Pagpakilala sing Epektibo sang Mabuhi sing Dayon nga Libro
1 Si Jesus lantip sa iya paggamit sing mga introduksion. Sang isa ka okasyon ginsugdan niya ang pagpakigsugilanon sa isa ka Samariahanon nga babayi paagi lamang sa pagpangabay sing tubig nga mainom. Gilayon ini nga nagganyat sang iya igtalupangod bangod ‘ang mga Judiyo wala nagapakig-angot sa mga Samariahanon.’ (Juan 4:7-9) Sarang kita makatuon gikan sa iya halimbawa.
2 Kon nagahanda sa pagtanyag sing Mabuhi sing Dayon nga libro, pamangkuta ang imo kaugalingon, ‘Ano bala ang magaganyat sa isa ka tin-edyer, sa isa ka tigulang, sa isa ka bana, ukon sa isa ka asawa?’ Mahimo ka makahanda sing kapin sa isa ka introduksion kag magamit ang isa nga daw labing nagakaigo para sa sitwasyon.
3 Sanglit ang pag-usmod sang pagkabuhi sang pamilya ginakabalak-an sang madamo, ayhan makasiling ka:
◼ “Ang adlaw-adlaw nga mga pag-ipit sa kabuhi nagahatag sing daku nga kahuol s a mga pamilya karon. Sa diin sila makakita sing bulig? [Pasabta sia.] Ang Biblia daku gid nga bulig sa aton. [Basaha ang 2 Timoteo 3:16, 17.] Talupangda ang parapo 3 sa pahina 238 sining publikasyon, Mahimu Ka Mabuhi Sing Dayon sa Paraiso sa Duta.” Basaha ang parapo 3, kag itanyag ang libro.
4 Kon ginagamit mo ang lokal nga balita, ayhan makasiling ka:
◼ “Nabatian mo bala ang balita nahanungod sa [sambita ang balita nga ginakabalak-an sa inyo lugar]? Ano ang imo panghunahuna sa sina? [Pasabta sia.] Ayhan nagapalibog ini sa imo kon diin nagapadulong ining kalibutan, indi bala? Ginatagna ina sang Biblia subong pamatuod nga nagakabuhi kita sa katapusan nga mga adlaw.” Nian binagbinaga ang impormasyon sa Mabuhi sing Dayon nga libro, pahina 150-3.
5 Madamo ang nabalaka nahanungod sa nagadugang nga problema sa krimen. Mahimo nimo gamiton ang nahauna nga introduksion sa ubos sang tig-ulo nga “Crime/Safety” sa pahina 10 sang “Reasoning” nga libro:
◼ “Nagapakigsugilanon kami sa mga tawo nahanungod sa personal nga pagkawalay peligro. May madamong krimen sa palibot naton, kag nagaapektar ini sang aton kabuhi. Ano sa banta mo ang kinahanglan nga himuon agod ang mga tawo magabatyag nga walay peligro sa mga dalan kon gab-i?” Basaha ang Salmo 37:10, 11 kag hambali ang mga pagpakamaayo sang Ginharian sang Dios, nagagamit sang mga pahina 156-8 sang Mabuhi sing Dayon nga libro.
6 Kon luyag mo ang mas simple nga pagpalapit, mahimo nimo magamit ang introduksion nga kaanggid sang makita sa pahina 11 sang “Reasoning” nga libro, sa ubos sang tig-ulo nga “Future/Security”:
◼ “Ginapalig-on namon ang amon mga isigkatawo nga binagbinagon ang matahom nga palaabuton nga ginahatag sang Biblia sa aton. [Basaha ang Bugna 21:3, 4.] Maayo bala ini pamatian para sa imo? [Pasabta sia.] Ang kapitulo 19 sini nga libro nagapatalupangod sang mga pagpakamaayo nga maagom sang katawhan sa idalom sang Ginharian sang Dios.” Itanyag ang libro.
7 Ang paghanda sing epektibo nga introduksion mahimo magabulig sa imo nga malab-ot yadtong ginauhaw sa kamatuoran kag pagkamatarong.—Mat. 5:6.