Gilead Ena Klas Namba 101—Kara Namodia Karaia Goadagoada Taudia
ITA ia Havaraia Tauna, Iehova Dirava, be kara namodia karaia goadagoada tauna, bona ena Natuna, Iesu Keriso danu be unai bamona. Iseda raka dalana ia hahedinaraia tauna, Iesu, be mai goada ida Dirava ese ia henia gaukarana ia karaia lalonai “iena mauri ia henia ita dainai, . . . ia sibona ena orea, do ita goevagoeva, bona iena kara namodia do ita karaia [“goadagoada,” NW] totona.” (Tito 2:14) Watchtower Bible School of Gilead ena klas namba 101 taudia 48 ese kara namodia karaia totona edia lalo-goada idia hahedinaraia momokani. Unai misinari taudia edia sikuli haorea program be September 7, 1996 ai, Watchtower Educational Center dekenai, Patterson, New York ai, idia karaia.
Sisiba Namodia Gaukara Goadagoada Totona
Sikuli haorea program ena seamani be Carey Barber, Hakaua Orea ena memba ta, ena ful-taim hesiai gaukara lagani be 70 idia hanaia. Ena hamatamaia herevana ai, Tadikaka Barber ese Iesu, “tanobada ena diari,” ena haroro bona hadibaia gaukarana ia herevalaia. (Ioane 8:12) Ia gwau Iesu ese unai gaukara namona be ia sibona dekenai ia dogoatao lasi to ena hahediba taudia ia hagoadaia idia ese edia diari do idia hahedinaraia. (Mataio 5:14-16) Unai hesiai gaukara namona ese Keristani tauna ena mauri ena anina ia habadaia bona “diari taudia bamona” idia raka taudia ibounai dekenai maduna badana ia henia.—Efeso 5:8.
Unai hamatamaia herevana murinai, Don Adams, Brooklyn ena hedikwota ena Executive Office amo, idia boiria. Ena hereva ena sinado be “Vairana Kahana ai Ita Raka Lao, Murina Kahana ai Ita Lao Lasi.” Tadikaka Adams ese Gilead School bona ena badina—tano idauidau dekenai sivarai namona harorolaia gaukarana habadaia—ia herevalaia. Dirava ena orea ena gaukara ia bada ia lao ia herevalaia, unai orea ese tanobada hegegemadai gado 300 ma haida ai Baibel bukadia idia halasia. Lagani 1995 ai idia halasia bukana, Diba ese Mauri Dekenai Ita Ia Hakaua Lao, be gado 111 ai idia karaia bona sediual idia karaia vadaeni gado ma haida ai do idia printaia. Ia ese Iesu ena hahediba taudia matamatadia ia durua vadaeni hua haida sibona lalonai idia gwauhamata bona bapatiso totona. Misinari matamatadia ese Baibel stadi durua gaudia matamatadia do idia abia edia gaukara totona.
Unai murinai, Lyman Swingle, Hakaua Orea ena memba ta, ese hereva ladana “Iehova Ena Hesiai Gaukara Oi Karaia Noho” ia henia, Apokalupo 7:15 amo. Iehova be moale Diravana dainai, iena hesiai gaukara ia karaia noho tauna be moale do ia abia. (1 Timoteo 1:11, NW) Unai moale hesiai gaukarana dainai, tanobada kahana ibounai amo taunimanima hutuma bada ese ia idia tomadiho henia. Lagani momo lalonai, Gilead School dekenai diba idia abia taudia ese unai taudia momo idia durua hereva momokani idia diba maoromaoro totona. Unai dainai, ita diba momokani Iehova ese hari ita siaia taudia do ia hanamoa noho hutuma bada memba taudia ma haida idia gogoa gaukarana lalonai.
“Iehova Ena Moale Ita Hahedinaraia Noho” be Daniel Sydlik ena hereva ena sinado, ia danu be Hakaua Orea ena memba ta. Ia hahedinaraia Dirava ena hesiai taudia ibounai, misinari matamatadia danu, ese mauri hanaihanai ena dala bona hari inai negai mauri namona abia dalana be taunimanima dekenai idia hadibaia ena hahenamo idia abia. Tadikaka Sydlik ia gwau: “Hadibaia gaukarana be sibona hanamoa gaukarana. Unai be hadibaia taudia edia vairana ai ia hedinarai bona diba idia abia taudia edia vairana ai danu.” (Salamo 16:8-11) Ia ese Estonia dekenai ia noho misinari tauna ta ena hereva ia gwauraia: “Tanobada hegegemadai ita ese sivarai hereadaena ita abia, bona unai be iseda vairana ai ia hedinarai.” Iseda vairana ena toana ese iduara momo bona lalona momo ia kehoa diba. Taunimanima idia ura diba Iehova ena hesiai taudia edia moale ena badina be dahaka. Tadikaka Sydlik ese ia sisiba henidia: “Oiemu vairana toana oi laloa. Taunimanima be moale taudia idia itaia neganai idia moale.”
Ulysses Glass, lagani 1949 ai Gilead stiuden edia klas 12 ia hadibaia bona unai nega amo ema bona hari ia karaia noho, ese helai taudia dekenai hereva ladana “Mai Haheauka ida, Emui Soul Umui Naria” ia herevalaia. Haheauka be dahaka? Ia be lalo-hekwarahi lasi ida gau ta naria karana, badu eiava hekwarahi neganai boga-auka karana ia hahedinaraia. Haheauka tauna ese ena lalona ia biagua; haheauka lasi tauna be ia naria lasi bona ia badu haraga. Tadikaka Glass ia gwau: “Momo idia laloa haheauka be manoka eiava lalo-rua ena toana,” to “Iehova dekenai haheauka be goada ena toana bona ena kara be mai ena badina.” (Aonega Herevadia 16:32) Haheauka ese dahaka namo ia havaraia? China ena aonega herevana ta ia gwau: “Badu neganai oi haheauka dainai dina handred lalonai do oi lalo-hekwarahi lasi.” Tadikaka Glass ia gwau: “Haheauka ese emu kara ia hanamoa. Emu kara namodia ma haida ia hagoadaia. Haheauka dainai emu abidadama be ura bada gauna ai ia lao, emu maino be do ia noho daudau, bona emu lalokau be do ia ore lasi.”
Mark Noumair, Kenya dekenai lagani 11 misinari gaukara ia karaia bona hari Gilead ena hadibaia tauna ta, ia gwau: “Iehova Dirava ese ena orea amo gaukara ia henia be hahenamo badana.” Hereva ladana, “Emui Abidadama be Lasi Neganai, Do Umui Gini Goada Daudau Lasi,” ia herevalaia lalonai, Tadikaka Noumair ese Iuda ena King Ahasa ena haheitalai ia gwauraia. Isaia ese king ia hadibaia Iehova ese do ia durua, to Ahasa ese Iehova ia abidadama henia lasi. (Isaia 7:2-9) Bena Tadikaka Noumair ia gwau misinari taudia—momokani, ita ibounai—be Iehova idia abidadama henia be namo edia tiokratik gaukarana be nega daudau lalonai idia karaia totona. Misinari gaukara ena hekwarahi idauidau dainai abidadama goadana be mai anina bada. Tadikaka Noumair ia gwau: “Umui laloaboio lasi inai tanobada lalonai mauri goevadaena ita abia diba lasi.”
Lalo-Goada Hagoadaia Ekspiriens
Gilead lalonai diba idia abia neganai, Saturday bona Sunday ibounai stiuden taudia ese nega idia atoa haroro gaukara totona, unai be edia misinari gaukarana ena kahana badana. Wallace Liverance, Gilead hadibaia oreana ena memba ta, ese edia ekspiriens idia herevalaia stiuden 15 ia henanadai henia. Leon Weaver, Service Department Committee amo, bona Lon Schilling, Bethel Operations Committee amo, ese Africa bona Latin America amo idia mai brens komiti taudia dekenai henanadai idia henia, idia ese misinari gaukara ena ekspiriens bona sikuli haorea misinari taudia dekenai sisiba namona idia henia. Idia gwau Sierra Leone ai, lagani 1995 ai bapatiso idia abia taudia 90 pesen be misinari taudia ese idia durua taudia. Gaukara goadagoada ena sivarai namona!
Dokonai, Milton Henschel, Society ena presiden, ese helai taudia 2,734 ia hereva henidia, ena hereva ena sinado be “Iehova Ena Tanobada Oreana be Idau Momokani.” Iehova ena orea be hereadae ena badina be dahaka? Iena bada eiava iena siahu dainai lasi, to Dirava ena kara maoromaoro taravatudia bona hahemaoro herevadia ese idia hakaua dainai. Gunaguna Iehova ena taunimanima, Israela besena unai ese iena hereva helagadia idia abia, unai dainai idia be idau momokani. (Roma 3:1, 2) Hari inai negai, Iehova ena orea ia lalo-tamona badina Iesu Keriso ese ia hakaua. (Mataio 28:19, 20) Ia bada ia lao noho. Tanobada dekenai orea ma ta ia noho, gau badana dekenai edia lalona idia hadaia gwauraia neganai ena Hakaua Oreana ese Dirava ena Hereva, Baibel, ia tahua guna, a? Unai bona ma dala haida ai, Iehova ena tanobada oreana be idau momokani. Unai program namona ena dokona ai kwalimu pepadia idia henia bona klas taudia ese hahediba idauna idia abia dainai edia tanikiu herevana ena revareva idia duahia.
[Box on page 22]
Klas Taudia
Edia tano idauidau: 9
Idia lao henia tano idauidau: 12
Klas taudia ibounai: 48
Edia lagani edia averes: 31.7
Lagani hida hereva momokani lalonai, edia averes: 13.8
Lagani hida ful-taim hesiai gaukara idia karaia, edia averes: 9.8
[Picture on page 23]
Watchtower Bible School of Gilead Ena Klas Namba 101
Inai lista ai, laini edia namba be vairana kahana amo ia daekau lao murina kahana ai, bona laini ta ta ibounai idia gini taudia edia ladadia be lauri kahana amo ela bona idiba kahana ai.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.