Ipatudok sa Iban ang Paglaum nga Kabuhi nga Walay Katapusan
1 Bisan nga ang tawo nagtuip sing mga paagi nga pahinayon ang pagtigulang kag palawigon ang iya kabuhi, ang katigulangon kag kamatayon indi gihapon malikawan. Nagapasalamat gid kita nga ginapaathag sang Biblia kon ngaa ang tawo nagatigulang kag nagakapatay, subong man kon paano ang mga halit sang katigulangon kag ang kamatayon dulaon. Ining mga kamatuoran makakumbinsi nga ginhatag sa libro nga Ang Ihibalo nga Nagadul-ong sa Kabuhi nga Walay Katapusan. Ginasabat sing maathag sang libro ang makalilibog nga mga pamangkot tuhoy sa kabuhi kag kamatayon, nagatuytoy sa bumalasa sa tion nga ang Paraiso ipasag-uli.
2 Sa Marso itanyag naton ang libro nga Ihibalo upod ang tulumuron nga makasugod sing mga pagtuon sa Biblia sa puluy-an. (Mat. 28:19, 20) Nian magahimo kita sing mga pagduaw liwat sa tanan nga nagpakita sing interes sa mensahe sang Ginharian. Sa sining paagi mapatudok naton sa iban ang paglaum nga kabuhi nga walay katapusan. (Tito 1:2) Agod mahimo ini, ayhan ang masunod nga mga panugda mahimo nga makabulig.
3 Sa una nga pagduaw, mahimo kamo makapamangkot sing subong sini:
◼ “Napamangkot mo na bala kon ngaa ang mga tawo nagahandum sing mas malawig nga kabuhi? [Pasabta sia.] Ang mga Budhista, Cristiano, Hindu, Muslim, kag iban pa nagalaum tanan nga magkabuhi sa pihak sang kamatayon.” Buksi ang Ihibalo nga libro sa kapitulo 6, “Ngaa Nagatigulang Kita kag Nagakapatay?,” kag basaha ang parapo 3. Mangatarungan sa ginsambit nga mga kasulatan. Ginapatuhuyan ang duha ka pamangkot sa katapusan sang parapo, pamangkuta ang tagbalay kon bala luyag niya nga makita mismo ang mga sabat. Kon luyag niya, padayuna ang paghinun-anon sa masunod nga pila ka parapo. Isa na ka pagtuon ang ginasugdan! Kon indi naman, ibilin ang libro para mabasa niya, kag maghimo sing mga kahimusan sa pagbalik, ayhan sa sulod sang isa ukon duha ka adlaw, agod mahambalan ang mga sabat.
4 Kon nagaduaw liwat sa napahamtangan sing “Ihibalo” nga libro, mahimo kamo makasiling:
◼ “Nagbalik ako agod binagbinagon ang duha ka pamangkot tuhoy sa kamatayon nga ginbilin naton nga wala masabat.” Pahanumduma ang tagbalay sang mga pamangkot. Nian ipaathag ang impormasyon sa kapitulo 6 sa ubos sang subtitulo nga “Isa ka Malaut nga Plano.” Depende sa mga sirkunstansia, mahimo ninyo padayunon ang pagtuon ukon gamiton ang katapusan nga pamangkot sa katapusan sang parapo 7 sa pagpasad sing sadsaran para sa masunod nga paghambalanay. Maghimo sing pat-od nga mga kahimusan sa pagbalik. Hatagi ang tagbalay sing handbill, kag ipaathag sa iya sa malip-ot kon paano ginahimo ang mga miting sa kongregasyon. Mainit sia nga agdaha sa pagtambong.
5 Sa pamalaybalay man ukon dipormal nga pagpanaksi, mahimo ninyo masugdan ang isa ka paghambalanay paagi sa pagsiling:
◼ “Napaligban mo na bala kon ano ang mangin palaabuton naton kag sang duta? [Pasabta sia.] Ginasumaryo sang Biblia ang palaabuton sa isa lamang ka tinaga—Paraiso! Ginapaathag sini nga sa ginsuguran, ginhimo sang Dios ang isa ka bahin sang duta nga isa ka matahom nga paraiso diin ginbutang niya ang mag-asawa nga gintuga niya. Dapat nila puy-an ang bug-os nga duta, amat-amat nga himuon ini nga isa ka paraiso. Talupangda ini nga paglaragway sa kon ano ang kahimtangan sini anay.” Buksi ang Ihibalo nga libro sa pahina 8, kag basaha ang parapo 9, sa ubos sang subtitulo nga “Kabuhi sa Paraiso.” Nian ipaathag ang mga punto sa parapo 10, kag basaha ang ginsambit nga kasulatan, ang Isaias 55:10, 11. Padayuna ang pagpaathag sa kon ano ang mangin kabuhi sa napasag-uli nga Paraiso kag tuptupi ang parapo 11-16. Ukon palig-una sia nga basahon ini sing kinaugalingon, kag maghimo sing kahimusan nga magkitaay kamo liwat kag hambalan ini.
6 Kon wala masugdan ang pagtuon sa una nga pagduaw, ayhan matilawan mo ini nga himuon sa liwat nga pagduaw paagi sa pagsiling:
◼ “Subong sang ginhambalan naton sang nagligad, katuyuan sang Dios nga ang bug-os nga duta mangin isa ka paraiso. Nagapautwas ina sang pamangkot, Ano ang mangin kahimtangan sa Paraiso?” Buksi ang Ihibalo nga libro sa kapitulo 1, kag tun-i ang mga parapo 11-16, sa ubos sang subtitulo nga “Ang Kabuhi sa Napasag-uli nga Paraiso.” Pagkatapos sina ipakita ang laragway sa pahina 4-5, kag pamangkuta sia kon bala luyag niya magkabuhi sa subong sina katahom nga mga palibot. Nian basaha ang nahaunang dinalan sang parapo 17 sa pahina 10. Depende sa mga sirkunstansia, mahimo ninyo mapadayon ang pagtuon ukon magsiling nga sa imo masunod nga pagduaw ipaathag mo kon ano ang dapat himuon agod magkabuhi ang isa sa napasag-uli nga Paraiso. Magbilin sing handbill, ipaathag ang iskedyul sang mga miting, kag mainit sia nga agdaha sa pagtambong sa Kingdom Hall.
7 Ang Ihibalo nga libro isa ka labing maayo nga gamit sa pagpakita sa iban sang “kabuhi nga walay katapusan” nga ginsaad sang Dios. Ang pagdumala ninyo sing mga pagtuon sa Biblia sa puluy-an sa mga tawo makapatudok sa ila sining daku nga paglaum nga gin-inspirar sang Dios nga “indi makabutig.”