Aids—Edena Bamona Do Ia Ore?
PHILADELPHIA U.S.A. dekenai, Wyeth-Ayerst Research Center dekenai, kodoa muramura tahua karana ia gunalaia tauna, Jorg Eichberg, ia gwau: “Lau diba momokani, AIDS gorerena koua kodoa muramurana be lagani 9 bamona ai do ita davaria.”
Bema AIDS gorere koua kodoa muramurana ta idia davaria neganai, dahaka do ia vara. Unai ese namo bada herea do ia havaraia! AIDS gorerena hanamoa karana idia tahua taudia 9,000 be Florence, Italy, dekenai idia hebou “Saiens ese AIDS Ia Tuari Henia” herevana idia kikilaia hebou totona.
Idia bada idia lao tanodia dekenai gorere matamatadia 10 lalonai 9 be unai gabudia dekenai idia vara, doketa taudia idia hekwarahi bada unai gorere hanamoa daladia idia tahua totona. To, New Scientist magasin ese ia hahedinaraia, Florence dekenai idia hebou taudia momo be “unai dika koua haraga karana be gau badana idia laloaboio bamona.”
To hereva momokanina be inai, Saiens taudia be edia tahua karana dekenai haere momo lasi idia davaria to henanadai momo idia davaria. New Scientist magasin ia gwau, “unai gorere ia vara laganidia 10 lalonai, gorere idauidau idia stadilaia taudia bona tauanina sibona ese gorere ia koua karana idia stadilaia taudia edia hekwakwanai be ia bada ia lao noho.”
To bema AIDS gorere koua kodoa muramurana ta idia davaria, taunimanima momo do idia abia diba, a? Doketa Dennis Sifris, be Africa dekenai idia vara gorere dikadia ia diba, ia gwau: “TB gorere [tuberculosis] hanamoa kodoa muramura namona ia noho, unai anina be TB gorere be idia koua momokani diba, [hegeregere,] measles bona Hepatitis B goreredia idia haoredia bamona. To unai gorere toi ese . . . hari Africa dekenai taunimanima momo idia hamasea noho. Unai dainai ena be kodoa muramurana ta idia davaria bona ia bada momokani, to taunimanima momo do idia abia be ia auka.”
Hanamoa karana be lasi dainai, Africa dekenai taunimanima idia hadibaia edia lalohadai mahuta hebou karana dekenai idia haidaua be namo.
Momo Edia Haere Herevana
Africa dekenai AIDS gorerena koua dalana badana ta be condom idia henia taunimanima dekediai. Motuka badadia idia taria taudia be tano ena gabu hetoana dekenai idia abia davana lasi. Hosipele dekenai idia gaukara taudia ese condom milion momo idia haboua hegaegae.
Ena be unai gaudia ese AIDS gorere ena tubu ia koua sisina, to hekwakwanai ma haida idia noho—hegeregere Africa dekenai. Health gaukara tauna ta Stefan van der Borght, ia be Medecins Sans Frontieres orea Angola dekenai, ia gwau, bema condom milion toi oi hariharilaia, oi laloa namo do ia havaraia. To unai anina be tatau milion ta mai kahana be nega rua sibona mahuta hebou karana do idia karaia bena edia condom do idia ore.
Unai kara amo hekwakwanai idia vara, to danu condom henia kava karana ese sihari kava karana ia hamaragia, a? Ia hedinarai goevagoeva condom henia karana ese sihari kava karana ia hamaragia lasi, to ia habadaia. Harihari gavamani ena tau badadia ese unai idia diba. Africa ena gabu ta dekenai gavamani taudia ese edia niuspepa bona reidio naria taudia idia hamaorodia condom kikilaia karana do idia koua, badina unai hereva ese sihari kava karana ia habadaia. Aids—Countdown to Doomsday bukana ia torea tauna, Keith Edelston, ia gwau: “Condom gaukaralaia karana amo . . . dika idauidau ia vara diba dainai, ia hedinarai goevagoeva gau badana be adavana tamona abia karana sibona ese namo do ia havaraia.”
AIDS Haorea Negana
Africa dekenai AIDS gorere ia stadilaia momo tauna, Profesa Reuben Sher, ia gwau: “Bema kerukeru ai taunimanima be sihari kava karana idia karaia lasi neganai, unai gorere do ia ore. Unai gorere idia abia vadaeni taudia do idia mase ore bena unai gorere do ia ore momokani.”
Hari, Africa dekenai, Iehova ena Witness taudia 450,000 bona ma haida be unai kara ibounai idia dadaraia noho. Idia ese Baibel ia gwauraia kara goeva karadia idia abidadama henia momokani, badina unai amo namo idia davaria. Edia lalohadai be inai: Havaraia Tauna, Iehova Dirava ese taunimanima ia karaia dainai iena ura taunimanima ese do idia karaia gaudia idia badinaia be maoro. Heberu 13:4 dekenai ia noho taravatuna be haheitalai namona, ia gwau: ‘Namona be taunimanima iboudiai ese headava idia matauraia, bona mahuta hebou gedana idia hadikaia lasi.’ Unai bamona tauanina ena moale karadia idia reaia lasi, bona unai bamona siridia edia mauri lalonai idia badinaia taudia be tauanina dalanai bona lalona ena goada dalanai dika idia davaria lasi.—Kara 15:29; 2 Korinto 7:1; Efeso 5:3-5 itaia danu.
Africa dekenai, nega momo niuspepa, reidio, bona TV dekenai Iehova ena Witness taudia edia kara goeva idia gwauraia hedinarai. Daily Telegraph niuspepa London, England dekenai, ia gwau: “[Idia] hahedinaraia idia be . . . kara goeva taudia, kara ibounai idia karaia maoromaoro, bona kara goeva ai idia noho.” Ma ia gwau: “Africa dekenai, Iehova ena Witness taudia edia ihuanai sihari kava karadia bona adavana momo abia karana oi davaria diba lasi.” Unai hegeregerena, Contemporary Transformations of Religion bukana ia torea tauna, Bryan Wilson ia gwau, “Africa dekenai, Witness taudia . . . edia kara be idia idau momokani” bona “[edia] . . . kara goeva be ia hedinarai momokani.”
Ita gwau lasi Iehova ena Witness taudia ese AIDS gorerena idia abia diba lasi. Haida edia adavadia be Keristen taravatudia idia badinaia lasi bona unai gorere idia dekenai idia henia hanai, bona haida be Iehova ena Witness taudia ai idia do lao lasi neganai, unai gorere idia abia vadaeni. Bona haida be inai tanobada ena kara bodaga karadia dekenai idia giroa lou, bona idia haida ese AIDS gorerena idia abia, edia kara ena huahua hegeregerena idia abia. (Galatia 6:7) To, mai edia ura ibounai ida kara bodaga karana idia tahua taudia be edia noho namona Keristen kongregesen lalonai idia haboioa. (1 Korinto 5:13; 6:9, 10) To Iehova ena Witness taudia milion hani bona ma haida be tanobada hegegemadai idia ese tauanina ai, lalona ena goada ai bona lauma dalanai namo idia davaria, badina Havaraia Tauna ena taravatu kara goeva karana dekenai idia badinaia dainai.
Moale gauna be inai, Baibel ese ia hahedinaraia ita idia hahisihisia goreredia hegeregere, AIDS gorerena do ia haoredia ela bona hanaihanai. (Apokalupo 21:1-4) Iehova Dirava ese tanobada matamata ia gwauhamatalaia, unuseniai matabodaga karadia amo idia vara gorere idauidau do idia noho lasi, AIDS gorerena be do ia kokia momokani. Unai neganai ta ena kerere dainai hisihisi do oi abia lasi, badina taunimanima ibounai be kara maoromaoro dalanai do idia raka, moale ia havaraia gorere lasi mauri namona do idia davaria.—Isaia 11:9; 2 Petero 3:13.
[Blurb on page 9]
“Gorere koua bona hanamoa tahua karadia dekenai moni bilion momo ita negea be anina lasi . . . Namona be kara goeva ita karaia.”—Dr. Mark Hendricks, South African immunologist
[Picture on page 9]
Adavana tamona abia hidi karana be gau badana AIDS gorerena oi abia lasi totona
[Picture on page 10]
Dirava ia gwauhamata tanobada matamata lalonai, gorere idauidau do idia ore, AIDS gorerena danu