San-o Madula ang Kahadlok?

MAKIBOT ka bala sa paghibalo nga ang matuod nga kalig-unan nagahilabot sa tawo nga nagkabuhi sang nagligad nga 2,000 ka tuig? Nagapakita sang pagkakinahanglanon sang gugma, si Jesucristo nagsugid sing talalupangdon nga parabola: “Isa ka tawo ang nanaug gikan sa Jerusalem pakadto sa Jerico kag nahulog sa tunga sang mga makawat, nga naghublas kag nagbakol sa iya, kag nagtaliwan, nagbiya sa iya nga daw patay.” Bisan pa nga wala pagsapaka sang duha ka manlalakbay ang biktima, ang mainawaon nga Samariahanon nagpakita sing kaluoy. Apang, sin-o ang nagakabalaka sa mga biktima sang krimen karon? Anong kaumpawan gikan sa kahadlok ang sarang naton mapaabot?​—⁠Lucas 10:​30-37.

Samtang nagapangangkon nga nagapati sa Dios, madamo ang nagahunahuna nga ang kasuguan kag kahim-ong dapat ipatuman sang tawo. Apang madula bala sang mas mabug-at nga silot sang pagkabilanggo ukon sang mas madamo kag mas daku sing suweldo nga pulis ang masingki nga krimen? Nagapati gid bala ikaw nga madula sang nagapatuman sing kasuguan nga mga ahensia, walay sapayan sang sinsero nga mga panikasog sa pag-aman sing maarang-arang nga kalig-unan, ang mga problema subong sang abuso sa droga, organisado nga krimen, kag kaimulon? Apang, ang aton pagkagutom kag pagkauhaw sa pagkamatarong indi dapat mangin wala sing pulos.​—⁠Mateo 5:⁠6.

Ang Salmo 46:1 nagasiling: “Ang Dios aton dalangpan kag kusog, handa gid nga kabulig sa kalisod.” Makita naton nga ining mga pulong indi lamang matahom nga binalaybay.

Subong sang nahibaluan mo, ang news media nagareport adlaw-adlaw sang wala kaluoy nga pagpamatay sa mga inaway sibil kag mga atake sang mga terorista. Sa iban nga mga bahin sang kalibutan, nangin kinaandan na ang pagpatay sa wala maluyagi nga mga pamatan-on ukon sa mga nakasaksi sa krimen. Ngaa nangin tuman ka barato ang kabuhi? Bisan pa nga ayhan may nanarisari nga mga kabangdanan ina nga kasingki, may isa ka rason nga indi naton dapat pasapayanan.

Suno sa Pulong sang Dios, ang Biblia, “ang bug-os nga kalibutan yara sa gahom sang malauton.” (1 Juan 5:19) Sa katunayan, ginpakilala ni Jesucristo si Satanas nga Yawa indi lamang subong isa ka butigon kundi subong “isa ka manugpatay sing tawo.” (Juan 8:44) Nagaimpluwensia sa katawhan sa nanuhaytuhay nga mga paagi, ginapasanyog sining gamhanan nga espirituhanon nga tinuga ang pagdugang sang kasingki sa karon. “Kailo sa duta kag sa dagat, kay ang Yawa nagpanaug sa inyo, nga may dakung kasingkal, nakahibalo nga may malip-ot lamang sia nga tion,” siling sang Bugna 12:12. Apang, sing makalilipay, ining malauton nga sistema pagabuslan sang “bag-ong mga langit kag bag-ong duta . . . , kag sa sini magapuyo ang pagkamatarong.”​—⁠2 Pedro 3:⁠13.

Dugang sa sining makatilingala nga paglaum sang bag-ong kalibutan, ano ang aton bulig sa karon?

Sa wala pa makita ang positibo nga sabat sa sina, maayo nga dumdumon nga bisan ang matuod nga mga Cristiano wala sing garantiya nga pagaamligan sila gikan sa krimen. Ginlaragway ni apostol Pablo ang pila ka katalagman nga personal niya nga gin-atubang. Naagihan niya sadto ang ‘katalagman sa mga suba, katalagman sa mga makawat, katalagman sa iya mga kasimanwa, katalagman sa mga pungsod, katalagman sa siudad, katalagman sa kamingawan, katalagman sa dagat.’ (2 Corinto 11:26) Apang nalampuwasan ni Pablo ining mga katalagman. Amo man sa karon; paagi sa pagkamainandamon, mahimo gihapon naton ang aton mga hilikuton sing normal. Binagbinagon naton ang pila ka butang nga makabulig.

Kon ang isa nagapuyo sa isa ka makatalagam nga palibot, ang maayo nga paggawi mahimo mangin pangamlig, kay ginapanilagan sing maayo sang mga tawo ang iban. Bisan nga ang mga makawat nagaplano kag nagahimo sing mga krimen, madamo ang nagakabig sang ila kaugalingon subong normal nga mga tawo. Likawi ang pagmulay kon ano ang ila ginahimo, kag indi pagtinguhai nga hibaluon kon sa ano sila nadalahig. Sa amo, mabuhinan mo ang posibilidad nga mangin puntariya ka sang pagtimalus. Dumduma nga ang mga makawat nagatinguha sa paghibalo kon sin-o ang may bag-o nga butang nga ginbakal ukon kon sin-o ang magabakasyon kag busa wala sa ila mga puluy-an, gani mangin mainandamon sa kon ano ang imo ginasugid sa iban.

Nasapwan sang madamong Saksi ni Jehova nga ang ila reputasyon subong mga ministro naghatag sa ila sing talalupangdon nga pangamlig. Masunson nga ginpakita sang mga kriminal nga ginarespeto nila ina nga mga Cristiano, nga walay pili nga nagabulig sa mga tawo sa komunidad. Ang mga Saksi indi mga manugpatay-tawo ukon mga makawat, ukon ‘mga mahilabtanon [sila] sa mga butang sang iban,’ hanti indi makatalagam.​—⁠1 Pedro 4:⁠15.

Kalig-unan sa Bag-ong Kalibutan sang Dios

Nahanusbo kita sa “pagdugang sang pagkamalinapason” nga gintagna ni Jesucristo, apang sa baylo nga mabalaka sing tuman, makasalig kita nga sa indi na lang madugay pagadulaon sang Dios ining malauton nga sistema. Luwas sang pagtagna sa bug-os kalibutan nga pagpanaksi ‘sining maayong balita sang ginharian,’ ginpahanumdom ni Jesus ang iya mga sumulunod: “Sia nga nakabatas tubtob sa katapusan amo ang maluwas.”​—⁠Mateo 24:​12-14.

Makapat-od kita nga yadtong nagapangbiktima sang iban, kon kaisa paagi sa dimapatihan nga kapintas, pagadulaon. Ang Hulubaton 22:​22, 23 nagasiling: “Dili pagkawati ang imol bangod nga imol sia, kag dili pagpigusa ang napiutan sa gawang. Kay si Jehova magaapin sang kasuayon nila, kag magalaglag sang kabuhi sang mga nagalaglag sa ila.” Dulaon ni Jehova ang mga malauton, subong sang mga makawat, mga manugpatay, kag mga nagahimo sing dinagakaigo nga mga buhat sa sekso. Dugang pa, indi niya pagapabay-an ang mga biktima sina nga mga krimen. Landason niya ang ila mga kadulaan kag ipasag-uli sing bug-os ang ila kapagros.

Sa pagkamatuod, yadtong ‘nagpalayo sa malaut kag naghimo sing maayo’ magatigayon sing kabuhi nga walay katapusan paagi sa pagkalampuwas sa nagapakari nga dakung kapipit-an ukon paagi sa pagkabanhaw gikan sa minatay. “Ang mga matarong magapanubli sang duta, kag magapuyo sa sini sing dayon.” (Salmo 37:​27-29) Ina nga mga benepisyo matigayon bangod sang halad nga gawad ni Jesus. (Juan 3:16) Apang ano ang mangin kaangay sang pagkabuhi sa napasag-uli nga Paraiso?

Ang pagkabuhi sa idalom sang Ginharian sang Dios mangin makalilipay gid. Si Jehova nagatagna: “Ang akon katawhan magapabilin sa puluy-an nga mahidaiton kag sa mga puluy-an nga malig-on kag sa mga palahuwayan nga malinong.” (Isaias 32:18) Ang tanan nga nagaagom sing kabuhi nga walay katapusan nagbag-o na sang ila personalidad. Wala sing isa ang mangin malaut ukon dimakatarunganon, ukon ang bisan sin-o mangin mahimo nga biktima sina nga tawo. Si manalagna Miqueas nagsiling: “Magalingkod sila, ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila.” (Miqueas 4:4; Ezequiel 34:28) Kabaliskaran gid sa makatalagam nga mga palibot karon!

[Kahon sa pahina 6]

MANGIN MAINANDAMON

Madamong kriminal ang nagapanghikot sing bug-os tion, nagahimo sang krimen nga isa ka propesyon. Mahimo sila nagapanghikot sa mga grupo nga tagduhaduha ukon tagtatlotatlo, bisan pa nga isa lamang ang nagataya sing pusil sa imo. Maathag gid nga kon mas bataon ang kriminal, mas makatalagam sia. Ano ang himuon mo kon mangin biktima ka?

Magpabilin nga matawhay agod indi makulbaan ang makawat​—⁠ang iya pagkadieks­periensiado mahimo makapatay. Kon isa ikaw sang mga Saksi ni Jehova, ipakilala ang imo kaugalingon. Apang, mangin handa nga ihatag kon ano ang luyag sang makawat. Kon magpaawat-awat ka, mas daku ang katalagman. Sa ulihi, mahimo ka magabatyag nga hilway sa pagpangabay nga ibalik ang nagapakilala nga mga papeles ukon plete sa bus.

Sa masami indi mo mahibaluan kon sin-o ang kriminal. Ang iban nga mga makawat mga nagiyan sa droga ukon mga propesyonal, ang iban luyag lamang makakuwarta agod may makaon. Sa bisan ano nga hitabo, indi magdala sing daku nga kantidad. Likawi ang pagsuksok sing alahas, bulawan nga mga singsing, ukon malahalon nga mga relo. Maglakat kag maglakbay sing normal, nga wala nagapakita sing kahadlok. Indi paghimutari ang mga indibiduwal subong bala nga ginapangilala mo sila. Kon may tiniruhay gid man sa kalye, maghapa; ang mga panapton sarang malabhan pagkatapos.​—⁠Isa anay ka pulis sa Rio de Janeiro.

[Retrato sa pahina 5]

Magpabilin nga matawhay kag ihatag kon ano ang luyag sang makawat. Kon magpaawat-awat ka, mas daku ang katalagman