsimba sa iban nga mga dios?

Ang Pagtamod sang Dios sa Easter

Sa una nga duha ka sugo sang Napulo ka Sugo nga ginhatag paagi kay Moises, ang Dios nagsiling: “Ako si Jehova nga imo Dios . . . Dili ka maghupot sing iban nga mga dios sa atubangan ko . . . bangod ako si Jehova nga imo Dios isa ka Dios nga nagakinahanglan sing sirado nga debosyon.” (Deuteronomio 5:6-9) Bisan ang pagpahangop sing dimatuod nga pagsimba indi pagtugutan, subong makita sa liwat kag liwat sa mga pagpakig-angot sang Dios sa pungsod sang Israel.

Halimbawa, samtang si Moises didto sa Bukid Sinai nga sa diin nabaton niya yadtong mga sugo sa duha ka tapitapi nga bato, ginsamo sang mga Israelinhon ang mga simbulo sang Egiptohanon nga relihion sa ila pagsimba kay Jehova. Sa tapos matipon ang bulawan nga mga aritos gikan sa mga tawo, nahimo ang tinunaw nga estatwa sang tinday nga baka. Nian amo ini ang ginpahayag: “Amo ini ang imo Dios, O Israel, nga nagpaguwa sa imo gikan sa duta sang Egipto.” Ang rekord sang Biblia nagasugid sa aton: “Sang ulihi si Aaron [utod ni Moises] nagpabantala kag nagsiling: ‘Buwas may piesta para kay Jehova.’ Gani nagbangon sila sing aga pa sang masunod nga adlaw, kag naghalad sila sing mga halad nga sinunog kag nagdala sing mga halad sa paghidait. Kag naglingkod ang katawhan sa pagkaon kag sa pag-inum. Nian nagtindog sila sa paghampang.”—Exodo 32:1-6.

Subong amo man sa mga nagasaulog sang modernong adlaw nga piesta sang East­er, ang mga Israelinhon nagpangangkon nga nagasimba sila sa matuod nga Dios. Dumduma, gintawag yadto nga “piesta para kay Jehova.” Gintuyo nila nga iangot si Jehova sa larawan. Apang, naglipaylipay sila sa isa ka piesta nga nag-ilog sa isa ka diosa sang Egipto, ayhan si Apis, nga ginlaragway sang isa ka tinday nga baka. Nahamuot bala ang Dios? Wala gid. Diutayan lang niya ginlaglag ang pungsod bangod sini!—Exodo 32:7-10.

Sing kaanggid, ginapaabot sang Dios nga huptan sang mga Cristiano ang ila pagsimba nga putli kag wala sing dagta, wala sing kaangtanan sa mga kinabatasan, mga simbulo, ukon mga piesta nga may kaangtanan sa dimatuod nga mga dios. Sa pag-ilustrar: Halimbawa nahibaloan mo nga ang kutsilyo gingamit sa isa ka indi maayo nga katuyoan. Ano ang batyagon mo kon gamiton mo ina gihapon nga kutsilyo sa paggulot kag sa pagkaon sang imo kalan-on? Nakita na sang Dios ang indi kalahamut-an nga mga buhat sang paganong relihion nga ginhalinan sang East­er. Indi bala dapat nga mangin importante sa aton ang iya pagtamod?

Si apostol Pablo nagsulat: “Ano bala ang pag-updanay sang pagkamatarong kag kalautan? Ukon ano bala ang paghiambit sang kapawa sa kadudulman? Dugang pa, ano bala ang pag-ugyon ni Cristo kay Belial? Ukon ano bala ang kalabtanan sang matinuohon sa dimatinuohon? Kag ano bala ang pagsinanto sang templo sang Dios sa mga diosdios?” Ang sabat: Wala gid. Sia nagpadayon: “‘Busa guwa kamo sa tunga nila, kag magpain kamo gikan sa ila,’ siling ni Jehova, ‘kag dili kamo magtandog sang dimatinlo nga butang;’ ‘kag batunon ko kamo.’”—2 Corinto 6:14-17.

Kutob sa dumaan nga mga tion, ginpadaku sang Dios nga sia lamang ang simbahon sang iya katawhan, kag indi maghupot sing bisan anong kaangtanan sa mga butang sang dimatuod nga relihion. Ang matuod nga mga Cristiano nagapakita sing apresasyon sa pagkabanhaw ni Cristo, indi paagi sa pagsaulog sang piesta nga ginsaylo gikan sa pagano, kundi, sa baylo, nahisuno sa sugo ni Jesus, paagi sa pagsaulog sang iya kamatayon kag, kaangay ni Jesus, padayon nga nagatinguha sila nga pahamut-an ang Dios paagi sa pagsimba sa Iya sa espiritu kag kamatuoran.—Lucas 22:19; Juan 4:24.

[Kapsion sa pahina 17]

Sanglit ang Easter ginapangangkon nga nagapadungog kay Cristo, wala bala ginasapak sang Dios ang kamatuoran nga ang mga puni sini may kaangtanan sa pagsimba sa iban nga mga dios?

[Laragway sa pahina 16]

Ano ang kaangtanan sining mga butang kay Jesus?