Magbalik Agod Maluwas ang Iban
1 Kabubut-on sang Dios “nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Ano ang sarang naton mahimo sa pagbulig? Maghimo sing mga pagduaw liwat upod ang tulumuron nga itudlo ang kamatuoran. Ano ang isiling mo? Ang masunod nga mga panugda mahimo nga makabulig sa imo.
2 Kon nabilin mo ang libro nga “Mankind’s Search for God,” mahimo nimo mapadayon ang paghambalanay paagi sa pagsiling:
◼ “Sang nagligad nga pagduaw ko ginhambalan naton ang lima ka pamangkot nga nagabulig sa aton nga mausisa kon bala ang aton relihion ginapasad sa Biblia. May kahigayunan ka bala nga mausisa ini? [Pasabta sia.] Sanglit daw masako ka, ayhan mahimo nimo makuha ang imo libro kag tan-awon naton ang nahaunang pamangkot sa sa pahina 17.” Nian ipaathag kon ano ang ginasiling sang Biblia tuhoy sa kalag, nga nagagamit sang Genesis 2:7 kag Ezequiel 18:4. Kon ang tagbalay nagapakita sing interes, maghimos sa pagbalik sa madason nga semana kag padayunon ang inyo paghambalanay.
3 Yari ang isa pa ka panugda nga ayhan luyag mo tilawan:
◼ “Sang nagligad ginhambalan naton ang isa sang mga tanda nga nagapakilala sa matuod nga relihion. Nadumduman mo bala kon ano ini? [Pasabta ang tagbalay.] Karon yari ang isa pa ka nagapakilala nga tanda, nga ginsambit sa Juan 13:34, 35. [Basaha.] Sa banta mo ginapakita bala sang tanan nga relihion ini nga sahi sang gugma sa isa kag isa? Ang libro nga ginbilin ko sa imo nagahinun-anon sini gid nga topiko sa kapitulo 15, diri sa pahina 344. Luyag ko ipakita sa imo ang pila ka punto nga naluyagan ko sa sinang kapitulo.” Hambali ang pila ka parapo kag nian maghimos para sa dugang pa nga paghambalanay.
4 Kon nagaduaw sa isa nga nagbaton sang libro nga “True Peace and Security—How Can You Find It?” mahimo nimo liwat mapatuhuyan ang ilustrasyon sa pahina 4 kag pamangkuta ang tagbalay:
◼ “Sa tapos mausisa sing dugang pa ang libro nga ginbilin ko sa imo kag mahunahuna ang saad sang Dios nga paraiso nga duta, ano ang balatyagon mo sa sining makatilingala nga mga saad sang Dios sa katawhan?” Sa tapos mapasalamatan ang sabat sang tagbalay kag makumentuhan ini sa malip-ot, ayhan mapatalupangod mo ang mga kapitulo 2 kag 3 kag mapanugda ang pagbinagbinag kon ngaa ang mga panikasog sang tawo ayon sa paghidait kag kalig-unan, lakip na yadtong may relihioso nga kinaugali, napaslawan.
5 Dumduma nga ang tulumuron sang mga pagduaw liwat amo ang pagsugod sing mga pagtuon sa Biblia. Ang isa ka pagtuon mahimo masugdan sa bisan anong kapitulo sang Search for God nga libro, apang sa kinaandan luyag naton ipatuhoy sila sa mga kapitulo 15 kag 16. Nian, pagkatapos sang pila ka pagtuon, ayhan mapatuhoy naton ang igtalupangod sa isa ka libro sa pagtuon nga nagahinun-anon sang sadsaran nga mga doktrina. Makasapo kita sing daku nga kalipay samtang nagatuon sila sa pagtawag kay Jehova para sa kaluwasan.—Binu. 2:21.