Ang Ika-101 nga Klase sang Gilead—Makugi sa Maayong mga Buhat

ANG aton Manunuga, si Jehova nga Dios, makugi sa maayong mga buhat, kag amo man ang iya Anak, si Jesucristo. Subong huwaran naton, nagpakita si Jesus sing kakugi paagi sa pagtuman sang iya hinatag-sang-Dios nga tulumanon, nga naglakip sang paghatag “sang iya kaugalingon para sa aton agod nga . . . matinluan para sa iya kaugalingon ang katawhan nga iya, nga makugi sa maayong mga buhat.” (Tito 2:14) Ang 48 ka katapo sang ika-101 nga klase sang Watch­tower Bi­ble ­School of Gil­ead matuod gid nga nagpakita sing kakugi sa maayong mga buhat. Ang programa sang gradwasyon para sa sining mga misyonero ginhiwat sang Septiembre 7, 1996 sa Watch­tower Educa­tional Center sa Pat­terson, New York.

Praktikal nga Laygay sa Pagpabilin nga Makugi

Ang tsirman sang programa sang gradwasyon amo si Carey Barber, isa ka katapo sang Nagadumala nga Hubon, nga kapin na sa 70 ka tuig sa bug-os tion nga ministeryo. Sa iya nagabukas nga mga komento, ginpatalupangod ni Utod Barber ang pagbantala kag pagpanudlo nga hilikuton ni Jesus, nga amo “ang kapawa sang kalibutan.” (Juan 8:12) Ginpakita niya nga wala ginsolo ni Jesus yadtong dungganon nga papel kundi ginpalig-on niya ang iya mga disipulo nga paiwagon man ang ila kapawa. (Mateo 5:​14-16) Ini nga pribilehiyo sa pag-alagad nagadugang sing kahulugan sa kabuhi sang isa ka Cristiano kag nagabutang sing isa ka mabug-at nga salabton sa mga abaga sang tanan nga “nagalakat subong mga anak sang kapawa.”​—⁠Efeso 5:⁠8.

Pagkatapos sadtong nagabukas nga mga komento, ginpakilala naman si Don ­Adams gikan sa Ex­ecu­tive Of­fices sang ulong-talatapan sa Brook­lyn. Nagpamulongpulong sia sa tema nga “Mag-uswag, Indi Mag-isol.” Ginpatalupangod ni Utod ­Adams ang Eskwelahan sang Gil­ead kag ang katuyuan sini​—⁠ang pagpasangkad sang pagbantala sing maayong balita sa iban nga mga kadutaan. Ginsambit niya ang pag-uswag sang organisasyon sang Dios, nga nagabalhag sing literatura sa Biblia sa bug-os nga kalibutan sa kapin sa 300 ka hambal. Ang libro nga Ang Ihibalo nga Nagadul-ong sa Kabuhi nga Walay katapusan, nga ginbalhag sang 1995, matigayon na sa 111 ka hambal kag naiskedyul nga imprintahon sa dugang pa nga mga hambal. Nangin instrumento na ini sa pagbulig sa bag-ong mga disipulo ni Jesus nga makalab-ot sa punto nga magdedikar kag magpabawtismo sa sulod lamang sang pila ka bulan. Gani sarang magamit sang bag-ong mga misyonero ang pinakabag-o nga bulig sa pagtuon sa Biblia para sa ila hilikuton.

Masunod, si Lyman Swingle, isa ka katapo sang Nagadumala nga Hubon, nagpamulongpulong sa topiko nga “Padayon nga Ihatag kay Jehova ang Inyo Sagrado nga Pag-alagad,” pasad sa Bugna 7:15. Sanglit si Jehova mismo isa ka malipayon nga Dios, ang pag-alagad sa iya sing padayon amo ang nagahimo sa isa nga malipayon. (1 Timoteo 1:11) Subong resulta sining malipayon nga pag-alagad, isa ka dakung kadam-an sang mga indibiduwal halin sa tanan nga bahin sang duta ang nagasimba sa iya. Sa sulod sang mga tinuig, ang mga nahanas sa Eskwelahan sang Gil­ead nakapakigbahin sa pagbulig sa madamo sini nga makadangat sa sibu nga ihibalo sang kamatuoran. Busa, may rason gid kita, nga magpati nga si Jehova padayon nga magapakamaayo sa mga ipadala karon agod magtipon sing dugang pa nga mga katapo sang nagadamo nga dakung kadam-an.

Ang “Pagpabanaag sang Kalipay ni Jehova” amo ang tema nga ginpadaku ni Daniel Syd­lik, isa man ka katapo sang Nagadumala nga Hubon. Ginpakita niya nga ang tanan nga alagad sang Dios, lakip ang bag-ong mga misyonero, may pribilehiyo nga itudlo sa katawhan ang dalan sang kabuhi nga walay katapusan kag ang dalan agod matigayon ang labing maayo gikan sa kabuhi karon. Ang “pagpanudlo,” siling ni Utod Syd­lik, “isa ka makapaladya nga propesyon. Ginapabanaag ini sang mga nawong sang mga tawo nga nagapanudlo kag sa mga nawong sang mga tawo nga ginatudluan.” (Salmo 16:​8-11) Ginbalikwat niya ang isa ka misyonero nga taga-Estonia nga nagsiling, “Dala naton ang labing daku nga mensahe sa nawong sang duta, kag ginapakita ini sang aton nawong.” Ang ekspresyon sang aton nawong mahimo nga magabukas sa madamong ganhaan kag magpukaw sing interes. Luyag mahibaluan sang katawhan kon ano ang nagapahalipay sa mga alagad ni Jehova. “Gani hatagi sing atension ang inyo nawong,” laygay ni Utod Syd­lik. “Nalipay ang mga tawo nga makakita sing malipayon nga mga tawo.”

Si Ulysses Glass, nga nakapakigbahin sa paghatag sing instruksion sa mga estudyante sang Gil­ead halin sang ika-12 nga klase sang 1949, nagpamulongpulong sa tumalambong sa tema nga “Sing Mapailubon, Bantayi ang Inyo mga Kalag.” Ano ang pagpailob? Nagapaalinton ini sing ideya nga paghulat sing kalma sa isa ka butang, nga nagapakita sing pagbatas walay sapayan sang makapaakig nga kahimtangan ukon kabudlayan. Ang mapailubon nga tawo nagapabilin nga kalma; ang dimapailubon nagapadasudaso kag buringot. “Madamo ang nagahunahuna nga ang pagpailob isa ka tanda sang kaluyahon ukon indi makadesisyon,” siling ni Utod ­Glass, apang “kay Jehova tanda ini sang kusog kag katuyuan.” (Hulubaton 16:32) Ano ang padya sang pagpailob? “Ang pagpailob sa idalom sang makapaakig nga kahimtangan magahilway sa imo gikan sa isa ka gatos ka adlaw nga kalisang,” siling sang isa ka hulubaton sang mga Intsik. “Ang pagpailob nagapauswag sa personalidad sang isa,” komento ni Utod ­Glass. “Sa katunayan, ginasilakan sini ang iban pa nga maayong mga kinaiya sing silak sang pagkapermanente. Ginahimo sini ang pagtuo nga halandumon, ang paghidait nga magadugay, kag ang gugma nga indi mationg.”

“Isa ka pribilehiyo ang makabaton sing asaynment gikan kay Jehova nga Dios paagi sa iya organisasyon,” siling ni Mark Nou­mair, nga nakaaalagad subong misyonero sa Kenya sing 11 ka tuig kag karon isa ka instruktor sa Gil­ead. Samtang ginapasangkad niya ang tema nga “Luwas kon May Pagtuo Kamo, Indi Kamo Magadugay,” ginpatalupangod ni Utod Nou­mair ang halimbawa ni Hari Ahaz sang Juda. Ginpasalig ni Isaias ang hari nga ginasakdag sia ni Jehova sa iya asaynment, apang wala gihapon magsalig si Ahaz sa Iya. (Isaias 7:​2-9) Nian ginpakita ni Utod Nou­mair nga ang mga misyonero​—⁠sa pagkamatuod, kita tanan​—⁠dapat may pagtuo kay Jehova agod magdugay sila sa ila teokratiko nga mga asaynment. Ang pinasahi nga mga hangkat sang asaynment subong misyonero nagakinahanglan sing malig-on nga pagtuo. “Dumduma pirme nga wala sing himpit nga kahimtangan sa sining sistema sang mga butang,” siling ni Utod Nou­mair.

Mga Eksperiensia nga Nagapalig-on sing Makugi nga Hilikuton

Sa tion sang ila paghanas sa Gil­ead, naghinguyang ang mga estudyante kada talipuspusan sang semana sing tion sa pag-alagad sa publiko, nga amo man ang ila una nga kabalak-an sa ila asaynment subong mga misyonero. Gin-interbyu ni Wal­lace Liver­ance, katapo sang pakultad sang Gil­ead, ang 15 ka estudyante nga nag-asoy sang ila mga eksperiensia. Nian gin-interbyu ni Leon ­Weaver sang Ser­vice De­part­ment Com­mit­tee kag ni Lon Schil­ling sang Beth­el Oper­ations Com­mit­tee ang mga katapo sang komite sang sanga gikan sa Aprika kag Latin Amerika, nga nag-asoy sing mga eksperiensia gikan sa latagon sang mga misyonero kag may pila ka maayong laygay para sa manuggradwar nga mga misyonero. Ginsambit nga sa Sier­ra ­Leone mga 90 porsiento sang mga nabawtismuhan sa tion sang 1995 nga tuig sang pag-alagad ang nabuligan sang mga misyonero. Daw ano kaayo nga rekord sang makugi nga pagpanghikot!

Sang ulihi, si Milton Henschel, ang presidente sang Sosiedad, nagpamulongpulong sa 2,734 nga nagtambong sa tema nga “Ang Kitaon nga Organisasyon ni Jehova Tumalagsahon.” Ano ang nagahimo sa organisasyon ni Jehova nga wala sing katupong? Indi ang kadakuon ukon ikasarang sini kundi amo ang kamatuoran nga ginatuytuyan ini sang matarong nga mga palatukuran kag hudisyal nga mga desisyon sang Dios. Sang dumaan nga mga tion ang katawhan ni Jehova, ang pungsod sang Israel, amo ang gintugyanan sing sagrado nga mga pinamulong, nga naghimo sadtong pungsod nga tumalagsahon. (Roma 3:​1, 2) Sa karon, ang organisasyon ni Jehova nahiusa samtang nagapanghikot ini sa idalom sang pagtuytoy ni Jesucristo. (Mateo 28:​19, 20) Nagauswag ini kag nagadaku. May yara pa bala iban nga organisasyon sa duta nga may Nagadumala nga Hubon nga nagakonsulta sa Pulong sang Dios, ang Biblia, antes maghimo sing importante nga mga desisyon? Sa sini kag sa iban pa nga mga paagi, ang kitaon nga organisasyon ni Jehova tumalagsahon gid. Naghinakop ang makalilipay nga programa paagi sa pagpanghatag sing mga diploma kag pagbasa sing sulat halin sa klase nga nagapabutyag sing apresasyon sa pinasahi nga paghanas.

[Kahon sa pahina 22]

Estadistika sang Klase

Kadamuon sang pungsod nga gintiglawas: 9

Kadamuon sang pungsod nga ginpadalhan: 12

Kadamuon sang mga estudyante: 48

Promedyo nga edad: 31.7

Promedyo nga kalawigon sa kamatuoran: 13.8

Promedyo nga kalawigon sa bug-os tion nga ministeryo: 9.8

[Retrato sa pahina 23]

Ika-101 nga Manuggradwar nga Klase sang Watch­tower Bible School of Gil­ead

Sa listahan sa ubos, ang mga idas nanumerohan halin sa atubang pa likod, kag ang mga ngalan nalista halin sa wala pa tuo sa tagsa ka idas.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.