Hahemauri be Iehova Ena
“Iseda Dirava be taunimanima ia hamauria Diravana.”—SALAMO 68:20.
1, 2. (a) Dahaka dainai ita gwau Iehova be hahemauri ena Badina? (b) Aonega Herevadia 21:31 ena anina be edena bamona oi gwauraia diba?
IEHOVA be ia idia lalokau henia taudia edia Hamauria Tauna. (Isaia 43:11) Israela edia ladana bada tauna King Davida be ia dekenai idia vara gaudia amo unai ia diba bona mai ena kudouna ibounai ida ane ia abia, ia gwau: “Lohiabada e, oi sibona ese ai oi hamauria diba.” (Salamo 3:8) Peroveta tauna Iona be gwarume ena bogana lalonai ia noho neganai, guriguri lalonai unai hereva tamona ia gwauraia.—Iona 2:9.
2 Davida ena natuna Solomona danu ia diba Iehova be hahemauri ena Badina, badina be ia gwau: “Tuari totona hosi umui abia hegaegae diba, to Lohiabada sibona ese kwalimu ia henia noho.” (Aonega Herevadia 21:31) Idaunegai, Middle East dekenai, boromakau ese tano geia gauna ia veria, doniki be kohu idia huaia, taunimanima be hosi bona doniki edia natuna ai idia guia, bona hosi be tuari totona idia gaukaralaia. To, Israela taudia be Gwauhamata Tanona ai idia do vareai lasi neganai, Dirava ese idia ia hagania edia king ai do idia lao taudia ese ‘hosi momo do idia abia lasi.’ (Deuteronomi 17:16) Tuari totona hosi do idia abia lasi badina Iehova ese ena bese taudia do ia hamauria.
3. Dahaka henanadai do ita lalodia be namo?
3 Siahu Ibounai Lohiabadana Iehova be “taunimanima ia hamauria Diravana.” (Salamo 68:20) Unai be lalona hagoadaia herevana! To Iehova ese edena bamona “hamauria” karana ia karaia vadaeni? Bona daika ia hamauria vadaeni?
Iehova ese Kara Maoromaoro Taudia Ia Hamauridia
4. Edena dala ai ita diba Iehova ese ia idia badinaia taudia ia hamauridia?
4 Dirava ena gwauhamata hesiai taudia, dala maorona idia badinaia taudia ibounai unai, be aposetolo Petero ena hereva ese edia lalona ia hagoadaia diba, ia gwau: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.” Unai hereva ia hamomokania totona, Petero ia gwau “gunaguna, taunimanima momo ese Dirava idia kamonai henia lasi neganai, ia ese idia ia bogahisihisi henia lasi. To abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, bona taunimanima 7, idia sibona idia mauri.”—2 Petero 2:5, 9.
5. Noa be “kara maoromaoro ia harorolaia” neganai, edena bamona gaudia idia vara?
5 Mani oi laloa, oi be Noa ena nega lalonai oi noho. Tanobada dekenai tanobada tauanina idia atoa demoni idia noho. Unai gwau-edeede anerudia edia natudia ese taunimanima idia dagedage henidia bada, bona “dika be gabu ibounai dekenai.” (Genese 6:1-12) To, Noa idia hagaria diba lasi Iehova ena hesiai gaukarana ia rakatania totona. Lasi, to ia be “kara maoromaoro ia harorolaia tauna.” Ia bona ena ruma bese ese lagatoi badana idia haginia, bona idia daradara lasi edia mauri negana lalonai Dirava ese idia vara kara dikadia do ia haorea. Noa ena abidadama ese tanobada taudia ia kota henia bamona. (Heberu 11:7) Hari inai nega lalonai idia vara gaudia be Noa ena nega lalonai idia vara gaudia bamona, idia hahedinaraia hari be inai tanobada ena oromana dikana ena dina gabedia. (Mataio 24:37-39; 2 Timoteo 3:1-5) Unai dainai, Noa hegeregerena, do oi hahedinaraia oi be mai abidadama ida kara maoromaoro oi harorolaia tauna, bona Iehova ena hahemauri oi naria noho lalonai Dirava ena orea taudia ida oi gaukara hebou, a?
6. Petero Iharuana 2:7, 8 be edena bamona ia hamomokania Iehova ese kara maoromaoro taudia ia hamauridia?
6 Hereva ma haida amo Petero ia hamomokania Iehova be kara maoromaoro taudia ia hamauria. Aposetolo tauna ia gwau: “Dirava ese unai kara maoromaoro tauna Lota ia hamauria. Lota be unai lebulebu taudia edia kara dainai iena lalona be ia metau. Lota be kara maoromaoro tauna, to edia huanai ia noho dainai, dina ibounai edia dika ia itaia bona ia kamonai. Unai dainai iena lalona be ia hisihisi bada.” (2 Petero 2:7, 8; Genese 19:1-29) Hari dina ginigabedia lalonai, matabodaga karadia be taunimanima milioni momo edia mauri dalana ai ia lao. Oi be Lota hegeregerena, hari inai negai, taunimanima momo herea ‘edia dika dainai emu lalona ia hisihisi bada,’ a? Bema oi lalohisihisi, bona bema kara maoromaoro oi badinaia noho, Iehova ese inai tanobada ena oromana dikana ia haorea neganai, reana ia hamauria taudia huanai do oi noho.
Iehova ese Ena Orea Taudia Ia Hamauria Idia Hahisidia Taudia Amo
7. Aigupito dekenai Iehova ese Israela besena ia kara henia dalana be edena bamona ia hamomokania ia ese hisihisi amo ena orea taudia ia ruhaia?
7 Inai tanobada gunana ia do noho lalonai, Iehova ena hesiai taudia be dagedage do idia davaria bona edia inai taudia ese do idia hahisia. To namona be idia diba momokani Iehova ese idia do ia hamauria, badina be gunaguna iena bese taudia ia hamauria. Mani oi laloa, Mose ena nega lalonai oi be Israela tauna ta, Aigupito taudia edia siahu henunai hisihisi oi mamia noho. (Esodo 1:1-14; 6:8) Dirava ese hisihisi ta murinai hisihisi ma ta amo Aigupito taudia ia hahisia noho. (Esodo 8:5–10:29) Bena hisihisi dikana namba 10 ese Aigupito edia vara guna natudia ibounai ia hamasea neganai, Farao ese Israela taudia ia ruhaia to gabeai ena tuari oreadia ia haboua bena idia murinai idia heau lao. To, daudau lasi murinai, ia bona ena tatau be Davara Kakakakana lalonai idia mase ore. (Esodo 14:23-28) Oi be Mose bona Israela taudia ida inai ane umui abia: “Lohiabada be tuari tauna, iena ladana be [Iehova]. Farao ena kariota bona iena tuari oreana, be davara dekenai ia negea diho vadaeni. Iena tuari biagudia namo herea taudia, be Davara Kakakaka dekenai idia mase vadaeni. Davara ese ia koudia momokani. Dobu gabuna dekenai idia diho, nadi bamona.” (Esodo 15:3-5) Hari dina gabedia lalonai, Dirava ena orea taudia idia hahisia taudia ese unai bamona dika do idia davaria.
8, 9. Gunalaia Taudia bukana lalonai, hisihisi amo Iehova ese ena bese taudia ia hamauridia karana ta mani oi gwauraia.
8 Israela taudia be Gwauhamata Tanona lalonai idia vareai murinai, lagani momo lalodiai gunalaia taudia ese idia hakaudia maoromaoro. Nega haida Israela taudia be idau bese taudia ese idia hahisidia, to Dirava ese gunalaia taudia mai edia abidadama ia gaukaralaia idia hamauridia totona. Unai hegeregerena, ena be reana ‘ita idia dagedage henia bona ita idia hisihisi henia dainai ita taitai,’ to Iehova ese ita, iena kamonai hesiai taudia, do ia hamauria. (Gunalaia Taudia 2:16-18; 3:9, 15) Momokani, Baibel bukana Gunalaia Taudia ese ita ia hamaoroa unai do ia vara bona Dirava ese ia abia hidi Hahemaoro Tauna, Iesu Keriso, amo ia karaia hahemauri karana badana do ia vara danu.
9 Gunalaia Tauna Baraki ena nega mani ita laloa. Tomadiho koikoi dainai bona Dirava ena lalo-namo ia noho lasi dainai, Israela taudia be lagani 20 Kanana ena King Iabina ena lohia henunai hisihisi idia ania. Sisera be Kanana tuari orea badana ena lohia. Ena be Israela besena ena taunimanima ibounai be reana milioni hani bamona, bona “Israela tuari taudia be 40,000, to idia ta lasi ese io o kesi ia dogoatao.” (Gunalaia Taudia 5:6-8) Israela taudia be edia helalo-kerehai dainai Iehova dekenai idia boiboi. Peroveta hahinena Debora ena amo Iehova ese ia hamaoroa hegeregerena, Baraki ese tatau 10,000 ia haboudia Taboro Ororona dekenai, bona Iehova ese edia inai taudia ia veridia mai Taboro Ororona badana ena badina ena koura dekenai. Sisera ena tuari oreadia bona tuari kariota 900 be mai rege bada ida tano palakana bona Kisona ena sinavai kaukauna amo idia heau mai. To medu bada herea ese Kisona ia hahonua bona abata ia havaraia. Baraki bona ena tatau be medu ese ia hunidia lalonai Taboro Ororona amo idia diho neganai, Iehova ena badu ia halasia karana amo ia vara dika badana idia itaia. Baraki ena tatau ese idia gari bona idia heau kava Kanana taudia idia hamasea, bona ta ia roho mauri lasi. Unai be hadibaia herevana ita idia hahisia bona Dirava idia tuari henia taudia dekenai!—Gunalaia Taudia 4:3-16; 5:19-22.
10. Dahaka dainai ita diba momokani Dirava ese ena orea taudia hari inai nega lalonai be do ia hamauridia?
10 Iehova ese ena hesiai taudia hari inai nega lalonai be edia dagedage inai taudia iboudiai amo do ia hamauridia, Dirava gari henia Israela taudia idia hisihisi negana ai ia hamauridia bamona. (Isaia 43:3; Ieremia 14:8) Dirava ese Davida ia hamauria ia ‘idia tuari henia taudia ibounai dekena amo.’ (2 Samuela 22:1-3) Unai dainai, ena be ita, Iehova ena orea taudia, idia hahisia o dagedage henia, namona be ita gari lasi, badina be Dirava ena Mesia Pavapavana ese hisihisi amo ita do ia ruhaia. Oibe, “gau lasi taudia be mase dekena amo, ia ese do ia hamauria. Bema unai ogogami taudia be haida ese idia dagedage henia neganai, king ese unai ogogami taudia do ia hamauria.” (Salamo 72:13, 14) Unai hamauria negana be ia kahirakahira vadaeni.
Dirava ese Ia Idia Abidadama Henia Taudia Ia Hamauridia
11. Iehova dekenai do ita tabekau karana be edena kara amo mero matamata Davida ese ia haheitalaia?
11 Iehova ena hahemauri karana ita itaia totona, namona be mai gari lasi ida ia ita abidadama henia. Davida be tau bada hereana Goliata dekenai ia lao neganai, mai gari lasi ida Dirava dekenai ia tabekau. Mani oi laloa, unai Filistia tauna latana be mero matamata Davida vairanai ia gini, bona Davida ia boiboi: “Oi be mai oiemu tuari kaia, bona mai oiemu io, bona mai oiemu auri labora io ta danu lau dekenai oi mai, to lau be Lohiabada Dirava ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava. Hari dina dekenai Lohiabada ese lauegu imana dekenai oi do ia atoa, oi do lau alaia mase, oiemu kwarana do lau utua, do ia moru. Hari dina dekenai danu, Pilistia tuari taudia edia tauanina be ataiai dekenai manudia, bona uda boroma dekenai do lau henia. Unai neganai tanobada taudia ibounai do idia diba Dirava ta Israela dekenai ia noho. Iniseni idia haboua noho taudia ibounai danu do idia diba Lohiabada be tuari kaia lasi, bona io lasi dekena amo hamauria kara ia karaia. Badina tuari be Lohiabada ena, bona ia ese aiemai imana dekenai umui ia atoa.” Daudau lasi murinai Goliata ia mase, bona Pilistia taudia idia halusia momokani. Ia hedinarai goevagoeva, Iehova ese ena taunimanima ia hamauridia.—1 Samuela 17:45-54.
12. Dahaka dainai Davida ena tau goadana ta, Eleasara, ita laloa karana ese ita ia durua diba?
12 Ita idia hahisia taudia vairanai ita gini neganai, ita gari lasi bona Dirava ita abidadama henia momokani be namo. (Isaia 46:8-13; Aonega Herevadia 3:5, 6) Gabu ladana Pasadamimi dekenai ia vara karana mani oi laloa. Israela taudia be Pilistia tuari oreadia amo idia heau siri. To Davida ena tatau goadadia toi amo ta, Eleasara, be gari ese ia hamanokaia lasi. Bali umana ai, gabu namona ta dekenai ia gini bona ia sibona ese tuari kaia amo Pilistia taudia ia hamasea. Unai dainai Iehova ese Israela besena ia hamauria. (1 Sivarai 11:12-14, NW; 2 Samuela 23:9, 10) Ta do ia laloa lasi ita ta sibona ese tuari oreana ta do ia tuari henia. Lasi. To, reana nega haida ita ta be sibona ia noho bona iseda inai taudia ese idia hametaua. Hahemauri karadia ia karaia Diravana, Iehova, do ita guriguri henia bona ia dekenai do ita tabekau, a? Iena heduru do ita noia, ita idia dagedage henia taudia dekenai eda tadikaka edia ladana ita henia lasi totona, a?
Iehova ese Ia Idia Badinaia Noho Taudia Ia Hamauridia
13. Dahaka dainai iduhu 10 basileiana, Israela, dekenai Dirava badinaia noho karana ia auka?
13 Iehova ena hahemauri karana ita mamia totona, namona be ia ita badinaia noho, herevana dahaka ia vara. Idaunegai, Dirava ena taunimanima be hahetoho idauidau idia davaria. Bema oi be iduhu ten basileiana Israela dekenai oi noho, reana do oi davaria gaudia haida mani oi laloa. Rehoboama ena dagedage karana dainai unai iduhu ten idia ura lasi ia idia durua bona idia be not kahana basileiana, Israela, ai idia lao. (2 Sivarai 10:16, 17; 11:13, 14) Unai basileia ena king iboudiai amo Iehu be king namona, to ia danu be ‘Iehova ena taravatu be mai ena kudouna ibounai danu ia badinaia lasi.’ (2 King Taudia 10:30, 31) To herevana, unai iduhu 10 basileiana dekenai Dirava badinaia taudia haida idia noho. (1 King Taudia 19:18) Dirava idia abidadama henia bona ia be idia ida ia noho. Herevana emu abidadama idia tohoa gaudia oi davaria, to Iehova oi badinaia noho, a?
14. King Hesekaia ena nega lalonai, Iehova be edena hahemauri karana ia karaia, bona dahaka ia vara dainai Babulonia taudia ese Iuda tanona idia abia?
14 Dirava ena Taravatu laloa lasi karana ia bada dainai Israela basileiana be dika bada ia davaria. Lagani 740 B.C.E. ai, Asuria taudia ese idia hamorua neganai, unai iduhu ten taudia haida be iduhu rua basileiana Iuda dekenai idia heau lao, unuseniai Iehova ena dubu ai ia idia tomadiho henia diba. Davida ena bese amo Iuda ena king ai idia lao taudia 19 amo, idia hani—Asa, Iehosapata, Hesekaia, bona Iosia—be Dirava idia badinaia namonamo. Dirava badinaia tauna Hesekaia ena nega lalonai, Asuria taudia edia tuari orea goadana ia mai, Iuda besena tuari henia totona. Dirava ese Hesekaia ena guriguri ia haerelaia neganai, aneru tamona sibona ia gaukaralaia bena hanuaboi tamona ai Asuria taudia 185,000 ia alaia, unai amo Ia idia tomadiho henia taudia ia hamauridia! (Isaia 37:36-38) Gabeai, unai taudia ese Taravatu bona Dirava ena peroveta taudia edia sisiba idia badinaia lasi dainai, lagani 607 B.C.E. ai, Babulonia ese Iuda tanona idia abia bona ena hanua badana, Ierusalema, bona ena dubu idia hadikaia.
15. Dahaka dainai Babulonia dekenai idia abia mauri Iuda taudia idia haheauka be gau badana, bona edena dala ai Iehova ese idia ia ruhaia?
15 Idia abia mauri Iuda taudia be hekwarahi laganidia 70 lalodiai Babulonia ena igui henunai Dirava idia badinaia noho totona, idia haheauka be gau badana. (Salamo 137:1-6) Dirava badinaia tauna namona ta be peroveta tauna Daniela. (Daniela 1:1-7; 9:1-3) Daniela ena moale mani oi laloa, badina lagani 537 B.C.E. ai, Parasa ena King Sairasi ena oda hegeregerena, Iuda taudia be dubu haginia lou totona Iuda dekenai idia giroa diba! (Esera 1:1-4) Daniela bona ma haida be lagani momo idia haheauka, to gabeai Babulonia ena moru bona Iehova ese ena bese taudia ia hamauridia karana idia itaia. Namona be unai ese ita ia durua “Babulonia badana,” tanobada ena tomadiho koikoi iboudiai, do idia hadikaia ore negana ita naria lalonai ita haheauka noho.—Apokalupo 18:1-5.
Iehova be Hanaihanai Ena Orea Taudia Ia Hamauridia
16. Kwini Eseta ena nega lalonai, Dirava ese edena hahemauri karana ia karaia?
16 Iehova be hanaihanai ena hesiai taudia ia hamauridia bema idia be iena ladana idia abidadama henia noho. (1 Samuela 12:22, NW; Isaia 43:10-12) Kwini Eseta ena nega mani oi laloa—lagani 500 B.C.E. ena murina laganidia. King Ahasuero (Xerxes Ginigunana) ese Hamana be praiminista ai ia halaoa. Iuda tauna Morodekai ia ura lasi Hamana dekenai ia igo diho dainai Hamana ia badu, bona palani ia karaia Morodekai bona Parasa Basileia lalonai idia noho Iuda taudia ibounai do ia hamasea ore. Ia gwauraidia taravatu utua taudia, bona ia gwau moni do ia henia unai hamasea karana ia durua totona, bena gwaumaoro ia abia king ena rini amo unai kara ena oda pepana ena koua gauna ia makaia totona. Eseta be mai gari lasi ida king dekenai ia hahedinaraia ia be Iuda besena amo, bona Hamana ena ala-ala lalohadaina ia gwauraia hedinarai. Nega daudau lasi murinai, Hamana be Morodekai hamasea totona ia karaia auna dekenai idia taua dae. Morodekai be praiminista ai idia halaoa, bona Iuda taudia be gwaumaoro idia abia tuari totona do idia hegaegae diba. Idia kwalimu, edia inai taudia idia halusia. (Eseta 3:1–9:19) Namona be unai kara ese iseda abidadama ia hagoadaia, bena ita abia dae momokani Iehova ese ena kamonai hesiai taudia totona hahemauri karadia do ia karaia.
17. Aposetolo taudia edia nega lalonai, edena dala ai kamonai karana be mai anina Iudea dekenai idia noho Iuda Keristani taudia idia roho mauri totona?
17 Dirava ese ena orea taudia ia hamauridia ena badina ma ta be idia ese ia bona ena Natuna idia kamonai henia. Mani oi laloa, aposetolo taudia edia nega lalonai oi be Iesu ena hahediba tauna ta, Iuda tauna. Iesu ese ia hamaorodia, ia gwau: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni. Unai neganai Iudea dekenai idia noho taudia be ororo dekenai do idia heau lao.” (Luka 21:20-22) Lagani momo idia ore, bona unai hereva do idia guguru negana oi laloa momo. Bena lagani 66 C.E. ai, Iuda taudia edia gwau-edeede karana ta ia vara. Cestius Gallus ena siahu henunai Roma tuari oreadia ese Ierusalema idia koua hegege bona dubu ena magu dekenai idia lao. Bena, toana be badina ta lasi dainai Roma taudia idia giroa lou. Iuda Keristani taudia be dahaka do idia karaia? Eusebius be ena buka ladana Ecclesiastical History (Buka Namba 3, karoa 5, 3) dekenai ia gwau Ierusalema bona Iudea amo idia heau siri. Idia roho mauri badina Iesu ena sisiba idia badinaia. Iesu ese ena “kohu” ibounai naria totona ia abia hidi “kohu naria tauna mai ena kamonai” be Baibel amo hakaua herevadia ia henia neganai, karaharaga oi badinaia, a?—Luka 12:42-44.
Hahemauri, Mauri Hanaihanai Abia Totona
18, 19. (a) Iesu ena mase be edena hahemauri dalana ia kehoa, bona daika totona? (b) Aposetolo Paulo be ena lalona ia hadaia dahaka do ia karaia?
18 Iesu ena sisiba idia badinaia dainai, Iudea dekenai idia noho Iuda Keristani taudia idia roho mauri. To Iesu ena mase ese “taunimanima ibounai” dekenai hahemauri dalana ia kehoa, mauri hanaihanai idia abia totona. (1 Timoteo 4:10) Adamu ia kara dika neganai taunimanima ese mauri hoia lou davana ta idia abia be namo, badina unai neganai Adamu ese sibona ena mauri ia haboioa bona kara dika bona mase ena igui lalonai taunimanima ibounai ia hoihoilaia bamona. (Roma 5:12-19) Mose ena Taravatu henunai animal idia bouboulaia karana be kara dika kokia karana ena toana sibona. (Heberu 10:1-4) Iesu be tauanina dalanai mai ena tamana lasi bona Maria be ia rogorogo negana amo ela bona Iesu ia vara negana lalonai Dirava ena lauma helaga ena siahu “ia abia” dainai, Iesu ia vara neganai ia be kara dika bona goevadae lasi maurina ia abia hanai lasi. (Luka 1:35; Ioane 1:29; 1 Petero 1:18, 19) Iesu be Dirava ia badinaia goevagoeva ela bona ia mase neganai, ena mauri goevadaena ia henia taunimanima ia hoia lou bona idia ia ruhaia totona. (Heberu 2:14, 15) Unai dainai “Keriso sibona ese iena mauri ia henia, taunimanima ibounai hamauria totona.” (1 Timoteo 2:5, 6) Taunimanima iboudiai ese unai hahemauri dalana idia abia dae lasi, to Iehova ese mai edia abidadama ida unai kara idia abia dae taudia ia lalo-namo henidia bona ena namo idauidau do ia henidia.
19 Guba ai, Keriso ese Dirava dekenai ena mauri davalaia boubouna ena davana ia henia karana amo, Adamu ena natudia ia hoia lou. (Heberu 9:24) Iesu be Adavana ta ia abia, ena murinai idia raka horoa taudia, guba maurina totona idia toreisi lou taudia 144,000 unai. (Efeso 5:25-27; Apokalupo 14:3, 4; 21:9) Iena boubou gauna idia abia dae bona tanobada dekenai mauri hanaihanai idia abia taudia dekenai ia be edia “Hanaihanai Noho Tamana” ai ia lao. (Isaia 9:6, 7; 1 Ioane 2:1, 2) Unai be lalokau bada karana! Lauma helaga ena siahu amo Paulo ese Korinto Keristani taudia dekenai ia torea revareva iharuana ia hamomokania unai kara ia laloa bada, bona hereva gabena be unai do ia hahedinaraia. Momokani, Paulo be ena lalona ia hadaia gau ta ese ia do ia koua lasi, to taunimanima do ia durudia mauri hanaihanai idia abia totona Iehova ia henia hahemauri dalana namo hereana do idia abia dae.
Edena Bamona Do Oi Haere?
◻ Edena Baibel herevadia ese idia hamomokania Dirava ese ena kara maoromaoro taudia ia hamauridia?
◻ Edena bamona ita diba Iehova ese ia idia abidadama henia bona ia idia badinaia noho taudia ia hamauridia?
◻ Mauri hanaihanai abia totona Dirava ese edena hahemauri dalana ia karaia?
[Picture on page 12]
Davida be Iehova, “taunimanima ia hamauria Diravana,” ia abidadama henia. Oi danu, a?
[Picture on page 14]
Iehova be hanaihanai ena taunimanima ia hamauridia, Kwini Eseta ena nega ai ia hamomokania hegeregerena