Pagpayunir​​—⁠Maalamon nga Paggamit Sang Aton Tion!

¹ ‘Madamo ako sing dapat himuon! Maalamon gid bala nga magpayunir ako sini nga tion?’ Amo sini anay ang ginhunahuna sang isa ka utod nga babayi samtang ginapamatian ang isa ka gulang nga isa man ka payunir nga nagahatag sing bahin nga “Pagsugod sa Ministeryo nga Pagpayunir” sa sirkito nga asambleya. Ang isa man ka lamharon nga utod nga lalaki sa tumalambong naghunahuna, ‘Paano niya nasarangan nga magpayunir? Indi ako isa ka gulang, apang ang akon kabuhi puno na sing hilikuton!’

² Samtang padayon nga ginapaathag sang gulang ang mga pagpakamaayo sang pagpayunir, gin-interbyu niya ang pila ka payunir gikan sa sirkito nga nagsugid sang mga pagbag-o nga ginhimo nila agod makapayunir kag kon paano ginpakamaayo sing bugana ni Jehova ang ila mga panikasog. Ang isa baldado, ang isa may dimatinuuhon nga tiayon, kag ang isa nagbiya sang kalibutanon nga karera apang nangabuhi suno sa iya kinitaan. Sang mabatian kon paano ining mga payunir nagmadinalag-on paagi sa bulig ni Jehova, gin-usisa liwat sang utod nga lalaki kag sang utod nga babayi sa tumalambong ang ila mismo panghunahuna kag mga kahimtangan. Ginaagda namon kamo nga himuon man ini, ilabi na karon nga ang ginpanubuan nga lalab-uton nga oras para sa mga payunir masarangan na sang madamo pa nga manugbantala sing maayong balita.

³ Nahibaluan naton nga si Jehova amo ang Manunuga kag Soberano sa Bug-os nga Uniberso kag utang naton sa iya ang aton kabuhi. (Dan. 4:​17; Binu. 17:28) Maathag sa aton nga isa lamang ka organisasyon ang ginagamit ni Jehova. Pribilehiyo naton nga alagaron sia sing matutom upod sini, nagasakdag sa “matutom kag mainandamon nga ulipon” sa paghatag sing panaksi sang Ginharian sa wala pa mag-abot ang katapusan. (Mat. 24:​45; 25:​40; 1 Ped. 2:9) Madugay na nga nagakabuhi sa “katapusan nga mga adlaw,” nahibaluan naton nga malip-ot na lamang ang tion sa pagbantala. (2 Tim. 3:1) Sa amo man nga tion, dapat naton suportahan ang aton mga pamilya sa materyal. (1 Tim. 5:8) Indi subong sang nagligad, ang kita sang isa haluson na nga makaigo. Ayhan ang aton panglawas indi na subong sang una. Kag sing tampad, luyag naton makatigayon sing diutay nga tion kag kuwarta nga magamit naton sa aton kaugalingon. (Manugw. 3:​12, 13) Gani mahimo kita magpalibog kon ang pagbaton sa imbitasyon nga magpayunir maalamon gid.

⁴ Kita mismo ang dapat mag-usisa sing maayo sang aton kahimtangan kag mamat-od kon bala mahimo kita magpayunir. (Roma 14:​12; Gal. 6:5) Makapalig-on makita ang madamo nga nagsabat sa panawagan nga magpayunir. Walay sapayan sang mga pag-ipit kag mga problema sining katapusan nga mga adlaw, ang report sa pag-alagad nga ginbalhag sa 1999 Yearbook nagapakita nga malapit sa 700,000 ka katawhan ni Jehova sa bug-os nga kalibutan ang maukod nga nagapadayon sa ministeryo nga pagpayunir. Nagaalagad man sa idalom sang mapiot nga pangabuhi, maiwat nga transportasyon, nagaeksperiensia sing mga problema sa kapagros, ukon nagasumalang sing iban pa nga mga problema kag mga kabudlayan, ining mga kauturan nga lalaki kag babayi wala ginakapoy sa paghimo kon ano ang maayo, kag dalayawon ini. (Gal. 6:9) Ginbaton nila ang tanyag ni Jehova nga tilawan sia. (Mal. 3:10) Nagabatyag sila nga ang pagpayunir isa gid ka maalamon nga paggamit sang ila limitado nga tion kag manggad kag tunay sila nga ginpakamaayo ni Jehova tungod sa paghimo sing kinahanglanon nga mga pagbag-o agod magsulod kag magpabilin sa hilikuton nga pagpayunir.

⁵ Ang mga Payunir Ginapakamaayo: Ang isa ka utod nga babayi sa Cameroon nga may gamay pa nga anak nga babayi nagapaathag: “Sugod sang mabun-ag sia, ang akon anak nga babayi pirme ko ginaupod sa ministeryo. Bisan sang wala pa sia nagalakat, ginasapnay ko sia sa akon likod sa bulig sang tela. Sang isa ka aga sa ministeryo, nagdulog ako sa isa ka tiangge sa higad-dalan. Ang akon anak nagpalayo sa akon, nga bitbit ang pila ka magasin halin sa akon bag. Nagtakangtakang sia pakadto sa kaiping nga tiangge. Bisan indi pa sia maayo maghambal, naganyat niya ang igtalupangod sang isa ka babayi kag gintanyagan sia sing magasin. Nakibot gid ang babayi nga makita ang isa ka bata nga nagapakigbahin sa sini nga hilikuton. Gilayon niya nga ginbaton ang magasin subong man ang isa ka pagtuon sing Biblia sa puluy-an!”

⁶ Bilang sabat sa panawagan para sa dugang pa nga mga auxiliary payunir, ang isa ka gulang kag padre-de-pamilya sa Zambia nga may bug-os tion nga palamugnan namat-od sa pag-auxiliary payunir walay sapayan sang iya masako nga iskedyul. Luyag niya magpahamtang sing halimbawa sa kongregasyon kag sa iya pamilya. Sa pila ka okasyon, ginadulog niya ang iya salakyan sa higad-dalan kag ginapatokar ang The Secret of Family Happiness sa audiocassette kag gin-agda niya ang mga nagalabay sa pagpalapit kag sa pagpamati sa kon ano ang ginabasa sing mabaskog. Sa sini nga paagi, nakapahamtang sia sing 16 ka Kalipay sa Pamilya nga libro kag 13 ka Ihibalo nga libro, kag nakasugod sing duha ka pagtuon sa Biblia.

⁷ Ang maayo nga espiritu sang pagpayunir nakita man sa kaiping nga pungsod sang Zimbabwe. Sadtong Abril 1998, ang isa ka kongregasyon nga may 117 ka manugbantala nagreport sing 70 ka auxiliary kag 9 ka regular payunir. Ang isa pa ka kongregasyon nga may 94 ka manugbantala may yara 58 ka auxiliary payunir nga nagreport. Ang isa pa, nga may 126 ka manugbantala, nagreport nga 58 ang namat-od sa pag-auxiliary payunir upod sa 4 ka regular payunir. Ang pag-alagad sang nagligad nga tuig tumalagsahon gid sa Zimbabwe. Bisan nga ang mga kauturan nga lalaki didto tuman gid kasako sa mga obligasyon sa pamilya, sa mga hilikuton sa kongregasyon, kag sa pagpatindog sa sanga, nagkonsentrar sila sa paghinguyang sang ila tion sing maalamon sa ministeryo.

⁸ Nahibaluan sang mga payunir nga ang pagsulod sa hilikuton nga pagpayunir kag ang pagpabilin sa sini wala nasandig sa ila kaugalingon nga kusog. Sila ang una nga nagabaton nga ang bisan ano man nga nahimo nila nangin posible lamang bangod sila “nagasalig sa kusog nga ginaaman sang Dios.” (1 Ped. 4:11) Ang ila pagtuo nakabulig sa ila nga magpabilin sa ila ministeryo adlaw-adlaw. Sa baylo nga tinguhaan ang ila mismo kahulasan kag kasulhayan, nahibaluan sang madinalag-on nga mga payunir nga agod magpadayon, ang “daku nga pagpanikasog” mahimo nga kinahanglan, apang nagabaton sila sing madamo nga pagpakamaayo subong resulta.​—⁠1 Tes. 2:⁠2.

⁹ Ang Halimbawa ni Pablo Takus Ilugon: Ang Biblia nagarekord sang mga hinimuan ni apostol Pablo sa ministeryo kag sang maayong bulig nga ginhatag niya sa tuman kadamo nga tawo. Apang, kon may isa man nga madamo sing ginahimo anay, si Pablo ini. Nagbatas sia sing paghingabot kag pisikal nga mga kabudlayan agod mabantala ang maayong balita kag agod mapabakod ang mga kongregasyon. Nagbatas man sia sing mabug-at nga problema sa kapagros. (2 Cor. 11:​21-29; 12:7-10) Determinado sia nga gamiton ang iya tion sing maalamon. Ginbaton niya nga nahimo niya ang iya tanan nga buluhaton paagi sa bulig ni Jehova. (Filip. 4:13) Wala sing isa sa mga nabuligan ni Pablo ang may rason sa paghinakop nga ang iya tion kag mga panikasog sa pag-alagad kay Jehova nauyang ukon nagamit kuntani sing mas maayo. Ti, nagabenepisyo kita gihapon karon sa maalamon nga paggamit ni Pablo sang iya tion! Ginapasalamatan gid naton sing daku kon paano kita nabuligan sang iya inspirado nga laygay nga mausisa ang aton mga prioridad kag magpabilin sa kamatuoran sa sining mabudlay nga mga tion!

¹⁰ Indi kaangay sang nagligad, ‘ang tion nga nabilin karon sa pagbantala sing maayong balita ginpalip-ot.’ (1 Cor. 7:​29; Mat. 24:14) Busa, nagakaigo nga pamangkuton ang aton kaugalingon, ‘Kon wala ginapaabot nga mapatay ako buwas, masiling ko bala karon kay Jehova nga gingamit ko sing maalamon ang akon tion?’ (Sant. 4:14) Ngaa indi karon sugilanunon si Jehova sa pangamuyo, ginapasalig sia sang imo handum nga gamiton ang imo tion sing maalamon subong isa sang iya mga Saksi? (Sal. 90:12) Mangamuyo kay Jehova nga buligan ka nga mapasimple ang imo kabuhi. Bisan pa namat-od ka anay nga indi ka makapayunir, nakita mo bala karon sa imo kabuhi nga mahimo ka na makapayunir?

¹¹ Himusli ang Imo mga Kahimtangan: Sing halangpunon, bangod sang mga kahimtangan indi tanan nga nagahandum sa pagpayunir ang makaiskedyul sing 70 ka oras sa isa ka bulan agod makaregular payunir. Apang, madamo nga manugbantala ang nagahimo sing kahimusan sa paghinguyang sing 50 ka oras sa isa ka bulan sa ministeryo subong mga auxiliary payunir sing mas masunson kon mahimo ukon sing dalayon. Kon ang imo mga kahimtangan wala karon nagatugot sa imo nga mag-auxiliary ukon magregular payunir, indi maluyahan sing buot. Padayon nga ipangamuyo nga magabalhin ang imo mga kahimtangan. Sa amo man nga tion, kon indi gid posible ang mga pagbag-o, malugpayan sa paghibalo nga nahamuot si Jehova sa bisan ano man nga masarangan mo nga himuon sing bug-os tagipusuon sa pag-alagad sa iya. (Mat. 13:23) Makita niya nga nagatindog ka sing malig-on dampig sa iya kag nagapanikasog ka sing lakas nga mangin isa ka matutom nga manugbantala nga wala gid nagatugot nga magligad ang isa ka bulan nga wala ginahimuslan ang mga kahigayunan nga makapanaksi. Ayhan mahimo ka mag-uswag paagi sa pagpauswag sang imo mga ikasarang sa pagpanaksi, nagapangabudlay nga mangin sampaton nga manugbantala kag manunudlo sing maayong balita.​—⁠1 Tim. 4:⁠16.

¹² Bangod ang “daku kag makakulugmat nga adlaw ni Jehova” malapit na katama, dapat naton gamiton ang nabilin nga tion sing maalamon agod matapos naton ang hilikuton nga gintangdo sa aton nga himuon. (Joel 2:31) Nakahibalo si Satanas nga malip-ot na lamang ang iya tion, kag subong sang wala pa gid matabo sang una, ginatinguhaan niya nga himuon ang tanan nga masarangan niya agod gamuhon ang aton kabuhi kag pabudlayon ang pagkonsentrar naton sa importante gid nga mga butang. (Filip. 1:​10; Bug. 12:12) Indi pagpakadiutaya ang interes sang Dios sa imo. Si Jehova sarang makabulig sa imo nga pasimplehon ang imo kabuhi kag himuon ang imo bug-os nga masarangan sa ministeryo. (Sal. 145:16) Sing makalilipay, paagi sa pag-usisa liwat sa ila mga kahimtangan, natukiban sang madamo nga mahimo gali sila makabuylog sa guban sang mga auxiliary kag regular payunir. Sa pagkamatuod, ang mga payunir may daku nga kaayawan sa paggamit sang ila tion sing maalamon. Mangin isa ka bala sa ila?