Paano Sila Makabati Kon Indi Kita Magbalik?
1 “Paano . . . bala sila makabati kon wala sing isa nga magawali?” (Roma 10:14) Sa pagkamatuod, paano sila makahangop sang kamatuoran kon indi kita maghimo sing epektibo nga mga pagduaw liwat? Sini nga bulan mahimo naton matatap ang aton una nga pagpakigsugilanon paagi sa dugang pa nga Makasulatanhon nga mga punto gikan sa bisan ano nga brosyur nga napahamtang naton, kag mahimo ina magadul-ong sa isa ka pagtuon sa Biblia.
2 Kon napahamtang ninyo ang brosyur nga “Ano ang Katuyuan sang Kabuhi?,” mahimo ini magadul-ong sa isa ka pagtuon sa Biblia sa sining paagi. Mahimo kamo makapamangkot:
◼ “Luyag mo bala kag sang imo pamilya magpuyo sa isa ka kalibutan kaangay sini nga laragway sa pahina 31 sang brosyur nga ginbilin ko sa imo? [Ipakita ang laragway kag pasabta sia.] Kita tanan may amo sini nga handom, bisan pa nga madamo ang nagapangduhaduha nga mangin posible gid ini. Para sa Dios, indi ini imposible.” Buksi ang pahina 29 kag basaha ang Salmo 145:16 gikan sa parapo 1. Padayuna ang paghambalanay sa masunod nga pila ka parapo, kag sugdi ang isa ka pagtuon sa Biblia. Maghimos para sa ulihi nga pagduaw liwat agod mapadayon ang paghambalanay.
3 Kon magbalik kamo pagkatapos mapahamtang ang brosyur nga “Nagaulikid Gid Bala ang Dios sa Aton?,” ayhan mangin epektibo ang kaangay sini:
◼ “Sa akon nagligad nga pagduaw, ginhambalan naton ang pamangkot, Nagaulikid gid Bala ang Dios sa aton? Nagahunahuna ka bala nga nagaulikid gid sa aton ang Dios amo nga tapuson niya ang pag-antos kag kasingki? [Pasabta sia. Nian buksi ang bahin 10 sang brosyur sa pahina 22, kag magpadayon.] Ang Dios nagsaad nga buslan niya ining malaut nga kalibutan sing isa ka bag-o nga pagapuy-an sang mabuot nga mga tawo nga magakabuhi sa paghidait. [Basaha ang Salmo 37:11.] Ikaw kag ako mahimo magkabuhi sa sinang bag-ong kalibutan kon magapati kita sa Biblia kag magaaplikar sang laygay sini.” Ipaathag ang aton programa sa pagtuon sa Biblia.
4 Kon magduaw kamo liwat pagkatapos mapahamtang ang brosyur nga “Toloka! Ginahimo Ko nga Bag-o ang Tanan nga Butang,” mahimo kamo magsugod paagi sa pagpakita sang larawan sa panghapin kag nian sa pagpamangkot:
◼ “Mangin kaangay sa ano sa banta mo ang magkabuhi sa isa ka himpit nga kalibutan? [Pakumentuha ang tagbalay.] Ang nakita mo sa sini nga larawan indi lamang handurawan; ginpasad ini sa pat-od nga mga saad nga ginasugid sa Biblia. [Basaha ang Bugna 21:4 kag Salmo 37:11, 29.] Luyag ko ipaathag kon paano ninyo maagom sang inyo pamilya ini nga pagpakamaayo.” Kon ang tagbalay magapakita sing interes, padayuna ang paghambalanay, kag magtanyag sing pagtuon sa Biblia.
5 Kon masapwan naton ang mga tawo nga nagapangita sing kamatuoran, ginapakita naton ang matuod nga gugma paagi sa pagpanumbalik agod mabuligan sila sing dugang pa. Sa amo ang mga kamatuoran nga gintugyan sa aton magaluwas sa aton kag sa sadtong nagapamati sa aton.—1 Tim. 4:16.