Pagguba sa mga Pader Agod Magtukod sing mga Taytay
WALA naton ginpili ang pamilya ukon pungsod nga aton namat-an, kag indi kita ang namat-od kon ano ang kultura nga magadihon sang aton panghunahuna. Wala kita sing kontrol sa sining mga butang. Naapektuhan kita tanan sang tion kag kahimtangan. Apang sarang naton makontrol kon paano naton ginatamod kag ginapakig-angutan ang iban.
Ginalaragway sang Biblia kon paano naton mahimo ina. Binagbinaga ang pila ka prinsipio nga magabulig sa aton sa pagtukod sing mga taytay sang komunikasyon sa mga tawo nga mahimo may tuhay nga ginhalinan.
‘Ang Dios nga naghimo sang kalibutan kag sang tanan nga butang nga yara sa sini . . . naghimo gikan sa isa ka tawo sing tagsa ka pungsod sang mga tawo, sa pagpuyo sa bug-os nga nawong sang duta.’ (Binuhatan 17:24, 26) Mga katapo kita tanan sang isa ka tawhanon nga pamilya kag sa amo pareho kita sa madamo nga butang. Mas mahapos ang komunikasyon kon ang tan-awon amo ang mga butang nga palareho kita. Kita tanan nagapangita sing maayong mga abyan kag nagakinahanglan nga higugmaon kag tahuron. Ang tanan nagatinguha nga likawan ang kasakit sa pisikal kag emosyon. Ang mga tawo sang tanan nga kultura maluyagon sa musika kag taliambong, nagasugid sing mga lahog, nagapati nga dapat mangin matinahuron sa isa kag isa, kag nagapangita sing mga paagi agod magmalipayon.
‘Dili maghimo sing bisan ano bangod sang huyog nga makigbais ukon bangod sang pagkamaiyaiyahon, kundi sa mapainubuson nga panghunahuna kabiga ang iban nga labaw pa sa imo.’ (Filipos 2:3) Indi buot silingon nga dapat naton kabigon ang iban nga labaw sa aton sa tanan nga butang. Sa baylo, dapat naton marealisar nga sa pila ka bahin sang kabuhi, ang iban labaw sa aton. Indi gid naton paghunahunaon nga kita lamang ukon ang aton kultura ang maayo sa tanan nga butang.
“Gani, sa pagkamatuod, kon may maayo kita nga kahigayunan sa sini, magbuhat kita sing maayo sa tanan.” (Galacia 6:10) Ang pag-una lamang sa pagpakita sing pagkamainabyanon kag pagkamabuligon sa iban, walay sapayan sang kultura nga ginhalinan nila, makahimo sing daku agod mataytayan ang kal-ang sang komunikasyon.
“Hibalua ini, hinigugma ko nga kauturan. Ang tagsa ka tawo dapat magmadagmit sa pagpamati, magmahinay sa paghambal, magmakuli sa pagpangakig.” (Santiago 1:19) Ang maayong mga komunikador indi lamang dapat maghambal; dapat sila mangin mahinuklugon nga manugpalamati.
“Ang laygay sa tagipusuon sang tawo kaangay sang tubig nga madalom, apang ang tawo nga mahinangpunon nagasag-ub sini.” (Hulubaton 20:5) Mangin alisto sa paghantop sang mga balatyagon kag mga hulusayon sa likod sang ginapakita nga paggawi sang isa ka tawo. Kilalaha ang mga tawo sing maayo pa.
“Tan-awa, indi ang personal nga interes sang imo lamang kaugalingon nga mga butang, kundi ang personal nga interes man sang iban.” (Filipos 2:4) Mangin mahinuklugon paagi sa pagtamod sa mga hulusayon pasad sa pagtamod sang iban nga tawo. Mangin dimakagod.
Nanuhaytuhay nga Kultura sa Tunga sang mga Saksi ni Jehova
Ang talalupangdon nga paghiusa sang mga Saksi ni Jehova, nga aktibo sa 232 ka kadutaan sang duta nagapakita nga ining mga prinsipio epektibo gid. Mga tawo sila nga naghalin sa “tanan nga pungsod kag tribo kag katawhan kag hambal” kag determinado sa pagsunod sa mahigugmaon nga pagtuytoy ni Jehova sa tanan nga butang.—Bugna 7:9; 1 Corinto 10:31-33.
Wala ginatamay sang indibiduwal nga mga Saksi ang kultura sang iban. Ukon ginasikway sang mga tawo nga nangin mga Saksi ang kultura nga ila gindakuan, luwas kon nagasumpakil ini sa mga prinsipio sang Biblia. Sa sini nga mga kaso nagahimo sila sing mga pagbag-o sa ila kabuhi. Ginakilala nila nga sa tagsa ka kultura may yara dalayawon nga mga bahin kag ginapatahom pa gani ini sang mga tawo nga nagabaton sa matuod nga pagsimba.
Ginatinguhaan nila nga tamdon ang aton planeta suno sa pagtamod sang Dios—masanag kag asul kag matahom—nga nagalibot sa kahawaan. Isa ini ka planeta nga may matahom kag nanuhaytuhay nga katawhan kag mga kultura. Ginapaabot sang mga Saksi ni Jehova ang tion nga ang tanan sa duta magakabuhi subong isa ka nahiusa gid nga pamilya.
[Laragway sa pahina 8]
Natun-an sang mga Saksi ni Jehova kon paano lumpagon ang mga balagbag sang kultura