Painia Gaukara—Iseda Nega be mai Aonega ida Ita Gaukaralaia Gaukarana!

¹ ‘Lauegu gaukara be momo herea vadaeni! Inai nega ai painia gaukarana lau karaia matamaia be aonega karana, a?’ Taihu ta be unai bamona ia laloa, painia elda ta ese sekit hebouhebou ena kahana ta ena hereva “Painia Gaukarana Goadalaia Noho” ia herevalaia neganai. Tadikaka matamatana ta unai hebou taudia huanai danu be ia laloa, ‘Edena dala ai unai elda tauna be ia painia diba? Lau be elda tauna ta lasi, to lauegu mauri lalonai gaukara be momo vadaeni!’

² Elda tauna ese painia gaukarana ena hahenamo ia herevalaidia noho neganai, ia ese unai sekit ena painia taudia haida ia henanadai henia bona idia ese idia painia totona idia haidaua gaudia bona edena bamona Iehova ese edia hekwarahi ia hanamoa be idia herevalaia. Ta be tauanina dika tauna, ta ena adavana be abidadama lasi tauna, bona ta be tanobada ena dagi bada gaukarana ia dadaraia, to ia do hegeregere. Unai helai taudia huanai idia helai tadikakana bona taihuna be edena bamona unai painia taudia be Iehova ena heduru amo idia kwalimu sivaraidia idia kamonai neganai, sibona edia lalohadai bona edia noho dalana idia laloa namonamo lou matamaia. Umui ai noia unai bamona do umui karaia danu, badina hari idia hamaragia painia horadia be sivarai namona harorolaia pablisa momo ese idia davaria diba.

³ Ita diba Iehova be iseda Havaraia Tauna bona ia be Guba bona Tanobada edia Lohia Badana, bona unai dainai ia be iseda mauri ena badina. (Dan. 4:​17; Kara 17:28) Ita dekenai ia hedinarai goevagoeva Iehova ese orea tamona sibona ia gaukaralaia noho. Unai orea danu ita gaukara hebou mai eda abidadama ida be hahenamo badana, bona dokona ia do mai lasi neganai “hesiai tauna mai ena kamonai, bona mai ena kara maoromaoro” ita durua Basileia sivaraina harorolaia totona. (Mat. 24:45; 25:40; 1 Pet. 2:9) “Dina gabedia” edia dokona momokani lalonai ita noho dainai, ita diba haroro negana ia ore gwauraia. (2 Tim. 3:​1, NW) Inai nega lalonai, tauanina dalanai iseda ruma bese ita durua be namo. (1 Tim. 5:8) Toana be hari ta ese ia davaria monina be mauri durua gaudia namodia abia totona ia hegeregere lasi, guna ia hegeregere bamona. Reana iseda tauanina ena goada be guna bamona lasi. Bona momokani, ita ura nega sisina bona kohu haida ita abia ita sibona totona. (Had. 3:​12, 13) Unai dainai reana do ita laloa bema painia gaukarana ena boiboi herevana ita abia dae be aonega karana eiava.

⁴ Ita ta ta eda maduna be sibona eda noho dalana ita laloa namonamo bona ita lalohadailaia do ita painia diba eiava lasi. (Roma 14:12; Gal. 6:5) Ita itaia momo herea be painia gaukarana idia abia dae be hagoadaia gauna. Hari inai dina gabedia edia hekwakwanai bona metau lalodiai, 1999 Yearbook ai idia halasia haroro ripotina ese ia hahedinaraia tanobada hegegemadai Iehova ena taunimanima kahirakahira 700,000 be painia gaukarana lalonai idia gaukara goada noho. Herevana hesiai gaukara idia karaia gabudiai moni gaukara idia davaria be auka, motuka be lasi, idia gorere, eiava hekwakwanai ma haida idia davaria, unai tadikaka bona taihu be idia hesiku lasi to kara namo idia karaia noho, bona unai dainai ita hanamodia. (Gal. 6:9) Idia ese Iehova ena hereva idia abia dae bona ia idia tohoa. (Mal. 3:​10) Idia laloa painia gaukarana amo edia kohu bona edia nega idia gaukaralaia namonamo bona Iehova ese ia hanamodia badina idia ese edia mauri idia haidaua, painia gaukara lalonai idia vareai bona idia painia noho totona.

⁵ Painia Taudia ese Hahenamo Idia Abia: Cameroon dekenai taihu ta mai ena natuna kekeni maragina be ia gwau: “Iena vara negana amo egu natuna kekeni ese hanaihanai lau ia bamoa haroro gaukarana lalonai. Ia do raka diba lasi neganai danu, lau ese egu doruna dekenai lau huaia bona dabua ta amo ia lau dogoatao namonamo. Daba ta haroro gaukarana lalonai, lau be dala kahana ta ai lau gini. Egu natuna be egu baege amo magasin haida ia abia bona lau ia rakatania. Kahana ma ta ai ia noho gini gabuna dekenai ia raka lao. Ena be hereva momo ia gwauraia diba lasi, ia ese hahine ta ena kamonai karana ia veria bona magasin ta ia henia. Unai hahine be ia hoa, badina ia itaia unai bamona natuna maragina ese haroro gaukarana ia karaia. Ia ese mai ena ura ida magasin bona Baibel stadi ia abia dae!”

⁶ Heduru painia taudia ma haida idia abia totona idia gwauraia boiboina dainai, Zambia dekenai elda ta, bona ia be ruma bese kwarana danu mai ena ful-taim moni gaukarana, be ia laloa heduru painia gaukarana do ia karaia ena be ia bisi bada. Ia ura haheitalai namona do ia hahedinaraia iena ruma bese bona kongregesen vairanai. Nega haida, ia ese dala badinai ena motuka ia atoa bona The Secret of Family Happiness be kaset teipi dekenai ia gadaralaia bona idia raka hanai taudia ia boiria unai do idia hakala henia totona. Unai dala amo, ia ese Family Happiness bukadia 16 bona Diba bukadia 13 ia hariharilaia, bona Baibel stadi rua ia hamatamaia.

⁷ Kahirakahira ai ia noho tanona ladana Zimbabwe ai, painia urana idia hahedinaraia danu. April 1998 lalonai, kongregesen ta mai ena pablisa 117 be heduru painia 70 bona regula painia 9 ia ripotilaia. Ma kongregesen ta mai ena pablisa taudia 94 ena ripoti ai heduru painia taudia be 58. Danu, kongregesen ma ta mai ena pablisa 126 ena ripoti ia hahedinaraia pablisa 58 be heduru painia gaukara idia karaia bona edia regula painia taudia be 4. Zimbabwe dekenai hesiai laganina gunana be namo herea. Ena be unuseniai tadikaka be edia ruma bese gaukara idauidau, kongregesen gaukara idauidau, bona brens haginia gaukarana dainai idia bisi bada, to idia ese mai aonega ida edia nega be haroro gaukarana lalonai idia gaukaralaia namonamo.

⁸ Painia taudia idia lalo-parara painia gaukarana idia hamatamaia bona idia painia noho be sibona edia goada dekenai idia karaia lasi. Idia hahedinaraia haraga, dahaka dahaka idia karaia be “Dirava ese ia henia goada” dainai idia karaia diba. (1 Pet. 4:​11, NW) Edia abidadama ese ia durudia dina ta ta iboudiai edia hesiai gaukara idia karaia totona. Sibodia edia namo idia tahua lasi, to idia kwalimu painia taudia idia diba idia gaukara goada noho totona idia hekwarahi bada, to dokonai hahenamo momo idia abia.​—1 Tes. 2:​2, NW.

⁹ Paulo Ena Haheitalai Ita Tohotohoa be Namo: Baibel ese aposetolo Paulo be hesiai gaukara lalonai ia hagugurua gaudia bona taunimanima momo dekenai ia henia heduru namona ia hahedinaraia. To, Paulo ia huaia metau gaudia be momo herea. Sivarai namona ia harorolaia bona kongregesen ia hagoadadia totona ia ese dagedage bona hekwakwanai ia haheaukalaidia. Danu, gorere metauna ta ia haheaukalaia. (2 Kor. 11:21-29; 12:7-10) Ia ese ena lalona ia hadaia ena nega do ia gaukaralaia mai aonega ida. Ia diba Iehova ena heduru amo iena gaukara ibounai ia karaia. (Fil. 4:​13, NW) Paulo ese ia durua taudia ta lasi be badina ta dainai ia gwau Paulo ese Iehova ena hesiai gaukara lalonai ena nega ia haorea kava eiava ena nega be ma gau ta dekenai ia gaukaralaia be namo. Momokani, hari inai negai danu ita ese Paulo be mai ena aonega ida ena nega ia gaukaralaia karana amo namo ita do davaria noho! Ita ese Paulo be lauma helaga ena heduru amo ia torea sisibana ita laloabada, ia ese ita ia durua mai anina bada gaudia ita itaia namonamo totona bona inai nega dikana lalonai hereva momokani lalonai ita gini goada noho totona.

¹⁰ Harihari sivarai namona harorolaia ena “nega be kwadogi.” (1 Kor. 7:​29; Mat. 24:14) Unai dainai, ita sibona ita nanadaia be namo, ‘Bema kerukeru egu mauri do ia boio, hari Iehova lau hamaoroa diba lau ese mai aonega ida egu nega lau gaukaralaia vadaeni, a?’ (Iam. 4:​14) Namona be hari guriguri amo Iehova oi hereva henia, oi hamaoroa oi be iena Witness tauna ta dainai oi ura emu nega do oi gaukaralaia namonamo mai emu aonega ida, ani? (Sal. 90:12) Iehova ena heduru oi noia, emu mauri lalonai mai anina bada gaudia sibona do oi lalodia totona. Ena be guna oi laloa painia gaukara oi karaia diba lasi, to reana hari emu mauri lalonai painia gaukara do oi karaia diba, a?

¹¹ Emu Noho Dalana Hegeregerena Oi Gaukara Goadagoada: Ita lalo-parara, taunimanima edia noho daladia be idauidau dainai, regula painia gaukara idia ura idia karaia taudia ibounai be idia hegeregere lasi hora 70 be hua ta ta ai painia gaukara dekenai idia gaukaralaia. To, pablisa momo be idia hegaegae hua ta lalonai hora 50 idia gaukaralaia haroro gaukarana lalonai bona bema dala ia noho unai idia karaia nega momo o idia karaia hanaihanai. Bema harihari oiemu noho dalana ia hegeregere lasi heduru o regula painia gaukarana oi karaia, oi lalo-manoka lasi. Oi guriguri noho emu noho dalana do ia idau. Hari, bema emu noho dalana oi haidaua diba lasi, oi lalo-goada badina oi diba Iehova ese mai emu goada ibounai ida oi karaia diba hesiai gaukarana ia moalelaia. (Mat. 13:23) Ia diba oi be iena kahana ai oi gini goada bona oi hekwarahi noho oi be abidadama goada pablisa ta bona hua iboudiai nega namodia oi gaukaralaia oi haroro totona. Reana oiemu haroro dalana oi hanamoa diba, sivarai namona harorolaia bona hadibaia tauna namona ta ai oi lao totona.​—1 Tim. 4:​16.

¹² Iehova ena dina badana mai garina be ia kahirakahira dainai, namona be ita ese ia do noho negana ita gaukaralaia namonamo mai aonega ida bema ita ura Iehova ese ia henia gaukarana ita hagugurua. (Ioe. 2:​31, NW) Satani ia diba iena nega be kwadogi, bona gau ibounai ia karaia toho iseda mauri ia ha-aukaia bona dala ia karaia ita be mai anina bada gaudia do ita laloa momo lasi totona. (Fil. 1:​10; Apok. 12:12) Oi daradara lasi Dirava ese oi ia laloa bada. Iehova ese oi ia durua diba, bena emu mauri ai mai anina bada gaudia sibona oi laloa bona mai goada ibounai ida emu hesiai gaukara oi hagugurua. (Sal. 145:​16, NW) Ita moale, badina momo be edia noho dalana idia laloa lou karana amo idia davaria idia ese heduru o regula painia gaukarana lalonai idia vareai diba. Momokani, painia taudia ese edia nega idia gaukaralaia mai aonega ida dainai idia moale bada. Oi danu be unai bamona tauna ta ai do oi lao, a?