Kahulugan sang Balita
Impluensia ni Satanas
Sa tapos makapanalawsaw nahanungod sa impluensia sang Satanismo sa rock kag heavy metal rock music, si Tom Harpur nga kolumnista sang pamantalaan sa Toronto nagsulat sa The Sunday Star: “Dapat ko ihatag ang pinakamatigdas nga paandam nahanungod sa kon ano ang nagakatabo. . . . Wala pa gid ako sing nakita nga tuman kalain. Nagapangibabaw sa mga kanta ang kabuangan, pagkontrol, mga demonyo, dugo, mga sumpa, tanan nga sahi sang kasingki, lakip ang panglugos, pag-utod-utod sang lawas, pagpatay, kag paghikog. Ang kamatayon kag kalaglagan, mga tagna sang kamatayon, ang pagsikway sa tanan nga maayo kag ang pagbaton sa tanan nga makangilil-ad kag malaut—amo sini ang mga tema.”
Nagadungan sa pagdugang sang sataniko nga musika ang pagdugang sang aktibidad sang satanikong kulto sa Estados Unidos kag Canada. Nagareport nahanungod sa ulihi nga seminar sang mga polis sa Ontario, ang The Globe and Mail, isa ka pamantalaan sa Canada, nagasiling nga ang satanikong mga kulto “nagahimo sing mga paghalad sa sapat, dipagtahod sa mga lulubngan kag ritwal nga pag-abuso sa kabataan.” Gin-angot sang lampitaw nga si James Bradley sang Washington, D.C., ang ginatos ka kaso sang pag-abuso sa bata sa ritwalistiko nga mga krimen sang Satanismo. Subong sang ginbalikwat sang The Globe and Mail, ang lampitaw nga si Bradley nagadugang nga sa sulod sang nagligad nga lima ka tuig, ang mga report nahanungod sa ritwal nga pag-abuso sa bata naghalin sa “ginatos ka bata, ginatos ka social worker kag mga manunudlo.”
Nahanungod sa “katapusan nga mga adlaw” sang karon malauton nga sistema sang mga butang, si apostol Juan nagsulat: “Ang Yawa nagpanaug sa inyo sa dakung kasingkal, bangod nakahibalo sia nga may malip-ot lamang sia nga tion.” (2 Timoteo 3:1; Bugna 12:12) Ang impluensia ni Satanas, “ang gumalahom sang awtoridad sang hangin,” lapnag bisan sa bantog nga musika sining kalibutan. (Efeso 2:2) Amo sina kon ngaa ginlaygayan ni apostol Pablo ang mga masigka Cristiano nga ‘pamatukan ang mga daya sang Yawa.’—Efeso 6:11.
“Indi Makontrol”
Sang ang 28-anyos nga babayi nga naga-jogging ginsakit kag ginlugos sa Central Park sa New York City, minilyon ka tawo ang nakibang kag nadismaya. Ang rason? Ang mapintas kag sinapat nga pagsalakay ginhimo sang isa ka guban sang mga tin-edyer nga ang ila “malaw-ay nga kahamuot kag ang ila dipagsapak sa pag-antos nga nahimo makangilidlis gid,” balita sang New York Post. Ang iban sa mga pamatan-on nga responsable sa makangilil-ad nga krimen ginreport nga subong kabata sa 14 anyos. Nangidlis sa pagsalakay, ang isa ka manunulat sang Post nagbaton nga ang kalibutan nangin “wala nadisiplina, mapatuyangon sa kaugalingon, paladruga, mahunahunaon sa sekso, naguba ang pamilya, nabuang sa kasingki nga katilingban” nga “indi makontrol kag ang pamangkot amo: ngaa?”
Sa pagkamatuod, ining kaliwatan sang dimatupungan nga kasingki amo gid ang gintagna ni apostol Pablo sa 2 Timoteo 3:1-5. Ginpaathag niya diri nga ang “katapusan nga mga adlaw” pagatandaan sang mga tawo nga “makagod, mahamkunon, matinaastaason, kag bugalon.” Dugang pa, “mangin palainsulto sila, dimatinumanon sa mga ginikanan, dimapasalamaton, kag direlihioso; mangin dimalulo sila, walay kaluoy, mapasipalahon, masingki, kag mapintas; magadumot sila sa maayo; mangin maluibon sila, mapatumbayaon, kag naghabok sa bugal; higugmaon nila ang kalipayan sa baylo sang Dios.” (Today’s English Version) Ining masingki nga kalibutan magapabilin bala nga “indi makontrol” sing dayon? Indi! Si Jesus nagsiling: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit.”—Lucas 21:28.