Manumbalik Agod Buligan ang mga Tawo sa Paghibalo Kon Paano Sila Mabuhi sing Dayon
1 Sugod sang ginpaguwa ang libro nga Mabuhi sing Dayon, kapin sa 65 milyones ka kopya ang naimprinta sa 115 ka hambal. Madamo sa mga alagad na karon ni Jehova ang nakatuon sang sadsaran nga mga kamatuoran sang Biblia paagi sa sining matahom nga instrumento. Sini nga bulan kag subong man sa Nobiembre, kahigayunan naton nga ipahamtang ining bulig sa pagtuon sa Biblia.
2 Pagduaw Liwat sa mga May Libro Na: Ang iban nga mga manugbantala nakatigayon sing maayong mga resulta paagi sa pagpakita sang listahan sang kaundan kag sa pagpamangkot sa interesado kon ano nga topiko ang naluyagan gid niya. Kon ang tagbalay nakapili na sing topiko, ipanugda nga basahon niya ang kapitulo sa libro antes sang masunod nga pagduaw.
3 Kon mahimo, dapat kita magtalana sing pat-od nga oras kag adlaw sa pagbalik. Antes makabalik dapat kita maghanda agod mapaathag ang pila ka parapo sa kapitulo nga napili sang tagbalay. Kon wala sia sing napili, ayhan masugdan naton nga hambalan ang kapitulo 1. Pagkatapos mabinagbinag ang pila ka parapo, magbangon sing pamangkot nga pagatuptupan sa masunod nga pila ka parapo. Mangin tikang ini para sa isa pa ka pagduaw liwat, kon san-o mahimo naton mapadayon ang pagtuon sa Mabuhi sing Dayon nga libro.
4 Sa pagkamatuod, kon ang tagbalay may mga pamangkot, labing maayo nga binagbinagon anay ini. Mahimo nga ang iya mga pamangkot ginasabat sang libro. Paagi sa paghibalo naton sing maayo sang mga kaundan sang libro, mahimo naton mabuksan ang nagakaigo nga mga parapo kag magamit ang materyal sa pagsabat sa pamangkot nga ginbangon.
5 Pagduaw Liwat sa mga Nabilinan Naton sing Tract: Ayhan nabilinan naton ang tagbalay sing isa ka kopya sang tract nga Mahidaiton nga Bag-ong Kalibutan. Sa pagduaw liwat, mahimo naton mapaathag ang unang mga parapo sang tract.
Kon ang tagbalay nagapakita sing matuod nga interes, sa paglab-ot naton sa katapusan sang unang parapo sa pahina 3, diin ginabalikwat ang Salmo 37:29, mahimo kita makasiling:
◼ “Ina nga mga pulong nagapadaku kon ano ang ginahambalan sa sining publikasyon nga Mahimu Ka Mabuhi sing Dayon sa Paraiso sa Duta. Talupangda ang ginasiling diri sa parapo 3 sang kapitulo 1 sa ubos sang tig-ulo nga ‘Kon Ngaa Makapati Kita.’ ” Nian mahimo naton mabasa ang parapo 3, mapamangkot ang naimprinta nga pamangkot sa sini, kag mapadayon ang parapo 4 kag 5 sa sining paagi. Nian makasiling kita: “Ngaa ang mga kahimtangan wala gid nahisuno sa mga katuyuan sang Dios karon? Ang masunod nga pila ka parapo nagapaathag sina, kag luyag ko magbalik sa masunod nga semana sa sini man nga oras kag sabton ina nga pamangkot para sa imo.” Kon ang tagbalay nagpakita sing matuod nga interes, ayhan matanyag naton ang libro sa sini nga tion. Ukon ayhan mamat-od kita nga himuon ini sa katapusan sang aton masunod nga paghambalanay.
6 Sa pagtanyag sing “Mabuhi sing Dayon” nga libro, mahimo kita makasiling:
◼ “Napat-od ko nga luyag mo makatigayon sing kaugalingon nga kopya sining publikasyon. Busa mabasa mo ini sing abanse kag nian matigayon mo ang labi pa sa aton masunod nga paghambalanay.” Kon ang tagbalay nagapasugot sa pagkuha sing libro, nian matanyag naton ini sa kinaandan nga amot.
7 Ginsugo ni Jesus ang iya mga sumulunod nga tudluan ang iban sang ila natun-an. Ginapangamuyo naton nga si Jehova magapadala sing dugang pa nga mga manugpangabudlay. Busa nian, himuon naton ang aton bahin sa pagpangita sa mga interesado kag sa pagtudlo sa ila nga mangin mga masigkamanugpangabudlay sa ani.—Mat. 9:37; 28:19, 20.