Pagsalimuang sa Loterya​—Ang Sugal Sang Kalibutan

ANG lamang nga kinahanglan mo amo ang dolyar kag isa ka damgo.” Ang damgo amo ang pagdaug sa jackpot sang loterya sa Nueva York nga 45 milyones ka dolyar. Ang isa ka dolyar may kahigayunan sa pagdaug. Minilyon ang nagdamgo. Samtang nagalinya sa pagbakal sang ila tiket, nag-estoryahanay sila nahanungod sa mga yate kag mga mink coat kag mga mansion​—mga butang nga baklon nila kon magdaug sila. Sa isa ka punto, sa bug-os nga estado, 28,000 kada minuto ka tiket ang ginbakal nila. Sa hingapusan nga tatlo ka adlaw antes sang ripa, nakabakal sila sing 37.4 milyones ka tiket.

Sa Hapon masako ang negosyo sa 10,000 ka awtorisado nga balaligyaan sing tiket para sa loterya nga sa diin nagapanong ang mga tawo agod magbakal sing tiket para sa Katapusan-Tuig nga Jumbo Takarakuji (Loterya). Sa isa ka balaligyaan sa Tokyo nga sa diin lima ka una nga premyo nga mga tiket ang nabaligya suno sa report sang nagligad nga mga tinuig, mga 300 ka tawo ang naglinya sang magbukas ang balaligyaan. Ang isa ka hoben pa nga babayi, nga nagapati nga maswerte ang temprano mag-abot, naghulat kutob sang ala 1:00 s.a. Ang ginahamkon nga jackpot sang nagligad nga tuig: labaw sa tanan nga 100 milyones ka yen ($714,285, U.S.)

Sa isa ka kapital sang Nakatundan nga Aprika, ang ginatawag sang lokal nga mga tawo nga Lotto College nga duog pirme lang gutok sing mga tawo nga nagakari agod magbakal sing mga tiket kag maghaumhaom tuhoy sa palaabuton nga mga numero. Ang malaba nga mga listahan sang mga numero nga nagdaug sang una ginabaligya sa mga nagalaum nga makakita sa sini sing ideya tuhoy sa palaabuton nga kombinasyon. Para sa mga nagapati sa mistiko nga ihibalo, may yara mga manugpakot nga nagapabayad sa pagpakot sang numero nga patdan.

Malaka lamang bala ini nga mga hitabo? Indi. Ang pagsalimuang sa loterya isa ka pandemiko. Ginapadabdab sini ang tagsa ka kontinente. Nagadabdab ini sa manggaranon kag imol nga mga pungsod. Ginapukaw sini ang bata kag tigulang sa tagsa ka ekonomiko, sosyal, kag edukasyonal nga nibel sang katilingban.

Huo, ang mga loterya daku nga negosyo, kag madahog ini nga negosyo. Sa Estados Unidos lamang, ang loterya sang Estado nakaganar sing $18.5 ka libo ka milyon sang 1989. Sang nagligad nga 27 ka tuig lamang, ina nga numero sero. Apang karon ang mga loterya amo ang ikaduha sa pinakadaku nga porma sang sugal sa Estados Unidos, kag nagauswag ang industriya sing 17.5 porsiento kada tuig, subong kadasig sa industriya sang kompyuter.

Ang nabaligya sang loterya sa bug-os nga kalibutan sang 1988, suno sa pinakaulihi nga mga numero sang magasin nga Gaming and Wagering Business, may kabilugan nga $56.38 ka libo ka milyon, isa ka daku nga numero. Katumbas ina sa kapin sa napulo ka dolyar para sa tagsa ka lalaki, babayi, kag bata sa duta! Kag sa isa ka tuig lamang ina!

Samtang wala sing makapanghiwala nga ang mga loterya nagauswag, madamo ang batok sa sini. Ginausisa sang masunod nga duha ka artikulo ang pagpopular sang mga loterya kag ang sinuay sa likod sini. Samtang ginabinagbinag mo ang mga katunayan, makadesisyon ka kon bala ang mga loterya para sa imo. Maalamon bala nga maghampang sini? Daw ano kahapos ang pagdaug? Mahimo bala nga kapin pa sa kuwarta ang mapierdi mo?