Haroro Bona Mauri Dalana Hebou Pepana Edia Referens
© 2025 Watch Tower Bible and Tract Society of Pennsylvania
SEPTEMBER 1-7
BAIBEL ENA HEREVA BADADIA PROVERBS 29
Dirava ese Ia ura Henia Lasi Hahediba Herevadia Bona Kastom Karadia Oi Dadaraia
wp16.6-E 6, maua
Guba ai Idia Noho Gaudia Ena Matahanai
Seini amo idia guia hesiai taudia bamona, taunimanima milioni momo be edia sene karadia bona lauma dikadia gari henia karana ena seini amo idia guia. Idia ese toni eiava ageva, imana ai idia kwatua au bamona gauna ta bona meamea karadia amo, idia ura sibona idia gimaia. Namona be unai bamona oi karaia lasi. Badina Baibel ia gwau: “Iehova ena matana be tanobada ibounai ia itaia noho, ia idia badinaia momokani taudia dekenai ena goada ia hahedinaraia totona.” (2 Sivarai 16:9) Dirava momokanina, Iehova, ena siahu be bada herea Satani ena siahu ia hereaia, oi do ia gimaia bema Ia oi tabekau henia.
Iehova ese oi ia gimaia totona, namona be ia ura henia gaudia oi dibaia bona oi karaia. Hegeregere, aposetolo taudia edia negai, Efeso ena taoni ai idia noho Keristani taudia be meamea karadia edia buka idia haboua bona gabua. (Kara 19:19, 20) Unai hegeregerena, Dirava ese oi ia gimaia totona, namona be toni eiava ageva, imana ai idia kwatua au bamona gauna ta, kaivakuku, meamea idia karaia bukadia, taunimanima ia gimaia varo, bona lauma dikadia edia heduru idia tahua gaudia oi hadikaia ore.
Mase Dekenai Baibel Ena Hereva Momokani Oi Gwauraia Hedinarai
13 Bema kastom karana ta dekenai oi daradara, Iehova oi guriguri henia, unai amo ia ese oi dekenai aonega do ia henia. (Iamesi 1:5 duahia.) Bena iseda pablikeisen amo tahua gaukara oi karaia. Heduru ma haida oi abia totona kongrigeisen ena elda taudia oi hereva henia diba. Oi totona abia hidi do idia karaia lasi, to oi do idia durua Baibel ena hakaua herevadia oi badinaia totona. Bema unai oi karaia, ‘emu darana oi gaukaralaia karana amo’ sibona oi hadibaia bona unai ese oi do ia durua ‘maoro bona kerere edia idau oi dibaia’ totona.—Heb. 5:14
“Hereva Momokani ai Oi Raka Noho”
12 Dirava ena taravatu ia utua kastom karadia. Nega haida ruma bese taudia, gaukara turadia, bona sikuli turadia ese ita do idia doria holidei o birthday ena moale karadia lalonai ita vareai totona. Edena dala ai Iehova ia hamoalea lasi kastom karadia bona holidei ena moale karadia idauidau ita dadaraia diba? Namona be Iehova ese unai moale karadia ia ura henia lasi ena badina ita lalopararalaia. Iseda pablikeisen lalonai tahua karana ita karaia unai amo ita laloparara edena dala ai unai holidei idauidau idia hamatamaia. Baibel ese unai kastom bona holidei idauidau ita moalelaia lasi ena badina ia herevalaia bona bema ita laloa dobu, do ita abia dae momokani ita be “Lohiabada ese ia abia dae” dalana ita badinaia noho. (Efe. 5:10) Iehova bona iena Hereva ita abidadama henia karana ese ita do ia durua ‘taunimanima do ita gari henia’ lasi totona.—Aon. 29:25
Hakaua Hereva Namodia
it-E “Flattery” par. 1
Hanamoa Koikoi
Ta ia ura ma haida amo hahenamo ia abia dainai, hanamoa hereva koikoi ia gwauraia. Unai ia karaia tauna be sibona ena namo ia laloa eiava ia koia tauna ia hadikaia bona unai ese dika bada ia havaraia diba. Ena ura be ma haida ese ia idia hanamoa eiava idia amo moni eiava kohu ia abia. Unai kara be tarapu bamona taunimanima ia hakaua kerere. (Ao 29:5) Hanamoa koikoi karana be Iehova amo ia mai aonega karana lasi, to ia be inai tanobada ena kara, hegeregere sibona laloa bada, taunimanima edia toana laloa karana, bona koikoi karadia. (Ia 3:17) Koikoi karadia, koikoi herevadia, taunimanima heagilaia karana, be ta ena ladana namona ia hadikaia diba bona unai ese Dirava ia hamoalea lasi.—2Ko 1:12; Ga 1:10; Ef 4:25; Kl 3:9; Apo 21:8.
SEPTEMBER 8-14
BAIBEL ENA HEREVA BADADIA AONEGA HEREVADIA30
“Ogogami Eiava Taga Tauna ai Lau Oi Halaoa Lasi”
Edena Bamona Lalokauna ese Moale Korikorina Ia Havaraia?
10 Momokani, ita ibounai be moni ita abia be namo. Moni be ita ia gimaia diba. (Had. 7:12) To bema ta ena moni be ena dina ta ta maurina durua sibona totona, ia moale diba, a? Oibe! (Hadibaia Tauna 5:12 duahia.) Lake ena natuna Aguru ia gwau: “Ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia.” Oibe, ia ura lasi ia be do ia ogogami momokani, bona unai ena badina ita lalopararalaia. Danu, ia ura lasi ia henaohenao, badina unai kara amo Dirava ena ladana ia hadikaia diba. To dahaka dainai ia ura lasi kohu momo ia abia? Ia gwau: “Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’” (Aon. 30:8, 9) Reana oi diba taudia haida be edia kohu laloa bada, to Dirava idia abidadama henia lasi.
11 Moni idia ura henia bada taudia be Dirava idia hamoalea diba lasi. Iesu ia gwau: “Tau ta be biaguna rua edia igui hesiai gaukara ia karaia diba lasi, badina ia ese ta do ia inai henia bona ta do ia lalokau henia, eiava ta do ia durua bona ta do ia dadaraia. Dirava bona Taga edia hesiai gaukara umui karaia diba lasi.” To matamanai ia gwau: “Tanobada dekenai umui sibona totona dava bada kohu do umui haboua lasi, badina unuseniai manumanu bona raraka ese do idia hadikaia bona henaohenao taudia ese do idia henaoa. To guba dekenai umui sibona totona dava bada kohu do umui haboua, unuseniai manumanu bona raraka ese do idia hadikaia lasi, bona henaohenao taudia ese do idia henaoa lasi.”—Mat. 6:19, 20, 24.
12 Momo idia abia dae kohu momo lasi maurina ese idia ia hamoalea sibona lasi, to nega bada ia noho Iehova idia hesiai henia totona. Jack be United States dekenai ia noho. Ia ese ena ruma badana bona bisinesi ia hoihoilaia, badina ia diba unai ia karaia neganai, ena adavana ida idia painia diba. Ia gwau: “Matamanai ia auka emai ruma namona bona tano ai hoihoilaia totona. To lagani momo lalonai, nega momo ruma dekenai lau giroa neganai, gaukara gabunai idia vara hekwakwanai dainai lau lalohekwarahi bada. To egu adavana, ia be ia regula painia, be nega ibounai ia moale. Nega momo ia gwau, ‘Egu biaguna be biaguna namo hereana!’ Hari lau danu lau painia, bona ai ruaosi be Biaguna tamona, Iehova, ai hesiai henia.”
w87-E 5/15 30 par. 8
Iehova Oi Gari Henia Bona Do Oi Moale
◆ 30:15, 16—Inai siri amo dahaka ita dibaia?
Inai siri ai ia noho haheitalai ese mataganigani karana ia herevalaia. Doma (leeches) ese rara idia inua bona edia tauanina ia bada hegeregerena, mataganigani taudia be moni momo bona siahu do idia ura henia. Unai hegeregerena, gara gabuna be do ia hegeregere lasi bona ena uduna be ia do kehoa noho mase taudia totona. Gabani hahine ena bogana be natudia totona ia ‘taitai’ noho. (Genese 30:1) Tano kaukau ese medu ranu ia inua murinai tano ia kaukau lou. Lahi ia ara matamaia neganai, badibadinai idia noho gaudia ibounai do ia araia danu. Mataganigani tauna be unai bamona. To Dirava amo ia mai aonega idia abia taudia be unai bamona mataganigani karana idia dadaraia diba.
w11-E 6/1 10 par. 4
Moni Bona Kohu Gaukaralaia Dalana
Gau oi do hoia lasi neganai, moni oi haboua. Moni haboua karana be namo, badina unai ese ta ia durua moni ena hekwakwanai ia hanaia totona. Unai kara ese abitorehai ena dika amo momo ia gimaia, hegeregere kohu davadia idia bada daekau dainai, momo be moni bada idia negea unai gaudia idia hoia totona. Baibel ia gwau dimairi be mai ena “aonega,” badina vaira nega totona “aniani idia haboua.”—Aonega Herevadia 6:6-8; 30:24, 25.
Iehova Ena Palai Ruma ai Oi Noho Hanaihanai!
18 Namona be moni totona ita abia lalohadai ita sekea. Sibona oi nanadaia: ‘Nega momo moni bona do lau hoia gaudia lau laloa, a? Bema moni lau abitorehai, lau haloua haraga lasi badina lau laloa, moni ia henitorehai tauna be unai ia abia haraga be gau badana lasi, a? Moni lau abia neganai, lau mamia ma haida lau hereaia bona hariharibada karana lau hahedinaraia be auka, a? Lau itaia egu tadikaka taihu be mai edia kohu momo dainai, lau laloa moni idia ura henia bada, a? Lau ura taga taudia sibona lau tura henia bona ogogami taudia lau laloa bada lasi, a?’ Ita sibona dekenai unai henanadai ita henia be mai anina bada, badina Iehova ese ita ia boiria karana be hahenamo badana. Unai hahenamo ita gimaia totona, moni ura henia bada karana ita dadaraia be namo. Bema unai bamona ita karaia Iehova ese ita do ia rakatania lasi!—Heberu 13:5 duahia.
Hakaua Hereva Namodia
Iehova Ia Havaraia Gaudia ese Iena Aonega Idia Hahedinaraia
11 “Mada” maragina amo mai anina bada gauna ita dibaia danu. (Aonega Herevadia 30:26 duahia.) Iena toana be ataiai laulau dekenai, iena taiana be maragi bona ena aena be kwadogi. Unai animal maragina be nadi gabudiai ia noho. Iena matana be gabu daudau ia itaia diba dainai, dagedage animal amo ia hunia haraga, bona ia be hanaihanai matu badinai sibona ia loaloa. Unai mada be idia noho hebou, unai amo ta ta idia gimaia bona keru bada negana ai ta ta idia hasiahua diba.
12 Mada amo dahaka ita dibaia? Gau ginigunana be, unai animal be nega ibounai ia naria namonamo dainai, dagedage animal be ia idia hadikaia diba lasi. Ia be matu badinai sibona ia loaloa bona daudau amo dagedage animal ia itaia bona ia hunia haraga diba. Unai hegeregerena, nega ibounai ita noga noho be gau badana, unai amo Satani ena tanobada ese ia havaraia dika ita itaia haraga bona ita dadaraia diba. Aposetolo Petero ese Keristani taudia ia sisiba henia: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Pet. 5:8) Iesu be tanobada ai ia noho neganai, ia naria namonamo, badina Satani ia ura ena Dirava badinaia karana ia hadikaia. (Mat. 4:1-11) Iesu be haheitalai namona ia hahedinaraia ia murinai idia raka taudia totona!
13 Ita naria namonamo dalana ta be, Iehova ese ita ia gimaia totona ia henia gaudia ita laloa bada. Baibel stadilaia karana bona Keristani heboudia lao henia karana ita rakatania lasi. (Luka 4:4; Heb. 10:24, 25) Danu, mada be gabu tamona ai idia noho hebou hegeregerena, iseda Keristani tadikaka taihu ida ita noho hebou be namo, unai amo edia abidadama ese ita ia hagoadaia diba. (Roma 1:12) Iehova ena gimaia karana henunai ita noho neganai, ita hahedinaraia Salamo torea tauna Davida ena hereva ita abia dae, ia gwau: “Lohiabada be egu Nadi Badana. Ia be egu magu, bona egu hamauria Tauna. Egu Dirava be egu kohoro, lau heau mauri gabuna.”—Sal. 18:2.
SEPTEMBER 15-21
BAIBEL ENA HEREVA BADADIA AONEGA HEREVADIA 31
Mai Lalokau ida Sina ta ese Natuna Ia Sisiba Henia Karana amo Diba Ita Abia
w11-E 2/1 19 par. 7-8
Emu Natudia Dekenai Kara Namodia Oi Hadibaia
Mahuta Hebou Karana Ena Diba Maorona Oi Hadibaia. Hadibaia herevadia ita abia be namo. (1 Korinto 6:18; Iamesi 1:14, 15) Baibel ese mahuta hebou karana ia gwauraia Dirava ena harihari gauna, to Satani ena tarapu lasi. (Aonega Herevadia 5:18, 19; Solomona ena ane 1:2) Emu tineij natudia dekenai, mahuta hebou karana ena dika sibona oi herevalaia neganai lalohadai kererena do idia abia, bona unai kara dekenai Baibel ena taravatu do idia diba lasi. France ai ia noho hahine matamata ta ladana Corrina, ia gwau, “Egu tama sina be lau dekenai matabodaga karana ena dika sibona idia herevalaia dainai mahuta hebou karana dekenai lalohadai kererena lau abia.”
Emu natudia dekenai mahuta hebou karana ena namo bona dika umui herevalaia namonamo. Mexico ai ia noho sina ta ladana Nadia, ia gwau, “Hanaihanai lau ura egu natuna ia diba gauna be mahuta hebou karana be namo, unai be Iehova amo ia mai harihari gauna bona ia ura taunimanima ese unai idia moalelaia. To, unai be headava taudia sibona ese idia moalelaia diba. Bema mahuta hebou karana ena hakaua dalana ita badinaia lasi, ita dekenai lalohisihisi ia havaraia diba.”
ijwhf atikol 4 par. 11-13
Natudia Dekenai Alkahol oi Herevalaia
Emu famili ida alkahol gaukaralaia dalana oi herevalaia. “Britain ai ia noho tama ta ladana Mark, ia gwau, “Egu natuna mero ena mauri lagani 8 lau nanadaia bema ia laloa alkahol inua karana be maoro eiava kerere. Ai herevahereva totona lau abia hidi gabuna be gabu be namonamo, bona unai ese ia durua ena lalohadai ia gwauraia hedinarai diba.”
Emu hereva do idia ura kamonai bema nega idauidau ai alkahol oi herevalaia. Emu natudia edia mauri lagani hegeregerena, bona mauri ai taunimanima ese alkahol idia gaukaralaia neganai idia vara gaudia oi herevalaia, hegeregere aksiden bona mahuta hebou karana.
Haheitalai namona hahedinaraia. Natudia be spansi bamona—idia itaia gaudia amo diba idia abia—bona tahua gaukara ese ia hahedinaraia natudia be edia tama sina dekenai gau momo idia diba. Unai dainai bema emu lalohekwarahi oi hamaoromaoroa totona alkahol oi inua, emu haheitalai amo natudia do idia diba hekwakwanai hamaoromaoroa totona alkahol idia inua be namo. Unai dainai alkahol oi gaukaralaia namonamo, bona haheitalai namona oi hahedinaraia.
g17.6-E 9 par. 5
Natudia Dekenai Manau Karana Oi Hadibaia
Idia dekenai henia karana oi hadibaia. Emu natudia dekenai oi hahedinaraia “henia kara ena moale be bada, to abia kara ena moale be maragi.” (Kara 20:35) Edena dala ai? Reana emu natudia ida heduru idia ura tadikaka taihu edia lista umui karaia, hegeregere sitoa lau totona motuka to idia ura, eiava ruma hanamoa gaukarana. Bena emu natudia ida unai tadikaka taihu haida umui durua. Namona be emu natudia do idia itaia mai moale ida unai tadikaka taihu oi durudia. Emu haheitalai namona amo emu natudia be manau karana idia dibaia diba.—Baibel ena hakaua hereva: Luka 6:38.
Hakaua Hereva Namodia
Diba Abia Dalana Baibel Negadia Ai
7 Israela dekenai, natudia idia do maragi negana amo tamana bona sinana taudia be natudia idia hadibaia. (Deuteronomi 11:18, 19; Aonega Herevadia 1:8; 31:26) France gado ena Dictionnaire de la Bible dekenai, Baibel ia diba momo tauna, E. Mangenot ia torea, ia gwau: “Ia hereva hamatamaia negana amo, natuna be Taravatu ena hereva haida idia hadibaia. Iena sinana ese siri ta ia gwauraia loulou; unai siri ia diba neganai, ia be ma siri ta ia henia. Gabeai, natudia be edia kwarana amo idia gwauraidia diba siridia edia toretore be edia imana dekenai idia henia. Unai dala amo duahiduahi dalana idia hamatamaia, bona idia tubu bada sisina neganai, tomadiho dekenai edia diba idia habadaia noho totona Lohiabada ena taravatu idia duahia bona idia laloa dobu.”
8 Unai amo ita lalo-parara hadibaia dalana badana ta be edia kwarana dekenai diba idia atoa. Iehova ena taravatu dekenai idia diba gaudia bona iena bese taudia ia kara henidia dalana dekenai be edia kudou dekenai idia atoa be namo. (Deuteronomi 6:6, 7) Idia lalodia noho be namo. (Salamo 77:11, 12) Matamata taudia bona buruka taudia edia kwarana dekenai hereva idia laloatao totona dala haida idia gaukaralaidia. Unai daladia haida be, toretore letadia be acrostic dalana ai idia torea, siridia ta ta be leta idaudia amo idia hamatamaia, unai be Heberu letadia tamona tamona amo idia karaia (hegeregere Heberu gado Baibel dekenai Aonega Herevadia 31:10-31 dekenai idia karaia bamona); idia hamatamaia herevadia iboudiai edia leta eiava edia rege be tamona; bona namba idia gaukaralaidia, hegeregere Aonega Herevadia karoa 30 ena dokona kahana ai idia gaukaralaia hegeregerena. Diba taudia haida idia laloa Gezer Kalenda, idau negai Heberu toretore dalana ia hahedinaraia gauna, be sikuli merona ta ena buka iena kwarana amo hereva ia laloatao totona ia durua gauna.
SEPTEMBER 22-28
BAIBEL ENA HEREVA BADADIA HADIBAIA TAUNA 1-2
Uru ma ta Oi hadibaia Noho
“Unai Hereva be Abidadama Taudia Dekenai Do Oi Henia”
3 Ita momo be ita karaia gaukarana ita moalelaia bona ita ura unai gaukara do ita karaia noho ela bona hanaihanai. To madi, Adamu ena nega amo, ita itaia uru ta ia ore ia lao neganai, ura ma ta ese ena gabu ia abia. (Had. 1:4) Unai ia vara dainai, hari Keristani taudia momokanidia be hekwakwanai haida idia davaria. Hegeregere, Iehova ena taunimanima edia gaukara be ia bada ia lao bona gau momo idia idau. Gaukara matamata ita karaia neganai, unai gaukara karaia dala matamatana ita dibaia—nega momo teknoloji dekenai unai ia vara. To buruka taudia haida be unai dala matamatadia idia manadalaia be auka. (Luka 5:39) Ena be unai ia vara, to ita diba matamata taudia edia goada ese buruka taudia edia goada ia hereaia. (Aon. 20:29) Unai dainai buruka taudia ese mai lalokau ida matamata taudia dekenai treinini idia henia be namo, unai amo maduna badadia idia huaia diba.—Salamo 71:18 duahia.
4 Maduna idia huaia taudia dekenai reana do ia auka edia gaukara haida be matamata taudia dekenai idia henia totona. Haida be idia ura lasi idia moalelaia gaukarana idia rakatania. Bona ma haida idia laloa idia karaia gaukarana be matamata taudia ese do idia karaia namonamo lasi. Reana ma haida idia gwau idia be nega lasi ma ta idia treinia totona. Ma danu, matamata taudia be maduna ma haida idia abia lasi neganai, namo lasi idia hesiku haraga.
Hakaua Hereva
it-E “Hadibaia Tauna” par. 1
Hadibaia Tauna
Inai Heberu herevana Qo·heʹleth (anina be “Hadibaia Tauna; Taunimanima ia haboua tauna”) be tiokratik gavamani lalonai Israela taudia ese King ena gaukara karana idia moalelaia ia herevalaia. (Had 1:1, 12) Lohia taudia edia gaukara be Dirava taunimanima idia hatamonaia edia King badana bona Dirava idia badinaia totona. (1Ki 8:1-5, 41-43, 66) Bema Israela taudia edia king ena kara be namo eiava dika, edia tomadiho karana Iehova dekenai ese unai do ia hahedinaraia. (2Ki 16:1-4; 18:1-6) Hadibaia tauna, Solomona, be Israela bona edia bamoa idau bese taudia, be dubu helaga dekenai ia haboua vadaeni. Inai buka lalonai ia ura Dirava ena taunimanima ia hadibaia be inai tanobada ena kara dikadia amo idia ia hakaua siri Dirava ia ura henia gaukaradia idia karaia totona badina idia be ia abia hidi besena. Iseda English Baibel ai inai ladana Qo·heʹleth idia hahanaia be Greek Septuagint amo idia abia, ena ladana ma ta be, Ek·kle·si·a·stesʹ (Hadibaia Tauna), anina be “ecclesia ena memba ta (kongrigeisen; assembly).”
SEPTEMBER 29–OCTOBER 5
BAIBEL ENA HEREVA BADADIA HADIBAIA TAUNA 3-4
Idia Pania Hebou Varo toi Oi Hagoadaia
ijwhf atikol 10 par. 2-8
Teknoloji Gaukaralaia Namonamo Dalana
● Teknoloji gaukaralaia namonamo karana ese headava ia durua diba. Hegeregere, headava taudia haida be gabu idauidau idia noho neganai, teknoloji amo edia adavana idia hereva henia diba.
“Teks meseij kwadogina ai oi gwau, ‘Oi lau lalokau henia’ o ‘Oi lau laloa noho’ ese emu hetura karana ia hagoadaia diba.”—Jonathan.
● Teknoloji gaukaralaia namonamo lasi karana ese headava ia hadikaia diba. Hegeregere, haida be hanaihanai edia fon idia gaukaralaia dainai, idia be nega lasi edia adavana ida idia herevahereva o gau ma haida idia karaia totona.
“Lau diba nega haida reana egu tau ia ura lau ia hereva henia, to egu fon lau gaukaralaia dainai, unai ia karaia lasi.”—Julissa.
● Haida idia gwau idia be fon idia gaukaralaia noho lalonai edia tau o hahine ida idia herevahereva namonamo diba. Diba bada hahinena Sherry Turkle ia gwau, unai be “gau rua nega tamona idia karaia taudia edia lalohadaina kererena.” Momokani, gau rua nega tamona karaia karana be lalohadai kererena. Ia gwau, “gau rua nega tamona ita karaia neganai, gau ta ta do ita karaia namonamo lasi.”
“Egu adavana ida herevahereva karana lau moalelaia, bema ia be gau ma ta ia karaia lasi. Bema ia be gau ma ta ia karaia, lau mamia iena nega bada be unai gauna dekenai do ia henia.”—Sarah.
Laloatao: Teknoloji oi gaukaralaia dalana ese emu headava ia durua o hadikaia diba.
“Iah Ena Lahi Hururuhururu” Habodoa Lasi
12 Edena dala ai headava taudia ese Akwila bona Prisikila idia tohotohoa diba? Oi bona emu adavana do umui karaia hebou gaudia mani oi laloa. Emu adavana ida gaukara haida umui karaia hebou, to oi sibona lasi. Hegeregere, Akwila bona Prisikila idia haroro hebou. Hanaihanai palani umui karaia unai bamona umui karaia totona, a? Akwila bona Prisikila idia gaukara hebou danu. Reana oi bona emu adavana emu gaukara be idauidau, to ruma ai umui gaukara hebou diba, a? (Had. 4:9) Bema gaukara ta umui karaia hebou, do oi mamia umui be tim ta bamona bona unai be nega namona umui herevahereva totona. Robert bona Linda be lagani 50 mai kahana idia headava. Robert ia gwau: “Momokani, nega be lasi moale karana ta ai karaia hebou totona. To, mereki lau huridia bona egu adavana ese ia hakaukaua, eiava murimuri ai ava lau kokidia bona ia mai lau ia durua neganai, lau moale bada. Ai gaukara hebou karana ese emai hetura karana ia hagoadaia bona emai lalokau ia habadaia.”
13 Laloatao, ena be tau bona hahine idia noho hebou, to nega haida do idia lalotamona lasi. Brazil ai hahine ta ia gwau: “Lau laloparara gau momo dekenai ai bisi dainai, nega haida ai laloa ruma tamona lalonai ai noho dainai unai be hegeregere bona ta ta do ai bamoa lasi. Lau dibaia gauna be ai noho hebou sibona be hegeregere lasi, to namona be egu adavana ena ura gaudia lau karaia danu.” Mani Bruno bona ena adavana, Tays edia hebamo karana ita laloa. Bruno ia gwau: “Ai ruaosi ai laga-ani hebou neganai, emai fon ai atoa siri bona unai nega ai moalelaia hebou.”
14 To, bema oi bona emu adavana emui hebamo karana umui moalelaia lasi be edena bamona? Reana emui ura gaudia be idauidau eiava ta ta umui habadua. Dahaka do oi karaia? Matamanai ita herevalaia lahi ena haheitalai mani ita laloa. Lahi oi karaia matamaia neganai, karaharaga do ia hururu lasi. To metairametaira lahi au oi atoa kau neganai, do ia hururu badabada. Unai hegeregerena, namona be dina ta ta ai nega sisina lalonai ta ta umui bamoa diba. Namona be umui moalelaia gauna umui karaia hebou, bona ta ia habadua gauna umui karaia lasi. (Iam. 3:18) Kara maragina amo umui hamatamaia neganai, emui lalokau do umui hagoadaia lou diba.
“Iah Ena Lahi Hururuhururu” Habodoa Lasi
3 “Iah ena lahi hururuhururu” ia goada totona, namona be tau bona hahine idia gaukara goada edia hetura karana Iehova ida idia hagoadaia. Edena dala ai unai ese edia headava do ia hagoadaia? Headava taudia be edia hetura karana, edia guba Tamana ida idia laloa bada, bona mai ura ida iena sisiba idia badinaia neganai, edia lalokau ia hadikaia diba hekwakwanai idauidau do idia hanaia. (Hadibaia Tauna 4:12 duahia.) Danu, edia hetura karana Iehova ida ia goada taudia ese Iehova ena kara namodia idia hahedinaraia hegeregere, hebogahisi, haheauka bona dika gwauatao karana. (Efe. 4:32–5:1) Bema headava taudia ese unai kara namodia idia hahedinaraia, edia lalokau do ia goada. Lagani 25 mai kahana ia headava taihu ta ladana Lena, ia gwau: “Iehova ia tura henia namonamo tauna oi lalokau henia bona oi matauraia be auka lasi.”
Hakaua Hereva Namodia
it-E “Lalokau” par. 39
Lalokau
“Lalokau be mai ena Nega.” Iehova ese edia lalona idia hadaia kara dika idia karaia taudia dekenai, lalokau do ia hahedinaraia lasi. Ia ese taunimanima ibounai ia lalokau henia, to bema Dirava idia inai henia neganai idia do ia lalokau henia lasi. Bena unai nega ai idia dekenai ena lalokau do ia doko. Iehova bona Iesu Keriso be kara maoromaoro idia ura henia bona kara dika idia inai henia. (Sal 45:7; Heb 1:9) Dirava idia inai henia momokani taudia dekenai lalokau hahedinaraia lasi. Momokani, unai bamona taudia ita lalokau henia neganai namo ta do ita abia lasi, badina Dirava idia inai henia taudia be ena lalokau karana idia abia dae lasi. (Sal 139:21, 22; Isa 26:10) Badina maorona dainai Dirava ese idia ia inai henia bona nega korikori ai idia do ia hadikaia ore.—Sal 21:8, 9; Had 3:1, 8.
OCTOBER 6-12
BAIBEL ENA HEREVA BADADIA HADIBAIA TAUNA 5-6
Siahu Ibounai Diravana Ita Matauraia Dalana
Iehova Ita Matauraia
17 Baibel be ia hahedinaraia, Iehova ita tomadiho henia neganai, hemataurai karana ita hahedinaraia be namo. Hadibaia Tauna 5:1 ia gwau: “Dirava ena Dubu Helaga oi raka vareai neganai do oi naria namonamo.” Mose bona Iosua be helaga gabuna dekenai idia lao neganai, Iehova ese ia hamaorodia edia tamaka idia kokia be namo. (Eso. 3:5; Ios. 5:15) Unai amo hemataurai karana idia hahedinaraia. Taravatu hegeregerena, Israela ena hahelaga taudia ese piripou idia karaia be namo, unai amo “edia hemarai do ia hedinarai lasi.” (Eso. 28:42, 43) Unai dainai, idia be pata dekenai idia gaukara neganai, edia tauanina idia koua namonamo. Ma danu, hahelaga tauna ena ruma bese taudia ibounai ese hemataurai idia hahedinaraia be namo.
18 Namona be Iehova tomadiho henia taudia ibounai ese edia mauri lalonai hemataurai idia hahedinaraia. Momokani, haida ese ita idia matauraia totona, namona be hemataurai karana ita hahedinaraia. To, namo lasi ma haida ita matauraia koikoi. Lasi, mai eda kudouna ibounai ida hemataurai ita hahedinaraia be namo, badina Dirava be eda kudouna ia itaia. (1 Sam. 16:7; Aon. 21:2) Unai bamona ita karaia neganai, eda kara, lalohadai, bona ma haida ita tura henia karana do ia idau. Danu, ita sibona eda hemami bona lalohadai do ita matauraia. Momokani, nega ibounai, eda hereva bona kara amo hemataurai ita hahedinaraia be namo. Danu, iseda kara, dabua bona tauanina ena toana namona sibona ita laloa lasi, to Paulo ena sisiba ita badinaia, ia gwau: “Ai ura lasi taunimanima idia gwau aiemai gaukara ia dika. Unai dainai ai ese taunimanima hadikaia kara ta ai karaia lasi, lasi momokani! To aiemai kara ibounai dekena amo ai hahedinaraia ai be Dirava ena hesiai taudia.” (2 Kor. 6:3, 4) Momokani, ‘gau ibounai dekenai ita ese iseda Hahemauri Tauna, Dirava, ena hahediba herevadia do ita hahairaia.’—Tito 2:10, NW.
Baibel Stadi amo Emu Guriguri Dalana Oi Hanamoa
21 Iesu be mai hemataurai bona abidadama ida Dirava ia guriguri henia. Iesu ese Lasaro ia do hatorea isi lou lasi neganai: “Iena matana dekenai guba ia itaia, ia guriguri, ia gwau, ‘Egu Tamana e, lau hanamoa oi, badina be oi ese lau oi kamonai henia noho. Lau diba oi be nega ibounai oi kamonai henia lau.’” (Ioa. 11:41, 42) Oiemu guriguri lalonai unai bamona abidadama bona hemataurai oi hahedinaraia, a? Iesu ese mai hemataurai ida ia gwauraia Lohiabada Ena Guriguri oi stadilaia neganai, do oi itaia ia gwauraia mai anina bada gaudia be Iehova ena ladana do ia helaga, ena Basileia do ia mai, bona ena ura do ia guguru. (Mat. 6:9, 10) Oi sibona emu guriguri mani oi laloa. Emu guriguri dalana ese ia hahedinaraia oi be Iehova ena Basileia oi laloa bada, iena ura oi karaia, bona ena ladana oi hahelagaia, a? Namona be emu guriguri dalana ese unai ia hahedinaraia.
“Oiemu Gwauhamata Ena Anina Do Oi Karaia”
12 Bapatiso be Dirava hesiai henia karana ena matamana sibona. Unai dainai ita ura iseda gwauhamata ita badinaia bona Dirava ita hesiai henia noho. Reana sibona ita nanadaia: ‘Egu bapatiso negana amo egu hetura karana Iehova ida be edena bamona? Mai kudouna ibounai ida Iehova lau hesiai henia noho, a? (Kol. 3:23) Lau guriguri, Baibel lau duahia, kongrigeisen heboudia dekenai lau lao, bona haroro gaukara lau goadalaia, a? Eiava hari unai gaudia lau goadalaia lasi?’ Aposetolo Petero ia gwau ita abidadama sibona lasi, to diba ita abia, ita haheauka, bona Dirava ita badinaia neganai, iseda hesiai gaukara dekenai do ita manoka lasi.—2 Petero 1:5-8 duahia.
Hakaua Hereva Namodia
Duahia Taudia Edia Henanadai
Hadibaia Tauna 5:8 ese lohia tauna ta ia herevalaia, ia ese ogogami taudia ia hahisia bona ia kara maoromaoro henidia lasi. Namona be unai lohia tauna ia laloaboio lasi, dagi bada tauna ta eiava iena siahu ia hereaia tauna ta ese ia iena kara ia raraia noho. Bona reana unai dagi bada tauna ena siahu idia hereaia lohia taudia ma haida idia noho. To madi, taunimanima edia gavamani lalodiai, lohia taudia ibounai be kara gageva taudia, unai dainai taunimanima be unai kara gageva dainai hisihisi idia mamia.
Ena be toana be dala be lasi, to ita lalogoada diba, badina ita diba Iehova ese taunimanima edia gavamani ena lohia taudia ia raraia noho. Dirava ena heduru ita noia diba bona iseda lalohekwarahi gaudia be ia dekenai ita negea lao diba. (Sal. 55:22; Fili. 4:6, 7) Ita diba “[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”—2 Siv. 16:9.
Vadaeni Hadibaia Tauna 5:8 ena hereva ese ita noholaia tanobada ena oromana ia herevalaia bona ia hamomokania nega ibounai siahu bada tauna ta ia noho. To mai anina bada gauna be, unai siri ese ita ia hadibaia Iehova be Ataiai Momokani Diravana. Bona hari Iehova be iena Natuna, Iesu Keriso, Basileia ena King amo ia lohia noho. Siahu Ibounai Diravana be gau ibounai bona taunimanima ibounai ia raraia noho, bona ia be maka tamona ai mai kara maoromaoro ida taunimanima ia kara henidia, bona ena Natuna ese unai ia karaia danu.
OCTOBER 13-19
BAIBEL ENA HEREVA BADADIA HADIBAIA TAUNA 7-8
“Taitai rumana dekenai oi lao”
it-E “Lalohisihisi” par. 9
Lalohisihisi
Taitai be mai ena Nega. Hadibaia Tauna 3:1, 4 ia gwau, “taitai be mai ena nega bona kiri be mai ena nega, taitai mai boiboi ida be mai ena nega bona mavaru be mai ena nega.” Ita ibounai be goevadae lasi bona do ita mase, unai dainai aonega tauna ena kudouna be “taitai rumana dekenai ia noho” to aria rumana dekenai lasi. (Had 7:2, 4; Ao 14:13 hahegeregerea.) Unai dainai, aonega tauna be ena nega ia gaukaralaia hebogahisi karana ia hahedinaraia bona idia lalohisihisi taudia ia hagoadaia, to namo lasi sibona ena namo ia tahua bona unai nega ia reaia. Unai ese ia do ia durua sibona ena mauri ia laloa bona ena Havaraia Tauna dekenai lalohadai maorona ia abia.
Ma Haida Oi Durua Edia Lalohekwarahi Idia Haheaukalaia Totona
15 Lagani momo gunana ai ena hahine ia mase tadikaka ta, William ia gwau: “Ma haida ese egu hahine ena kara namodia idia herevalaia neganai, lau moale badina unai ese ia hahedinaraia idia be egu hahine idia lalokau henia bona idia matauraia. Unai bamona kara bona hereva ese lau ia durua bada. Idia gwauraia herevadia ese lau ia hagoadaia, badina egu hahine lau lalokau henia bada bona ia be egu mauri ena kahana ta bamona.” Vabu ta ladana, Bianca ia gwau: “Haida be lau ida idia guriguri bona Baibel ena siri ta eiava rua idia duahia neganai, unai ese lau ia hagoadaia bada. Egu tau idia herevalaia bona lau ese ena sivarai haida lau gwauraia neganai idia kamonai, unai ese lau ia durua.”
“Taitai Taudia ida Umui Taitai”
16 Iseda guriguri ese idia lalohisihisi noho tadikaka taihu ia hagoadaia diba danu. Ena be ia auka unai oi karaia totona, badina oi laloa dika oi tai, to mai kudouna ibounai ida oi gwauraia gurigurina ese ia lalometau tauna ia hagoadaia diba. Dalene ia gwau: “Nega haida taihu haida be lau hagoadaia totona idia mai neganai, idia lau noia guriguri kwadogina do idia gwauraia. Idia guriguri matamaia neganai, nega haida ia auka idia hereva totona, to hereva haida idia gwauraia murinai, goada idia abia lou bena edia guriguri idia haorea. Edia abidadama goadana, edia lalokau, bona lau idia laloa bada karana ese egu abidadama ia hagoadaia momokani.”
“Taitai Taudia ida Umui Taitai”
17 Taunimanima be idauidau dainai, idia lalohisihisi ena daudau danu be idauidau. Momokani, ta ia mase neganai, turadia bona varavara be momo, to mase idia guria murinai momo be edia ruma dekenai idia giroa lou, unai bamona negadiai idia lalohisihisi noho taudia ita hagoadaia noho be namo. “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hahedinaraia noho.” (Aon. 17:17) Namona be idia lalohisihisi noho taudia ita hagoadaia noho, ela bona edia lalona ia goada momokani.—1 Tesalonika 3:7 duahia.
18 Laloatao, gau haida ese idia taitai noho taudia edia lalona ia hahisia diba. Reana badina edia headava dinana idia laloa, mase tauna ese ia ura henia bada miusiki ta idia kamonai, foto haida idia itaia, idia karaia hebou gaukara haida idia laloa, eiava gau ta ena bonana o regerege ta idia laloa lou. Bema ia do lalohisihisi noho vabu o dogae be nega ginigunana gau ta ia karaia, hegeregere ia sibona be hebouhebou ta, eiava memorial dekenai ia lao, do ia lalohisihisi bada. Tadikaka ta ia gwau: “Egu adavana ia mase murinai, lau laloa emai headava dinana laloatao negana ai do lau lalohisihisi bada, to unai nega ia ginidae neganai, tadikaka taihu haida ese egu tura haida idia boiria bona ai moale hebou.”
19 Laloatao, idia lalohisihisi noho taudia ita hagoadaia noho be namo, spesel negadiai sibona lasi. Junia ia gwau: “Headava dinana laloatao negana sibona lasi, to nega ma haida ai ia lalometau tauna ita hagoadaia neganai, namo bada ia vara diba. Unai bamona hahegoada karana be mai anina bada bona ta ia hagoadaia bada.” Momokani, ta ena lalokau tauna ta ena mase ese ia havaraia hisihisina do ita haorea diba lasi, to gau haida ita karaia diba ia lalometau tauna ita hagoadaia totona. (1 Ioa. 3:18) Gaby ia gwau: “Elda taudia edia heduru dainai, Iehova lau tanikiu henia, badina unai nega aukana lalonai idia ese lau idia durua bada. Edia kara amo Iehova ena lalokau lau mamia momokani.”
Hakaua Hereva Namodia
“Unai amo Ibounai Do Idia Diba Umui be Egu Hahediba Taudia”
18 Nega haida ita ura ita ia habadua tadikaka eiava taihu ta ita hereva henia. To, gau ginigunana be sibona do ita nanadaia: ‘Ia vara gauna lau diba namonamo, a?’ (Aon. 18:13) ‘Reana unai gauna ia karaia lasi lau ia habadua totona, ani?’ (Had. 7:20) ‘Nega ta lau danu be unai bamona kerere lau karaia, a? (Had. 7:21, 22) Bema lau hereva henia, inai hekwakwanai do ai hamaoromaoroa eiava habadaia?’ (Aonega Herevadia 26:20 duahia.) Nega ita atoa unai henanadai ita lalodia neganai, reana do ita laloparara lalokau dainai, iseda tadikaka ena dika do ita gwauatao.
OCTOBER 20-26
BAIBEL ENA HEREVA BADADIA HADIBAIA TAUNA 9-10
Emu Hekwakwanai Dekenai Lalohadai Maorona oi Abia
“Iehova Oi Badu Henia Lasi”
20 Kerere ena badina korikori do ita laloa namonamo. Namona be ita abia dae iseda hekwakwanai haida be ita sibona ese ita havaraia. (Gal. 6:7) Namo lasi Iehova dekenai kerere ita atoa. Dahaka dainai? Mani inai haheitalai ita laloa: Motuka idia sipidi momokani diba. To, bema draiva ia sipidi momokani dainai, kona ia giroa bena aksiden ia vara, do ita gwau unai be motuka ia karaia tauna ena kerere, a? Lasi! Unai hegeregerena Iehova be ita ia karaia neganai ita dekenai ura kwalimu ia henia. To, danu ia ese ita ia hadibaia abia hidi maorodia ita karaia totona. Unai dainai, bema hekwakwanai ta be ita sibona ese ita havaraia, namo lasi iseda Havaraia Tauna dekenai kerere ita atoa.
21 Momokani, idia vara hekwakwanai haida be iseda kerere lasi. Badina hekwakwanai haida be idia “vara kava.” (Had. 9:11) Danu, namona be ita laloatao, kara dika ena badina badana be Satani Diabolo. (1 Ioa. 5:19; Apok. 12:9) Ia be iseda inai tauna, to Iehova lasi!—1 Pet. 5:8.
Iehova ese Manau Taudia Ia Laloa Bada
10 Manau karana ese iseda mauri ia hanamoa danu. Momokani, nega haida iseda mauri lalonai idia vara gaudia dainai do ita lalohisihisi. Aonega tauna King Solomona ia gwau: “Hesiai mai guia danu taudia, hosi edia latanai idia helai lau itaia, to lohia taudia be aena dekenai idia raka, hesiai mai guia danu taudia bamona.” (Had. 10:7) Nega momo diba bada taudia be hahenamo idia abia lasi. Bona diba bada lasi taudia be nega haida hahenamo momo idia abia. To Solomona ia laloparara, namona be iseda mauri ai idia vara gaudia ita abia dae, bona unai gaudia dainai ita lalohisihisi lasi. (Had. 6:9) Bema manau karana ita hahedinaraia, iseda mauri ai idia vara gaudia do ita abia dae.
Moale Karadia Abia Hidi Namonamo
BAIBEL ese ia hahedinaraia Iehova ia ura iseda mauri ita moalelaia. Hegeregere, Salamo 104:14, 15 ia gwau: “Oi . . . amo taunimanima ese aniani idia hadoa, bona lalona ia hamoalea wain idia karaia, Vairana toana ia hadiaria dehoro idia karaia, bona goada ia henia paraoa idia karaia.” Oibe, ita mauri noho totona Iehova ese ita dekenai aniani idauidau ia henia. Aniani ia hatubua dainai witi, oela bona wain ita abia diba. Ita mauri totona wain be gau badana lasi, to wain ese iseda kudouna ia hamoalea. (Had. 9:7; 10:19) Oibe, Iehova ia ura iseda “kudouna ia hamoalea.”—Kara 14:16, 17.
2 Unai dainai, namona be nega ita atoa “guba manudia” bona “flaoaflaoa” ita moalelaia totona. Unai bamona karadia ese iseda lalona ia hamoalea bona tauanina ia hagoadaia. (Mat. 6:26, 28; Sal. 8:3, 4) Unai bamona moale karadia be “Dirava ena harihari gauna” ta. (Had. 3:12, 13) Unai dainai, unai bamona gaudia ita moalelaia totona nega ita atoa neganai, Dirava ia moale.
Hakaua Hereva Namodia
it-E “Maumau, Ladana Hadikaia” par. 4, 8
Maumau, Ladana Hadikaia
Maumau karana ese ta ena ladana ia hadikaia, bona ta ena ladana ia hadikaia tauna dekenai dika bada ia havaraia diba. Hadibaia Tauna 10:12-14 ena aonega herevana ese unai ia hamomokania, ia gwau: “Kavakava tauna ena udu bibina ese ia do ia hadikaia. Iena uduna amo idia raka-lasi hereva ginigunadia be kavakava, bona ena hereva dokodia ese dika bada idia havaraia noho. To kavakava tauna be iena hereva ia hadokoa lasi.”
Nega haida maumau karana be ia dika momokani lasi eiava ta ia hadikaia lasi (to nega haida ta ena ladana ia hadikaia eiava unai bamona dika ia havaraia diba), ladana hadikaia karana be hanaihanai dika ia havaraia bona ta ia hahisia eiava hepapahuahu ia havaraia diba. Idia gwauraia herevadia be reana idia laloa eiava idia laloa lasi bona idia gwauraia. Herevana dahaka, to ladana hadikaia tauna be Dirava ena inai tauna ai ia lao, ia be “tadikaka huanai hepapahuahu ia havaraia noho tauna,” bona unai kara be Dirava ese ia inai henia kara dikadia. (Ao 6:16-19) T Greek herevana idia hahanaia “ladana hadikaia tauna” eiava “samania tauna” be di·aʹbo·los. Baibel ai unai hereva Satani “Diabolo” idia gaukaralaia, ia be Dirava ena ladana ia hadikaia tauna badana, idia herevalaia totona. (Ioa 8:44; Apo 12:9, 10; Ge 3:2-5) Unai ese mai badu ida koikoi herevadia amo ta ena ladana ia hadikaia tauna ia hahedinaraia.
OCTOBER 27–NOVEMBER 2
BAIBEL ENA HEREVA BADADIA HADIBAIA TAUNA 11-12
Mauri Namona Oi Noholaia Bona Oi Moale
g-E 3/15 13 par. 6-7
Hodahoda Namona Bona Dina—Idia be “Muramura” Bamona
Dina ena siahu ese jems ia hamasea diba. Journal of Hospital Infection ia gwau, “hodahoda lalonai idia noho jems momo be dina ena siahu dekenai idia mauri diba lasi.”
Namo lasi unai ita reaia? Reana oi ura nega oi atoa bona murimuri dekenai oi lao, unai amo dina bona hodahoda namona oi abia diba. Unai ese oi dekenai namo ia havaraia diba.
Dirava Ena Harihari Gauna, Mauri, Ita Laloa Bada
6 Ena be Baibel ese helt eiava dahaka aniani ita ania ia herevalaia lasi, to Iehova ena lalohadai unai gaudia dekenai ia hahedinaraia. Hegeregere, ita ia sisiba henia “tauanina idia hadikaia gaudia do [ita] dadaraia.” (Had. 11:10) Baibel ia gwau aniani momo do ita ania lasi bona alkahol momo do ita inua lasi, badina unai gaudia ese iseda tauanina idia hadikaia bona ita idia hamasea diba. (Aon. 23:20) Iehova ia ura aniani bona alkahol dekenai sibona biagua karana do ita hahedinaraia.—1 Kor. 6:12; 9:25.
7 Laloa namonamo karana ese ia hahedinaraia, Dirava ese ita dekenai ia henia mauri ita laloa bada. (Sal. 119:99, 100; Aonega Herevadia 2:11 duahia.) Hegeregere, ita ura aniani ta ita ania neganai, do ita laloa namonamo. Bema ita diba unai aniani ese iseda tauanina dekenai gorere do ia havaraia, vadaeni namona be ita ania lasi. Danu, aonega karana be ita mahuta namonamo, hanaihanai ita eksasais, iseda tauanina ita naria namonamo, bona iseda ruma ita hagoevaia.
“Namona be Hereva Badinaia Taudia ai Umui Lao”
2 Iehova idia tomadiho henia taudia be idia moale. Dahaka dainai? Unai ena badina be momo, to mai anina bada gauna be hanaihanai Dirava ena Hereva ita duahia bona ita gaukara goada ita dibaia gaudia ita badinaia totona.—Iamesi 1:22-25 duahia.
3 “Hereva badinaia taudia ai ita lao” neganai, dala momo ai namo ita abia. Hegeregere, Dirava ena Hereva amo ita dibaia gaudia ita badinaia neganai, Iehova ita hamoalea bona unai ese ita ia hamoalea danu. (Had. 12:13) Dirava ena Hereva amo ita duahia gaudia ita badinaia neganai, unai ese iseda ruma bese maurina bona iseda hetura karana tadikaka taihu ida ia hagoadaia. Reana emu mauri ai unai ia vara. Danu, Iehova ena taravatu idia badinaia lasi taudia ese idia davaria hekwakwanai momo ita davaria lasi. Oibe, King Davida ena hereva dekenai ita lalotamona. Iena ane lalonai, Iehova ena taravatu, ena oda herevadia, bona hahemaoro karadia ia herevalaia murinai, ia gwau: ‘Unai gaudia ia badinaia neganai, ahuna namona ia abia.’—Sal. 19:7-11.
Hakaua Hereva Namodia
it-E “Lauma Helaga ena Siahu amo”
Lauma Helaga ena Siahu amo
Hamomokania gaudia ese ia hahedinaraia, Dirava ese ia gaukaralaia buka helaga idia torea tatau, be hereva idia kamonai bona torea masini eiava robot bamona lasi. Aposetolo Ioane ena sivarai amo ita duahia, “Dirava ese ena lauma helaga” ia gaukaralaia aneru ta ia durua “toa” amo Ioane dekenai Hunia Herevadia ia gwauraia hahedinaraia totona, bena Ioane be “Dirava ese ia henia herevana bona Iesu Keriso ese ia henia herevadia, oibe, ia itaia gaudia ibounai ia gwauraia hedinarai.” (Apo 1:1, 2) “Lauma helaga” Ioane be “Lohiabada ena dina lalonai [ia] noho” bona gado badana ta ese ia hamaoroa: “Oi itaia gaudia be lokua toretore dekenai oi torea.” (Apo 1:10, 11) Unai dainai, Dirava ese Baibel idia torea taudia ia rakatania sibona edia lalohadai bona hereva amo, idia itaia matahanai idia herevalaia (Hab 2:2), to Dirava ese gau haida dekenai idia ia biagua bona gimaia, unai dainai idia gwauraia herevadia be hereva momokani sibona lasi, to Iehova ena ura hegeregerena idia torea. (Ao 30:5, 6) Baibel idia torea taudia edia hekwarahi be Hadibaia Tauna 12:9, 10 ese inai bamona ia gwauraia, idia laloa dobu, tahua gaukara idia karaia, bona idia vara gaudia hegeregerena “hereva momokani bona maorodia ia torea.”—Lu 1:1-4 hahegeregerea.