Makapabilin Ka nga Malipayon Samtang Ginaatipan Mo ang Imo Pinalangga

1-2. Kon ikaw ang nagaatipan sa imo pinalangga, ano ang ginabatyag ni Jehova sa imo? (Hulubaton 19:17) (Tan-awa man ang mga piktyur.)

“SOBRA 32 ka tuig na kami nga kasal sang akon asawa,” siling sang isa ka brother sa Korea nga si Jin-yeol. “May Parkinson’s disease sia kag nabudlayan sia maghulag, gani ako ang nagaatipan sa iya sa sulod sang lima na ka tuig. Palangga ko gid ang akon asawa, kag nalipay ako nga atipanon sia. Ang iya katre daw pareho sa katre sa ospital, kag diri sia nagatulog. Kada gab-i, nagatupad ako sa iya magtulog, kag ginauyatan ko ang iya kamot.”

² Isa ka bala ka caregiver? Ukon ikaw bala ang nagaatipan sa imo ginikanan, asawa ukon bana, bata, ukon abyan? Kon huo, posible gid nga nalipay ka sa pag-atipan sa iya bangod palangga mo sia. Kag paagi sa pag-atipan sa imo pinalangga, ginapakita mo nga palangga mo man si Jehova. (1 Tim. 5:4, 8; Sant. 1:27) Pero, may mga kabudlayan man ini nga posible indi matalupangdan sang iban. May mga tion nga posible nagabatyag ka nga wala sing may nakaintiende sa imo sitwasyon. Posible makita sang iban nga daw malipayon ka. Pero kon nagaisahanon ka na lang, wala sila kabalo nga indi mo na mapunggan ang imo luha. (Sal. 6:6) Bisan pa wala kabalo ang iban sang imo ginabatyag, nabal-an gid ni Jehova ang imo sitwasyon kag naintiendihan ka niya. (Ipaanggid ang Exodo 3:7.) Nakita ni Jehova ang imo mga sakripisyo para maatipan mo ang imo pinalangga, nakita niya ang imo pagpangabudlay, nakita niya ang imo paghibi, gani palangga ka gid niya. (Sal. 56:8; 126:5) Para kay Jehova, may utang sia sa imo kag nagpromisa sia nga bayaran ka niya.—Basaha ang Hulubaton 19:17.

3. Ngaa posible mabudlay para kay Abraham kag kay Sara ang pag-atipan kay Tera?

³ Madamo sing kasaysayan sa Biblia parte sa mga alagad ni Jehova nga nag-atipan sa ila mga pinalangga. Binagbinaga si Abraham kag si Sara. Sang naghalin sila sa Ur, mga 200 na ang edad sang ila amay nga si Tera. Pero nag-upod sia sa ila, kag naglakbay sila sing mga 960 ka kilometro pakadto sa Haran. (Gen. 11:31, 32) Palangga ni Abraham kag ni Sara si Tera, pero sigurado gid nga indi mahapos para sa ila nga atipanon sia samtang nagalakbay sila. Posible nga nagsakay sila sa kamelyo ukon asno, kag mabudlay gid ini para sa tigulang na nga si Tera. Sa bahin ni Abraham kag ni Sara, posible gid nga may mga tion nga ginkapoy sila. Pero sigurado gid nga ginhatagan sila ni Jehova sang kusog nga kinahanglan nila. Makasalig ka nga pareho sa ginhimo ni Jehova para kay Abraham kag kay Sara, hatagan ka man ni Jehova sang kusog para padayon mo nga maatipan ang imo pinalangga.—Sal. 55:22.

4. Ano ang binagbinagon naton sa sini nga artikulo?

⁴ Ang kalipay amo ang makabulig para padayon mo nga maatipan ang imo pinalangga. (Hulu. 15:13) Dumduma nga makapabilin ka nga malipayon bisan pa mabudlay ang imo sitwasyon. (Sant. 1:2, 3) Ano ang puede mo himuon? Padayon nga mangamuyo kay Jehova kag pangabaya sia nga buligan ka nga indi madula ang imo kalipay. Sa sini nga artikulo, binagbinagon naton ang mga puede mo pa gid himuon para makapabilin ka nga malipayon. Binagbinagon man naton kon paano ka mabuligan sang iban. Pero, binagbinagon anay naton kon ngaa dapat mo panikasugan nga indi madula ang imo kalipay kag kon ano ang posible makadula sini.

KON PAANO MAAPEKTUHAN ANG IMO KALIPAY

5. Ngaa dapat mo panikasugan nga indi madula ang imo kalipay?

⁵ Kon madula ang imo kalipay, posible kapuyon ka sa pag-atipan sa imo pinalangga. (Hulu. 24:10) Kag kon kapoy ka, posible indi ka na makapakita sang kaayo kag daw wala ka na gana magbulig. Kon ikaw ang nagaatipan sa imo pinalangga, ano ang posible makadula sang imo kalipay?

6. Ngaa posible makabatyag sang sobra nga kakapoy ang mga nagaatipan sa ila pinalangga?

⁶ Posible makabatyag sang sobra nga kakapoy ang mga nagaatipan sa ila pinalangga. Ang isa ka sister nga si Leah nagsiling: “Bisan pa daw katawhay man lang sa bilog nga adlaw, nagabatyag ako gihapon nga daw naubos na ang akon kusog pagkagab-i. May mga tion gani nga daw wala na ako sang kusog bisan sa pag-reply lang sa mga text.” May iban naman nga wala na sang tion para makapahuway sing maayo. Ang isa ka sister nga si Inés nagsiling: “Kulang pirme ang akon tulog. Kon gab-i, madamo nga beses ako nga nagabugtaw para atipanon ang akon ugangan nga babayi. Pila na gani ka tuig nga wala kami nakabakasyon sang akon bana.” May iban naman nga wala na nagabaton sa imbitasyon sang ila mga abyan ukon sa mga asaynment sa pag-alagad bangod indi nila mabayaan ang ila ginaatipan. Bangod sini, nasubuan sila kag pamatyag nila indi nila mahimo ang mga gusto nila himuon.

7. Ngaa posible ginakonsiensia ukon nasubuan ang mga nagaatipan sa ila pinalangga?

⁷ Posible ginakonsiensia ukon nasubuan ang mga nagaatipan sa ila pinalangga. Ang isa ka sister nga si Jessica nagsiling: “May mga tion nga pamatyag ko wala ko naatipan sing maayo si Tatay. Kon nagapahuway ako, ginakonsiensia ako kay pamatyag ko gin-una ko pa ang akon kaugalingon.” Ginakonsiensia naman ang iban kay pamatyag nila wala nila nahimo ang bug-os nila nga masarangan, ukon daw indi na sila makapadayon sa pag-atipan sa ila pinalangga. Nagalalain naman ang iban bangod may nahambal sila nga masakit nga mga tinaga sa ila ginaatipan. Sa masami, nagakatabo ini kon grabe ang ila kakapoy. (Sant. 3:2) Nasubuan naman ang iban bangod amat-amat nga nagaluya ang ila pinalangga. Ang isa ka sister nga si Barbara nagsiling: “Ang pinakamabudlay gid amo ang makita ang akon pinalangga nga abyan nga nagalala ang sitwasyon kada adlaw.”

8. Magsugid sang eksperiensia nga nagapakita sang epekto sang pagpasalamat sa mga nagaatipan sa ila pinalangga.

⁸ May pila nga nagaatipan sa ila pinalangga nga nagabatyag nga wala sila ginaapresyar. Ngaa? Bangod talagsa lang sila ginapasalamatan ukon ginakomendahan sa ila pagpangabudlay kag mga sakripisyo. Gani kon pasalamatan naton sila, mapalig-on gid sila sa sini. (1 Tes. 5:18) Ang isa ka sister nga si Melissa nga nagaobra bilang caregiver nagsiling: “May mga tion nga nagahibi na lang ako sa sobra nga kakapoy ukon pagluya sang buot. Pero nalipay gid ako kon ginasilingan ako sang akon mga ginaatipan, ‘Salamat gid sa tanan mo nga ginahimo para sa akon.’ Kag nagapalig-on ini sa akon nga padayon sila nga atipanon.” Ginpaathag sang isa ka brother nga si Ahmadu ang epekto sa iya kon ginapasalamatan sia. Ginaatipan niya kag sang iya asawa ang ila hinablos nga babayi nga nagaistar sa ila balay. Bata pa ang ila hinablos kag may mga tion nga ginakuyap sia. Nagsiling si Ahmadu: “Bisan pa wala niya naintiendihan sing bug-os ang amon mga sakripisyo para sa iya, nalipay gid ako kon ginapasalamatan niya kami ukon nagasulat sia sing ‘Palangga ko kamo.’”

KON PAANO KA MAKAPABILIN NGA MALIPAYON

9. Paano mo mapakita nga kabalo ka sang imo masarangan kag indi masarangan nga himuon?

⁹ Hibalua ang imo masarangan kag indi masarangan nga himuon. (Hulu. 11:2) Limitado lang ang aton tion kag kusog. Gani may mga tion nga dapat ka mangindi kay indi mo na masarangan ang ginapahimo sa imo. Kon matabo ini, indi ka dapat maluyahan sang buot. Kay man, ginapakita mo nga kabalo ka sang imo limitasyon. Kag kon gusto sang iban nga buligan ka, batuna ang ila bulig. Ang isa ka brother nga si Jay nagsiling: “Kada adlaw, indi gid naton maubos ang tanan nga ulubrahon kay nagadepende ini sa aton tion kag kusog. Gani kon himuon lang naton ang aton masarangan, indi madula ang aton kalipay.”

10. Ngaa importante nga intiendihon mo ang sitwasyon sang imo ginaatipan? (Hulubaton 19:11)

¹⁰ Intiendiha ang sitwasyon sang imo ginaatipan. (Basaha ang Hulubaton 19:11.) Kon himuon mo ini, makapabilin ka nga kalmado bisan pa indi maayo ang iya ginsiling ukon ginhimo. Kon ginaintiende mo sia, ginapanikasugan mo nga hibaluon kon ngaa nasiling niya ini ukon nahimo. Posible nagairitable sia bangod sa iya balatian. (Man. 7:7) Halimbawa, posible mangin palabais ang isa ka mabuot nga tawo sadto. Posible man nga mangin palareklamo sia ukon madali maakig. Kon may malala nga balatian ang imo ginaatipan, mas maayo kon mag-research ka parte sa iya balatian. Kon himuon mo ini, makabulig ini sa imo nga maintiendihan nga indi niya hungod ang iya ginsiling ukon ginhimo, kundi bangod ini sa iya balatian.—Hulu. 14:29.

11. Ano ang importante nga mga butang nga dapat mo himuon kada adlaw? (Salmo 132:4, 5)

¹¹ Magpain sang tion para pabakuron ang imo kaangtanan kay Jehova. Kon kaisa, kinahanglan mo buhinan ang imo tion sa pila ka hilikuton para mahimo mo ang “mas importante” nga mga butang. (Fil. 1:10) Halimbawa, dapat mo pabakuron ang imo kaangtanan kay Jehova. Sa bahin ni Hari David, gin-una niya ang pagsimba kay Jehova. (Basaha ang Salmo 132:4, 5.) Dapat ka man magpain sang tion kada adlaw para magbasa sang Biblia kag magpangamuyo. Ang isa ka sister nga si Elisha nagsiling: “Paagi sa pagpangamuyo, pagbasa sang mga salmo, kag pagpamalandong sa akon mga nabasahan, nakapabilin ako nga malipayon. Daku gid ang nabulig sa akon sang pagpangamuyo. Sa bilog nga adlaw, madamo nga beses ako nga nagapangamuyo kay Jehova nga buligan niya ako nga mangin kalmado.”

12. Ngaa dapat ka magpain sang tion para atipanon ang imo panglawas?

¹² Magpain sang tion para atipanon ang imo panglawas. Bangod sa kasakuon, posible nga kulang ang imo tion para manindahan kag magluto sang masustansia nga pagkaon. Pero para mangin mapagros ka pirme sa pisikal kag sa mental, dapat masustansia ang imo ginakaon kag dapat regular ka nga mag-exercise. Importante gid nga himuon mo ini bisan pa limitado lang ang imo tion. (Efe. 5:15, 16) Importante man nga bastante ang imo tulog. (Man. 4:6) Suno sa mga eksperto, makabulig ang pagtulog para makapanghikot sing maayo ang aton utok. Suno sa isa ka artikulo nga “How Sleep Can Affect Stress” nga ginhimo sang Banner Health, makabulig ang bastante nga tulog para mabuhinan ang aton kabalaka kag stress. Dapat magpain ka man sang tion para maglingawlingaw. (Man. 8:15) Ginpaathag sang isa ka sister kon ano ang nakabulig sa iya nga makapabilin nga malipayon. Nagsiling sia: “Kon manami ang tiempo, nagalakatlakat ako sa gua para mainit-initan ako. Kag kada bulan, nagapain ako sang isa ka adlaw para maglingawlingaw upod sa akon abyan.”

13. Paano makabulig ang pagkadlaw? (Hulubaton 17:22)

¹³ Panikasugi nga magkadlaw bisan pa mabudlay ang sitwasyon. (Basaha ang Hulubaton 17:22; Man. 3:1, 4) Ang pagkadlaw makabulig sa imo pisikal kag mental nga kapagros. Kon may ginaatipan ka, may mga nagakatabo gid pirme nga wala mo ginapaabot. Pero kon kadlawan mo lang ang indi maayo nga mga sitwasyon, mas mahapos para sa imo nga batason ini. Kag kon magkaupod kamo nga nagakadlaw sang imo ginaatipan, mas magasuod pa gid kamo.

14. Paano makabulig ang pagsugid sa imo masaligan nga abyan sang imo ginabatyag?

¹⁴ Isugid sa imo masaligan nga abyan ang imo ginabatyag. Bisan pa ginatinguhaan mo gid nga indi madula ang imo kalipay, may mga tion gihapon nga masubuan ka. Sa sini nga mga tion, mas maayo kon isugid mo ang imo ginabatyag. Isugid ini sa imo abyan nga nakaintiende sa imo kag kilala mo nga kalmado. (Hulu. 17:17) Ang iya pagpamati kag pagpalig-on sa imo makabulig sa imo nga makapabilin nga malipayon.—Hulu. 12:25.

15. Ngaa mangin malipayon ka kon imadyinon mo ang imo kabuhi sa Paraiso?

¹⁵ Imadyina ang imo kabuhi sa Paraiso upod ang imo ginaatipan. Dumduma nga temporaryo lang ang imo responsibilidad nga mag-atipan sa imo pinalangga nga tigulang na ukon nagamasakit. Kay man, indi amo sini ang hilikuton nga gintuyo ni Jehova nga himuon sang mga tawo. (2 Cor. 4:16-18) Pero, lapit na lang naton maeksperiensiahan ang “matuod nga kabuhi.” (1 Tim. 6:19) Gani kon istoryahan mo kag sang imo ginaatipan ang mga himuon ninyo sa Paraiso, mangin malipayon gid kamo. (Isa. 33:24; 65:21) Ang isa ka sister nga si Heather nagsiling: “Pirme ko ginahambalan ang akon mga ginaatipan nga sa Paraiso, magaupdanay kami sa pagpanahi, sa pagdalagan, kag sa pagbisikleta. Maluto man kami sang tinapay kag pagkaon para sa amon mga pinalangga nga banhawon. Ginapasalamatan gid namon si Jehova sa sini nga paglaum.”

KON PAANO MAKABULIG ANG IBAN

16. Paano naton mabuligan ang utod nga nagaatipan sa iya pinalangga? (Tan-awa man ang piktyur.)

¹⁶ Buligi sila para makapahuway sila. Puede naton buslan ang utod nga nagaatipan sa iya pinalangga. Paagi sini, makapahuway sia kag mahimo niya ang mga dapat niya himuon. (Gal. 6:2) May pila ka kauturan nga nagahimo sang iskedyul kon sin-o ang ila buligan kada semana. Ang isa ka sister nga si Natalya nga paralisado ang bana nagsiling: “May isa ka brother sa amon kongregasyon nga nagakadto sa amon sing isa ukon duha ka beses kada semana para updan ang akon bana. Magkaupod sila nga nagabantala, nagaistorya, kag nagatan-aw sang pelikula. Nalipay gid ang akon bana kon kaupod niya ini nga brother, kag mahatagan man ako sang tion para magpahuway kag himuon ang mga gusto ko.” Kon posible sa imo sitwasyon, puede mo man buslan kon gab-i ang nagaatipan sa iya pinalangga para makabawi sia tulog.

17. Paano naton mabuligan ang utod nga nagaatipan sa iya pinalangga sa tion sang miting?

¹⁷ Buligi sila sa tion sang miting. Bangod masako sila sa pag-atipan sa ila pinalangga, indi sila makapamati sing maayo sa tion sang miting, asembleya, kag rehiyonal nga kombension. Puede naton sila buligan paagi sa pagtupad sa ila ginaatipan sa bilog nga miting ukon bisan sa pila lang ka bahin sang programa. Kon indi na makahalin sa balay ang ila ginaatipan, puede naton sia kadtuan sa ila balay. Dayon updan naton sia sa pag-attend sa miting paagi sa videoconference. Paagi sini, maka-attend sa Kingdom Hall ang nagaatipan sa iya.

18. Ano pa ang puede naton himuon para buligan ang mga nagaatipan sa ila pinalangga?

¹⁸ Palig-una sila kag ipangamuyo. Sa bahin sang mga gulang, dapat regular nila nga palig-unon ang mga utod nga nagaatipan sa ila pinalangga. (Hulu. 27:23) Sa bahin naton tanan, dapat naton sila pirme hambalan nga palangga naton sila kag ginapabaloran naton ang ila ginahimo. Puede man naton pangabayon si Jehova nga padayon niya sila nga pabakuron kag buligan sila nga makapabilin nga malipayon.—2 Cor. 1:11.

19. Ano ang ginalauman naton nga matabo sa indi na lang gid madugay?

¹⁹ Sa indi na lang gid madugay, dulaon ni Jehova ang tanan nga rason sang aton pag-antos kag kasubo. Dulaon man niya ang balatian kag kamatayon. (Bug. 21:3, 4) “Ang mga piang magalukso kaangay sang usa.” (Isa. 35:5, 6) Indi na kita magaantos ukon ang aton mga pinalangga bangod sa pagtigulang. Kay man, malakip ini sa ‘nagligad nga mga butang nga indi na pagdumdumon.’ (Isa. 65:17) Pero bisan subong pa lang, samtang ginahulat naton ining dalayawon nga paglaum, indi gid kita pagpabay-an ni Jehova. Padayon kita nga magsalig nga hatagan niya kita sang kusog kay buligan gid niya kita nga ‘makabatas sing bug-os nga may pagpailob kag kalipay.’—Col. 1:11.