Lub 7 Hli

Txhua yam Yexus tau hais, tau ua, thiab tag nrho tej txuj ci nws tau ua puav leej ua tau raws nkaus li nws Leej Txiv lub siab xav ntag. (Yauhas 14:9) Peb khaws tau li cas ntawm Yexus tej txuj ci? Yexus thiab nws Txiv nkawd hlub peb heev. Thaum Yexus tseem nyob hauv ntiaj teb no, nws qhia tias nws hlub tib neeg heev los ntawm tej txuj ci nws ua los pab lawv. Muaj ib zaug, muaj ob tug yawg dig muag qw nrov nrov thov Yexus pab. (Mathais 20:30-34) Yexus “hlub nkawd heev,” nws thiaj li kho nkawd tej mob zoo du dais. Lus Kilis txhais cov lus “hlub nkawd heev” tias yog hlub tawm plaws hauv nruab siab nruab ntsws tuaj. Yexus txoj kev hlub no kuj ua tau rau nws pub zaub mov rau cov tshaib nqhis noj thiab kho tus neeg mob ruas. (Mathais 15:32; Malakaus 1:41) Tej no qhia rau peb tias Yehauvas uas yog tus Vajtswv muaj kev “hlub tshua” thiab nws tus Tub yeej hlub peb thiab tsis xav pom peb raug kev txom nyem li. (Lukas 1:78; 1 Petus 5:7) Nkawd tos tsis hnyu yuav muab noob neej tej teeb meem tshem tawm mus huv si! w23.04 3 ¶4-5

Peb yuav tau ua npaum li peb ua tau kom tsis txhob mus nyeem los sis mloog tej tswv yim uas Xatas lub qab ntuj no qhia tshwm. Peb yuav tau kawm thiab nyeem Vajlugkub kom peb thiaj xav txog tej yam dawb huv. Mus kev sib txoos thiab mus tshaj tawm txoj xov zoo yuav tiv thaiv tau peb tej kev xav. Yehauvas cog lus tias nws yuav tsis pub peb raug kev sim siab ntau tshaj li qhov uas peb nyiaj taus. (1 Kauleethaus 10:12, 13) Peb ib tug dhau ib tug yuav tau kub siab lug thov Yehauvas heev tshaj li yav tag los lawm kom peb tsis txhob tso Yehauvas tseg nyob rau lub caij nyuaj siab ntxhov plawv no. Yehauvas xav kom peb “qhia [peb] lub siab rau nws” thaum peb thov. (Ntawv Nkauj 62:8) Qhuas Yehauvas thiab ua nws tsaug rau txhua yam nws tau ua rau koj. Thov kom nws pab koj muaj lub siab tawv qhawv mus tshaj tawm txoj xov zoo. Taij thov nws pab thaum koj raug teeb meem los sis muaj kev sim siab. Tsis txhob cia ib yam dab tsi los sis leej twg tav tau koj thov Yehauvas tsis tseg tsis tu. w23.05 7 ¶17-18

Vim li cas peb ho mus sib txoos ua ke? Twb yog peb mus pe hawm kom tau qhuas Yehauvas. (Ntawv Nkauj 26:12; 111:1) Tsis tas li ntawd, peb sib txoos ua ke xwv ib leeg thiaj txhawb tau ib leeg nyob rau lub caij nyuaj siab ntxhov plawv no. (1 Thexalaunikas 5:11) Yog li ntawd, thaum peb tsa tes teb rau hauv tej kev sib txoos ces twb yog peb ua li ob yam tau hais tas los no. Tiam sis muaj ob yam ua rau peb tsis kam tsa tes teb. Tej zaum peb kuj txaj muag teb los sis peb xav teb los ho hu tsis txog. Yam uas yuav pab tau peb yog thaum tus tub txib Povlauj hais tias peb yuav tau nco ntsoov txog qhov uas ib tug “txhawb ib tug lub zog.” Peb yuav tsis txaj muag teb yog peb nco ntsoov tias peb tej lus teb yuav txhawb tau lwm tus lub zog. Yog lwm tus hauv lub koom txoos teb es peb tsis tau teb ua luaj twg los, cia li nrog lawv zoo siab.​—1 Petus 3:8. w23.04 20 ¶1-3

Tus vaj ntxwv tau tshaj tawm tias cov Yudais uas raug ntes los ua cev qhev hauv lub nroog Npanpiloos tau 70 lub xyoos yuav tau rov qab mus nyob rau lawv qub teb qub chaw dua. (Exalas 1:2-4) Tsuas yog Yehauvas tib leeg nkaus nkaus xwb thiaj tso tau cov Yudais dim, yeeb vim yog Npanpiloos tau ntes leej twg lawm, tus ntawd yeej tsis dim ib zaug li. (Yaxayas 14:4, 17) Muaj ib tug vaj ntxwv tuaj ntaus yeej lub nroog Npanpiloos, nws thiaj hais kom cov Yudais rov qab mus rau teb chaws Ixayees. Txhua tus txiv tsev yuav tau ua tib zoo txiav txim siab seb lawv yuav nyob hauv teb chaws Npanpiloos los sis yuav tau mus rau lawv teb lawv chaw. Txoj kev txiav txim siab no kuj tsis yooj yim rau cov txiv tsev. Muaj ib txhia hnub nyoog los kuj nchav lawm ces mus tsis taus. Hos muaj ib txhia kuj yug rau lub nroog Npanpiloos thiab lawv tsuas paub lub teb chaws ntawd xwb. Tsis tas li ntawd, lawv tsuas paub tias teb chaws Ixayees tsuas yog lawv poj koob yawm txwv tej qub teb qub chaw. Hos muaj ib txhia Yudais kuj muaj txiag nplua nuj nyob rau hauv lub nroog Npanpiloos ces yog li ntawd tej zaum lawv tsis xav tso lawv tej vaj tse los sis tej lag luam mus nyob rau ib lub teb chaws uas lawv twb tsis paub txog. w23.05 14 ¶1-2

Vajtswv Txoj Lus yeej txhawb kom peb txhua tus xyaum kom muaj lub siab ntev thev, hmov tshua, thiab kev hlub. Lukas 21:19 hais tias: “Yog nej ua siab ntev thev ces nej yuav cawm tau nej txoj sia.” Kaulauxis 3:12 hais tias: “Nej yuav tsum hlub lwm tus.” Thiab 1 Thexalaunikas 4:9, 10 hais tias: ‘Vajtswv twb qhia rau nej lawm hais tias ib tug yuav tsum hlub ib tug. . . . Tiam sis cov kwv tij, peb thov ntuas nej hais tias nej ib tug yuav tsum hlub ib tug heev dua ntawd thiab.’ Cov lus no yog sau rau txhua tus thwj tim uas twb muaj lub siab ntev thev, hmov tshua, thiab kev hlub lawm. Lawv txhua tus yuav tau coj tej cwj pwm no mus li tsis txhob tso tseg. Peb txhua tus los yuav tau ua tib yam li ntawd. Yuav kom pab tau koj ua tau li ntawd, koj yuav tau kawm seb cov ntseeg txheej thaum ub tau coj tej cwj pwm no li cas rau li cas, koj thiaj paub xyaum tau lawv li cas rau li cas xwv koj thiaj npaj txhij rau lub sij hawm muaj kev txom nyem loj kawg nkaus. Ces thaum lub sij hawm muaj kev txom nyem loj kawg nkaus pib, koj yuav paub thev li cas rau li cas thiab koj yuav peem tiag thev mus lawm yav tom ntej. w23.07 3 ¶4, 8

Txawm peb yog cov xaiv tseg los yog lwm pab yaj, peb yuav tau taug nraim ‘Txoj Kev uas Dawb Huv’ rau qhov yuav pab kom peb kub siab lug teev tiam Yehauvas tam sim no thiab yav tom ntej. (Yauhas 10:16) Txij xyoo 1919 tom qab Yexus yug, muaj coob leej ntau tus txiv neej, poj niam, me nyuam tau tawm hauv Npanpiloos tus loj dua ntais uas yog kev ntseeg cuav thiab los mus taug txoj kev uas dawb huv. Cov Yudais uas tawm hauv lub nroog Npanpiloos los, Yehauvas tau muab txhua yam khuam lawv kev tshem huv tib ntxiag ntawm lawv hauv ntej mus. (Yaxayas 57:14) Ua li niaj hnub nim no Yehauvas ho tau npaj ‘Txoj Kev uas Dawb Huv’ li cas? Tau ntau pua xyoo ua ntej xyoo 1919, Yehauvas siv cov txiv neej uas muaj kev ntseeg rau nws npaj kom cov muaj siab mos siab muag thiaj li tawm tau hauv lub nroog Npanpiloos uas loj dua ntais los mus teev tiam Yehauvas.​—Muab piv rau Yaxayas 40:3. w23.05 15-16 ¶8-9

Yehauvas xav kom peb teev tiam nws kaj siab lug thiab zoo siab hlo. (2 Kauleethaus 9:7) Yog li ntawd, peb puas yuav peem tiag ua kom tau raws li peb lub hom phiaj tab txawm peb tsis xav ua? Tus tub txib Povlauj hais tias: “Kuv niaj hnub tswj rawv kuv lub cev.” (1 Kauleethaus 9:25-27) Povlauj yuam nws tus kheej ua qhov zoo qhov yog tab txawm nws tsis muaj siab ua. Yehauvas yeej txaus siab rau txhua yam uas Povlauj ua thiab muab nqi zog rau nws. (2 Timautes 4:7, 8) Yehauvas yeej zoo siab kawg li thaum nws pom peb ua npaum li peb ua tau kom ncav cuag peb lub hom phiaj tab txawm peb tsis muaj siab ua dab tsi. Nws paub tias qhov peb ua tsis yog vim peb nyiam qhov uas peb ua ntawd tiam sis peb ua vim peb muaj kev hlub rau nws. Zoo ib yam li Yehauvas tau foom koob hmoov rau Povlauj, nws yeej yuav foom koob hmoov rau tej peb ua thiab. (Ntawv Nkauj 126:5) Thaum peb tau txais Yehauvas tej koob hmoov ces peb kuj yuav kub siab lug tuaj. w23.05 29 ¶9-10

Tus tub txib Povlauj muab cov uas yuav tsis dim Yehauvas hnub piv rau cov neeg tsaug zog. Cov neeg tsaug zog tsis ras txog tej uas muaj tshwm sim puag ncig lawv thiab lub caij lub nyoog uas lawv nyob. Lawv thiaj tsis paub tias tej xwm txheej txog lub sim ceeb kawg twb muaj tiav li cas lawm thiab tsis paub tias lawv yuav ua li cas. Niaj hnub no tib neeg feem coob zoo li cov neeg tsaug zog ntawd. (Loos 11:8) Txawm lawv pom tej xwm txheej no los lawv tsis ntseeg tias peb nyob rau lub sim ceeb kawg lawm, thiab lub sij hawm muaj kev txom nyem loj kawg nkaus twb los ze lawm. (2 Petus 3:3, 4) Tiam sis peb paub tias niaj hnub no haj yam tseem ceeb rau peb yuav tsum tsis txhob tsaug zog thiab ceev faj zov tos. (1 Thexalaunikas 5:6) Yog li ntawd, peb yuav tsum muaj lub siab tus thiab tsis txhob ua ywj fab ywj fwj, peb thiaj yuav tsis mus nrog luag koom kev nom kev tswv los sis nrog zej zog ua txij tog txij peg. Rau qhov thaum Yehauvas hnub los ze zuj zus tib neeg yuav ua kom nyuaj heev rau peb mloog Yehauvas lus. Txawm li los, peb tsis txhob txhawj. Thaum ntawd Yehauvas lub hwj huam dawb huv mam li pab kom peb muaj lub siab tus thiab paub txiav txim siab zoo tias peb yuav ua li cas.​—Lukas 12:11, 12. w23.06 10 ¶6-7

Thaum koj hnov lub npe Xaxoos ua rau koj xav txog dab tsi? Tej zaum koj yuav xav tias nws yog ib tug neeg muaj zog heev. Yeej muaj tseeb li ntawd tiag tiam sis Xaxoos ua tau ib yam uas los raug rau nws lub neej ua rau nws txom nyem ntsuav. Txawm li ntawd los Yehauvas yeej nco ntsoov Xaxoos txoj kev ntseeg, Yehauvas thiaj muab Xaxoos sau tseg rau hauv phau Vajlugkub rau peb tau kawm. Yehauvas siv Xaxoos ua ntau yam zoo los pab Nws cov tib neeg uas yog cov Ixayees. Tau ntau pua xyoo tom qab no, Yehauvas kuj tshoov tus tub txib Povlauj kom muab Xaxoos lub npe sau tseg tias nws yog ib tug uas muaj kev ntseeg heev. (Henplais 11:32-34) Yog peb kawm txog Xaxoos lub neej yuav txhawb peb heev vim nws tso siab plhuav rau Yehauvas tab txawm nws raug ntau yam kev sim siab. Peb yeej kawm tau ntau yam los ntawm Xaxoos tus qauv uas kuj pab thiab txhawb tau peb. w23.09 2 ¶1-2

Yog peb pheej qhia tsis so txhua yam nraim nkoos hauv nruab siab rau Yehauvas paub ces yuav pab tau peb kom muaj lub siab ntev thev. (1 Thexalaunikas 5:17) Tej zaum tam sim no kuj tsis muaj kev kub ntxhov qhov twg los raug koj. Txawm li ntawd los koj puas thov Yehauvas pab thaum koj chim siab, ntxhov siab los sis tsis pom qab ua zaj twg? Yog koj thov Yehauvas txhua txhua hnub rau tej nyuag teeb meem me me uas koj muaj ces thaum koj raug tej teeb meem loj loj yav tom ntej los koj thiaj li yuav nco ntsoov thov nws pab. Koj yeej tso siab plhuav tias Yehauvas paub thaum twg zoo rau nws teb koj tej lus thov. (Ntawv Nkauj 27:1, 3) Yog peb thev kev sim siab tam sim no ces tej zaum peb yuav thev taus lub sij hawm muaj kev txom nyem loj kawg nkaus. (Loos 5:3) Vim li cas peb ho paub li ntawd? Muaj coob leej ntau tus kwv tij xam pom tias thaum lawv thev dhau ib qho kev sim siab ces txawm muaj dua lwm qhov los raug ntxiv los lawv yeej thev taus. Thaum Yehauvas pab lawv thev taus ib qho kev sim siab twg lawm ces lawv yeej ntseeg tias Yehauvas tos tsis hnyu yuav pab lawv dua. Txoj kev ntseeg no yuav pab tau lawv thev taus qhov kev sim siab uas tseem yuav los raug yav tom ntej.​—Yakaunpaus 1:2-4. w23.07 3 ¶7-8

Yehauvas txoj kev txo hwj chim thiab nws txoj kev hmov tshua ua tau rau nws txawj yoog. Xws li Yehauvas txo hwj chim thaum nws yuav muab cov tib neeg lim hiam hauv Xaudoos rhuav tshem. Yehauvas siv nws ob tug tub txib saum ntuj kom hais rau Lauj khiav mus rau saum tej ncov roob. Lauj ntshai tsam nws mus tsis txog, nws thiaj thov kom Yehauvas cia nws thiab nws tsev neeg mus nkaum rau ntawm lub nroog Xau-as. Lub nroog no Yehauvas twb npaj siab yuav muab rhuav tshem tib yam nkaus. Yog Yehauvas xav yuam qhe Lauj kom mloog Nws tej lus los yeej tau tiam sis Nws ho ua li Lauj thov thiab tseg lub nroog ntawd cia. (Chiv Keeb 19:18-22) Tau ntau pua xyoo tom qab no Yehauvas kuj hmov tshua cov neeg uas nyob hauv lub nroog Nineves. Nws xa Yaunas tus uas cev Nws lus mus tshaj tawm rau cov tib neeg ntawd paub tias lawv thiab lawv lub nroog yuav raug puas tsuaj. Tiam sis thaum cov neeg Nineves tso lawv tej kev txhaum tseg, Yehauvas kuj zam lawv lub txim thiab tseg tsis tua lawv lub nroog.​—Yaunas 3:1, 10; 4:10, 11. w23.07 21 ¶5

Peb kawm tau li cas los ntawm Yau-ases tus qauv? Yau-ases zoo li tsob ntoo uas tsis khov uas yuav tsum muaj ib tug ncej txheem. Thaum tsis muaj Yehauyadas txheem nws lawm ces thiaj yooj yim heev rau nws qaug rau cov neeg fav xeeb Yehauvas tej lus dag ntxias, nws thiaj tso tseg tsis teev tiam Yehauvas lawm. Nws tus qauv qhia rau peb tias peb yuav tsum tsis txhob tos lwm tus hauv lub koom txoos los sis peb tsev neeg pab peb xwb es peb thiaj li mloog Yehauvas lus. Tiam sis peb yuav tsum rau siab kawm Vajtswv Txoj Lus, ua tib zoo xav txog tej uas peb kawm, thiab nco ntsoov thov Vajtswv tsis tseg. Yog peb ua li no ces peb txoj kev ntseeg thiab kev sib raug zoo nrog Yehauvas thiaj li yuav ruaj khov. (Yelemis 17:7, 8; Kaulauxis 2:6, 7) Yehauvas twb tsis hais kom peb ua dab tsi ntau. Nws tsuas kom peb ua raws li Laj Lim Tswv Yim 12:13 hais no xwb: ‘Hwm Vajtswv thiab ua raws li nws tej lus sam hwm, rau qhov nws tsim neeg los ua tes hauj lwm ntawd.’ Thaum peb hwm Yehauvas ces txawm yuav muaj xwm dab tsi yav tom hauv ntej no los peb yeej tsis ntshai thiab tuav rawv peb txoj kev ntseeg. Thiab yeej tsis muaj ib yam dab tsi yuav los rhuav tau peb txoj kev sib raug zoo nrog Yehauvas. w23.06 19 ¶17-19

Nqe 5 pib li no hais tias: “Tus uas zaum saum lub zwm txwv hais tias.” (Tshwm Sim 21:5, thawj kab) Cov lus no tshwj xeeb heev vim yog peb zaug uas Yehauvas hais lus nyob rau hauv phau Tshwm Sim. Cov lus no tsis yog ib tug tub txib saum ntuj los sis Yexus hais tiam sis yog Yehauvas hais kiag ntag! Qhov no pab tau kom peb tso siab hais tias Yehauvas “yeej tsis dag li.” (Titus 1:2) Yog li ntawd, cov lus uas hais nyob rau hauv Tshwm Sim 21:5, 6 yeej yuav muaj xwb thiaj tag. Nyob thoob plaws phau ntawv Tshwm Sim, Yehauvas kheev hais tias “saib maj.” Ua li Yehauvas yuav hais dab tsi? Nws hais txuas ntxiv tias: “Kuv tsim txhua yam dua tshiab.” Yehauvas yuav kho txhua yam tshiab rau yav tom ntej. Tej uas nws hais no nws hais yam nkaus li twb muaj tiav tag lawm.​—Yaxayas 46:10. w23.11 3-4 ¶7-8

Tub tub txib Petus ua yuam kev thiab yeej tsis yooj yim rau nws. Xws li thaum Petus cheem Yexus thaum Yexus qhia hais tias nws yuav tuag txom nyem ntsuav kom muaj tiav raws li tej lus faj lem hauv phau Vajlugkub. (Malakaus 8:31-33) Tsis tas li ntawd, Petus thiab lwm cov tub txib sib cav tias leej twg yog tus loj dua. (Malakaus 9:33, 34) Nyob rau hmo uas Yexus tuag ntawd, Petus txiav ib tug txiv neej sab pob ntseg tu nrho pov tseg. (Yauhas 18:10) Tib hmos ntawd xwb Petus kuj ntshai tib neeg thiab tsis lees paub Yexus peb zaug. (Malakaus 14:66-72) Tom qab ntawd, Petus txawm quaj quaj tu siab nrho. Txawm Petus ua ntau yam yuam kev los Yexus kuj tsis muab nws tso tseg. Tom qab Yexus sawv rov qab los, nws nug Petus seb Petus puas tseem hlub nws. Yexus cia Petus ua ib tug uas saib xyuas nws cov yaj. (Yauhas 21:15-17) Petus yeej txaus siab hlo ua li Yexus tau hais rau nws. Hnub Pheetekos, Petus kuj nyob hauv lub nroog Yeluxalees thiab nws kuj nrog cov uas tau lub hwj huam dawb huv nyob ua tib ke ntawd. w23.09 22 ¶6-7

Tus tub txib Petus txhawb cov txwj laus tias: “Nej yuav tsum yug pab yaj uas Vajtswv muab tso rau nej saib.” (1 Petus 5:1-4) Yog tias koj yog ib tug txwj laus, peb yeej paub tias koj hlub cov kwv tij nkauj muam thiab koj yeej xav txhawb lawv. Muaj qee lub sij hawm tej zaum koj yuav xav tias koj tsis xyeej los sis koj sab sab lim lim, koj mus txhawb tsis tau lawv. Yog li koj yuav ua li cas xwb? Qhib siab lug thov Yehauvas txog koj tej kev txhawj xeeb. Petus sau tias: ‘Tus uas pab ua hauj lwm, nws yuav tsum siv nws lub dag lub zog uas Vajtswv pub rau nws.’ (1 Petus 4:11) Tej zaum qhov uas cov kwv tij nkauj muam raug yuav kho tsis tau txog thaum lub qab ntuj tshiab. Nco ntsoov tias Yexus Khetos yog “tus Tswv yug yaj uas yog tus thawj” ces nws yuav pab tau lawv zoo dua li koj pab. Nws yuav pab tau lawv tam sim no thiab thaum nyob rau hauv lub ntiaj teb tshiab. Qhov uas Yehauvas xav kom cov txwj laus ua yog tsuas hlub cov kwv tij nkauj muam, saib xyuas lawv, thiab “ua yam ntxwv zoo rau lawv xyaum.” w23.09 29-30 ¶13-14

Peb yuav tsum tsis txhob tso siab rau tib neeg tej kev xav. Yog peb xav li tib neeg xav ces peb yuav tsis xav txog Yehauvas thiab nws tej kev cai lawm. (1 Kauleethaus 3:19) ‘Tej tswv yim hauv ntiaj teb no’ feem ntau yeej ntxias tau tib neeg kom tsis txhob mloog Vajtswv lus. Muaj ib txhia ntseeg nyob hauv Penkamus thiab Thiyatilas pib xav tib yam li cov tib neeg ua phem ua qias thiab pe dab pe mlom uas nyob ib ncig lawv. Yexus qhuab ntuas ob lub koom txoos no vim lawv cia muaj kev nkauj kev nraug. (Tshwm Sim 2:14, 20) Niaj hnub nim no tib neeg kuj ntxias kom peb xav ib yam li lawv xav thiab. Tej nruab ze los sis tej tib neeg uas peb paub kuj ntxias kom peb ua ib yam li lawv ua es tsis txhob coj Vajtswv tej kev cai nruj nruj. Xws li lawv hais kom peb kav tsij ua tej yam uas peb lub siab ntshaw, thiab tej lus nyob hauv phau Vajlugkub yog hais rau txheej thaum ub xwb. Muaj qee lub sij hawm peb yuav xav tias peb paub tsis tseeb tej uas Yehauvas hais peb. Tej thaum peb yuav muaj lub siab ntshaw kom ‘ua dhau Vajtswv Txoj Lus.’​—1 Kauleethaus 4:6. w23.07 16 ¶10-11

Maivliag uas yog Yexus niam, cheem tsum kev txhawb zog. Nws tsis tau yuav txij nkawm tiam sis nws cia li xeeb tub. Nws tsis paub tias yuav tu tub tu kiv li cas thiab nws tseem tau tes hauj lwm uas yuav los mus tu tus me tub uas yog tus Mexiyas. Nws haj tseem yog ib tug nkauj xwb, nws yuav ua li cas mus fim Yauxej tus uas qhaib nws lawm tias nws xeeb tub lawm. (Lukas 1:26-33) Maivliag tau kev txhawb zog li cas? Nws kuj txais lwm tus txoj kev pab. Xws li nws nug Khali-ees kom qhia nws seb yuav ua li cas rau li cas ntxiv. (Lukas 1:34) Tsis ntev tom qab ntawd, nws kuj mus rau “ib lub nroog uas nyob saum laj roob” hauv teb chaws Yudas mus cuag Elixanpe uas yog nws ib tug txheeb ze. Elixanpe qhuas nws thiab Yehauvas tshoov kom Elixanpe hais ib zaj lus faj lem txog tus me nyuam nws tseem yuav yug. (Lukas 1:39-45) Maivliag hais tias Yehauvas tau siv Yehauvas txhais npab uas muaj zog zis los ua ntau yam hauj lwm. (Lukas 1:46-51) Yehauvas siv Khali-ees thiab Elixanpe los txhawb Maivliag. w23.10 14-15 ¶10-12

Yexus cov thwj tim ib txhia yog cov uas raug xaiv thiab muaj ib txoj kev sib raug zoo tshwj xeeb nrog Yehauvas. Cov no muaj 144,000 leej thiab yuav mus ua pov thawj nrog Yexus saum ntuj ceeb tsheej. (Tshwm Sim 14:1) Chav Dawb Huv hauv lub tsev ntaub piv txog qhov uas lawv raug saws los ua Vajtswv cov tub thaum lawv tseem nyob hauv ntiaj teb. (Loos 8:15-17) Chav Dawb Huv Kawg Nkaus hauv lub tsev ntaub piv txog lub ntuj ceeb tsheej uas yog Yehauvas qhov chaw nyob. “Daim ntaub” uas kem Chav Dawb Huv thiab Chav Dawb Huv Kawg Nkaus piv txog Yexus lub cev nqaij tawv. Thaum Yexus tseem muaj lub cev nqaij tawv, nws mus tsis tau saum ntuj li tus Pov Thawj Hlob loj rau hauv lub tuam tsev ntawm sab kev ntseeg. Tom qab Yexus muab nws lub cev nqaij tawv los txhiv noob neej, nws thiaj qhib tau txoj kev rau cov xaiv tseg mus saum ntuj. Cov xaiv tseg los yuav tau tuag, lawv thiaj mus tau saum ntuj.​—Henplais 10:19, 20; 1 Kauleethaus 15:50. w23.10 28 ¶13

Nkide-oos ua siab ntev thaum cov Efalayees tuaj yws nws. (Cov Thawj 8:1-3) Nws tsis ua npau taws vog rov rau lawv tiam sis nws txo hwj chim thiab ua zoo mloog lawv tej lus yws thiab ua zoo teb lawv. Lawv siab thiaj li nqig thiab tsis chim lawm. Cov txwj laus yuav tau xyaum Nkide-oos es ua siab ntev ua zoo mloog thiab ua zoo teb thaum muaj neeg thuam lawv. (Yakaunpaus 3:13) Yog cov txwj laus ua li ntawd ces lawv yuav pab tau lub koom txoos muaj kev sib haum xeeb. Thaum Nkide-oos mus tua yeej cov Midias, cov Ixayees tuaj qhuas nws tiam sis nws hais kom lawv qhuas Yehauvas xwb. (Cov Thawj 8:22, 23) Cov txwj laus yuav xyaum Nkide-oos tus qauv li cas? Txawm lawv yuav ua tau li cas los lawv yuav tsum qhuas Yehauvas xwb. (1 Kauleethaus 4:6, 7) Muab piv txwv li no, thaum muaj neeg qhuas ib tug txwj laus tias nws txawj cev lus qhuab qhia heev, nws yuav hais li cas? Tej zaum nws kuj teb tau lawv tias tej lus qhuab qhia ntawd yog nws muab ntawm Vajtswv Txoj Lus los xwb thiab nws tsuas ua li tej uas Yehauvas lub koom haum cob qhia peb sawv daws xwb. Muaj tej thaud kuj zoo rau cov txwj laus ua zoo xav seb lawv tej kev cob qhia puas ua rau tib neeg qhuas Yehauvas los sis ua rau tib neeg qhuas lawv xwb. w23.06 4 ¶7-8

Yog Yehauvas tsis teb peb cov lus thov tej zaum yuav zoo rau peb nug peb tus kheej li no. ‘Yam uas kuv thov puas zoo rau kuv tiag?’ Ntau zaus peb xav tias peb paub yam twg zoo rau peb. Tiam sis tej uas peb thov tej zaum tsis yog tej uas yuav pab tau peb. Thiab tej thaum tej uas peb thov tej zaum twb tsis raws li Vajtswv lub siab nyiam. (1 Yauhas 5:14) Xws li ib leej niam thiab ib leej txi uas nkawd thov Yehauvas pab kom nkawd tus tub txhob tso Yehauvas tseg. Nkawd thov li ntawd zoo li kuj yog ib qho zoo thiab, tiam sis Yehauvas tsis yuam peb ib tug twg teev tiam nws. Yehauvas xav kom peb txhua tus, tsis hais peb cov me nyuam, txiav txim siab los pe hawm nws. (Kev Cai 10:12, 13; 30:19, 20) Yog li ntawd, zoo dua rau ob niam ntxiv ntawd thov kom Yehauvas pab nkawd qhia tau nkawd tus me nyuam muaj lub siab xib Yehuavas kom nws thiaj hlub Yehauvas thiab nrog Yehauvas sib raug zoo.​—Paj Lug 22:6; Efexaus 6:4. w23.11 21 ¶5; 23 ¶12

Vim li cas qhov uas peb nplig lwm tus lub siab ho qhia tias peb hlub lawv? Muaj ib phau ntawv uas hais txog phau Vajlugkub hais tias thaum Povlauj siv lo lus “nplig,” yog nws hais txog “nyob ntawm ib tug twg ib sab thiab txhawb tus ntawd lub zog thaum nws tab tom raug kev nyuaj siab.” Yog li ntawd, thaum ib tug kwv tij nkauj muam twg raug kev nyuaj siab, qhov uas peb mus nyob rau ntawd thiab hais lo puav nplig nws siab yuav pab tau kom nws rau siab teev tiam Yehauvas. Txhua zaus uas peb mus nplig ib tug kwv tij nkauj muam twg, yeej qhia tau rau nws tias peb hlub tshua nws heev. (2 Kauleethaus 7:6, 7, 13) Peb yuav tau xyaum kam tiag kom peb txawj hmov tshua lwm tus peb thiaj li yuav mus nplig lwm tus lub siab thaum lawv xav tau kev pab. Thaum ib tug tib neeg twg hmov tshua lwm tus uas raug kev nyuaj siab ces nws yeej yuav mus nplig thiab mus pab tus ntawd. Povlauj hais tias Yehauvas txoj kev hmov tshua rau tib neeg pab tau kom Nws txawj mus nplig lwm tus thiab. Povlauj thiaj li hais tias Yehauvas yog “Leej Txiv tus uas yog Vajtswv, nws hlub peb thiab txhawb peb lub zog.”​—2 Kauleethaus 1:3. w23.11 9-10 ¶8-10

Txhua tus uas raws Khetos qab yeej yuav raug kev txom nyem. Xws li tus tub txib Povlauj tus yam ntxwv. Nws hais rau cov ntseeg hauv Thexaulaunikas tias: ‘Thaum peb tseem nrog nej nyob, peb twb qhia rau nej paub lawm hais tias, peb cov uas ntseeg yeej yuav raug kev tsim txom. Nim no nej pom hais tias twb muaj li ntawd lawm tiag.’ (1 Thexalaunikas 3:4) Thiab nws sau rau cov ntseeg hauv Kauleethaus tias: ‘Cov kwv tij, peb xav kom nej paub hais tias . . . peb raug txom nyem heev kawg li, . . . peb xav hais tias peb yeej yuav tuag xwb.’ (2 Kauleethaus 1:8; 11:23-27) Cov ntseeg niaj hnub nim no yeej paub ntsoov tias lawv yuav raug kev txom nyem. (2 Timautes 3:12) Vim koj raws Yexus qab, tej zaum koj tej phooj ywg los sis tej nruab ze ua saib tsis taus koj. Los sis tej zaum koj tus los pav los sis cov neeg koj nrog ua hauj lwm yuav tsim txom koj vim koj ua qhov ncaj. (Henplais 13:18) Thaum koj qhia Vajlugkub rau lwm leej lwm tus, koj puas tau raug tej nom tej tswv tawm tsam? Txawm peb yuav raug hom kev txom nyem li cas los xij peem. Povlauj hais tias kom cia li zoo siab. w23.12 10-11 ¶9-10

Yakhauj tau thev ntau yam kev nyuaj siab. Yakhauj ob tug tub npe hu ua Xime-oos thiab Levis ua rau lawv tsev neeg thiab Yehauvas puas koob puas npe tas. Tsis tas li ntawd xwb, tom qab Laxees yug nkawd tus tub ntxawg tag, nws txawm tuag lawm. Tom qab no thaum Yakhauj laus lawm, txawm muaj kev tshaib nqhis. Lawv tsev neeg thiaj tau tsiv mus nyob teb chaws Iyiv. (Chiv Keeb 35:16-19; 37:28; 45:9-11, 28) Txawm muaj kev nyuaj siab los raug Yakhauj lub neej los nws yeej tsis tso Yehauvas tseg thiab nws haj tseem ntseeg tej uas Yehauvas cog tseg. Xws li txawm Lanpas dag npaum li cas los Yehauvas huab yam foom koob hmoov kom Yakhauj muaj yam ub yam no nplua mias. Tsis tas li ntawd, Yakhauj ris Yehauvas txiaj ntsig kawg li uas tau rov qab pom nws tus tub Yauxej dua. Yakhauj thiab Yehauvas sib raug zoo heev thiaj li pab tau Yakhauj thev taus tej kev sim siab uas nws raug. (Chiv Keeb 30:43; 32:9, 10; 46:28-30) Tej no qhia rau peb tias yog peb nrog Yehauvas sib raug zoo ces peb yeej yuav kov yeej txhua yam kev sim siab uas los raug peb. w23.04 15 ¶6-7

Nyob hauv Ntawv Nkauj 23, Daviv qhia meej tias nws tso siab rau Yehauvas txoj kev hlub tshua txog nws thiab saib xyuas nws zoo heev. Nws piav ntxiv tias nws thiab Yehauvas nkawd sib raug zoo npaum li cas thiab Yehauvas saib xyuas nws yam li ib tug Tswv Yug Yaj. Daviv tso siab rau Yehauvas coj nws txoj hau kev, thiab tso plhuav ib puas tsav yam rau Yehauvas saib xyuas. Daviv paub tias Yehauvas yeej yuav hlub tshua txog nws mus tag nws sim neej. Vim li cas Daviv ho tso siab ua luaj? Vim Yehauvas ib txwm muab txhua yam rau Daviv, Daviv thiaj muaj txaus. Daviv paub tias Yehauvas yog nws tus phooj ywg kwv luag thiab Yehauvas txaus siab rau nws. Daviv tsis txhawj txog nws lub neej rau yav tom ntej vim nws tso siab tias Yehauvas yuav saib xyuas nws. Vim Daviv tso siab plhuav rau qhov uas Yehauvas hlub tshua txog nws, Daviv thiaj tsis txhawj tiam sis nws muaj kev zoo siab thiab txaus siab rau tej uas nws muaj.​—Ntawv Nkauj 16:11. w24.01 29 ¶12-13

Txij thaum Ntsuj Rog Thoob Qab Ntuj Zaum 2, Yehauvas cov tib neeg tau mus tshaj tawm rau ntau lub teb chaws. Muaj coob leej ntau tus tib neeg tau los paub Yehauvas thiab nws cov tib neeg yeej tshaj tawm mus thoob plaws ntiaj teb no. Niaj hnub nim no Pab Uas Ntaus Thawj haj tseem tos nrhw Yexus Khetos ua tus coj lawv txoj hau kev. Lawv tsis xav qhia raws li lawv lub siab xav tiam sis lawv xav qhia cov kwv tij raws li Yehauvas lub siab nyiam. Ces cov saib xyuas thaj tsam thiab cov txwj laus mam li hais qhia rau cov koom txoos paub. Cov txwj laus uas yog cov xaiv tseg nyob ntawm Khetos “txhais tes xis.” (Tshwm Sim 2:1) Cov txwj laus yeej yog noob txaug neeg txhaum ces lawv yeej yuav ua tau yuam kev. Qho zaus Mauxes, Yausuas thiab cov tub txib kuj ua tau yuam kev thiab. (Teev Npe 20:12; Yausuas 9:14, 15; Loos 3:23) Tiam sis peb yeej pom tias Yexus haj tseem coj tus qhev ncaj thiab ntse thiab cov txwj laus kev. Yog li ntawd, peb yeej tso siab plhuav rau cov kwv tij uas Yexus siv ua cov coj. w24.02 23-24 ¶13-14

Niaj hnub no peb ua rau Yehauvas zoo siab thaum peb mus nrog tib neeg tham es lawv pom tias peb ris Yehauvas txiaj ntsig thiab hlub nws npaum li cas. Thaum peb mus tshaj tawm, peb lub hom phiaj yog pab kom lwm tus txav ze rau Yehauvas thiab hlub nws ib yam li peb hlub. (Yakaunpaus 4:8) Peb yeej zoo siab hlo siv phau Vajlugkub los qhia tib neeg txog Yehauvas txoj kev hlub, txoj kev ncaj ncees, lub laj lim tswv yim, lub hwj chim, thiab lwm yam yeeb yam uas nws muaj. Peb kuj qhuas Yehauvas thaum peb xyaum nws li peb xyaum tau. Thaum peb xyaum Yehauvas, tej zaum yuav ua rau tib neeg pom peb txawv ntawm lwm tus hauv lub qab ntuj phem no ces lawv yuav xav paub tias yog vim li cas. (Mathais 5:14-16) Ces thaum peb nrog lawv tham, peb mam piav tias vim li cas peb thiaj coj txawv. Thaum kawg, yuav pab tau cov muaj lub siab xib Vajtswv txav ze rau nws. Thaum peb qhuas Yehauvas li no yuav ua rau nws zoo siab heev.​—1 Timautes 2:3, 4. w24.02 10 ¶7

Yuav kom koj ua tau ib tug txiv neej Khixatias paub tab, koj yuav tsum paub ua neej. Yog koj paub ua neej ces koj yeej yuav tuav tau tej hauj lwm hauv lub koom txoos thiab paub mus khwv noj khwv haus los yug koj tus kheej los sis koj lub cuab lub yig. Tsis tas li ntawd xwb yog koj paub ua neej ces koj yuav nrog lwm tus sib raug zoo dua. Xwv li, xyaum txawj nyeem thiab sau ntawv. Phau Vajlugkub hais tias tus txiv neej uas muaj kev zoo siab thiab ua neej vam meej ntxhias yog tus uas nyiam nyeem Vajtswv Txoj Lus txhua hnub thiab xav txog tej ntawd. (Ntawv Nkauj 1:1-3) Yog nws nyeem Vajtswv Txoj Lus txhua hnub ces nws yuav muaj Vajtswv txoj kev xav. Qhov no yuav pab tau nws txawj xav thiab txawj muab Vajtswv Txoj Lus coj los siv ua neej. (Paj Lug 1:3, 4) Peb cov kwv tij nkauj muam yeej tos nrhw cov txiv neej uas paub tab los qhia lawv thiab muab tswv yim pab lawv. Yog koj txawj nyeem thiab sau ntawv, ces koj yuav npaj tau tej zaj lus qhuab qhia zoo thiab txhawb zog heev. Tsis tas li ntawd xwb thaum koj tsa tes teb, koj cov lus teb yuav raug siab heev. Koj kuj yuav sau tau cia rau koj rov saib dua kom tsav tau koj txoj kev ntseeg thiab txhawb tau lwm tus. w23.12 26-27 ¶9-11

Thaum koj txhawj ntshai, cia li ua tib zoo xav txog tej yam Yehauvas yuav ua rau yav tom ntej thaum tsis muaj Xatas lawm. Nyob rau lub rooj sib txoos xyoo 2014, ua piv txwv qhia txog ib leej txiv uas qhia rau nws tsev neeg txog 2 Timautes 3:1-5 tias thaum txog lub Vaj Kaj Siab, cov lus ntawd yuav hloov li no: “Thaum txog lub qab ntuj tshiab yuav muaj kev kaj siab. Rau qhov tej neeg yuav xav txog lwm tus, lawv yuav nyiam qhov tseeb, yuav coj zoo, txo hwj chim, qhuas Vajtswv, mloog niam txiv lus, ris luag txiaj ntsig, saib taus Vajtswv txoj kev cai, hlub tshua lawv tsev neeg, zam txim rau lwm tus, hais zoo txog lwm tus, tswj lawv lub siab, ua siab mos siab muag, nyiam ua zoo, tso siab tau rau, zam luag, nyiam Vajtswv heev dua kev lom zem, ua raws li Vajtswv txoj kev cai. Cia li nrog cov neeg uas zoo li no ua ke.” Ua li koj puas tau nrog koj tsev neeg los sis cov kwv tij nkauj muam tham txog lub neej uas nyob rau hauv lub qab ntuj tshiab? w24.01 6 ¶13-14

Peb zoo siab thaum peb paub tias Yehauvas txaus siab heev rau nws cov tib neeg. Phau Vajlugkub hais tias: ‘[Yehauvas] txaus siab heev rau nws haiv neeg.’ (Ntawv Nkauj 149:4) Muaj ib txhia thaum lawv qaug zog heev, tej zaum lawv yuav xav tias, ‘Yehauvas puas txaus siab rau kuv?’ Muaj coob tus teev tiam Yehauvas uas nyob hauv phau Vajlugkub, thaum lawv qaug zog kuj ua rau lawv xav tias Yehauvas puas txaus siab rau lawv thiab. (1 Xamuyees 1:6-10; Yauj 29:2, 4; Ntawv Nkauj 51:11) Phau Vajlugkub qhia meej meej tias txawm peb yog neeg txhaum los, peb yeej ua tau haum Yehauvas siab. Qhov uas peb ua tau ntawd yog muaj kev ntseeg rau Yexus Khetos thiab ua kev cai raus dej. (Yauhas 3:16) Thaum peb ua li no ces twb yog peb qhia rau sawv daws tias peb tau tso peb tej kev txhaum tseg thiab tau cog lus rau Vajtswv tias peb yuav ua raws li nws lub siab nyiam. (Tes Hauj Lwm 2:38; 3:19) Qhov no ua rau Yehauvas txaus siab heev vim nws pom tias peb xav nrog nws sib raug zoo. Yog peb ua raws li peb lo lus cog tseg tias peb yuav teev tiam nws ces Yehauvas yeej txaus siab heev rau peb thiab yeej suav tias peb yog nws cov phooj ywg.​—Ntawv Nkauj 25:14. w24.03 26 ¶1-2

Cov thwj tim yeej tso tau ib tug yam ntxwv zoo heev rau peb xyaum kom rau siab ntso mus qhia txoj xov zoo tab txawm tej nom tej tsw yuav txwv tsis pub peb mus qhia. Peb yuav tau tso siab plhuav rau Yehauvas pab kom peb mus tshaj tawm tau txoj xov zoo tib yam li ntawd. Cia peb thov Yehauvas pab kom peb muaj lub siab tawv qhawv, muaj tswv yim, thiab tau nws txoj kev pab kom peb thev taus peb tej teeb meem. Peb coob leej ntau tus yeej raug ntau yam teeb meem xws li cov uas peb hlub tau tag sim neej, lub cuab lub yig muaj kev sib cov nyom, raug kev tsim txom los sis raug lwm yam teeb meem. Txuas ntxiv ntawd, tej kab mob aws thiab tsov rog haj tseem tsub ntxiv rau tej yam uas peb raug. Cia li qhib siab lug thov Yehauvas. Qhia rau nws txog koj tej kev txhawj xeeb ib yam li koj qhia rau ib tug phooj ywg kwv luag. Nco ntsoov tias Yehauvas “yuav pab” koj. (Ntawv Nkauj 37:3, 5) Thov Vajtswv tsis tseg tsis tu yuav pab peb “thev tiag thaum [peb] raug kev nyuaj siab.” (Loos 12:12) Yehauvas yeej paub tej yam uas cov teev tiam nws raug thiab “nws hnov lawv tej suab thov.”​—Ntawv Nkauj 145:18, 19. w23.05 5-6 ¶12-15

Thaum peb yuav txiav txim siab ua ib yam dab tsi twg, peb yuav tau “ua tib zoo saib, saib Vajtswv xav kom [peb] ua yam twg” ces xyaum coj ib yam li ntawd. (Efexaus 5:17.) Thaum peb nrhiav tau tej hauv paus ntsiab lus hauv phau Vajlugkub uas hais tsi ntsees rau tej uas peb raug, twb yog peb cia Vajtswv pab peb. Yog peb coj raws li tej hauv paus ntsiab lus ntawd, peb yuav txiav txim tau qhov zoo qhov yog. Xatas uas yog tus yeeb ncuab “uas Phem” xav kom peb tsis muaj sij hawm ua Yehauvas tes hauj lwm. (1 Yauhas 5:19) Yeej yooj yim heev rau ib tug Khixatias twg xav txog nyiaj txiag, kawm ntawv qib siab, los sis hauj lwm dua li ua tej yam los teev tiam Yehauvas ntxiv. Yog tias ib tug Khixatias twg ua li no, twb yog nws pib xav li lub qab ntuj neeg lawm. Txhua yam uas hais tas no yeej tsis txhaum tiam sis yuav tau tsis txhob muab ua thawj yam hauv peb lub neej. w24.03 24 ¶16-17