Pepapepa Gaukaralaia Anina Namona Havaraia Totona
(Kahana 1)
1 Hari inai negai, Iehova ena orea ese pepapepa gaukaralaia dalana idia diba momo. Gavamani dekenai iseda orea ena ladana idia rejista neganai, ena ladana be, Watch Tower Bible and Tract Society; motu gado dekenai tract ena anina be pepapepa, unai ese ia hahedinaraia pepapepa be mai anina bada sivarai namona ita harorolaia neganai. Lagani 1881 ia lao lagani 1918 lalonai, Iehova ena Witness taudia ese pepapepa 300 milion bona ma haida idia hariharilaidia. Orena taudia momo, be unai lagani lalodiai pepapepa hariharilaia karana amo hereva momokani idia kamonai bona idia be Iesu ena tadikaka ai idia lao.
2 Lagani 1987 lalonai, pepapepa gaukaralaia karana ena namo idia gwauraia bada, bona murinai mai edia kala idauidau pepapepa matamatadia hani idia halasidia. Lagani 1992-93 “Diari Loalaia Taudia” Distrik Hebouhebou dekenai, taunimanima edia lalona veria kala idauidau pepapepa matamatadia ma hani idia halasidia. Unai pepapepa edia ladadia be, Lalo-Metau Taudia Hagoadadia Herevadia, Emu Famili Oi Moalelaia, Daika ese Tanobada Ia Lohiaia? bona Inai Tanobada Do Ia Ore Eiava? Oiemu hesiai gaukara dekenai unai pepapepa iboudiai 8 oi gaukaralaidia anina namodia oi davaria totona, a?
3 Pepapepa oi gaukaralaidia namonamo neganai, anina namona do oi davaria. Unai pepapepa namodia ta ta iboudiai ita dibadia namonamo be gau badana. Hegeregere, unai pepapepa ta ta dekenai idia torea herevadia ibounai oi duahia vadaeni, bona oi lalo-parara dahaka idia herevalaia, a? Edena pepapepa be ia namo taunimanima ta ta dekenai oi lalohadailaia namonamo, a? Namona be unai pepapepa iboudiai edia hereva oi duahidia namonamo, unai neganai oi do idia durua ruma ta ruma ta gaukarana dekenai, bona gabu bona nega ma haida dekenai do oi gaukaralaidia totona.
4 Ruma Ta Ruma Ta Gaukarana Dekenai Gaukaralaidia: Sekit naria tauna ta ia toretore, ia gwau: “Haroro gaukara dekenai nega momo pepapepa dekena amo hereva lau hamatamaia bona unai dala be namo herea.” Oi ese unai dala oi karaia toho, a? Namona be pepapepa oi gaukaralaia emu haroro herevana oi hamatamaia totona, ani? Pepapepa iboudiai be 8, bona hari taunimanima edia lalona veria hereva 8 amo, hamatamaia herevana ta ita gaukaralaia diba. Unai pepapepa ta ta iboudiai ese ita idia durua nega ginigunana taunimanima ita hereva henia eiava ita lou henia neganai Baibel stadi ita hamatamaia totona.
5 Nega bona gabu idauidau dekenai pepapepa ita gaukaralaidia diba. Ruma ta dekenai oi haroro noho lalonai, reana oi kamonai vanegai edia lalokau tauna ta ia mase eiava edia ruma bese tauna ta be ia gorere. Lalohisihisi bada idia davaria taudia, eiava hekwakwanai be nega daudau lalonai idia haheaukalaia toho taudia, be nega momo hagoadaia lasi karadia idia laloa dainai idia lalo-metau. Idia dekenai pepapepa ta ladana Lalo-Metau Taudia Hagoadadia Herevadia ena sivarai ita kikilaia be lalokau karana, ani? Reana oi kamonai ruma tauna be vanegai ena headava idia hadokoa eiava ena moni gaukarana amo idia hadokoa. Unai bamona ia vara neganai, idia lalohisihisi bada bona ruma bese taudia edia mamina be ia dika. Unai dainai, namona be Emu Famili Oi Moalelaia pepapepana ena rau 2 dekenai idia torea henanadai oi gaukaralaidia: “Dahaka dainai hari inai negai unai hekwakwanai badadia be famili momo lalodiai idia vara? Iseda famili be edena bamona do ita moalelaidia diba?” Reana oi haroro henia tauna be unai henanadai ia lalodia momo. Ena be oi laloa ia ura momokani lasi ia kamonai, to reana gabeai unai pepapepa do ia duahia.—Koh. 11:6.
6 Gabu haida dekenai kongregesen ena teritori dekenai idia haroro momo, bona taunimanima momo ese iseda buka eiava magasin idia abia vadaeni. Pepapepa ita gaukaralaidia neganai, ruma taudia idia laloa momo sivaraidia ma haida ita kikilaia diba, namona be edia lalona ita veria, bona ita durudia Basileia ena helaro idia lalohadailaia totona. Namona be henanadai idia dekenai ita henia ma nega ta ai do ita kikilaia lou totona. Idia ita lou henidia, bona ma ita durudia. Reana nega sisina murinai idia abia vadaeni buklet ta eiava buka ta amo stadi ita hamatamaia diba.
7 Nega bona Gabu Idaudau Dekenai Pepapepa Gaukaralaidia: Bema nega ibounai pepapepa be ita dekenai idia noho—hegeregere, iseda sieti poketi, kouti poketi, kiapa, eiava haroro baege ai ita atodia—nega bona gabu idauidau ai, taunimanima ita davaridia neganai, ita gaukaralaidia diba. Sitoa dekenai ita lao neganai, PMV dekenai gabu ta ita lao henia neganai, eiava varavara eiava vadivadi taudia ita hereva henidia neganai ita gaukaralaidia diba. Unai pepapepa ese ita idia durua haroro maragina ta ita karaia totona. Pepapepa edia hereva be momo lasi dainai, taunimanima idia gari lasi ta idia abia totona, danu, edia hereva be ia hedinarai herea bona mai hemataurai danu idia torea. Ita henia pepapepa ena namba be buka eiava magasin ita henia edia namba ia hanaia. Taunimanima be pepapepa idia abia dae haraga badina idia itaia ena hereva be bada lasi.
8 Namona be ita gima noho unai pepapepa be sikuli dekenai, moni gaukara gabuna dekenai, aniani hoia rumadia dekenai, bensini abia gabuna dekenai, eiava ma gabu haida dekenai ita henia totona. Taihu ta be doketa dekenai ena tubuna ia laohaia neganai, pepapepa danu be ia dekenai ia noho. Doketa naria rumana dekenai, ia rogorogo hahinena ta ida idia kiki hebou. Unai hahine dekenai Mauri mai Mainona Tanobada Matamatana Lalonai pepapepana ia hahedinaraia murinai, taihu be unai hahine dekenai ia henanadai, ia gwau: “Oi ura do oi abia natuna be inai laulau ese ia hahedinaraia tanobadana bamona lalonai do ia tubu daekau, a?” Ma nega ta ai taihu be unai hahine ena ruma dekenai ia lao kiki hereva ma haida ia henia totona. Bona murinai ia lou henia loulou.
Pepapepa Gaukaralaia Anina Namona Havaraia Totona
(Kahana 2)
1 Sekit naria tauna ta ia gwau kongregesen ia vadivadi henia purana dekenai, idia ese ruma taudia idia hereva henia hamatamaia neganai unai pepapepa idia gaukaralaidia dainai, Baibel stadi matamatadia 64 idia hamatamaia.
2 Ruma ta ruma ta gaukara lalonai nega ginigunana ruma taudia oi hereva henia neganai, Baibel stadi herevana idia dekenai oi gwauraia, a? Pepapepa gaukaralaidia karana amo, reana nega sisina lalonai idia dekenai stadi karaia dalana oi hahedinaraia diba. Taihu ta be Mauri mai Mainona Tanobada Matamatana Lalonai pepapepana amo stadi dalana ia hahedinaraia. Laulau ia duanaia bena ruma hahine ia nanadaia, ia gwau oi laloa nega ta ai iseda tanobada ena toana be inai bamona toana ai do ia vara, a? Ruma hahine ia haere murinai, unai taihu ese ia hamaoroa namona be 2 Petero 3:13 bona Isaia 65:17 do ia duahidia, unai siri rua edia sivarai be pepapepa lalonai idia noho. Bena iseda taihu ia gwau: “Unai gwauhamata herevadia be taunimanima edia nihi eiava gori herevadia lasi, to Dirava ena Hereva, Baibel dekena amo idia mai.” Bena dala ia hegaegaelaia murina pura dekenai do ia giroa lao ma idia kiki hebou totona. Ia giroa lao neganai, taihu ese unai ruma hahine ena henanadai haida ia haerelaidia bona ruma hahine be ia dekena amo Mauri Hanaihanai Paradaiso Lalonai bukana ia abia. Murinai, Baibel stadi ia dekenai ia hamatamaia.
3 Reana oi be vanegai sibona oi bapatiso eiava oi be bapatiso lasi pablisa tauna ta, bona emu diba haroro gaukara karaia dalana dekenai oi habadaia noho, a? Bema oi be unai bamona ta, oiemu kongregesen teritori dekenai pepapepa hariharilaidia dala namona oi diba totona, namona be unai gaukara idia diba momo taudia edia heduru oi tahua. Gunaguna, abidadama lo taudia ese haida idia hagoadadia bona idia hakaudia namonamo sivaraidia be momo.
4 Kongregesen ena Buka Stadi naria tauna be dala ia hegaegaelaia diba haida ese pepapepa gaukaralaidia dala namodia be ma haida dekenai idia hadibadia totona. Tama bona sina be mai edia maduna edia natudia idia durudia haroro gaukara idia karaia namonamo totona. Witness kekeni maragina ta ena tamana bona sinana ese idia hadibaia Mauri mai Mainona Tanobada Matamatana Lalonai pepapepana ia hariharilaia toho totona. Ena sinana ia bamoa Baibel stadi ta ia karaia neganai, bona unai kekeni maragi be pepapepa ta ia henia kamonai hahine ena adavana dekenai. Unai kekeni maragi ena abidadama kara bada ia itaia neganai unai tau be ia hoa. Unai pepapepa ia duahia neganai ia moalelaia bada. Baibel stadi karaia totona sinana danu idia giroa loulou neganai, kekeni maragi ese unai tau totona ia hegaegaelaia Baibel sirina ta eiava Baibel ena sivarai ta ia kikilaia. Harihari, unai tau be nega ibounai magasin ia abia ia duahidia totona, bona Revelation Climax buka ia moalelaia, bona nega ta ta ai hebou dekenai ia lao. Unai kara ibounai ia vara badina tama bona sina ese nega idia atoa edia maduna idia huaia totona, unai be edia natuna dekenai pepapepa gaukaralaidia dalana idia hadibaia namonamo.
5 Iseda Pepapepa Matamatadia Ita Gaukaralaidia Namonamo: Inai Tanobada Do Ia Ore Eiava? pepapepana ita henia toho neganai, hereva ita hamatamaia totona reana inai bamona ita gwau diba: “Daba namona. Hari dinai ai be mauri ena namo ai kikilaia taunimanima dekenai. Oi laloa iseda mauri ena namo do ia bada ia lao, eiava do ia dika lao noho? (Naria do ia haere totona.) Taunimanima haida idia laloa tanobada dekenai idia vara gaudia ese Baibel ena peroveta herevadia idia hagugurudia, bona idia laloa tanobada dokona be ia kahirakahira vadaeni. Oi be dahaka oi laloa?” Ruma tauna ia haere murinai, pepapepa ita henia toho bona paragraf iharuana dekenai idia noho henanadai toi ita gwauraidia. Bena murinai pepapepa ena sivarai hegeregerena ita hahedinaraia gunaguna tanobada ta be ia ore, bona hari tanobada danu do ia ore. Iseda hereva ita hadokoa gwauraia neganai, namona be dala ita hegaegaelaia ita lou henia totona, bona Baibel dekena amo tanobada be kahirakahira do ia ore hamomokania sivaraina ita kikilaia totona.
6 Nega momo dala ia kehoa nega sisina lalonai taunimanima dekenai Basileia ena sivarai do ita harorolaia totona, hegeregere moni gaukara gabunai eiava sikuli dekenai. Moni gaukara gabunai, reana gavamani ena kara ta do idia kikilaia. Reana oi gwau diba ena be gavamani ena gunalaia taudia be idia hekwarahi bada badina idia ura namo idia havaraia, to idau nega amo ia mai hari tanobada dekenai taunimanima be hisihisi bada idia davaria. Bena murinai, Daika ese Tanobada Ia Lohiaia pepapepana ena rau 2 ai, paragraf dokodia rua edia sivarai oi kikilaia. Lalona veria henanadai toi oi duahidia. Bema nega be lasi umui kiki hebou noho totona, unai pepapepa oi henia bona unai henanadai do oi haerelaidia totona, do oi lou henia negana oi gwauraia hedinarai.
7 Namona be ita sibona bona ruma bese ta ta iboudiai be nega ita atoa unai pepapepa henia dala idauidau ita laloa namonamo totona. Namona be pepapepa henia dalana ita karaia toho guna, gabeai ita lao haroro. Haroro gaukara dekenai hua ena henia gauna bona pepapepa be edena bamona ita gaukaralaidia hebou diba? Reana doketa dekenai eiava ma gabu ta dekenai do oi lao neganai, namona be unai pepapepa haida oi abia lao danu, ani? Reana hari pura lalonai taunimanima ta do oi davaria bona unai pepapepa ena sivarai namona ese do ia durua bada, ani?
8 Bema Iehova ita lalokau henia bada bona taunimanima edia namo ita tahua, do ita goada karaia taunimanima dekenai sivarai namona ita harorolaia totona. Unai ita karaia diba bema hanaihanai unai pepapepa ita gaukaralaidia. Mero maragina ta, ena lagani be 7, be ia ura ena ruma kahirakahira hahinena be tanobada matamatana lalonai do ia vareai, unai dainai pepapepa ta ia henia, bona murinai ia dekenai Baibel stadi idia hamatamaia. Unai be ia auka lasi! Ita haroro neganai, unai hereva auka lasi dala amo ita karaia, to unai kara ena namo be bada. Gabeai, pepapepa ta ita henia neganai, reana unai amo Baibel stadi ita hamatamaia diba danu. Basileia ena sivarai namona ita harorolaia neganai, bema pepapepa ita gaukaralaidia namonamo, hahenamo momo do idia vara.
[Questions for Part 1]
1. (a) Gavamani dekenai iseda orea ena ladana idia rejista neganai dahaka idia gwauraia? Dahaka dainai unai ladana ita laloa bada? (b) Pepapepa ese haroro gaukara dekenai edena bamona ita idia durua?
2. Hari ita abia pepapepa idauidau be hida? Pepapepa matamatadia 4 edia ladana oi gwauraia.
3. Unai pepapepa ita gaukaralaidia namonamo totona, dahaka do ita karaia be gau badana? Pepapepa iboudiai amo edena ta be ia hegeregere taunimanima toadia ta ta dekenai be edena bamona oi diba?
4, 5. (a) Sekit naria tauna ta ia gwau pepapepa gaukaralaidia dala namona ta be dahaka? (b) Edena negai ia maoro Lalo-Metau Taudia Hagoadadia Herevadia pepapepana oi henia toho? Daidia dekenai Emu Famili Oi Moalelaia pepapepana oi henia toho?
6. Baibel stadi ta hamatamaia totona pepapepa be edena bamona ita gaukaralaidia diba?
7. Dahaka dainai ita henia pepapepa ena namba be buka eiava magasin ita henia edia namba ia hanaia?
8. Namona be ita ta ta iboudiai be ita gima noho dahaka ita karaia totona? Unai amo nega momo dahaka do ia vara diba?
[Questions for Part 2]
3. (a) Lo pablisa taudia be edena dala amo Priskila bona Akula edia kara idia tohotohoa diba? (Kara 18:24-27) (b) Korinto Ginigunana 4:17 oi duahia. Paulo bona Timoteo edia haheitalai namona be dahaka?
4. Hereva momokani dekenai tama bona sina ese edia natudia idia hadibaia namonamo neganai, dahaka hahenamo idia vara?
6-8. (a) Sivarai namona harorolaia gaukarana lalonai pepapepa ita gaukaralaidia namonamo totona, dahaka do ita karaia guna? (b) Pepapepa ita gaukaralaidia diba gabudia haida oi gwauraidia hedinarai. (c) Basileia ena sivarai namona ita harorolaia gaukarana lalonai pepapepa ita gaukaralaidia namonamo neganai, dahaka hahenamo do ita abia?