Pagbulig sa Iban nga Makilala ang Daku nga Bahandi
1 Kon ginabantala naton ang maayong balita sang Ginharian, ang isa sang aton mga tulumuron amo ang pagbulig sa mga tawo nga maapresyar ang balor sang Pulong sang Dios. (Filip. 3:8) Ang aton literatura may importante nga bahin sa pagpalapnag sang mensahe sang Ginharian. Halimbawa, ang Mabuhi sing Dayon nga libro nagbulig sa ginatos ka libo ka tawo sa pag-alagad kay Jehova subong resulta sang mga kamatuoran nga ila natun-an.
2 Ang aton ministeryo indi lamang pagbilin sing literatura sa mga tawo. Dapat naton ipakilala ang mensahe sa makagalanyat nga paagi, pamatian nga may paghantop ang ginasiling sang tagbalay, kag nian mangin handa nga ‘mangatarungan sa iya gikan sa Kasulatan.’—Binu. 17:2.
3 Paano Ini Himuon? Ang aton mga introduksion mahimo magabukas sing dalan para ipakita sang mga tagbalay kon bala interesado gid sila sa Biblia kag sa mensahe sini.
Ayhan makasiling ka:
◼ “Nagaduaw kami agod ipaathag ang kahulugan sang nagakatabo sa kalibutan karon. Sa tunga sang madamo nga tawo diutay lamang ang interesado sa Dios kag sa iya mga talaksan sang pagkabuhi subong sang ginbalay sa Biblia. Nakaimpluwensia ini sing daku sa panimuot sang mga tawo sa isa kag isa. Natalupangdan mo bala ini? [Pakumentuha sia. Ayhan mapatuhuyan mo ang espesipiko nga mga halimbawa.] Talupangda palihug ang panimuot sadtong ginsambit sa 2 Timoteo 3:1-5, kag sugiri ako kon ginahunahuna mo nga kaangay sini ang kalibutan karon. [Basaha; pakumentuha sia.] May maligdong nga rason bala nga paabuton ang maayo pa nga mga kahimtangan sa palaabuton?” Patuhuyi ang larawan sa mga pahina 12 kag 13 sang Mabuhi sing Dayon nga libro kag ipatuhoy ang igtalupangod sa parapo 12 kag 13. Itanyag ang libro.
4 Kon isa ka ginikanan ang magguwa sa ganhaan, mahimo naton sugdan ang aton paghambalanay sa sining paagi:
◼ “Nagapakigsugilanon kami sa mga tawo nga interesado kon paano naton malandas sing maayo pa ang mga problema sa pagkabuhi sang pamilya. Ginatinguhaan naton tanan nga himuon ang aton labing maayo nga masarangan, apang kon may makabulig sa aton nga matigayon ang daku pa nga kadalag-an, interesado kita, indi bala? [Pasabta sia.] Ang Biblia nagahatag sing panuytoy sa sini subong sang mabasa sa Colosas 3:12-14. [Basaha.] Gani, ano ang kinahanglan agod maagom ang madinalag-on nga pagkabuhi sang pamilya? Talupangda ang ginasiling sining publikasyon sa kapitulo nga natig-uluhan sing ‘Paghimu nga Madinalag-on sa Pagkabuhi sang Pamilya.’ ” Basaha ang parapo 3 sa pahina 238 sang Mabuhi sing Dayon nga libro. Kon ang tagbalay masako ukon wala sa gilayon nagahulag, tinguhai nga matanyag ang ulihi nga magasin nga nagahinun-anon nahanungod sa pamilya ukon ang tract nga Magkalipay sa Pagkabuhi Subong Pamilya.
5 Indi naton luyag nga mawasi ang aton katuyuan sa paghatag sing maid-id nga panaksi nahanungod sa Ginharian. (Mat. 24:14) Paagi sa maayo nga paggamit sang Biblia kag sa makadalayaw nga bahandi sang teokratikong literatura nga matigayon naton, masinaligon kita nga makapaabot kay Jehova sang iya pagpakamaayo sa pagtuman sang iya kabubut-on sa sining importante gid nga panahon.—Gal. 6:9.