Repaso sa Teokratikong Eskwelahan sa Pagministro

Answer Sheet para sa written review sa teokratikong eskwelahan sa pagministro sa materyal sa New World Translation of the Holy Scriptures [bi12]; “All Scripture is Inspired of God and Beneficial” (1990 edisyon) [si]; Ang Sekreto sang Kalipay sa Pamilya [fy-hv]; Ang Lalantawan [w]; Awake! [g]; kag semanal nga pagbasa sa biblia, nagatuptop sang mga asaynment para sa semana sang enero 4 tubtob Abril 19, 1999.

MGA INSTRUKSION: Ang kada isa dapat nga may mga pamangkot para sa repaso subong sang makita sa Ang Aton Ministeryo sa Ginharian. Pat-ura nga ang tanan nga luyag makigbahin may papel nga sululatan. Nian dapat ipahibalo sang manugtatap sa eskwelahan kon san-o magsugod. Ang repaso limitado sa 25 minutos, pagkatapos sini basahon sing mabaskog sang manugtatap sang eskwelahan ang mga pamangkot kag mga sabat (ukon agdahon ang pagpakigbahin sang tumalambong para sa iban nga mga pamangkot). Dapat sia magkonsentrar sa mas mabudlay nga mga pamangkot, nagabulig sa tanan nga mahangpan sing maayo ang mga sabat. Mahimo tsekan sang tagsa ka estudyante ang iya kaugalingon nga papel, nagatsek sang tagsa ka husto nga sabat. Ang mga papel indi pagakuhaon. Indi pirme praktikal nga ihatag ang tanan posible nga mga sabat sa answer sheet; gani ang bisan ano nga sabat nga nagakaigo kag nahisanto sa aton karon nga paghangop ginabaton, bisan pa nga ang punto indi makita sa answer sheet. Tubtob nga ang kongregasyon wala pa makarepaso, ang answer sheet indi mahimo ipabasa sa kongregasyon, apang mahimo ini gamiton sang manugtatap sa eskwelahan subong giya sa mga punto nga luyag niya ipadaku sa kongregasyon. Ang Biblia lamang ang mahimo nga gamiton sa tion sang repaso.

PAHIBALO SA MGA MANUGTATAP SANG ESKWELAHAN: Ang nagahilay nga numero sa unahan sang ginkuhaan nga materyal nagapakita sang semana pagkatapos sang nagligad nga repaso nga ang materyal nga ginbasihan sang pamangkot gintuptupan.

Sabta ang tagsa ka masunod nga mga pinamulong sing Husto ukon Sala:

1. Si Jehova wala pirme nagdikta sing letra-por-letra sang kon ano ang narekord sa Biblia. (2 Tim. 3:16) [1, w97 6/15 p. 5 par. 3] Husto.

2. Ang paghiusa sa pamilya kag ang espirituwal nga pagtubo sang kabataan nasandig sing bug-os sa mga ginikanan. (Hulu. 22:6) [9, fy-HV p. 85 par. 19] Sala. Ang mga ginikanan kag mga anak dapat magbuligay sa pag-aplikar sang Makasulatanhon nga mga prinsipio. Ang iban nga mga bersikulo sang Biblia nagapadaku sang salabton sang anak nga mamati kag magtuman sa mga ginikanan. (Hulu. 1:8)

3. Bangod ang sala “nagapuot sa gawang,” indi mahimo nga malikawan ni Cain ang paghimo sing malubha nga sala. (Gen. 4:7) [4, Semanal nga pagbasa sa Biblia; tan-awa ang w94 6/15 p. 14 par. 11.] Sala. Subong sang ginpaathag ni Jehova, ang sala nagahulat sa pagdamhag kag sa pagtukob kay Cain kon pahanugutan niya ini; sa baylo nga pamatukan kag ‘daugon’ ang iya undanon nga kailigbon, gintugutan ini ni Cain nga magkontrol sa iya.

4. Samtang nagahamtong ang tin-edyer, dapat sia awtomatiko nga hatagan sing dugang nga kahilwayan sa iya pagpili sing kalingawan. [5, fy-HV p. 73 par. 20] Sala. Ang dugang nga kahilwayan matigayon kon ang tin-edyer magpakita sa iya mga pagpili sing kahilwayan nga nagauswag sia padulong sa espirituwal nga pagkahamtong.

5. Ang handum nga pahamut-an ang aton Manunuga nagapahulag gid agod isugid ang kamatuoran sa tanan nga tion. (Hulu. 6:17) [6, g97 2/22 p. 19 par. 4] Husto.

6. Agod ang ‘mga pulong sang aton baba kag ang pagpamalandong sang aton tagipusuon kalahamut-an kay Jehova’ sa pangamuyo, dapat kita manikasog nga mangin matanlas kon mahimo. (Sal. 19:14) [8, w97 7/1 p. 29 par. 4-5] Sala. Si Jehova wala nagadayaw sa matanlas nga hambal; nahamuot sia sa aton matinahuron, tinagipusuon nga mga ekspresyon, bisan daw ano man ka simple ini ginhambal.

7. Ang mga mando, palatukuran, kag kasuguan ni Jehova nga ginsambit sa Genesis 26:5 nagapatuhoy sa Kasuguan nga katipan. [11, Semanal nga pagbasa sa Biblia; tan-awa ang w92 7/1 p. 10 par. 8.] Sala. Ang Kasuguan nga katipan wala pa nagaluntad; nagapatuhoy ini sa sadsaran nga mga kasuguan ni Jehova may kaangtanan sa katilingban sang mga patriarka.

8. Sang nagsiling si Jesus nga “ang imo pagtuo nag-ayo sa imo,” suno sa Lucas 8:48, ang buot niya silingon amo nga ang nagamasakit nga babayi dapat magpahayag sing pagtuo sa iya subong ang Mesias antes niya sia ayuhon. [13, w97 7/1 p. 4 par. 2-4] Sala. Ang babayi nga ginhinambitan sa sining teksto wala sing bisan ano man nga ginsiling antes sia gin-ayo ni Jesus; ang pagpalapit niya sa iya agod mag-ayo pamatuod sang iya pagtuo sa iya subong ang Mesias.

9. Ang Genesis 11:1 amo ang isa sang pila ka teksto sa Biblia nga nagagamit sang tinaga nga “duta” sa pagpatuhoy sa katawhan sa kabilugan, ukon sa katilingban sang tawo. [12, g97 1/8 p. 27 par. 3 (HV, p. 19 par. 3)] Husto.

10. Bisan pa wala sing patimaan sang pagpasugot ni Dina, may salabton gihapon sia tungod sa pagkadula sang iya pagkaulay. (Gen. 34:1, 2) [13, Semanal nga pagbasa sa Biblia; tan-awa ang w85-E 6/15 p. 31 par. 4.] Husto. Paagi sa pagpamat-od nga makig-upod sa imoral nga mga tawo nga nagbutang anay sa katalagman sa iya katigulangan nga sanday Sara kag Rebeca, ginbutang niya ang iya kaugalingon sa kahuluy-an.

Sabta ang masunod nga mga pamangkot:

11. Ano ang ginpahangop ni Satanas paagi sa pangatarungan nga ginhatag sang Genesis 3:1-5? [3, Semanal nga pagbasa sa Biblia; tan-awa ang w95 7/15 p. 5 par. 1.] Ginpahangop niya nga ang Dios naggahom sing malain paagi sa pagdingot sang butang nga maayo kanday Adan kag Eva; kon magkaon sila sing ginadumilian nga bunga, mahimo na sila mahilway. (Bastante na ang ideya)

12. Sa Bugna 19:15, ano ang ginalaragway sang “malaba nga espada nga matalom” nga nagaguwa sa baba ni Jesus? [2, Semanal nga pagbasa sa Biblia; tan-awa ang w90 5/15 p. 4 par. 4.] Nagalaragway ini sa awtoridad ni Cristo sa pagmando nga pamatyon ang tanan nga nagadumili sa pagsakdag sa Ginharian sang Dios. (Bug. 1:16; 2:16)

13. Ano ang ginapadaku sang katunayan nga si Moises nagahatag sing espesipiko nga mga petsa may kaangtanan sa Anaw sang adlaw ni Noe? [5, g97 2/8 p. 26 par. 4 (HV, p. 28 par. 4)] Gintamod ni Moises ang Anaw subong isa ka matuod nga hitabo; ang paghatag sing espesipiko nga mga petsa nagapatuhay sang pagkamatinuuron sang Biblia sa una nga mga tinaga sang madamong sugilanon, “Sang una nga panahon . . .” (Bastante na ang ideya)

14. Paano si Abraham “nagpanawag sa ngalan ni Jehova”? (Gen. 12:8) [6, Semanal nga pagbasa sa Biblia; tan-awa ang w89 7/1 p. 20 par. 9.] Si Abraham masidla nga nagpahayag sang ngalan sang iya Dios, si Jehova, sa iya panimalay kag sa mga taga-Canaan. (Gen. 14:22-24)

15. Sa konteksto, ano ang buot silingon ni Jehova sang nagsiling sia kay Pablo: “Ang akon dibagay nga kaayo tuman na para sa imo”? (2 Cor. 12:9) [7, w97 6/1 p. 25 par. 3] Ayhan nagasiling sia nga ang pribilehiyo nga mangin disipulo “tuman na” kag indi magalakip sa milagruso nga pagdula sa personal nga mga problema sa kabuhi.

16. Ano ang maathag nga nagtiklod sa asawa ni Lot sa pagbalikid, nga tungod sini nangin haligi sia nga asin? (Gen. 19:26) [8, Semanal nga pagbasa sa Biblia; tan-awa ang w90 4/15 p. 18 par. 10.] Ini amo ang iya gugma sa iya puluy-an kag sa iya materyal nga mga butang didto. (Luc. 17:31, 32)

17. Paano ginatamod sang mga Cristiano ang pagbakal sing mga butang nga kinawatan? (Ex. 22:1; Jer. 17:11) [7, Semanal nga pagbasa sa Biblia; tan-awa ang w92 6/15 p. 30 par. 3; p. 31 par. 1, 7.] Ginalikawan nila ang pagbakal sang mga butang nga nahibaluan nila nga kinawatan.

18. Suno sa Genesis 33:18, paano ginpakita ni Jacob nga indi sia interesado sa pagpakig-upod sa mga taga-Canaan? [13, Semanal nga pagbasa sa Biblia; tan-awa ang w95 9/15 p. 21 par. 4.] Gintukod niya ang iya kampo sa guwa sang siudad sang Siquem kag ginpatok ang iya kaugalingon nga suplay sang tubig. (Juan 4:6, 12)

19. Paano ang mga paggawi ni Jose nga ginlaragway sa Genesis 37:13 kaanggid sang kay Jesus? [14, Semanal nga pagbasa sa Biblia; tan-awa ang w87 5/1 p. 12 par. 12.] Ginhimo ni Jose ang ginpangabay sang iya amay nga tan-awon ang kahimtangan sang iya mga utod, walay sapayan sang ila kaakig; subong man, ginbaton ni Jesus ang sugo ni Jehova sa iya diri sa duta, bisan pa nga mahimo ini magkahulugan sing daku nga pag-antos.

20. Ano ang kinatuhayan sa ulot sang Dios kag sang mga tawo may kaangtanan sa pagpabutyag sing kaakig? [16, g97 6/8 p. 19 par. 2-3] Sarang mapunggan ni Jehova ang iya kaakig, nga pirme matarong, makatarunganon, kag kontrolado; ang mga tawo nabudlayan sa pagpugong sang ila kaakig, sa kabilugan napaslawan sa pagbinagbinag sing maayo sa mga resulta, kag masunson nga nagaani sang mga resulta sang indi nila pagpugong sa ila kaakig.

Ihatag ang (mga) tinaga ukon prase nga kinahanglanon sa pagkompleto sa tagsa ka masunod nga mga pinamulong:

21. Ang pagpasibangod sing sayop nga mga motibo sa iban nga wala sing makatarunganon nga kabangdanan katumbas sa paghukom sa ila. [4, w97 5/15 p. 26 par. 5]

22. Ang pagkamatinuuron sang libro sang Genesis ginapakita paagi sa nasulod nga paghiliugyon, subong man sang bug-os nga paghisanto sini sa iban nga mga bahin sang inspirado nga Kasulatan. [3, si p. 14 par. 8]

23. Ang mga halimbawa nanday Jeroboam kag Eli makabulig sa mga ginikanan nga mahangpan ang mga resulta sang mangin tuman ka madumilion ukon tuman ka matinuguton sa pagpadaku sa bata. [7, fy-HV p. 80-1 par. 9-13]

24. Ang pagkuha sing sibu nga ihibalo isa ka importante nga tikang sa pagpalambo sing diosnon nga konsiensia. [9, w97 8/1 p. 4 par. 5]

25. Ang pagreport sa sala isa ka buhat sang may prinsipio nga Cristianong gugma nga ginapakita sa Dios, sa kongregasyon, kag sa nakasala. [15, w97 8/15 p. 30 par. 2]

Pilia ang husto nga sabat sa tagsa sang masunod nga mga pinamulong:

26. Ang (estrikto; malum-ok; nagakaigo) nga disiplina isa ka pamatuod sang gugma sang ginikanan sa iya anak. (Heb. 12:6, 11) [4, fy-HV p. 72 par. 18]

27. Ang Genesis 7:6, 11 nagatudlo sang tuig (2970; 2370; 2020) B.C.E., ‘sang ang pag-anaw sang tubig natabo sa duta.’ [5, Semanal nga pagbasa sa Biblia; tan-awa ang si p. 294 tsart.]

28. Sa Juan 8:32, ang kahilwayan nga ginhunahuna ni Jesus amo ang kahilwayan gikan sa (pagginahom sang Roma; disparatis; sala kag kamatayon). [10, w97 2/1 p. 5 par. 1]

29. Sa katapusan nga katumanan sang Genesis 22:18, ang binhi nagapatuhoy (kay Isaac; sa mga Israelinhon; kay Jesus kag sa 144,000). [9, Semanal nga pagbasa sa Biblia; tan-awa ang w98 2/1 p. 14 par. 8.]

30. Ang (pagkamatinumanon sa Mosaikong Kasuguan; pagkamaminatud-on sang Dios kag ang kahadlok nga indi sia mapahamut-an; kahadlok sa silot) ang nagbulig kay Jose nga pamatukan sing madinalag-on ang imoral nga mga pagsulay. (Gen. 39:9) [15, Semanal nga pagbasa sa Biblia; tan-awa ang w81 2/15 p.  7 par. 2 (HV, 8/15 p. 7 par. 1)]

Ibagay ang masunod nga mga kasulatan sa mga pinamulong nga nalista sa ubos:

Hulu. 5:3, 4; 15:22; 20:11; Efe. 5:19; 2 Tim. 3:16

31. Importante nga pat-uron sang mga ginikanan nga ang ila mga anak bug-os tagipusuon nga nagapati sa pagkaimportante sang matarong kag matinlo nga pagkabuhi. [Hulu. 20:11] [3, fy-HV p. 67 par. 8]

32. Ang kompidensial nga paghambalanay sa ulot sang mga ginikanan kag sang ila tin-edyer nga kabataan kinahanglanon agod huptan nga bukas ang linya sang komunikasyon. [Hulu. 15:22] [2, fy-HV p. 65 par. 4]

33. Ang yabi sa napauswag nga pagkanta sa mga miting sang kongregasyon amo ang nagakaigo nga panimuot sang tagipusuon. [Efe. 5:19] [11, w97 2/1 p. 27 par. 3]

34. Ang paghangop sa mga panudlo sang Pulong sang Dios, ang Biblia, kinahanglanon para sa kabuhi nga walay katapusan. [2 Tim. 3:16] [14, w97 8/15 p. 6 par. 5]

35. Agod malikawan ang pagsulay sang imoralidad, dapat naton kilalahon nga ini malain kag may makahalalit kag mapait nga mga resulta. [Hulu. 5:3, 4] [12, fy-HV p. 93 par. 9]