Mga Ginikanan—Hanasa ang Inyo Kabataan sa Pagbantala
1 Ang aton mga kongregasyon ginabulahan bangod madamo nga kabataan ang hanuot nga nagahandum sa pag-alagad sa Dios. (Manugw. 12:1) Nalakip sila sa mga gin-agda ni Jehova nga makigbahin sa pagdayaw sa iya. (Sal. 148:12-14) Gani, ang adlaw-adlaw nga paghanas sang mga ginikanan sa ila kabataan dapat magalakip sing instruksion sa kon paano ipaambit ang ila pagtuo sa iban sa pagbantala sang Ginharian nga hilikuton.—Deut. 6:6, 7.
2 Hanasa ang Kabataan sa Progresibo nga mga Tikang: Ang kabataan takus hanason sa tuman pa kabata nga edad sa pag-upod sa ila mga ginikanan sa ministeryo. Antes magguwa sa pag-alagad, ihanda ang inyo kabataan sa pagpakigbahin sa mapuslanon nga paagi. Hibalua nga daan kon ano ang ginapaabot mo nga himuon nila sa ganhaan. Ang mga bata pa mahimo makadaho sing mga tract kag mga handbill kag makaagda sa mga tawo sa Kingdom Hall. Ang kabataan nga maayo na magbasa mahimo pabasahon sing mga kasulatan sa ganhaan. Mahimo sila makatanyag sing mga magasin, nga nagagamit sing malip-ot nga presentasyon. Samtang nagakuha sila sing eksperiensia, hanasa sila sa paggamit sing Biblia sa ila presentasyon. Madamong lamharon nga manugbantala ang nakasugod sing kaugalingon nila nga ruta sang magasin kag nakahimo sing regular nga mga pagduaw liwat. Labing maayo nga ang bata magapangabudlay kaupod sang isa ka hamtong sa baylo nga kaupod sang isa pa ka bata. Mahimo mapaathag sang hamtong sa tagbalay nga ang kabataan ginahanas sa ministeryo.
3 Isa ka bata nga babayi ang nangayo sing bulig gikan sa mga gulang agod makalipikar sia subong isa ka manugbantala sang Ginharian. Bisan singko anyos pa lamang sia sadto kag indi pa makahibalo magbasa, nasarangan niya nga ipresentar sing epektibo ang mensahe sang Ginharian sa mga ganhaan. Ginatandaan niya kon diin makita ang mga kasulatan, ginabuksan ini, ginapabasa ini sa tagbalay, kag nian ginapaathag niya.
4 Ang kabataan dapat man tudluan paagi sa halimbawa sang mga ginikanan sang balor sang maayong iskedyul sa pagpakigbahin sing regular sa ministeryo. Ang mga ginikanan dapat maghimo sing regular nga rutina sa pag-alagad kada semana kag sundon ini, agod mahibaluan sang kabataan kon san-o ang gintalana nga tion para sa hilikuton sa pagbantala kada semana.
5 Kon ang kabataan ginahanas kutob sa pagkabata nga higugmaon kag magustuhan ang ministeryo, mapahulag sila sa paglab-ot sing daku pa nga mga pribilehiyo sa ulihi, ayhan lakip na ang pag-alagad subong payunir. (1 Cor. 15:58) Dapat naton tanan palig-unon ang kabataan sa tunga naton sa paghimo sing maayo nga pag-uswag subong mga dumalayaw ni Jehova.