Ang Pagtamod sang Biblia
Mga Loterya—Sin-o ang Nagadaug?
“KON luyag mo magdaug dapat ka maghampang.” “Duha ka jackpot sa bili nga 1 ka dolyar.” “Kapin pa nga mga premyo sa baylo sang isa ka dolyar!” Ang tension kag kalangkag nagbaskog. Napukaw sining mga eslogan, ang mga lalaki, mga babayi, kag bisan gani ang mga pamatan-on, bisan diin nagkuot sa ila mga bulsa kag mga kahita. Bisan ang mga punsion sang kasal natublag bangod sini. Ginasaksihan mo ang pagdinaguso sa loterya!
Sang ulihi, ang “masuwerte nga numero” gin-anunsyo. Ginakunyag ang pila. Linibolibo, ayhan minilyonmilyon, ka dolyar ang sa hinali mangin ila. Ang pagdaug sa isa ka milyon ka dolyar nga loterya, pabugal sang isa nga nagdaug, “paaman lamang” sa isa ka makaalayaw nga kabuhi.” Ang isa pa gid nagsiling, “Makapasulhay gid ang mahibaloan mo nga indi na ikaw kulangon sing kuwarta.” Apang para sa kalabanan—ang mga napierdi—ang mga hilikuton sang kabuhi nagabalik sa ila normal nga lakat.
Naganyat ka bala sa haylo sang loterya? Paano sini maapektohan ikaw kag ang imo palaabuton? Sin-o gid ang nagadaug?
Isa Bala ka Pagsulhay sang Pangabuhi?
Ang mga loterya makapukaw sa tagipusuon sang mga humalampang sing handum nga magmanggaranon. Apang, ang Biblia nagasiling nga ining “gugma sa kuwarta amo ang gamut sang tanan nga kalainan, kag paagi sa pagtinguha sa sini nga gugma ang iban . . . nagsuntok sang ila tagipusuon sing madamo nga kasakitan.” Ang mga loterya indi eksepsion.—1 Timoteo 6:9, 10.
Ang mga humalampang mahimo nga magiyan sa sugal. Si Dr. John Watt, direktor medikal sang Homewood Sanitarium sa Guelph, Canada, nagsiling nga ang isa ka indibiduwal mahimo mangin isa ka ‘masupog nga humalampang sing loterya, subong nga ang isa ka tawo mahimo nga mangin alkoholiko,’ sa pagtinguha nga likawan ang kamatuoran. Ginatawag niya ini nga lotteryitis.
Kag kon magdaug ang isa, nagautwas ang bag-o nga mga problema. “Pagdumdom ko anay magasulhay ang akon kabuhi,” siling ni Erika, nga nagdaug sing isa ka milyon ka dolyar sa loterya. Apang sa tapos sang duha ka diborsio kag masunson nga pag-obligar sang mga manugbuhis, sia nanganduhoy: “Kon nahibaloan ko lamang kon ano ang matabo, kuntani gingisi ko yadto nga tiket.” Ang iban pa nagkomento nga ang pagdaug ‘sa loterya amo ang umpisa sang isa ka kabuhi nga ginsalot sang balatian, kahadlok, kag sang ulihi sang dumot.’ “Ang tanan nga pasundayag sang pagdaug ginbuslan sang mabug-at nga mga lulan sa akon mga abaga.” “Wala na ako nagasalig sa mga tawo—amo sina ang nahimo sa akon sang pagdaug sa loterya.” Para sa mga nagdaug sa loterya, ang mga opisyales nagapanugda pa gani nga magkuha sing bodyguard kag business manager agod proteksionan ang ila “mga premyo kag ang ila kaugalingon.” Huo, bisan ang mga dumalaog mahimo nga mapierdi.
Daku Pa nga mga Katalagman
Ang iban, lakip ang kilala nga mga lider sang relihion, nagapangatarungan nga ang paghampang sing loterya indi malain basta legal ini. Apang, ang kamatuoran nga ang loterya legal sa pila ka pungsod wala nagahimo sini nga maayo. Sa pag-ilustrar: Kon himuon nga legal sang inyo lokal nga pangulohan ang pagpamampam, mangin matarong bala ini? Indi suno sa Biblia. (1 Corinto 6:9, 10) Ang isa ka tawo nga nagahandum sa pagpahamuot sa Dios nabalaka labi na sa ginasiling sang Iya Pulong, ang Biblia. Mahimo nga amo man sina ang imo una nga ginakabalak-an. Apang may ginasiling bala ang Biblia nahanungod sa loterya?
Wala sing talangkod, apang ang una nga pangganyat sang loterya amo ang gugma sa kuwarta, nanggamut ini sa paghamkon. Ang paghamkon nagapatubas lamang sing malain nga mga bunga. Ang Biblia nagalaygay sa aton nga indi magpalambo sing paghamkon sa aton tagipusuon. (1 Juan 2:15, 16) “Ang . . . paghamkon dili gid pagsambiton sa inyo.”—Efeso 5:3.
Ang gugma sa loterya napasad sa kakagud. Wala bala ang tagsa ka humalampang nagatinguha sang iya kaugalingon nga bentaha, amo ang pagdaug sa ginbayad sang iya isigkatawo? Apang, ang Biblia nagalaygay sa tagsatagsa nga ‘pangitaon, indi ang iya kaugalingon nga kaayohan, kundi ang kaayohan sang iya isigkatawo.’ Sa amo, indi bala malain nga magtigayon sing kalipay kag daug gikan sa kapierdihan sang iban nga tawo?—1 Corinto 10:24; Hulubaton 17:5.
Ang loterya mahimo nga mangin siod man para sa imol nga tawo, ginakuha sa iya ang butang gid nga ginakinahanglan niya ukon sang iya pamilya—ang kuwarta. Daku gid ang posibilidad nga indi magdaug ang isa ka indibiduwal. Ang mga awtoridad nagasiling nga mas daku ang posibilidad nga maigo ka sang kilat sang sa magdaug ka sa loterya. Kag suno sa Lightning Protection Institute, ang posibilidad nga maigo sang kilat ang isa ka tawo isa ka milyon sa isa. Busa, ang posibilidad nga magdaug ikaw mahimo nga pila ka milyon sa isa!
Apang may dugang pa nga rason nga kabalak-an. Ang mga humalampang sa loterya nagasandig sa suwerte kag indi sa kalantip, sa intuition kag indi sa lohika. Subong resulta, madamo ang may huyog sa disparatis. Sa diin ini makadul-ong? Ang Biblia nagahambal tuhoy sa mga tawo nga “nagaaman sing latok para sa dios sang Maayong Kapalaran.” Idolatriya ang pagtawag sa sini. Busa, indi lamang nga daku ang posibilidad batok sa ila kon tuhoy sa pagdaug sa loterya kundi mahimo nga una ini nga tikang padulong sa idolatriya, nga magahimo sa ila nga kaaway ni Jehova nga Dios.—Isaias 65:11-14.
Maayo Pa sa Pagsugal
Ang Biblia nagapahanumdom sa aton nga may yara “kapin nga kalipay sa paghatag sang sa pagbaton.” Sa pagkamatuod, ang pagkabuang sa loterya wala nagapauswag sang espiritu sang indi makagud nga paghatag, nga makapaladya gid.—Binuhatan 20:35.
Ang matuod nga kalipay masapwan kon ipahamtang naton ang aton paglaum “indi sa dimasaligan nga mga manggad, kundi sa Dios, nga nagahatag sa aton sing bugana sang tanan nga butang nga pagkalipayan; maghimo sing maayo, magmanggaranon sa maayong mga buhat, . . . handa sa paghatag.” Sa amo, matipigan naton para sa aton kaugalingon ang “maayong sadsaran para sa palaabuton” kag “makapanguyat sing hugot sa matuod nga kabuhi.”—1 Timoteo 6:17-19.
Sa sining paagi, mahimo ikaw mangin garantisado nga dumalaog. Kag indi ini mangin butang sang tsansa ukon pag-uyat sing “masuwerte nga numero.” Sa baylo, subong maathag nga ginhambal ni Jesucristo, dapat ikaw ‘magkuha sing ihibalo tuhoy sa lamang matuod nga Dios’ kag tuhoy sa iya mga katuyoan. Nian, maghikot sa sini. Magkabuhi nahisuno sa iya Pulong. Ang imo palaabuton nasandig sa sini, “kay nagahatag sia sa aton sing pagdaug.” Ang padya labi pa ka hamili sa jackpot sa loterya. Amo ini ang “kabuhi nga walay katapusan”!—Juan 17:3; 1 Corinto 15:57.
[Kapsion sa pahina 23]
Bisan ang mga dumalaog mahimo nga mapierdi
[Kapsion sa pahina 24]
Mas daku ang posibilidad nga maigo ikaw sang kilat sang sa magdaug ka sa loterya