Itanyag ang Kalipay sa Pamilya nga Libro sa mga Tawo Sang Tanan nga Pangidaron
1 Ang isa ka 11-anyos nga bata nga lalaki nga taga-California nagpabutyag sang iya apresasyon sa libro nga Ang Sekreto sang Kalipay sa Pamilya. Sia nagsulat: “Nagapasalamat ako tungod sini, kag ginapalig-on ko ang iban pa nga mga pamilya nga basahon ini nga libro bangod maayo gid ini. Nagabulig ini sa akon pamilya nga matigayon ang kalinong kag kalipay sa amon puluy-an.” Ang eksperiensia sini nga bata dapat magpalig-on sa aton nga itanyag ang Kalipay sa Pamilya nga libro sa mga tawo sang tanan nga pangidaron. Yari ang pila ka panugda nga ayhan luyag mo tilawan sa imo ministeryo sa Pebrero.
2 Kon nagapakigsugilanon sa isa ka pamatan-on, mahimo makasiling ka:
◼ “Madamo sang pareho sa imo sing edad ang nagahunahuna sa pagminyo. Apang diin kita makakita sing masaligan nga impormasyon tuhoy sini nga butang? [Pasabta sia.] Ang mga pamatan-on masunson nagasiling nga indi sila sigurado kon handa na sila sa pagminyo. Pasugira ako kon ano ang ginasiling sini nga libro tuhoy sini nga topiko.” Buksi ang pahina 14 sang Kalipay sa Pamilya nga libro, kag basaha ang parapo 3. Nian ipakita ang tagsa ka subtitulo sa kapitulo. Itanyag ang libro, kag maghimo sing kahimusan nga makabalik.
3 Kon nagasugilanon sa isa ka ginikanan, mahimo makasiling ka:
◼ “Ginapaambit namon sa mga ginikanan ang pila ka praktikal nga mga giya nga epektibo gid sa pagpadaku sa kabataan. Gintipon ini sa sini nga libro nga Ang Sekreto sang Kalipay sa Pamilya.” Buksi ang pahina 55. Basaha ang parapo 10, dayon ang Deuteronomio 6:6, 7, sa parapo 11. Nian ipakita ang nagahilay nga mga dinalan sa parapo 12 tubtob 16. Magpadayon paagi sa pagsiling: “Madamo ang nabuligan sini nga libro nga matigayon ang daku pa nga kadalag-an subong mga ginikanan. Kon luyag mo ini basahon, nalipay ako sa pagbilin sa imo sini nga kopya sa diutay lamang nga amot.”
4 Kon nagapakighambal sa isa ka tigulang, mahimo makasiling ka:
◼ “Pagkatapos ko basahon ining malip-ot nga komento, sugiri ako palihug kon ano ang imo panghunahuna.” Buksi ang Kalipay sa Pamilya nga libro sa pahina 169, kag basaha ang nahaunang duha ka dinalan sang parapo 17. Nian mangayo sing sabat. Depende sa sabat, mahimo nimo basahon ang dugang pa nga mga dinalan gikan sa libro antes ini itanyag.
5 Kon nagatatap sang mga napahamtangan sing Kalipay sa Pamilya nga libro, dumduma nga tinguhaan nga makasugod sing isa ka pagtuon sa Biblia. Ayhan nagakaigo ini sugdan sa Leksion 8 sa Ginapatuman nga brosyur ukon sa kapitulo 15 sa Ihibalo nga libro. Sa amo man nga tion, panikasugan naton nga buligan ang mga tawo sang tanan nga pangidaron sa pagtukod sing isa ka malipayon nga pagkabuhi sang Cristianong pamilya.