Tanobada Amo Sivarai Idauidau
Natu Hamasea Karadia Hida?
Buenos Aires ena daba niuspepa, Clarín ia gwau: ‘Tanobada ibounai, lagani ta lalonai, taravatu lasi bogana lalonai natu hamasea karadia milioni 33 idia karaia, bona bema hunia dalanai natu hamasea karadia be unai namba ida idia hakapua, reana do ia daekau 40 bona milioni 60 bamona. Tanobada ena taunimanima 76 pesen be bogana lalonai natu hamasea karana idia taravatua lasi tanodia ai idia noho.’ Bogana lalonai idia hamasea natu edia namba be Argentina ena taunimanima edia namba ia hanaia, bona Britain, Egypt, France, Italy, South Africa, eiava Turkey dekenai idia noho taunimanima ibounai lagani ta ta lalonai idia hamasedia ore bamona. Edia namba be tanobada turiana iharuana ena lagani 6 lalonai idia mase taudia, milioni 50, hegeregerena.
Noho Gabuna Namona?
United Nations ia gwau Canada be noho gabuna namo hereana tanobada lalonai. The Toronto Star niuspepa ia gwau: “Unai be nega iharuana, tano 173 amo, idia gwau Canada be ataiai.” Ma ia gwau, “ena be unai idia hereva, to unai hereva ena anina be inai lasi: tanobada dekenai Canada taudia edia taga ese bese idaudia edia ia hereaia.” Vadaeni, dahaka dainai Canada idia gwauraia gabu namona? UN Development Program ese tano idauidau edia moni gaukara ena pei, edukeisini, bona edia mauri lagani ia hahegeregerea, bena unai ripoti ia torea. Edia mauri lagani dekenai, Canada taudia idia mai namba 6, edia mauri lagani ena averes be 77.2. Edukeisini bona gorere hanamoa totona idia halusia monina, bona mai edia kohu hegeregere, televisen bona motuka dainai, Canada be kahirakahira ataiai idia atoa.
Brazil ena Indian Besedia
O Estado de S. Paulo niuspepa ia gwau ‘Brazil be mai ena Indian besedia 59, sibodia idia noho bona idia be nao taudia idia itaia momo lasi bona idia tura henidia lasi. Lagani 1980 ia hamatamaia negana amo, National Indian Foundation ese unai namba amo, orea 9 sibona idia davaria,’ Amazon uda badana lalonai, iduhu matamatadia idia do davaridia noho. Sibodia idia noho Indian taudia edia orea momo lalonai taunimanima 150 bamona idia noho. Brazil be mai ena 532 Indian noho gabudia, iduhu idauidau 180, bona Indian taudia 260 tausen. Idia noholaia tano ena bada be 909,000 square kilomita—Brazil ena tano ibounai amo unai be 11 pesen—ena be unai gabu momo edia hetoana idia do atoa lasi. Iduhu idauidau idia hetura bona hari tanobada ena mauri dalana idia dibaia totona, anthropologist taudia ese iduhu taudia idia hadibaia vidio kamera idia gaukaralaia edia hanua kastom idia rekodia bona ma kahirakahira idia noho orea haida dekenai idia hahedinaraia. Vanegai, edia piksa idia itaia murinai, Waiapi bona Zo’é iduhu taudia idia hedavari. Gado tamona idia herevalaia dainai, edia gori bona sene karadia, edia labana, gorere hanamoa karadia, nadunadu, bona bosea turia daladia idia kikilaia.
Operesen Namona
Italy ena niuspepa ladana La Stampa ia gwau, April lalonai Pope John Paul Namba 2 ena gabana operesen idia karaia medikal orea be “mai maoro ida idia heagi” bona idia gwau “unai operesen idia karaia namo herea momokani.” To hari inai nega ena pope dekenai idia karaia operesen momo be unai bamona lasi. Lagani 1981 ai, idia pidia murinai, John Paul Namba 2 be idia henia rara amo gorere dikana ia davaria bona hua rua ia noho hospital dekenai. Unai dainai ita hoa lasi, badina ena be La Stampa niuspepa ia gwau “rara bada herea ia halusia,” to rara idia henia hanai lasi. To, unai niuspepa ia gwau, “Pope ena rara idia abia, idia hagoevaia, bena idia henia giroa lou.”
AIDS Hanamoa Dalana be Lasi
August 1994 lalonai, Japan dekenai AIDS 10th International Conference idia karaia, bona idia gwau AIDS koua bona hanamoa totona idia karaia drag be idia do karaia lasi, bona idia laloa vaira lagani 5 idia ore murinai danu, ta do idia karaia lasi. Dr. James Curran, Centers for Disease Control and Prevention, Atlanta, Georgia dekenai ia gwau: “Ita be tanobada hegegemadai ai H.I.V. gorere ena bada ena hamatamaia gabunai sibona.” Tanobada hegegemadai, taunimanima milioni 17 bamona be unai gorere idia abia, guna lagani ena namba ia hanaia milioni 3 amo. Madi, unai namba amo milioni ta be natu. World Health Organisation ia gwau, bema unai namba dekenai ia bada ia lao, lagani 2000 ai taunimanima milioni 30 ia lao 40 be AIDS do idia abia vadaeni. Hua 12 lalonai AIDS gorere taudia edia namba be 60 pesen amo ia bada, unai ese lagani 1994 ena namba, mase taudia danu, ia abia daekau milioni 4. HIV idia abia taudia be lagani 10 eiava ma haida murinai AIDS gorere ena toana idia hahedinaraia. Tanobada hegegemadai unai daihanai gorerena idia hanamoa gaukara be ia metairametaira dainai, AIDS hebouhebou be lagani ta ta lasi, to lagani rua rua lalonai do idia karaia, bona nega vaira ena hebou be July 1996, Vancouver, British Columbia, Canada ai do idia karaia.
Idia Maragi Negana amo Idia Mamia
Toronto ena niuspepa The Globe and Mail ia gwau: ‘Natu ena mauri lagani be toi ia do abia lasi lalonai idia naria dalana be mai ena siahu, edia laloa dalana dekenai. Bona unai ese ia durua ena lalohadai, ena lalo-goada bona aonega hekwakwanai hanamoa daladia ai ia tubu namonamo totona. Moni lasi bona noho namonamo lasi besedia lalonai idia noho matamata taudia be nega momo, lo taudia namodia ai do idia lao lasi.’ Canadian Institute for Advanced Research ena presiden, Dr. Fraser Mustard ia gwau, unai bamona natu be sikuli dekenai do idia kwalimu lasi, bona heai amo edia hekwakwanai do idia hanamoa toho. Ia gwau: “Hekwakwanai hanamoa daladia oi dibaia namonamo neganai, unai ese oi do ia durua taunimanima ida oi noho namonamo totona.” Globe niuspepa ia hahedinaraia Yale University bona University of Montreal edia tahua gaukara amo idia davaria “natu bona sina tama idia hebamo namonamo neganai unai be namo do ia havaraia natu ena tubu dalanai, ena aonega bona ena laloa dalana dekenai.”
Loaloa Neganai Naria Namonamo
Oi loaloa neganai, oi badinai idia vara gaudia oi raraia namonamo. Brazil ena magasin ladana Claúdia ia gwau: “Baege henaoa taudia bona poketi lalonai gaudia henaoa taudia be loaloa bona daradara taudia idia ura henidia.” Hegeregere, “bema ta ese oi ia bampaia o gau ta ia bubua emu dabua dekenai, oi naria namonamo. Unai be koikoi karana, emu lalona veria totona.” Danu, ta ese oi ia noia heduru o gau ta diba totona neganai, oi naria namonamo. Oi itaia namonamo lasi neganai, reana emu baege do ia henaoa. São Paulo ena International Airport gaukara tauna, Adriano Caleiro ia gwau inai negadia ai oi naria namonamo: peleini gabunai emu baege oi atodia, motuka renta gabuna pepa oi sainia, hotele dekenai oi lao o rakatania, motuka dekenai natudia oi atodia vareai, sitoa dekenai oi loaloa, o sitoa lalonai kofi oi inua neganai. Unai magasin ia gwau bema emu ki idia boio, emu loka oi senisia haraga. Henaoa tauna be reana do ia gwau, emu baege ia davaria bona lalona gaudia ibounai ia mailaia, to reana emu ki amo ma ki ta ia karaia, bona gabeai emu ruma dekenai do ia vareai.
Idia Badu Lasi
Maumau hereva idia haerelaia oreana, Japan Helpline, ia gwau, Japan idia vadivadi henia taudia be bema “Idau Taudia Lasi” saini idia itaia, idia badu lasi be namo. Unai saini idia atoa taudia momo be idia ura haida idia durua. Haheitalai ta be, Tokyo ena Akihabara taoni dekenai, paua gaudia ia hoihoilaia sitoa biaguna tauna ia gwau: “Badina lau be [gado idauna ma ta] lau diba lasi, egu sitoa dekenai idia mai Japan gado idia diba lasi taudia momo lau hahekwakwanaidia. Unai dainai, lau laloa saini ta do lau atoa bena taunimanima do lau hahekwakwanaidia lasi.” Asah Evening News ia gwau: “Unai bamona taunimanima idia kara henia taudia be idau bese ida idia hebamo momo lasi taudia, unai dainai idia laloa bema idau bese idia durudia lasi, unai be dala namona unai hekwakwanai hanamoa totona.”
Bita Alaia Aonega Taudia
Bombay Municipal Corporation be bita alaia taudia 76 ia tahudia neganai, hekwakwanai ta ia davaria. Indian Express niuspepa ia gwau: “Taunimanima 40,000 bamona ese unai gaukara idia ura karaia to idia momo be iunivesiti aonega taudia, idia do sikuli noho eiava idia doko koledi taudia, to bita alaia tauna be komiuniti sikuli tauna sibona be hegeregere.” Orea tauna ta ia gwau: “Edena bamona ai ese iunivesiti tauna ai abia bita ia alaia totona?” Hanuaboi ai bita idia tahua bona au dekenai idia alaia, bona bita 25 idia alaia davana be K3.66 bamona. Unai orea be gaukara taudia “abia dalana namona ia tahua” noho. To unai taoni naria oreana be unai hekwakwanai sibona ia davaria lasi. Tomadiho hekwakwanai ta danu. Jain tomadiho bona ma tomadiho orea haida ese gaukara taudia dekenai moni idia henia, bita idia aladia lasi totona, badina edia tomadiho ese animal alaia karana ia taravatua.