Evanelia Buka Haniosi​—Sivarai Momokani O Koikoi?

BIBLE idia hakoikoia gwauraia taudia haida idia gwau Evanelia Buka Haniosi ese Iesu ena mauri idia sivarailaia maoromaoro lasi. Idia gwau unai toretore lalodiai kerere momo idia noho, bona idia vara gaudia be sisina daudau murinai idia torea hedinarai dainai, unai sivarai idia torea maoro lasi. Idia gwau, Keriso ese ia karaia hoa karadia edia sivarai be toretore taudia sibodia edia lalohadai amo idia torelaidia.

Idau negai sivaraina ia torea tauna, Will Durant, ese ia torea bukana Caesar and Christ lalonai, ia ese Evanelia Buka Haniosi edia hereva ia tahua namonamo, idia be hereva maoromaoro o lasi. Ia gwau Evanelia Buka Haniosi lalodiai kerere bona daradara gaudia haida ia davaridia, to ma ia gwau: “Idia be kerere maragidia sibona, bona unai buka haniosi idia gwauraia sivaraidia be tamona, bona Keriso ena mauri oromana idia gwauraia hedinarai goevagoeva.”

To, Bible idia hakoikoia gwauraia taudia idia gwau Evanelia Buka Haniosi edia sivarai be idau negai ena sivarai momokanina lasi, to unai taudia edia lalohadai be maoro, a? Unai tau Durant ma ia gwau: “Unai taudia ese Taravatu Matamatana ena sivarai iboudiai idia hakoikoia gwauraia, to bema idau negai idia torea sivarai ma haida, taunimanima idia hamomokanidia vadaeni sivaraidia, do idia sekedia namonamo, hegeregere Hamurabi eiava David, eiava Sokaratis idia torea sivaraidia, do idia gwau unai danu be gori sivaraidia sibona. Vaia, gori sibona idia torea taudia ese sivarai haida do idia hunidia, to Evanelia Buka Haniosi idia torea taudia ena be idia be mai edia lalohadai kereredia, to tomadiho dalana tamona idia manadalaia dainai, idia vara sivaraidia iboudiai idia torelaidia hedinarai. Basileia lalonai daika ese dagi badana do ia abia idia hepapahuahulaia ena sivarai, Iesu idia dogoatao neganai idia heau oho, bona Petro ese Iesu ia dadaraia edia sivarai idia torea hedinarai . . . Unai sivarai idia duahia neganai, taunimanima do idia diba namonamo unai sivarai lalodiai idia gwauraia tauna be idau negai ia noho momokani.”

Unai tau Durant ma ia gwau: “Bema uru tamona lalonai sikuli bada lasi taudia haida be sibodia edia lalohadai amo tau hereadaena mai ena siahu bada, taunimanima momo ese idia ura henia bada tauna unai, bona mauri dalana hereadaena, bona bese tamona bamona noho hebou karana be idia sivarailaidia diba, unai be hoa gauna momokani, Evanelia Buka Haniosi lalodiai idia torelaia hoa karadia do ia hereaia vaitani gauna unai. Bible be lagani 200 lalodiai haida ese idia hakoikoia gwauraia noho ema bona hari, to unai be herevana, taunimanima ese Keriso ena mauri oromana, ena kara, bona ena hahediba herevadia edia sivarai idia do lalo-pararalaia goevagoeva diba. Unai dainai, Evanelia Buka Haniosi ese idia sivarailaidia gaudia be mai edia anina bada West kahana taudia edia idau negai sivaraina lalonai.”