Sampol nga mga Presentasyon

Sa Pagsugod sang Pagtuon sa Biblia sa Una nga Sabado sang Marso

“Nagaduaw kami sing makadali bangod sa importante nga okasyon nga hiwaton sa Abril 14. Ini amo ang anibersaryo sang kamatayon ni Jesus. Ginasaulog ini sang iban bangod para sa ila importante ang kamatayon ni Jesus. Ang iban naman wala nakahibalo kon ngaa importante ini. Sa banta mo makabenepisyo bala kita sa kamatayon ni Jesus?” Tuguti sia nga magsabat. Dayon ipakita sa iya ang likod sang Marso 1 nga Lalantawan, kag binagbinaga ninyo ang una nga pamangkot kag bisan isa lang sa ginsambit nga teksto. Itanyag ang mga magasin, kag maghimo sing kahimusan nga magbalik para binagbinagon ang masunod nga pamangkot.

Ang Lalantawan Marso 1

“Madamo ang nagapalibog kon ngaa wala pa gintapos sang Dios ang inhustisya kag pag-antos sa kalibutan. Sa banta mo bangod ayhan wala sia nagaulikid sa aton ukon nagabatyag sia nga dapat mag-antos ang mga tawo? [Tuguti sia nga magsabat. Dayon basaha ang Juan 3:16.] Bisan madamo ang nagagamit sini nga teksto para ipakita nga nagaulikid ang Dios, indi sila sigurado kon ano ang benepisyo sa aton sang kamatayon sang Anak sang Dios. Ginapaathag sini nga magasin kon paano ang kamatayon ni Jesus magadula sang inhustisya kag pag-antos sa duta.”

Magmata! Marso

“Nagaduaw kami sing makadali bangod lain ang paghangop sang iban sa sini nga teksto sa Biblia. [Basaha ang Genesis 1:1.] Ang pila nagapati nga gintuga ang uniberso, pero ang iban naman wala. Ano sa banta mo? [Tuguti sia nga magsabat.] Madamo ang wala nagapati sa pagpanuga bangod ang ginatudlo sang mga lider sang relihion wala gid sa Biblia. Ginapakita sini nga magasin ang maathag kag masaligan nga paathag sang Biblia parte sa pagtuga sang uniberso.”