Mainit Bala ang Impierno?

“SA PILA ka punto sang katuigan mil nuebe sientos sisenta, ang Impierno nadula.” Amo ang ginsiling sang Britaniko nga awtor nga si David ­Lodge sa iya libro nga Souls and Bodies, kag ang iya mga pulong nagapabanaag sang panghunahuna sang madamo nga mga Katoliko kag mga Protestante sa sulod sang mga dekada sa tapos sang ikaduha nga inaway kalibutanon. Sa sulod sang isa ka tion, madamo sang dalagku nga mga iglesia ang nagpahaganhagan sang ila opisyal nga doktrina tuhoy sa kalayuhon nga impierno sa pagpanikasog nila nga ipasibu ini sa modernong panghunahuna.

Ang ideya nga may silot sa tapos sang kamatayon labi na nga indi mabaton sang mga tawo bangod ang ideya tuhoy sa sala mismo indi gani maathag sa ila hunahuna. Sang gin-interbyu sang 1984, si Kardinal Ratzinger sang Roma nagsiling: “Ang aton sibilisasyon . . . nagasentro sa nagapahaganhagan nga mga kahimtangan kag mga balibad sa pagtinguha nga dulaon ang pagbatyag sang katawhan sing sayop, sing sala . . . , ina gid nga katunayan nga sa amo gin-angot ang impierno kag Purgatoryo.”

Posible bala karon nga patihan ang katunayan sang sala nga wala ginabaton ang doktrina nga sa tapos sang kamatayon may silot sa purgatoryo kag impierno? Ang isa ka bag-o nga libro, Abrégé de la foi catholique (Sumaryo sang Katoliko nga Pagtuluohan), nga ang introduksion sini ginhimo sang Pranses nga si Kardinal Decourtray, prangka nga nagapamangkot: “Kinahanglanon bala nga magpati sa impierno?” Ang sabat: “Indi posible nga likawan ang makahaladlok nga pamangkot tuhoy sa impierno.” Ang libro nga Vatican Council II​—⁠More Postconciliar Documents (1982) nagabalikwat sang “Pagtuo sang Katawhan sang Dios” subong nagasiling: “Nagapati kami . . . [nga] ang mga nagpauyon sa gugma kag kaluoy sang Dios magakadto sa dayon nga kabuhi. Ang mga nagdumili tubtob sa katapusan pagadalhon sa kalayo nga wala gid nagakapalong.”

Gani, walay sapayan sang tanan nga teolohiko nga panikasog sa pagpamatuod sang kabaliskaran, ang kalayuhon nga impierno isa gihapon ka daku nga bahin sang opisyal nga doktrina sang mga Katoliko. Apang ang A New Dictionary of Christian Theology (1983) nagahambal tuhoy sa “kahuya” kag “kahilas” sang madamo nga katapo sang mga iglesia sang Cristiandad karon bangod sa doktrina sang dayon nga pag-antos. Nabudlayan sila sa pagpahisanto sining doktrina sa ideya nga ang Dios gugma. Nagapalibog sila: ‘Isa gid bala ka Cristiano kag Biblikanhon nga doktrina ang mainit nga impierno? Kon indi, sa diin ini maghalin?’

[Piktyur sa pahina 3]

Bourges Cathedral, Pransya