Pagpauswag sang Aton mga Ikasarang sa Ministeryo—Pagsabat sa Akig nga Tagbalay

Kon Ngaa Importante: Madamo kita sang maistorya sa ministeryo nga maayo sing batasan. Apang, nagtagna si Jesus nga ang iban nga tawo magadumot sa aton. (Juan 17:14) Gani indi kita matingala kon makaatubang kita sang akig nga tagbalay. Kon matabo ini, dapat kita magsabat sa paagi nga makapahamuot kay Jehova. (Roma 12:17-21; 1 Ped. 3:15) Kon himuon naton ini, malikawan naton nga maglala ang kahimtangan. Makahatag man ini sing panaksi sa tagbalay kag sa iban nga makakita, kag mahimo mamati sila sa masunod nga pagduaw sang mga Saksi ni Jehova.—2 Cor. 6:3.

Kon Paano Ini Himuon:

Magpabilin nga kalmado kag mainabyanon. Makabulig ini nga indi maglala ang sitwasyon. Indi maakig sa reaksion sang tagbalay. (Man. 7:9) Mahimo akig sia bangod sang personal nga problema ukon nagbisita ka sa indi nagakaigo nga tion. Sa masami, akig ang tagbalay sa aton mensahe bangod napatalang sia.—2 Cor. 4:4.
Magsabat sing malulo kag mainayuhon. (Hulu. 15:1) Basi naisturbo mo sia sa iya pagtulog ukon sa iya ginaobra. Bisan pa wala kita nagapangayo sing pasaylo bangod sa aton hilikuton, mapainubuson nga mangayo sing pasaylo bangod nagbisita kita sa indi nagakaigo nga tion. Akig bala sia bangod sa nabatian niya nga indi matuod parte sa aton? Kon huo, mahimo ka magsiling: “Nahangpan ko kon ngaa naakig ka. Pero indi matuod ang nabatian mo parte sa amon. Mahimo bala ako magpaathag?” Indi bala sia ugyon sa isa sa aton mga ginapatihan pareho sang pag-disfellowship ukon parte sa dugo? Mahimo ka magsiling: “Nahangpan ko ikaw. Amo man sina ang ginasiling sang iban. Puede ko bala ipakita sa imo sa Biblia kon ngaa amo sina ang amon ginapatihan?”
Kon akig gid ang tagbalay, mas maayo nga maghalin na lang kag indi na magsabat. Kon magsiling sia nga indi na pagkadtuan sang mga Saksi ni Jehova, pasaliga sia nga matuman ina.

Tilawi Ini sa Sini nga Bulan:

Mag-ensayo sa inyo pangpamilya nga pagsimba.
Kon makahalin na sa akig nga tagbalay, istoryahi ninyo sang imo partner kon paano ninyo masabat sing mas maayo ang tagbalay.