Lub 8 Hli

Muaj ob lub ntsiab hais nyob rau nqe Vajlugkub rau hnub no: (1) Cov neeg ncaj ncees yeej raug ntau yam kev nyuaj siab. (2) Yehauvas yuav cawm peb ntawm tej kev ntxhov siab. Ua li Yehauvas yuav cawm peb li cas rau li cas? Ib yam yog Yehauvas pab kom peb nco ntsoov tias peb nyob rau lub qab ntuj zoo li cas rau li cas. Txawm Yehauvas cog lus tias nws yuav pab kom peb muaj kev kaj siab teev tiam nws los nws tsis tau cog lus tias peb yuav tsis raug kev nyuaj siab nyob rau hauv lub qab ntuj no. (Yaxayas 66:14) Nws txhawb kom peb nco ntsoov lub neej yav pem suab raws li nws tau npaj tseg. (2 Kauleethaus 4:16-18) Tam sim no Yehauvas tsuas pab kom peb thev ib hnub dhau ib hnub xwb. (Nkauj Quaj Ntsuag 3:22-24) Peb khaws tau li cas los ntawm cov ntseeg nyob puag thaum ub thiab cov nim no. Peb pom tias kev nyuaj siab yeej yuav los raug peb nthawv nthav tiam sis yog peb tso siab rau Yehauvas, nws yeej yuav pab peb nyiaj dhau.​—Ntawv Nkauj 55:22. w23.04 14-15 ¶3-4

Peb kawm tau Yauxej thiab Maivliag nkawd tus yam ntxwv tias yuav tsum mloog tej nom tswv lus tab txawm tsis yooj yim rau peb ua li ntawd. (Lukas 2:1-6) Thaum Maivliag suab me nyuam tau cuaj lub hlis, Aunkuxataus uas yog tus vaj ntxwv kav Loos, txheeb kom tag nrho nws tej pej xeem tuaj sau npe. Yog li ntawd, Yauxej thiab Maivliag nkawd yuav tau mus rau lub zos Npelehees uas deb li 150 kilumev (93 mais) thiab hla roob hla hav. Txoj kev uas nkawd mus ntawd yeej tsis yooj yim rau Maivliag mus kiag li vim Maivliag lub cev tsis tab seeb thiab tsam ho muaj xwm li cas rau tus me nyuam. Tej zaum nkawd txhawj tsam nws ho lam tau me nyuam los sis txhawj tsam tus me nyuam ho sav li cas vim nws yog tus Mexiyas. Nkawd txoj kev txhawj xeeb puas ua rau kom nkawd tsis txhob mloog nom tswv lus? Txawm Yauxej thiab Maivliag nkawd muaj kev txhawj xeeb ntau tsav ntau yam los nkawd mloog tej nom tswv lus. Yehauvas zoo siab heev vim ob tug mloog lus, nws thiaj li tsom kwm nkawd txoj hau kev kom mus txog ntua Npelehees, Maivliag mam li tau me nyuam ces thiaj li muaj raws li lo lus faj lem hauv phau Vajlugkub.​—Mikhas 5:2. w23.10 8 ¶9; 9 ¶11-12

Tej zaum thaum koj xav txog tsa tes yuav teb tom kev sib txoos, koj twb tshee tos lawm. Ib yam uas pab tau koj yog koj npaj ua ntej. (Paj Lug 21:5) Yog peb npaj zoo zoo kom paub tias hnub ntawd hais li cas rau li cas ces yuav yooj yim rau peb tsa tes teb dua. Tsis tas li ntawd, nco ntsoov teb tsawg tsuag ob peb los xwb. (Paj Lug 15:23; 17:27) Yog peb teb ob peb los xwb ces peb yuav tsis tshee. Yog tias peb twb npaj ua ntej thiab paub zaj uas tham ntawd zoo zoo lawm ces peb yuav hais tawm plaws hauv nruab siab tuaj. Yog tias koj twb ua raws li tau hais tas los no tiam sis koj lub siab tsuas kheev koj teb ib los sis ob zaug xwb, nco ntsoov tias Yehauvas yeej ris txiaj ntsig rau qhov uas koj ua npaum li koj ua tau. (Lukas 21:1-4) Yehauvas yeej tsis kom peb ua ntau tshaj li qhov peb ua tau. (Filipis 4:5) Npaj siab tias koj yuav ua li cas rau li cas, npaj tias koj yuav ua kom tiav rau thaum twg, thiab thov Yehauvas kom koj muaj lub siab tus. Tej zaum qhov ntawd yuav yog tsa tes teb tsawg tsuag ob peb los. w23.04 21 ¶6-8

Tus tub txib Povlauj muab peb piv rau ib pab tub rog uas npaj txhij vog yuav mus ua rog. Tus tub rog yuav tsum npaj kom txhij thiab tos ntsoov yuav mus ua rog txhua lub sij hawm. Peb los yuav tsum npaj kom txhij es muab kev ntseeg thiab kev hlub uas yog daim thaiv hauv siab los hnav thiab muab peb txoj kev cia siab uas yog lub kaus mom hlau los ntoo tos Yehauvas hnub. Daim thaiv hauv siab tiv thaiv tus tub rog lub hauv siab. Kev ntseeg thiab kev hlub tiv thaiv peb lub siab thiab pab kom peb teev tiam Yehauvas thiab taug nraim Yexus tus hneev taw. Kev ntseeg pab kom peb tso siab tau tias Yehauvas yuav muab nqi zog rau cov uas mus cuag nws. (Henplais 11:6) Kev ntseeg kuj yuav pab kom peb tsis tso Yexus tseg txawm hais tias peb yuav tau nyiaj ntau yam kev nyuaj siab. Peb txoj kev ntseeg yuav ruaj khov yog hais tias peb xyaum cov kwv tij nkauj muam niaj hnub no uas txawm yog lawv raug kev tsim txom thiab kev txom nyem los lawv yeej tuav rawv lawv txoj kev ntseeg. Thiab peb yuav tsis nrog luag ntshaw nyiaj txiag thiab ntshaw muaj ub muaj no ntau ntau yog hais tias peb xyaum cov uas ua lawv neej yooj yim thiab muab Vajtswv lub Nceeg Vaj tso ua ntej hauv lawv lub neej. w23.06 10 ¶8-9

Tswj lub siab yog tswj tej yam peb ua thiab tej uas peb xav. Kuj pab tau peb ua tej yam zoo kom ncav cuag peb lub hom phiaj uas nyuaj rau peb ua los sis peb tsis xav ua. Nco ntsoov tias Yehauvas lub hwj huam dawb huv pab tau kom peb tswj taus peb lub siab. Yog li ntawd, peb yuav tau thov Yehauvas kom nws muab lub hwj huam dawb huv rau peb. (Lukas 11:13; Kalatias 5:22, 23) Tsis txhob tos kom zoo caij zoo nyoog tso. Nyob rau lub qab ntuj no yeej tsis muaj ib lub caij uas yuav zoo caij zoo nyoog. Peb tsis muaj siab ua dab tsi, yeeb vim yog peb teem tseg tej lub hom phiaj loj loj uas peb ua tsis tau. Yog tias koj ua ib yam li no ces teem tseg tej lub hom phiaj kom me zog. Yog koj lub hom phiaj yog xyaum Yehauvas ib qho yeeb yam twg ces xyaum ua ib qho me ntsis zuj zus. Yog tias koj lub hom phiaj yog nyeem phau Vajlugkub kom thoob plaws ces teem sij hawm luv luv los nyeem tsawg tsuag xwb. w23.05 29 ¶11-13

Nyob rau tiam kawg no, Yehauvas siv nws lub koom haum los mus luam thiab tso tawm tej ub tej no kom nkag siab nws Txoj Lus xwv peb thiaj li taug nraim ‘Txoj Kev uas Dawb Huv.’ (Yaxayas 35:8; 48:17; 60:17) Thaum muaj ib tug kawm Vajlugkub, zoo yam li nws los taug ‘Txoj Kev uas Dawb Huv.’ Muaj ib txhia taug me ntsis xwb ces kuj tawm ntawm txoj kev ntawd mus lawm. Hos ib txhia haj tseem taug nraim txoj ntawd mus kom kawg. Ua li thaum kawg ntawd muaj dab tsi? Cov uas muaj kev vam kev cia siab mus nyob saum ntuj ceeb tsheej taug ‘Txoj Kev uas Dawb Huv’ yuav mus nyob “Vajtswv lub Vaj” saum ntuj ceeb tsheej. (Tshwm Sim 2:7) Hos cov uas muaj kev vam kev cia siab hauv ntiaj teb uas taug txoj kev no yuav tsis muaj kev txhaum ntxiv lawm tom qab 1,000 xyoo. Yog koj tab tom taug txoj kev no, tsis txhob thim rov qab thiab tsis txhob tawm rau qhov twg mus txog thaum lub qab ntuj tshiab! w23.05 17 ¶15; 19 ¶16-18

Thaum koj xav txog ib puas tsav yam uas Yehauvas tau ua rau koj mas koj yeej xav muab koj tus kheej cob rau nws xwb. (Ntawv Nkauj 116:12-14.) Phau Vajlugkub thiaj hais li no tias Yehauvas yog tus pub “Ib puas tsav yam uas zoo thiab ib puas tsav yam koob hmoov uas zoo kawg nkaus.” (Yakaunpaus 1:17) Yam koob hmoov uas zoo tshaj plaws Yehauvas pub rau peb yog nws tus Tub Yexus uas muab nws txoj siab los txhiv peb. Sim xav seb zoo npaum li cas! Twb yog vim muaj tus nqi txhiv koj thiaj tau los nrog Yehauvas sib raug zoo. Thiab nws yuav pub txoj sia rau koj nyob mus ib txhis. (1 Yauhas 4:9, 10) Thaum koj muab koj tus kheej cob rau Yehauvas ces qhia tias koj nco nws txiaj ntsig rau txoj kev hlub uas nws pub, thiab ntau yam koob hmoov uas nws muab pub rau koj.​—Kev Cai 16:17; 2 Kauleethaus 5:15. w24.03 5 ¶8

Thaum peb pom tej kev phem kev qias uas tib neeg ua niaj hnub no, peb yeej xav ib li Lauj thiab. “Lauj nyuaj siab rau cov neeg uas ua kev phem kev qias kawg li” vim nws paub tias peb Leej Txi Yehauvas ntxub kev phem kev qias. (2 Petus 2:7, 8) Lauj ntxub tej kev phem kev qias uas tib neeg ua los twb yog vim nws hwm thiab hlub Yehauvas. Niaj hnub no los yeej muaj cov neeg uas saib tsis taus Yehauvas tej kev cai dawb huv nyob puag ncig peb. Txawm li ntawd los, peb yeej ua tau neeg dawb huv yog hais tias peb hwm Yehauvas thiab hlub nws. Yehauvas muab cov lus qhuab ntuas hauv Paj Lug los pab peb ua neeg dawb huv. Txhua tus Khixatia, tsis hais poj niam txiv neej, tus laus tus hluas los cov lus qhuab ntuas no yeej pab tau peb sawv daws. Thaum peb hwm Yehauvas, peb yuav tsis mus ua phooj ywg nrog cov neeg ua phem. w23.06 20 ¶1-2; 21 ¶5

Tej zaum koj tau raug kev tawm tsam los ntawm koj tsev neeg. Los sis koj tau tso tej qhov txhia chaw tseg koj thiaj muab tau Vajtswv lub Nceeg Vaj tso ua ntej hauv koj lub neej. (Mathais 6:33) Vajtswv Yehauvas pom ntsoov tej uas koj tau ua. (Henplais 6:10) Koj puas pom tias muaj raws li Yexus cov lus no: “Txhua tus uas tso niam tso txiv, tso tub tso kiv, tso kwv tso tij, tso nkauj tso muam, tso vaj tso tsev, tso liaj tso teb tseg los ua kuv tus thwj tim, tiam no yuav tau 100 npaug ntxiv, tsis hais niam txiv, tub ki, kwv tij nkauj muam, vaj tse, liaj teb. Nws kuj yuav raug tsim txom. Thiab tiam tom ntej nws yuav tau txoj sia ib txhis tsis kawg.” (Malakaus 10:29, 30) Tej koob hmoov uas koj tau txais yeej zoo tshaj txhua yam uas koj muab tso tseg lawd.​—Ntawv Nkauj 37:4. w24.03 9 ¶5

Thaum muaj kev tshaib nqhis los raug cov ntseeg nyob hauv lub xeev Yudias, cov kwv tij ntawm lub koom txoos nyob rau hauv lub nroog Ati-aukias “npaj sau khoom xa mus pab cov kwv tij hauv Yudias, nyias muab raws li nyias muaj.” (Tes Hauj Lwm 11:27-30) Txawm cov ntseeg uas raug kev tshaib nqhis nyob ntuj ncua kev deb lawm los cov ntseeg hauv Ati-aukias yeej kub siab lug xav pab lawv. (1 Yauhas 3:17, 18) Thaum cov kwv tij nkauj muam raug xwm txheej, peb yeej qhia tau peb txoj kev hmov tshua rau lawv. Tej zaum peb yeej maj nroos mus nug cov txwj laus seb yuav pab li cas, tso nyiaj mus pab tes hauj lwm thoob qab ntuj, thiab thov Yehauvas pab cov uas raug xwm txheej. Tej zaum peb cov kwv tij nkauj muam yuav tos peb txoj kev pab kom lawv muaj txawm peem. Thaum peb tus Vaj Ntxwv Yexus Khetos los txiav txim, thov kom nws pom tias peb muaj txoj kev hmov tshua thiab cia peb tau “lub Nceeg Vaj” ua peb tug.​—Mathais 25:34-40. w23.07 4 ¶9-10; 6 ¶12

Yexus xyaum yoog li Yehauvas. Thaum nws los hauv ntiaj teb no, yog nws los qhia rau cov Ixayees uas zoo li “pab yaj uas poob zoo lawm.” Thaum nws qhia rau tib neeg, nws kuj txawj yoog lawv. Muaj ib zaug ib tug poj niam uas tsis yog cov neeg Ixayees thov kom Yexus kho nws tus ntxhais uas “raug dab.” Yexus hmov tshua tus poj niam ntawd heev nws thiaj li kho tus poj niam ntawd tus ntxhais. (Mathais 15:21-28) Hos muaj dua ib zaug, thaum Yexus nyuam qhuav pib tshaj tawm txoj xov zoo, nws hais tias: “Yog leej twg tsis lees paub kuv . . . ces kuv yuav tsis lees paub tus ntawd.” (Mathais 10:33) Tiam sis thaum Petus tsis lees paub nws peb zaug, nws puas tsis lees paub Petus thiab? Nws tsis ua li ntawd. Yexus paub tias Petus yeej tu siab rau qhov uas Petus tau ua li ntawd thiab Yexus paub tias Petus muaj kev ntseeg heev. Tom qab Yexus sawv rov qab los nws mus tshwm rau Petus thiab hais rau Petus tias nws zam Petus lub txim thiab haj tseem hlub Petus heev. (Lukas 24:33, 34) Yehauvas thiab Yexus Khetos nkawd yeej txawj yoog heev. Ua li peb puas txawj yoog? Yehauvas xav kom peb yuav tsum txawj yoog. w23.07 21 ¶6-7

Muaj peb yam uas peb muab qhia tau rau lwm tus yog lawv tsis ntseeg tias lub ntiaj teb yeej yuav muab ua rau ib lub Vaj Kaj Siab tiag tiag. Qhov ib, Yehauvas yog tus cog lus. Nyob rau hauv phau Tshwm Sim hais tias: “Saib maj, kuv tsim txhua yam dua tshiab.” Yehauvas muaj tswv yim, muaj hwj chim, thiab muaj lub siab kub lug xav ua kom txhua yam tiav li nws tau cog tseg. Qhov ob, Yehauvas yeej paub ntsoov tias txhua yam nws hais yeej yuav muaj tiag tiag xwb thiaj tag. Nws thiaj li hais li no tias “tej lus no tso siab tau thiab muaj tseeb” thiab “tiav lawm!” Qhov peb, tsis muaj ib yam twg yuav txwv tau Yehauvas kom tsis txhob muaj raws li nws twb tau pib lawm. Nws hais tias: “Kuv yog Alafas thiab yog Aumenkas.” (Tshwm Sim 21:6) Thaum txhua yam tiav tag lawm, Xatas yuav yog tus dag thiab txwv tsis tau Yehauvas kom tsis txhob ua tau raws li Nws lub ntsiab. Yog li, lwm zaus thaum muaj ib tug ho teb tias, “Ntshe lam hais xwb,” ces cia li mus nyeem nqe 5 thiab 6. Qhia rau nws paub tias ob nqes no Yehauvas yog tus cog lus ces yeej yuav muaj raws li nws cog tseg xwb thiaj tag.​—Yaxayas 65:16. w23.11 7 ¶18-19

Thaum Yehauvas cog cov lus hauv nqe Vajlugkub rau hnub no rau Anplahas, nws twb muaj 75 xyoos lawm. Anplahas puas pom tag nrho tej uas Yehauvas cog lus rau nws? Nws yeej tsis pom tag nrho. Twb yog thaum nws hla tus Dej Efalates lawm thiab twb yog 25 xyoos tom qab ntawd lawm, mam li yug tau nws tus tub Ixaj. Ces 60 xyoo tom qab no ntxiv mam li yug tau nws ob tug tub xeeb ntxwv, Exaus thiab Yakhauj. (Henplais 6:15) Tiam sis Anplahas tsis pom nws cov xeeb leej xeeb ntxwv ua ib haiv neeg tseem ceeb thiab tsis pom thaum lawv mus rau hauv lub teb chaws uas Yehauvas cog tseg. Txawm li los Anplahas yeej muaj kev sib raug zoo nrog nws. (Yakaunpaus 2:23) Thaum Yehauvas tsa Anplahas sawv rov qab los yav tom hauv ntej, Anplahas yuav zoo siab heev tias vim nws muaj kev ntseeg thiab ua siab ntev, Yehauvas thiaj foom koob hmoov rau txhua haiv neeg hauv ntiaj teb no. (Chiv Keeb 22:18) Peb kawm tau los ntawm Anplahas tias tej zaum peb yuav tsis pom tag nrho Yehauvas tej lus cog tseg muaj tiav. Tiam sis yog peb ua siab ntev li Anplahas, Yehauvas yeej yuav muab koob hmoov rau peb tam sim no thiab tseem yuav muab ntau tshaj ntxiv rau peb hauv lub qab ntuj tshiab.​—Malakaus 10:29, 30. w23.08 24 ¶14

Thaum Vaj Ntxwv Uxiyas tseem yau, nws txo hwj chim kawg li. Nws ua lub neej “hwm [Yehauvas].” Rau caum yim lub xyoos uas nws ua neej nyob, Yehauvas yeej tau foom koob hmoov rau nws ntau kawg li. (2 Vaj Keeb Kwm 26:1-4) Uxiyas ntaus yeej ntau lub teb chaws thiab nws saib ntshis kom tsis txhob muaj neeg tuaj ntaus tau lub nroog Yeluxalees. (2 Vaj Keeb Kwm 26:6-15) Uxiyas zoo siab kawg li uas Vajtswv pab nws ua tau tej no. (Laj Lim Tswv Yim 3:12, 13) Vaj Ntxwv Uxiyas ib txwm qhia tib neeg ua ub ua no. Tej zaum qhov no ua rau nws xav tias nws xav ua dab tsi los yeej tau. Muaj ib hnub Uxiyas txawm nkag mus rau hauv Yehauvas lub tuam tsev thiab cia li mus hlawv hmoov tshuaj tsw qab rau saum lub thaj. Tej no tsis yog cov vaj ntxwv tes hauj lwm. (2 Vaj Keeb Kwm 26:16-18) Tus pov thawj hlob Axaliyas tav Uxiyas tiam sis Uxiyas chim heev. Vim Uxiyas tsis mloog lus, Yehauvas thiaj li rau txim rau nws kom mob ruas. (2 Vaj Keeb Kwm 26:19-21) Yog nws txo hwj chim ces nws lub neej twb tsis zoo li ntawd! w23.09 10 ¶9-10

Txawm tom qab tus tub txib Petus ua ib tug xaiv tseg lawm los, nws haj tseem ua tau yuam kev quj qees. Xyoo 36 tom qab Yexus yug, Vajtswv xa Petus mus cuag Khaunelias uas tsis yog ib tug neeg Yudais. Vajtswv xaiv Khaunelias ua ib tug xaiv tseg. Qhov no qhia tau tias “Vajtswv tsis xaiv leej twg ntsej muag” thiab cov uas tsis yog neeg Yudais yeej los ntseeg tau Vajtswv. (Tes Hauj Lwm 10:34, 44, 45) Tom qab ntawd, Petus kuj nrog cov ntseeg uas yog lwm haiv neeg noj mov ua ke. Ua ntej ntawd, Petus yeej tsis nrog lwm haiv neeg noj mov ua ke li. Tiam sis muaj ib txhia ntseeg uas yog neeg Yudais hais tias cov Yudais yuav tsum tsis txhob nrog lwm haiv neeg noj mov ua ke. Thaum ib txhia uas muaj txoj kev xav li no mus rau hauv Athi-aus, Petus txawm tsis kam nrog cov ntseeg uas yog lwm haiv neeg noj mov ua ke vim nws tsis xav kom cov ntseeg uas yog neeg Yudais xav li cas rau nws. Thaum tus tub txib Povlauj pom Petus ua li no, nws thiaj li tab meeg ntuas Petus. (Kalatias 2:13, 14) Txawm Petus ua yuam kev li no los nws yeej peem tiag. w23.09 22 ¶8

Cov txwj laus, nej puas muaj siab kub lug mus pab Yehauvas cov tib neeg? Ua zoo tshuaj xyuas koj tus kheej seb tseem tshuav qhov twg koj ua tsis tau tau, tiam sis tsis txhob rawm maj tag kev cia siab. Nco ntsoov tias “tus Tswv zoo kawg nkaus,” thiab nws yuav pab koj. (1 Petus 2:3) Tus tub txib Petus txhawb peb li no tias: “Vajtswv . . . yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv.” Petus xav hais tias tsis tsim nyog nws nrog Yexus ntxiv lawm. (Lukas 5:8) Tiam sis Yehauvas thiab Yexus nkawd txhawb nqa thiab hlub Petus heev, Petus thiaj li peem tiag ua Yexus ib tug thwj tim. Petus thiaj li muaj feem ‘mus nyob hauv peb tus Tswv Yexus Khetos tus uas yog peb tus Cawm seej lub [Nceeg Vaj] uas nyob mus ib txhis li.’ (2 Petus 1:11) Qhov no yog ib qho koob hmoov zoo kawg li uas Petus tau txais! Yog tias koj peem tiag ib yam li Petus thiab cia Yehauvas cob qhia koj ces koj yuav tau txais txoj sia ntev dhawv mus ib txhis. Koj yuav ‘txais txoj kev dim [koj] lub txim raws li uas [koj] cia siab rau Vajtswv.’​—1 Petus 1:9. w23.09 31 ¶16-17

Lub tsev ntaub txheej thaud muaj ib lub tshav puam uas xov ib ncig uas cov pov thawj leg lawv tes hauj lwm nyob rau hauv. Ntawm lub tshav puam muaj ib lub thaj tooj liab loj loj uas hlawv tej khoom fij. Nyob ntawd kuj muaj ib lub phiab tooj liab rau dej uas cov pov thawj siv los ntxuav lawv tus kheej ua ntej lawv ua lawv tes hauj lwm. (Khiav Dim 30:17-20; 40:6-8) Niaj hnub nim no, cov xaiv tseg yeej muaj kev ntseeg ruaj nreeg teev tiam Yehauvas nyob ntawm lub tshav puam sab hauv ntawm lub tuam tsev ntawm sab kev ntseeg. Lub phiab ntim dej loj loj ntawm lub tsev ntaub thiab ntawm lub tuam tsev pab kom cov xaiv tseg nco ntsoov tias lawv lub neej thiab lawv txoj kev ntseeg yuav tsum dawb huv. Ua li pab “neeg coob coob” ho teev tiam Yehauvas qhov twg? Tus tub txib Yauhas pom lawv ‘sawv tab meeg ntawm Vajtswv lub zwm txwv,’ uas hauv ntiaj teb ces yog lub tshav puam sab nraud uas lawv ‘pe hawm Vajtswv tas hnub tas hmo hauv lub tuam tsev.’ (Tshwm Sim 7:9, 13-15) Cia peb ris Yehauvas txiaj ntsig rau qhov uas nws cia pe los mus pe hawm nws nyob rau hauv nws lub tuam tsev ntawm sab kev ntseeg! w23.10 28 ¶15-16

Muaj dua lwm txoj kev uas Yehauvas pab tau peb yog nws siv cov txwj laus los txhawb peb. (Yaxayas 32:1, 2) Thaum twg koj muaj kev nyuaj siab ntxhov plawv, mus cuag cov txwj laus thiab qhia rau lawv paub. Thaum lawv pab koj los tsis txhob yig mus yig los. Yehauvas yuav siv lawv los mus txhawb koj lub zog. Tsis tas li ntawd, cov lus cog tseg nyob hauv phau Vajlugkub kuj pab kom peb muaj kev vam kev cia siab thiab rau siab ntso teev tiam Yehauvas mus li. Txawm tias peb ho muaj kev vam kev cia siab mus nyob saum ntuj ceeb tsheej los sis nyob mus ib txhis hauv ntiaj teb no. (Loos 4:3, 18, 19) Vim peb muaj txoj kev vam kev cia siab no, pab tau kom peb thev taus tej kev sim siab uas peb raug, mus qhia txoj xov zoo, thiab ua peb tes hauj lwm hauv lub koom txoos. (1 Thexalaunikas 1:3) Txoj kev vam kev cia siab no kuj pab tau tus tub txib Povlauj tib yam nkaus. Nws “raug kev nyuaj siab,” ‘kawg tswv yim,’ ‘raug luag tsim txom,’ thiab raug luag muab “ntaus ntog.” Muaj qee lub sij hawm kuj phom sij heev rau nws. (2 Kauleethaus 4:8-10) Qhov uas pab tau Povlauj thev taus nws tej kev sim siab yog xav txog nws txoj kev cia siab. (2 Kauleethaus 4:16-18) Povlauj tsuas xav ntsoov txog nws txoj kev vam kev cia siab uas yuav tau nyob mus ib txhis saum ntuj ceeb tsheej. Qhov uas nws xav txog txoj kev vam kev cia siab no pab tau kom nws “niaj hnub muaj zog ntxiv.” w23.10 15-16 ¶14-17

Thaum thov Vajtswv, xav seb puas yog Yehauvas lub sij hawm teb koj cov lus thov. Tej zaum peb xav kom Yehauvas teb kiag peb tam sid. Qhov tseeb, Yehauvas yog tus paub tias lub sij hawm twg thiaj yog lub sij hawm zoo rau nws teb peb. (Henplais 4:16) Yog Yehauvas tsis teb peb tam sid ces tej zaum peb yuav xav tias Yehauvas tsis kam pab peb. Tiam sis tsis yog Yehauvas tsis kam pab peb, tej zaum tsuas yog Yehauvas tsis tau teb peb xwb. Xws li ib tug tub hluas uas thov kom Yehauvas pab nws tus mob zoo. Tiam sis nws tus mob yeej tsis zoo li. Yog Yehauvas kho nws tus mob ces Xatas yuav nkaug tias tos nws teev tiam Yehauvas los twb yog vim Yehauvas kho nws zoo. (Yauj 1:9-11; 2:4) Txawm Yehauvas tsis tau kho tej kev mob kev nkeeg tam sim no los nws twb teem tseg ib lub sij hawm uas nws yuav kho txhua hom mob lawm. (Yaxayas 33:24; Tshwm Sim 21:3, 4) Ua ntej lub sij hawm ntawd, peb yuav tau ua siab ntev tos Yehauvas. Yog li zoo dua rau tus kwv tij thov kom Yehauvas pub dag pub zog thiab pub lub siab kaj siab tus rau nws thev nws tus mob, thiab pab nws rau siab ntso teev tiam Yehauvas mus li. w23.11 24 ¶13

Xaxoos tau ua ib qho yuam kev loj heev tiam sis nws kuj tsis muab Yehauvas tso tseg. Nws kuj nrhiav kev seb yuav ua li cas nws thiaj ua tiav tes hauj lwm uas Yehauvas muab tso rau nws uas yog ntaus kom yeej cov Filitees. (Cov Thawj 16:28-30) Xaxoos thov Yehauvas tias: “Thov koj pub rau kuv rov muaj zog li qub ib zaug ntxiv, kom kuv pauj tau cov Filitees no.” Yehauvas teb Xaxoos cov lus thov thiab ua txuj ci kom Xaxoos rov muaj zog li qub. Xaxoos thiaj li tua cov Filitees tuag coob tshaj li txhia zaus hauv nws lub neej. Txawm Xaxoos raug txom nyem ntsuav vim nws ua yuam kev los nws yeej tsis tso Yehauvas tseg. Yog li ntawd, thaum peb ua tau ib yam yuam kev twg es raug qhuab ntuas los sis tsis tau ua Yehauvas tes hauj lwm li qub lawm los peb yuav tau tsis txhob muab Yehauvas tso tseg. Nco ntsoov tias Yehauvas yeej tsis tso peb tseg ib zaug li. (Ntawv Nkauj 103:8, 9) Txawm peb ua tau yuam kev lawm los Yehauvas yeej yuav ntxiv dag zog kom peb rov qab ua tau nws tes hauj lwm ib yam li nws tau muab rau Xaxoos. w23.09 6 ¶15-16

Qhov uas koj thev yuav haum Vajtswv siab. Qhov no tsis yog hais tias Vajtswv xav pom kom koj raug kev sim siab los sis teeb meem tiam sis qhov uas Vajtswv zoo siab yog koj thev dhau tej uas koj raug. (Ntawv Nkauj 5:12) Nco ntsoov thaum Anplahas tiv dhau kev sim siab, nws ua haum Yehauvas siab. Yehauvas saib nws tam li ib tug phooj ywg thiab suav tias nws ncaj ncees. (Chiv Keeb 15:6; Loos 4:13, 22) Peb los kuj zoo tib yam li ntawd. Qhov uas peb ua haum Yehauvas siab tsis yog peb tuav ntau tes dej num hauv nws lub koom haum tiam sis yog qhov uas peb rau siab teev tiam nws tab txawm peb raug kev sim siab. Txawm peb yuav laus yuav hluas, yuav ua tau ntau, tau tsawg los peb yeej muaj rab peev xwm thev taus. Yog koj tseem tab tom raug kev sim siab thiab haj tseem ntseeg Yehauvas ruaj nreeg, nco ntsoov tias koj ua haum Yehauvas siab. Yog peb xam pom tias Yehauvas txaus siab rau peb lawm ces yuav yim huab pab tau kom peb muaj kev vam kev cia siab rau yav tom ntej. w23.12 11 ¶13-14

Ib tug txiv neej Khixatias yuav tsum txawj sib txuas lus. Tus txiv neej uas txawj sib txuas lus yeej ua tib zoo mloog thiab yeej paub lwm tus txoj kev xav. (Paj Lug 20:5) Nws yuav paub tias luag xav li cas yog nws ua tib zoo mloog luag lub suab, saib luag lub ntsej muag, thiab saib luag tus cwj pwm. Yuav kom koj ua tau li no, koj yuav tau siv sij hawm nrog tib neeg tham. Yog koj tsuas ntaus ntawv mus nrog tib neeg tham hauv e-mail thiab hauv xov tooj xwb ces koj yuav tsis paub nrog tib neeg sib txuas lus thaum koj pom lawv tim ntseg tim muag. Yog li ntawd, txhuas lub sij hawm uas koj pom tib neeg tim ntsej tim muag, zoo rau koj nrog lawv sib txuas lus. (2 Yauhas 12) Tus txiv neej Khixatias uas paub tab kuj yuav tsum ua hauj lwm yug nws tus kheej thiab nws lub cuab lub yig. (1 Timautes 5:8) Zoo rau koj kawm kom tau ib txoj hauj lwm xwb ces yeej zoo heev. (Tes Hauj Lwm 18:2, 3; 20:34; Efexaus 4:28) Cia kom luag pom tias koj yog ib tug uas nquag ua hauj lwm thiab ua tes hauj lwm twg los yeej ua tiav. Yog koj yog ib tug uas zoo li no ces yuav yooj yim rau koj nrhiav hauj lwm thiab thaum koj nrhiav tau ib txoj lawd, koj yuav tuav tau txoj hauj lwm ntawd mus li. w23.12 27 ¶12-13

Thaum phau Vajlugkub hais txog Yehauvas hnub, yog hais txog hnub uas Yehauvas los rhuav tshem nws cov yeeb ncuab thiab los cawm nws cov neeg. Yav thaum ub, Yehauvas rau txim thiab rhuav tshem tej haiv neeg. (Yaxayas 13:1, 6; Exekhees 13:5; Xefaniyas 1:8) Tiam sis nyob rau tiam no, Yehauvas hnub yuav pib thaum tej nom tswv rhuav tshem kev ntseeg cuav mus txog rau thaum ntsuj rog Amankedoos. Yexus hais tias yuav kom peb dim “hnub” ntawd, peb yuav tsum tau npaj tam sim no rau thaum muaj “kev txom nyem loj kawg nkaus” thiab peb “yuav tsum zov tos” hnub ntawd. (Mathais 24:21; Lukas 12:40) Povlauj thawj tsab ntawv uas nws sau mus rau cov ntseeg hauv Thexalaunikas, nws siv lus piv txwv ntau los pab kom lawv paub npaj rau Yehauvas hnub. Txawm nws paub hais tias Yehauvas hnub yuav tsis tau los thaum ntawd los nws xav kom lawv npaj txhij rau hnub uas Yehauvas yuav los phua txim rau nws cov yeeb ncuab. (2 Thexalaunikas 2:1-3) Povlauj txhawb kom lawv npaj li hnub ntawd twb yuav los tag kis ntag. Peb los yuav tau ua ib yam li ntawd thiab. w23.06 8 ¶1-2.

Nyob rau xyoo 1978, hauv teb chaws Nyiv Pooj ntawm lub nroog Toki-au (Tokyo), lawv ua tau ib lub tsev siab siab heev. Cov tib neeg uas pom lub tsev ntawd xav tias yog muaj av qeeg lub tsev ntawd puas yuav khov. Cov kws ua lub tsev no yeej ua tib zoo soj ntsuas kom lub tsev khov khwb kho thiab ywj ywj xwv thaum muaj av qeeg los thiaj tsis ua li cas. Peb muab cov ntseeg piv tib yam li lub tsev ntawd. Ua li lawv ho zoo li ntawd tau li cas? Ib tug ntseeg twg yuav tau txawj ua tib zoo luj seb thaum twg yuav tau ua tawv qhawv los sis ua muag muag. Nws yuav tau saib xyuas kom nws ua tau tawv qhawv thaum hais txog Yehauvas tej kev cai. Nws yeej yuav mloog lus thiab tsis ua ywj fab ywj fwj. Txuas ntxiv ntawd nws yuav tau ua tib zoo soj ntsuas los sis ua muag muag thaum tsim nyog. (Yakaunpaus 3:17) Ib tug ntseeg twg uas txawj luj tej no yuav tsis coj nruj nruj los sis ho cia ywj siab dhau. w23.07 14 ¶1-2

Xatas kuj sim kom Yexus ua txhaum thiab tso Yehauvas tseg. (Mathais 4:1-11) Xatas lub hom phiaj yog ntxias kom tau Yexus poob kev txhaum xwv Yexus thiaj tuag theej tsis tau neeg lub txhoj. Yexus thev ntau yam kev sim siab ntxiv thaum nws mus tshaj tawm txoj xov zoo hauv ntiaj teb no. Xws li muaj neeg tsim txom nws thiab nrhiav nrhw kev xav muab nws tua. (Lukas 4:28, 29; 13:31) Tsis tas li ntawd, nws haj tseem yuav tau ua siab ntev rau nws cov thwj tim vim lawv yog noob txaug neeg txhaum thiab ua ntau yam yuam kev. (Malakaus 9:33, 34) Thaum luag ntes nws mus hais plaub, luag kuj thuam thiab muab nws tsim txom. Tom qab ntawd, luag kuj muab nws coj mus tua ib yam li ib tug neeg raug txim thiab nws tuag txom nyem ntsuav. (Henplais 12:1-3) Qhov kev sim siab zaum kawg no, nws yuav tau thev nws ib leeg, tsis muaj Yehauvas pab nws. (Mathais 27:46) Yog li ntawd, Yexus yeej raug ntau yam xwv nws thiaj theej tau peb lub txhoj. Thaum peb ua tib zoo xav txog tej uas nws txaus siab ua los pab peb mas ua rau peb tig rov hlub nws heev. w24.01 10-11 ¶7-9

Qhov uas peb ua siab ntev yuav pab tau peb muaj kev sib raug zoo nrog lwm leej lwm tus, pab tau peb ua zoo mloog thaum lwm tus nrog peb tham. (Yakaunpaus 1:19) Pab tau peb muaj kev sib haum xeeb nrog lwm tus. Thiab kuj yuav pab kom peb tsis txhob lam tau lam ua thiab hais lus phem thaum muaj kev nyuaj siab ntxhov plawv. Thiab yog peb ua siab ntev ces peb yuav tsis chim sai thaum muaj neeg ua mob peb siab. Peb yuav tsis ua phem pauj phem, tiam sis peb “ib tug yuav tsum pab ib tug” thiab “ib tug yuav tsum zam txim rau ib tug.” (Kaulauxis 3:12, 13) Qhov uas peb ua siab ntev kuj yuav pab kom peb paub txiav txim siab zoo. Rau qhov yog peb ua siab ntev ces peb yuav ua zoo xav thiab ua zoo tshuaj xyuas kom zoo zoo ua ntej peb txiav txim siab ua ib yam dab tsi. Peb yuav tsis maj thiab tsis lam tau lam ua. Muab ua piv txwv li no, thaum peb mus nrhiav hauj lwm, tej zaum peb yuav cia li lees ua thawj txoj hauj lwm uas peb nrhiav tau. Tiam sis yog peb ua siab ntev ces peb yuav ua tib zoo xav seb txoj hauj lwm ntawd yuav ua li cas rau peb tsev neeg thiab peb txoj kev sib raug zoo nrog Yehauvas. Yog li ntawd, thaum peb ua siab ntev ces peb thiaj yuav paub txiav txim siab zoo. w23.08 22 ¶8-9

Thaum koj xav txog tej uas koj yuav tsum tawm tsam, thiab tej ntawd ua rau koj qaug zog tas. Yog koj nco ntsoov koj cov lus cog tseg rau Yehauvas thaum koj muab koj tus kheej cob rau nws, koj yuav tuaj zog. Yehauvas yuav pab kom koj kov yeej tej kev sim siab. Yuav pab tau li cas? Thaum koj muab koj tus kheej cob rau Yehauvas ces koj tsis ua raws li koj lub siab nyiam lawm. Qhov no txhais tias koj yuav tsis ua raws li koj lub siab ntshaw los sis mus vuag tej uas tsis haum Yehauvas siab. (Mathais 16:24) Yog li, thaum koj raug kev sim siab koj yuav tsis ua xyem xyav. Rau qhov koj twb txiav txim siab lawm tias koj yuav muab siab npuab Yehauvas xwb. Koj yuav ua tau siab tawv qhawv ua haum Yehauvas siab. Thaum koj ua li no twb yog koj ua ib yam li Yauj ntag. Txawm nws raug kev txom nyem kawg nkaus li los nws hais hlo tias: “Kuv yuav tsis tso kuv lub siab ncaj tseg mus txog thaum kuv tuag.”​—Yauj 27:5. w24.03 9 ¶6-7

Tus ‘Vajtswv uas muaj txoj kev hlub’ yeej nrog nraim peb! (2 Kauleethaus 13:11) Nws yeej hlub peb sawv daws ib tug zuj zus. Peb yeej ntseeg tias Yehauvas ‘txoj kev hlub yuav tsom kwm cov neeg uas cia siab rau nws.’ (Ntawv Nkauj 32:10) Yog peb ua tib zoo xav txog Yehauvas txoj kev hlub ces peb yuav pom tias Yehauvas hlub peb npaum li cas. Thaum ntawd peb yuav txav ze rau nws. Peb yeej tsis ntshai thov Yehauvas thiab qhia rau nws tias peb xav tau nws txoj kev hlub npaum li cas. Peb yeej qhia tau rau Yehauvas txog peb tej kev txhawj kev ntshai rau qhov peb ntseeg tias nws yuav to taub peb thiab yuav maj nroos pab peb. (Ntawv Nkauj 145: 19) Tej hnub uas no no peb yeej xav nyob ze cub hluav taws. Tib yam li ntawd, peb yeej xav nyob ze Yehauvas vim nws hlub peb. Txoj kev hlub uas Yehauvas muaj rau peb mas loj heev thiab ua rau peb kaj siab kawg li. Yog li ntawd, cia li zoo siab rau qhov Yehauvas hlub koj heev. Cia peb qhia rau Nws tias: “Kuv hlub Yehauvas”!​—Ntawv Nkauj 116:1. w24.01 31 ¶19-20

Yexus tsis yog qhia tib neeg tias Vajtswv lub npe hu ua Yehauvas xwb tiam sis nws qhia ntau tshaj ntawd. Cov Yudais uas Yexus qhia rau twb yeej paub Vajtswv lub npe lawm. Tiam sis Yexus yog thawj tug uas “qhia tau Leej Txiv rau peb.” (Yauhas 1:17, 18) Xws li Cov Nqe Lus Henplais qhia tias Yehauvas yog tus muaj kev khuv leej thiab kev hmov tshua. (Khiav Dim 34:5-7) Yexus tseem muab qhov ntawd piav meej tshaj thaum nws tham zaj lus piv txwv txog tus tub loj leeb thiab nws leej txiv. Thaum peb nyeem txog qhov uas leej txiv pom dheev leej tub “los txog deb tsawv” es nws txawm dhia loo mus ntsib leej tub, mus muab nws puag kiag, thiab zam nws lub txim huv si ua rau peb pom meej meej tias Yehauvas khuv leej thiab hmov tshua tib neeg npaum li cas. (Lukas 15:11-32) Thaum Yexus piav li no ua rau lwm tus pom tias Yehauvas zoo li cas tiag. w24.02 10 ¶8-9

Yehauvas kuj daws thiab nplig cov uas raug kev nyuaj siab. Ib yam uas pab tau peb kom xyaum tau Yehauvas yog xyaum kom muaj tej cwj pwm uas yuav pab kom peb hmov tshua lwm tus xwv peb thiaj mus nplig lawv. Ua li cov cwj pwm no yog li cas rau li cas tiag? (1 Thexalaunikas 4:18) Tej cwj pwm uas peb yuav tau muaj mus li yog ib leeg xam pom ib leeg, ib leeg hlub ib leeg ib yam li kwv tij sib hlub, thiab muaj lub siab mos siab muag. (Kaulauxis 3:12; 1 Petus 3:8) Muaj tej cwj pwm no yuav pab tau peb li cas? Thaum peb muaj tej cwj pwm no peb yuav kheev hmov tshua peb cov kwv tij nkauj muam thiab pab lawv thaum lawv cheem tsum kev pab. Yexus hais tias, “lub siab xav li cas, lub ncauj hais tawm li ntawd. Tus neeg zoo xav ntsoov txog yam zoo hauv nruab siab, nws thiaj hais tawm yam zoo xwb.” (Mathais 12:34, 35) Peb qhia tias peb hlub peb cov kwv tij nkauj muam thaum peb nplig lawv siab. w23.11 10 ¶10-11

Yuav kom peb to taub cov lus faj lem hauv phau Vajlugkub peb yuav tau thov lwm tus pab peb. Muab piv txwv tias koj mus rau ib thaj tsam uas koj tsis tau mus dua tiam sis koj tus phooj ywg uas nrog koj mus paub thaj tsam ntawd zoo heev. Nws paub cov kev nyob ntawd tias txoj twg mus rau qhov twg ces koj yeej zoo siab heev uas muaj nws nrog koj. Yehauvas zoo li tus phooj ywg ntawd. Nws paub yav tom hauv ntej yuav zoo li cas. Yog peb xav kom peb to taub cov lus faj lem ces peb yuav tau txo hwj chim thiab thov nws pab peb. (Daniyees 2:28; 2 Petus 1:19, 20) Cov niam cov txiv tsuas xav kom lawv cov me nyuam muaj lub neej zoo siab xwb. Yehauvas los kuj xav kom peb muaj lub neej zoo siab thiab. (Yelemis 29:11) Tiam sis Yehauvas tsis zoo li tib neeg, nws paub tseeb tias yav tom hauv ntej yuav zoo li cas thiab yeej muaj tiag li nws hais. Yehauvas muab cov lus faj lem sau cia rau hauv phau Vajlugkub los twb yog nws xav kom peb paub txog tej xwm txheej tseem ceeb uas yuav muaj tshwm sim rau yav tom hauv ntej, thiab yuav tshwm sim los li cas kom peb thiaj li paub npaj tam sim no.​—Yaxayas 46:10. w23.08 8 ¶3-4