TULUN-AN 11

Kapagsik

Roma 12:11

KON ANO ANG HIMUON: Pahulaga ang imo tagpalamati paagi sa paghambal sing mapagsik.

Tuguti nga matandog ang imo tagipusuon. Samtang ginahandaan ang imo presentasyon, hunahunaa sing maayo kon daw ano ka importante ang mensahe sini. Mangin pamilyar sa materyal para mapabutyag mo ini halin sa tagipusuon.
Hunahunaa ang imo mga tagpalamati. Pamalandungi kon paano makabenepisyo ang iban sa impormasyon nga imo pagabasahon ukon itudlo. Hunahunaa kon paano ini mapresentar sa paagi nga maapresyar pa gid ini sang mga tagpalamati.
Himua nga buhi ang imo presentasyon. Maghambal sing mapagsik. Para mapabutyag ang imo balatyagon, magkumpas sing natural kag ipakita ang pagkasinsero sa imo nawong.

Indi paghimua nga batasan ang pagkumpas sing sulitsulit para indi matublag ang imo mga tagpalamati. Dapat nagakaigo ang imo pagkumpas. Ipakita ang kapagsik ilabi na kon nagatudlo sang panguna nga mga punto kag kon ginapahulag ang mga tagpalamati nga manghikot. Indi pagpasobrahi ang imo kapagsik sa bug-os nga presentasyon kay makapakapoy ini sa mga tagpalamati.