Matabodaga Tanobadana Dekenai Oi Kara Goeva Diba

TAU ena toana be korema bona namo herea. Hahine ena diba be bada bona ia be mai ena hairai. Idia ruaosi be kampani tamona dekenai idia gaukara hebou. Hahine ese tau ia kara namo henia. Tau be hahine ia laloa bada. Idia ta ta totona harihari gaudia idia hoia heheni. Nega sisina murinai idia mahuta hebou. Unai hahine totona tau ese ena adavana ia rakatania. To gabeai, hahine ese ena lalona ia haidaua ena adavana ida do ia noho bona heudahanai karana ia hadokoa. Tau be iena adavana dekenai ia giroa lou toho. To, ia helalo-kerehai momokani lasi dainai, ia kwalimu lasi. Unai taudia ibounai edia mauri lalonai bero idia abia vadaeni.

Hari inai tanobada dekenai, taunimanima be kara goeva idia laloa bada lasi. Idia ura lasi gau ta ese edia moale tahua karana bona edia ura hagugurua karana ia koua. The New Encyclopædia Britannica ia gwau: “Toana be heudahanai karadia be gabu ibounai dekenai idia vara, bona gabu haida dekenai edia momo be headava edia momo bamona.”

To, Iehova Dirava ena ura be “taunimanima iboudiai ese headava do idia matauraia, bona headava gedana do idia hadikaia lasi.” (Heberu 13:​4, NW ) Baibel ia gwau: “Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia . . . ta lasi be Dirava ena Basileia do ia davaria diba.” (1  Korinto 6:​9, 10) Unai dainai, Dirava ena lalo-namo ita moalelaia totona, inai matabodaga tanobadana dekenai ita kara goeva noho be gau badana.

Ita idia hagegea gaudia dikadia amo, edena bamona sibona ita gimaia noho diba? Baibel ena Aonega Herevadia bukana karoa 5 lalonai, idaunegai Israela ena King Solomona be unai henanadai ena haere ia henia. Mani ena hereva ita laloa.

Laloa Namonamo Karana ese Oi Do Ia Gimaia

Israela ena King ia gwau: “Egu natuna tau e, egu aonega bona laloa kehoa dekenai, do oi kamonai bona laloa namonamo . . . bona oiemu hereva ese, oiemu diba namona do idia hedinaraia.”​​—⁠Aonega Herevadia 5:​1, 2.

Matabodaga karana dekenai ita idia veria gaudia ita dadaraia totona, aonega​​—⁠Baibel ena hadibaia herevadia gaukaralaia diba karana​​—⁠bona laloa kehoa, eiava maoro bona kerere edia idau dibaia bona dala maorona abia hidi diba karana, ita abia be namo. Ita idia hagoadaia aonega bona laloa kehoa herevadia do ita kamonai henia, iseda laloa namonamo karana ita gimaia totona. Edena bamona unai ita karaia diba? Dirava ena Hereva, Baibel, ita stadilaia neganai, namona be Iehova ena gaukara dalana ita laloa namonamo bona iseda taiana ita kehoa iena ura bona palani ita kamonai totona. Unai kara dainai, ita ese laloa dalana maorona ita badinaia. Unai amo ita dibaia laloa namonamo karana be Dirava ena aonega bona diba ida ia tamona. Bema ita gaukaralaia namonamo, matabodaga ena tarapu lalonai do ita moru lasi.

Hereva mai Ena Digara Dainai Oi Naria Namonamo

Matabodaga tauna eiava hahine ena laloa veria karana be mai ena siahu dainai, inai tanobada mirona lalonai ita kara goeva totona laloa namonamo karana be gau badana. Solomona ia gwau: “[Idau hahine] ena bibina, be gaiho momokani, hani bamona, bona iena hereva ena digarana ese, dehoro ena digarana idia hereaia, to gabeai, unai hahine ena mamina oi dekenai, be dika, mamina dika muramura bamona, mai matana momokani, isena ruaosi idia segea tuari kaia bamona.”​​—⁠Aonega Herevadia 5:​3, 4.

Unai aonega hereva ese kerere hahine ia gwauraia “idau hahine”​​—⁠ariara hahine.a Iena lalo-ani herevadia be gaiho momokani hani bamona, bona iena digara ese olive dehorona ena digara ia hereaia. Matabodaga karadia momo be unai dala ai idia matamaia, ani? Hegeregere, mani seketere gaukara ia karaia mauri lagani 27 kekenina mai hairaina ladana Amy ena sivarai oi laloa. Ia gwau: “Gaukara gabuna dekenai, tau ta ese lau ia laloa bona hanamoa bada. Unai be namo. To lau itaia goevagoeva gau tamona sibona ia ura, mahuta hebou karana unai. Iena koikoi karana dainai do lau moru lasi.” Matabodaga tauna eiava hahine ena lalo-ani herevadia be mai edia siahu, bema edia anina korikorina ita lalo-pararalaia lasi. Unai dainai ita laloa namonamo be gau badana.

Matabodaga karadia idia havaraia gaudia be mamina dika muramura bamona bona tuari kaia mai matana rua bamona​​—⁠hisihisi bona mase idia havaraia. Lalona ena mamina dikana, rogorogo kava, eiava pokese goreredia be nega momo unai kara dainai idia vara. Bona heudahanai tauna eiava hahine ena adavana ena lalo-metau bada mani oi laloa. Heudahanai karana tamona ese ta ena mauri ibounai lalonai do ia noho berona ia havaraia diba. Oibe, matabodaga karana ese hisihisi bada ia havaraia.

Aonega king be kerere hahine ena kara ia kikilaia neganai, ma ia gwau: “Unai hahine ese mase taudia edia gabu dekenai, oi do ia hakaua lao. Mase dekenai ia lao dalana dekenai ia raka noho. Mauri dalana be unai hahine ese ia laloa lasi, to ia raka kava, raka kava noho, bona iena dala ia diba lasi.” (Aonega Herevadia 5:​5, 6) Matabodaga hahine ena dala ese mase dekenai ia hakaua lao​​—⁠ena raka dalana be Sheol, mase taudia edia gabu, dekenai ia lao. Mahuta hebou karana amo idia vara gorere idauidau, AIDS be idia badana ta, idia bada daekau dainai, unai hereva be momokani! Unai hahine bona ena dala idia badinaia taudia be unai dika tamona do idia davaria.

Mai ena kudouna ibounai ida king ia gwau: “Egu natuna tau e, lau dekenai do oi kamonai. Egu hereva gaudia do oi rakatania lasi. Unai bamona hahine dekena amo do oi raka siri. Iena ruma ena iduara kahirakahira do oi lao lasi.”​​—⁠Aonega Herevadia 5:​7, 8.

Matabodaga taudia edia lalona veria karana amo ita gini siri be namo. Unai bamona taudia edia lalona veria karana totona dala ita kehoa bona miusiki dikana ita kamonai, dika idia havaraia diba muvini piksa ita itaia, eiava matabodaga sivaraidia bona laulaudia idia hahedinaraia bukadia ita raraia be namo lasi, ani? (Aonega Herevadia 6:​27; 1 Korinto 15:33; Efeso 5:​3-5) Bona iseda lebulebu karadia, dabua, eiava tauanina ena toana amo edia lalona ita veria be kavakava karana!​​—⁠1 Timoteo 4:8; 1 Petero 3:​3, 4.

Ena Davana be Dika Herea

Kerere tauna eiava hahine ena dala amo ita gini siri ena badina ma haida be dahaka? Solomona ia haere: “Oi ese oiemu goada, be idau taudia dekenai do oi henia garina, bona oiemu mauri lagani, be bogahisihisi lasi taudia ese do idia hakwadogia garina. Io, idau taudia ese oiemu kohu dainai do idia goada, bona oiemu hekwarahi ena anina ese, idau tauna ena ruma do ia hanamoa garina, ela bona oiemu mauri ena dokona dekenai do oi taitai, oiemu hidiona bona oiemu tauanina, be do idia ore lao neganai.”​​—⁠Aonega Herevadia 5:​9-​11.

Solomona ese matabodaga karana ena davana dikana ia herevalaia unai. Heudahanai bona sibona matauraia lasi karana ita hakapua diba. Ita sibona eda eiava ma ta ena matabodaga urana hagugurua totona sibona ita mauri noho be hemarai gauna momokani, ani? Bema iseda adavana lasi tauna eiava hahine ida ita mahuta hebou, unai be sibona matauraia lasi karana, ani?

To, idau tauna dekenai ‘iseda mauri lagani, goada, bona iseda hekwarahi ena anina’ ita henia ena anina be dahaka? Buka ta ia gwau: “Unai siri edia anina ia hedinarai goevagoeva: Heudahanai karana ena davana be dika momokani; reana tau ta ese ena hekwarahi amo ia abia gaudia​​—⁠dagi, siahu, kohu​​—⁠be hahine ena mataganigani karana eiava dekena taudia idia ura davana idia abia dainai, ia haboioa diba.” Matabodaga karana ena davana be dika momokani!

Kavakava tauna ta be iena dagi bona kohu ia haboioa neganai, reana ia gwau: “Badina dahaka matakani lau negea, bona edena bamona sisiba hereva lau ura henia lasi? Lau ese egu hadibaia taudia edia hereva lau kamonai lasi, bona lau dekenai sisiba ia henia tauna, ena hereva lau abia dae lasi. Unai dainai harihari taunimanima ibounai edia vairana dekenai, dika bona hemarai lau davaria inai.”​​—⁠Aonega Herevadia 5:​12-​14.

Gabeai, diba bada tauna ena hereva hegeregerena, kara dika ia karaia tauna be “nega momo ‘bema’ herevadia do ia gwauraia: bema lauegu tamana lau kamonai henia be namo; bema lauegu dala lau badinai lasi be namo; bema ma haida edia sisiba lau badinaia be namo.” To, unai lalo-parara karana ia leiti. Hari matabodaga karana ia karaia tauna ena mauri bona ladana be ia hadikaia vadaeni. Gau badana be matabodaga karana amo ia vara davana dikana ita laloa guna, ia lalonai ita do vareai lasi neganai!

‘Sibona Emu Ranu Kohua amo Ranu Oi Inua’

Baibel ese mahuta hebou karana ia herevalaia goevagoeva lasi, a? Lasi vaitani. Tau bona hahine idia ura heheni neganai ia vara lalokauna bona idia mahuta hebou neganai idia abia moalena be Dirava ena harihari gauna. To, headava taudia sibona ese unai kara idia moalelaia be maoro. Unai dainai, Solomona be headava tauna ia sisiba henia neganai, ia gwau: “Sibona emu ranu kohua, bona sibona emu ranu guri huanai ia lohilohi ranuna, amo ranu oi inua. Oiemu ranu lohilohi be ruma murimurinai do oi negea kava a, oiemu ranu ena sinavai maragidia ariara gabudia dekenai, a? Namona be idia be oi sibona emu, bona idau taudia oi ida totona lasi.”​​—⁠ Aonega Herevadia 5:​15-​17, NW.

Unai laulau herevadia “sibona emu ranu kohua” bona “sibona emu ranu guri” be tau ta ena lalokau adavana idia herevalaia. Ia ida mahuta hebou karana amo ia abia moalena be ranu namona ia inua karana bamona. Ariara gabuna dekenai ia aru noho ranuna bamona lasi, ranu kohua eiava ranu gurina be mai ena biaguna. Bona tau ia sisiba henia namona be ruma dekenai ena adavana ida natudia do ia havaraia, namo lasi ariara gabudia dekenai, anina be hahine idaudia ida, do ia mahuta hebou lasi. Ia hedinarai goevagoeva, tau ia abia sisiba be inai, namona be iena adavana sibona do ia badinaia.

Unai aonega tauna be ma ia gwau: “Namona be oiemu ranu gabuna be do ia namo, bona oiemu matamata negana ai oi adavaia hahinena oi moalelaia, oi ura henia dia hahinena bona oi moale henia ororo nanigosi. Namona be iena ratana sibona ese nega ibounai oi idia hamoalea dikadika. Iena lalokau ese hanaihanai oiemu lalona ia hamoalea dikadika be namo.”​​—⁠Aonega Herevadia 5:​18, 19, NW.

Unai hereva “ranu gabuna,” eiava ranu lohilohi gabuna, ese mahuta hebou karana amo ia vara moalena ia laulaulaia. Headava taudia ese mahuta hebou karana idia moalelaia neganai, unai be “namo”​​—⁠Dirava ese ia henia gauna. Unai dainai, tau ia hagoadaia namona be ena matamata negana ai ia adavaia hahinena sibona do ia moalelaia. Ia laloa iena adavana lalokauna be dia hahinena mai hairaina bona ia moale henia ororo nanigosi namona bamona.

Bena Solomona be henanadai rua ia henia, ia gwau: “Egu natuna e, anina be dahaka idau hahine dekenai do oi ura henia? Badina be dahaka [idau hahine] do oi rosia?” (Aonega Herevadia 5:​20) Oibe, badina be dahaka headava tau o hahine be gaukara gabuna dekenai, sikuli gabuna dekenai, eiava ma gabu ta dekenai ia davaria taudia edia lalo-ani herevadia ia badinaia, bena headava murimurinai mahuta hebou karadia ia karaia?

Aposetolo Paulo be Keristani headava taudia ia sisiba henia, ia gwau: “Varavara taudia e, lauegu hereva ena anina be inai: Nega be kwadogi. Unai dainai inai nega kwadogina ia noho lalonai, tatau mai edia adavana be adavana lasi taudia bamona do idia noho be namo.” (1 Korinto 7:​29) Unai ena anina be dahaka? Vadaeni, Iesu Keriso ena murinai idia raka taudia ese ‘Dirava ena Basileia idia tahua guna’ be namo. (Mataio 6:​33) Unai dainai, namo lasi headava taudia be ta ta sibona dekenai idia laloa bada dainai, edia mauri lalonai Basileia idia atoa guna lasi.

Tauanina Ena Ura Oi Biagua be Namo

Mahuta hebou urana be oi biagua diba. Bona Iehova ena lalo-namo idia ura abia taudia ese idia biagua be gau badana. Aposetolo Paulo ia gwau: “Dirava ena ura be inai: Do umui helaga, heudahanai bona sihari kava karadia do umui rakatania momokani.” “Umui ta ta ibounai be helaga bona hemataurai dalana ai sibona emui tauanina umui biagua dalana do umui diba be namo.”​​—⁠1 Tesalonika 4:​3,  4, NW.

Unai dainai, matamata taudia be mahuta hebou urana ena hemami idia abia matamaia neganai, namona be karaharaga idia headava lasi. Headava taudia ese edia headava do idia badinaia be gau badana, bona unai maduna huaia totona ta be lo tauna vadaeni be namo. (Genese 2:​24) Namona be ta ia naria ela bona ena “matamata negana ia hanaia,”​​—⁠unai nega lalonai mahuta hebou urana ia goada bona laloa namonamo karana ia hadikaia diba. (1 Korinto 7:​36, NW ) Bona ia ura headava tauna eiava hahine ese matabodaga karadia ia karaia badina ia adavaia diba tauna o hahine ta ia noho lasi, be aonega lasi karana bona kara dikana!

“Kara Dika Tauna Ena Kara Dika be Tarapu”

Matabodaga karana be kara dikana, badina Iehova​​—⁠mauri Ia Henia Tauna bona taunimanima dekenai mahuta hebou urana ia Atoa Tauna​​—⁠ese unai kara be ia abia dae lasi. Unai dainai, King Solomona ese kara goeva badinaia totona badina goadana ia hahedinaraia, ia gwau: “Badina be tau ta ta edia kara be Lohiabada ese ia itaia noho. Lohiabada ese taunimanima ta ta ibounai, edia dala ibounai ia tahua noho.” (Aonega Herevadia 5:​21) Oibe, Dirava ena matana dekena amo gau ta ita hunia diba lasi, bona “iseda kara do ia kota henia.” (Heberu 4:​13) Matabodaga karadia ibounai, herevana hehuni dalanai ita karaia bona herevana tauanina bona dekena taudia dekenai hekwakwanai ia havaraia eiava lasi, to Iehova ida iseda hetura karana ia hadikaia. Unai kara dika amo nega sisina moale ita abia totona, iseda maino Dirava ida ita hadikaia be kavakava karana!

Toana be taunimanima haida be mai edia hemarai lasi ida matabodaga karadia idia moalelaia bona panisi idia abia lasi​​—⁠to, unai be nega daudau gauna lasi. Solomona ia gwau: “Kara dika tauna ena kara dika be tarapu, bona unai tarapu, sibona ia karaia kara dikadia, ese unai tau do idia abia, do idia hadikaia. Matakani ena sisiba momokani ia kamonai henia lasi, unai dainai unai tau ia mase noho. Iena kavakava bada herea dainai, unai tau ia boio vadaeni.”​​—⁠Aonega Herevadia 5:​22, 23.

Ita ta ia boio ena badina ta be lasi, ani? Oibe, Aonega Herevadia bukana be ita ia sisiba henia tanobada ena lalona veria daladia ita dadaraia totona. Bona matabodaga karana amo ia vara davana dikadia​​—⁠iseda tauanina, iseda kohu, iseda goada, bona iseda hairai korikorina dekenai​​—⁠be ita dekenai ia hadibaia. Unai ita lalo-pararalaia goevagoeva dainai, gabeai “bema” herevadia do ita gwauraia be mai badina lasi. Oibe, Iehova ese ena lauma amo ia havaraia Herevana lalonai ia henia sisiba ita badinaia neganai, matabodaga tanobadana dekenai do ita kara goeva diba.

[Footnote]

[Pictures on page 30]

Matabodaga karadia murinai idia vara gaudia be mamina dika muramurana bamona

[Pictures on page 31]

“Oiemu matamata negana ai oi adavaia hahinena oi moalelaia”