Ano ang Ginasiling sang Biblia Parte sa Easter?
Ang sabat sang Biblia
Ang pagselebrar sang Easter wala nabase sa Biblia. Kon balikan mo ang kasaysayan sini, makita mo ang matuod nga kahulugan sang Easter—tradisyon ini nga ginbase sa ritwal sang pertilidad sadto. Binagbinaga ang masunod.
Ngalan: Ang Encyclopædia Britannica nagsiling: “Wala mahibaluan kon diin naghalin ang Ingles nga tinaga nga Easter; ginkuha ini sang Anglo-Saxon nga pari nga si Venerable Bede sang ikawalo nga siglo sa Anglo-Saxon nga diosa sang tigpamulak nga si Eostre.” Ang iban nagapati nga gin-ilog ini sa diosa sang pertilidad sang mga Phoenician nga si Astarte, nga pareho man sa diosa sang mga taga-Babilonia nga si Istar.
Kuneho: Simbulo ini sang pertilidad “nga naghalin pa sa mga seremonya kag simbulo nga ginagamit sadto sa pagano nga kapiestahan sang mga taga-Europa kag Middle East kon tigpamulak.”—Encyclopædia Britannica.
Itlog: Suno sa Funk & Wagnalls Standard Dictionary of Folklore, Mythology and Legend, ang pagpangita sang mga itlog kon Easter, nga dala kuno sang mga kuneho, “indi lamang hampang para sa kabataan, kundi bahin sang mga ritwal para sa pertilidad.” Sa iban nga kultura, ginapatihan nga ang gindekorasyunan nga itlog kon Easter, “milagruso nga makahatag sa ila sing kalipay, kabuganaan, maayong panglawas, kag proteksion.”—Traditional Festivals.
Bag-o nga bayo: “Ginapatihan nga indi pagtahod kag dimalas ang magtamyaw sa diosa sang Tigpamulak sang Scandinavia, ukon kay Eastre, kon daan ang ginasuksok nga bayo.”—The Giant Book of Superstitions.
Misa sa pagbutlak sang adlaw: Pareho ini sa mga ritwal sang mga nagasimba sa adlaw nga “ginahiwat kon vernal equinox nga nagaabiabi sa adlaw kag sa daku nga gahom sini sa paghatag sing kabuhi sa tanan nga nagatubo nga mga butang.”—Celebrations—The Complete Book of American Holidays.
Ang The American Book of Days nagsiling parte sa ginhalinan sang Easter: “Wala sing duhaduha nga ang Simbahan sang una nagbaton sa dumaan nga paganong mga kinabatasan kag naghatag sing Cristianong kahulugan sa sini.”
Ang Biblia nagapaandam batok sa pagsimba sa Dios paagi sa mga tradisyon kag kustombre nga wala niya nahamut-an. (Marcos 7:6-8) Ang 2 Corinto 6:17 nagasiling: “‘Magbulag kamo,’ siling ni Jehova, ‘kag untati ninyo ang pagtandog sa di-matinlo nga butang.’” Ang Easter isa ka pagano nga seremonya nga dapat likawan sang mga gusto magpahamuot sa Dios.