Iehova be Egu Guriguri Do Ia Haerelaia, A?

1-2. Dahaka dainai nega haida ita laloa Iehova be iseda guriguri ia haerelaia lasi?

“IEHOVA dainai do oi moale bada, bona ia ese emu kudouna ena ura gaudia do ia henia.” (Sal. 37:4) Unai be gwauhamata namo hereana! To, ita ura Iehova be ita gurigurilaia gaudia ia haerelaia haraga be namo, a? Dahaka dainai unai bamona ita henanadai? Mani inai haheitalai haida ita laloa. Singul taihu ta ia ura Basileia Evanelia Sikuli ia lao totona ia guriguri. To lagani haida idia hanaia vadaeni, idia do boiria lasi. Tadikaka matamata ta be Iehova ia noia ena gorere do ia hanamoa unai amo kongrigeisen do ia durua namonamo. To iena gorere ia namo lasi. Keristani tama sina be edia natuna totona idia guriguri hereva momokani lalonai do ia noho. To edia natuna be Iehova tomadiho henia karana ia rakatania.

² Reana oi danu be gau ta totona Iehova dekenai oi noinoi, to ena haere oi do abia lasi. Reana unai dainai do oi laloa Iehova be haida edia guriguri ia haerelaia to oiemu ia haerelaia lasi. Eiava oi laloa reana oi be gau ta oi karaia kerere. Taihu ta ladana Janiceb be unai bamona ia mamia. Ia bona ena adavana be Betele gaukara totona idia guriguri. Ia gwau: “Lau abia dae momokani Betele dekenai do ai vareai haraga.” To lagani momo idia hanaia bona idia boiridia lasi. Janice ia gwau: “Lau lalohisihisi bona lau daradara. Reana gau ta lau karaia dainai Iehova be lau dekenai ia moale lasi. Betele gaukara totona nega momo lau guriguri. To dahaka dainai egu guriguri ia haerelaia lasi?”

3. Inai atikol ai dahaka do ita herevalaia?

³ Nega haida ita laloa Iehova be reana iseda guriguri ia kamonai lasi. Idaunegai abidadama tatau haida be unai bamona idia laloa danu. (Iobu 30:20; Sal. 22:2; Hab. 1:2) Edena bamona do oi diba momokani Iehova be emu guriguri do ia haerelaia? (Sal. 65:2) Unai ita haerelaia totona inai henanadai toi do ita herevalaia guna: (1) Iehova be ita totona dahaka do ia karaia? (2) Iehova ia ura dahaka ita karaia? (3) Dahaka dainai ita gurigurilaia gaudia haida do ita haidaua?

IEHOVA BE ITA TOTONA DAHAKA DO IA KARAIA?

4. Ieremia 29:12 hegeregerena, Iehova ia gwauhamata dahaka do ia karaia?

⁴ Iehova ia gwauhamata iseda guriguri do ia kamonai. (Ieremia 29:12 duahia.) Iseda Dirava be ita ia lalokau henia badina mai abidadama ida ia ita hesiai henia, unai dainai hanaihanai iseda guriguri do ia kamonai. (Sal. 10:17; 37:28) To, namo lasi ita laloa, ita noinoilaia gaudia ibounai be do ia henia. Reana ita noia gaudia haida be do ita naria ela bona tanobada matamatana ai do ia henia.

5. Iehova be iseda guriguri ia kamonai neganai, dahaka ia laloa danu? Herevalaia.

⁵ Iehova be iseda guriguri ia kamonai neganai, iena ura ia laloa danu. (Isa. 55:​8, 9) Iena ura gauna ta be mai moale ida ia idia badinaia taudia be inai tanobada do idia hahonua. To Satani ia gwau taunimanima be do idia moale bema sibodia idia lohiaia. (Gen. 3:​1-5) Iehova be Diabolo ena hereva hakoikoia totona, taunimanima ia rakatania idia sibona do idia lohiaia. To, taunimanima edia lohia dalana ese hari ita davaria hekwakwanai momo idia havaraia. (Had. 8:9) Ita laloparara hari Iehova be unai hekwakwanai ibounai do ia kokia lasi. Badina, bema hari ia ese hekwakwanai ibounai ia kokia, haida do idia laloa taunimanima edia gavamani ese unai idia karaia.

6. Dahaka dainai ita diba, Iehova be hanaihanai lalokau bona dala maorona ai iseda guriguri ia haerelaia?

⁶ Ita ibounai be gau tamona totona ita guriguri, to Iehova ese dala idauidau ai ia haerelaia. Hegeregere, King Hesekaia be ia gorere bada herea, bona Iehova ia noia ia hanamoa totona. Bena ena guriguri ia haerelaia bona ia hanamoa. (2 Ki. 20:​1-6) Paulo be ‘ginigini ta ese ena tauanina ia gwadaia bamona,’ reana ia gorere bona Iehova ia noia unai ginigini ia kokia totona, to Iehova be unai ia karaia lasi. (2 Kor. 12:​7-9) Mani aposetolo Iamesi bona Petero edia sivarai ita laloa. King Heroda ia ura idia ruaosi ia hamasedia. Kongrigeisen be Petero bona Iamesi totona idia guriguri. To, Iamesi idia hamasea bona Petero be aneru ta ese ia hamauria. (Kara 12:​1-11) Reana ita laloa, ‘dahaka dainai Iehova be Petero ia hamauria to Iamesi be lasi?’ Baibel be unai ia herevalaia lasi.c Ita diba Iehova be ia “kara gageva lasi.” (Deu. 32:4) Bona ita diba Petero bona Iamesi be Iehova ese ia lalonamo henidia. (Apok. 21:14) Nega haida, Iehova be iseda ura dalanai iseda guriguri ia haerelaia lasi. To ita diba momokani, Iehova be hanaihanai lalokau bona dala maorona ai iseda guriguri ia haerelaia dainai, ia haerelaia dalana ita maumauraia lasi.—Iobu 33:13.

7. Dahaka ita karaia lasi be namo, bona dahaka dainai?

⁷ Namo lasi iseda hekwakwanai be ma ta ena hekwakwanai ida ita hahegeregerea. Hegeregere, Iehova ita noia iseda ura gauna ta do ia karaia, to unai ia karaia lasi. Gabeai ita kamonai, ma ta ena guriguri be iseda guriguri hegeregerena, to Iehova ese ena guriguri ia haerelaia. Taihu ta ladana Anna dekenai unai ia vara. Ia guriguri, ena adavana Matthew ena kensa gorerena do ia ore. Unai nega ai taihu burukadia rua be kensa gorerena idia davaria danu. Anna be Matthew bona unai taihu rua totona ia guriguri goadagoada. Unai taihu rua idia namo lou, to Matthew ia mase. Matamanai, Anna ia laloa, unai taihu rua edia gorere ia ore badina Iehova ese ia hanamodia. Bema Iehova ese idia ia hanamoa, dahaka dainai, ena adavana ia hanamoa lasi? Momokani, ita diba lasi unai taihu rua be edena bamona idia namo lou. To, ita diba gauna be Iehova ese iseda hisihisi ibounai do ia haorea, bona ia ura ena turadia idia mase vadaeni do ia hatoredia isi lou.—Iobu 14:15.

8. (a) Isaia 43:2 hegeregerena, Iehova be edena dala ai ita ia durua? (b) Hekwakwanai ita davaria neganai, edena dala ai guriguri karana ese ita ia durua? (Vidio ladana Guriguri ese Ai Ia Durua Ai Haheauka Totona itaia.)

⁸ Iehova be hanaihanai ita do ia durua. Iseda lalokau Tamana, Iehova, ia ura lasi ita hisihisi. (Isa. 63:9) To, iseda hekwakwanai, sinavai eiava lahi bamona gaudia ibounai, be do ia koua lasi. (Isaia 43:2 duahia.) To, ia gwauhamata ita do ia durua unai hekwakwanai ita “hanaia” totona. Bona herevana dahaka hekwakwanai ita davaria, ita do ia durua ita gini goada totona. Danu Iehova ese ita dekenai iena lauma helaga ena siahu ia henia ita haheauka totona. (Luka 11:13; Fili. 4:13) Unai dainai ita diba momokani, Iehova ita abidadama henia noho bona ita haheauka totona, heduru gaudia do ia henia.d

IEHOVA BE ITA AMO DAHAKA IA URA?

9. Iamesi 1:​6, 7 hegeregerena, dahaka dainai do ita abidadama momokani Iehova ese ita do ia durua?

⁹ Iehova ia ura ia do ita abidadama henia. (Heb. 11:6) Nega haida ita mamia iseda hekwakwanai be auka momokani bona ita hamaoromaoroa diba lasi. Bona reana ita daradara Iehova ese ita do ia durua eiava lasi. To, Baibel ia gwauhamata Dirava ena siahu amo “magu ta [ita] roho hanaia diba.” (Sal. 18:29) Unai dainai do ita daradara lasi, to namona be mai abidadama ida Iehova ita guriguri henia bona ita abia dae ia ese iseda guriguri do ia haerelaia.—Iamesi 1:​6, 7 duahia.

10. Edena dala ai iseda guriguri hegeregerena kara ta ita karaia diba? Haheitalai gwauraia.

¹⁰ Iehova ia ura iseda guriguri hegeregerena kara ta ita karaia. Hegeregere, tadikaka ta be rijinol hebouhebou do ia lao totona, Iehova ia noia do ia durua unai dina toi ai moni gaukara do ia karaia lasi. Iehova ese edena bamona unai guriguri do ia haerelaia? Reana ia ese tadikaka dekenai lalogoada do ia henia ena bosi ia hereva henia totona. To unai tadikaka be ena bosi dekenai do ia lao ia noinoi totona, bona reana unai do ia karaia loulou. Eiava reana do ia noinoi iena gaukara dinana do haidaua. Danu, bema ia hegeregere, bosi do ia hamaoroa dina haida ia gaukara lasi bona ena pei do idia utua.

11. Dahaka dainai do ita guriguri loulou?

¹¹ Iehova ia ura ita laloa bada gaudia totona ita guriguri loulou. (1 Tes. 5:17) Iesu ia hahedinaraia ita gurigurilaia gaudia haida edia haere be do ita abia haraga lasi. (Luka 11:9) Unai dainai do ita hesiku lasi! Hanaihanai do ita guriguri goadagoada. (Luka 18:​1-7) Gau ta totona ita guriguri loulou neganai, Iehova dekenai ita hahedinaraia unai gauna ita laloa bada. Danu, unai ese ia hahedinaraia ita abia dae momokani ita do ia durua.

DAHAKA DAINAI ITA GURIGURILAIA GAUDIA DO ITA HAIDAUA?

12. (a) Dirava ena heduru ita noia neganai dahaka henanadai ita laloa be namo, bona dahaka dainai? (b) Edena dala ai iseda guriguri karana ese ia hahedinaraia Iehova ita matauraia? (“Lau Gurigurilaia Gaudia ese Idia Hahedinaraia Iehova Lau Matauraia, A?” maua itaia.)

¹² Bema ita gurigurilaia gaudia edia haere ita abia lasi, reana inai henanadai toi do ita laloa. Ginigunana be, ‘Lau be gau maorona totona lau guriguri, a?’ Nega momo ita laloa, ita diba dahaka be namo ita totona. To ita gurigurilaia gaudia be reana nega daudau lalonai ita dekenai namo ta do ia havaraia lasi. Bema Iehova dekenai hekwakwanai hamaoromaoroa dalana ta ita gurigurilaia, reana ita laloa dalana be maoro lasi, to dala namona ma ta ia noho. Bona reana ita noia gaudia haida be Iehova ena ura hegeregerena lasi. (1 Ioa. 5:14) Hegeregere, matamanai ita herevalaia tama sina mani ita laloa. Iehova idia noia edia natuna be hereva momokani lalonai do ia noho. Toana be unai be guriguri namona. To, Iehova be ta ia doria lasi ia do ia hesiai henia totona. Ia ura ita ibounai, iseda natudia danu, be abia hidi do ita karaia ia ita tomadiho henia totona. (Deu. 10:​12, 13; 30:​19, 20) Unai dainai, namona be tama sina ese Iehova idia noia idia do ia durua edia natuna do idia hagoadaia ena kudouna amo Iehova ia lalokau henia bona ena turana ai ia lao totona.—Aon. 22:6; Efe. 6:4.

13. Heberu 4:16 hegeregerena, Iehova ese edena negai ita do ia durua?

¹³ Henanadai iharuana be, ‘Inai be nega maorona Iehova ese lau noia gauna ia karaia totona, a?’ Reana ita ura iseda guriguri ena haere ita abia haraga be namo. To momokani, Iehova ia diba edena nega be nega maorona ita ia durua totona. (Heberu 4:16 duahia.) Ita gurigurilaia gauna ena haere ita abia haraga lasi neganai, reana do ita laloa Iehova ena haere be ‘Lasi.’ Momokani do ia haerelaia, to unai be nega maorona lasi. Hegeregere, matamanai ita herevalaia tadikaka ta ita laloa, ia guriguri iena gorere amo do ia namo totona. Bema Iehova ese hoa dalanai ia hanamoa, reana Satani do ia gwau unai tadikaka be Iehova ia hesiai henia noho, badina ena gorere ia hanamoa. (Iobu 1:​9-11; 2:4) Ma danu, Iehova ese gorere ibounai do ia hanamoa negana ia makaia vadaeni. (Isa. 33:24; Apok. 21:​3, 4) To hari, hoa dalanai gorere do ia hanamoa lasi. Unai dainai, tadikaka be Iehova do ia noia ia dekenai goada bona lalomaino ia henia, unai amo ia haheauka bona mai abidadama ida Dirava do ia hesiai henia noho.—Sal. 29:11.

14. Janice ena ekspiriens amo dahaka oi dibaia?

¹⁴ Mani Janice ena ekspiriens ita laloa lou, ia be Betele gaukara totona ia guriguri. Lagani faiv murinai ia laloparara, Iehova be dala idauna ai ena guriguri ia haerelaia. Ia gwau: “Iehova ese unai nega ia gaukaralaia lau dekenai gau momo ia hadibaia bona lau ia durua Keristani hahine namona ai lau lao totona. Iehova dekenai egu abidadama ia goada be namo. Namona be sibona egu stadi karana lau hanamoa. Bona namona be lau abia dae, herevana edeseniai Iehova lau hesiai henia, do lau moale diba.” Gabeai, Janice bona ena adavana idia boiria sekit gaukara idia karaia totona. Ia gwau: “Iehova be lau laloa lasi dalanai, egu guriguri ia haerelaia. Lagani haida murinai lau laloparara Iehova ese egu guriguri ia haerelaia dalana be namo herea, bona lau moale bada badina ena lalokau bona hebogahisi lau mamia.”

15. Dahaka dainai ita ura henia gauna sibona totona ita guriguri lasi? (Laulau itaia danu.)

¹⁵ Henanadai ihatoina be, ‘Gau ma ta totona lau guriguri be namo, a?’ Ita ura henia gauna totona ita guriguri be namo. To nega haida namona be iseda ura gauna do ita herevalaia lasi, unai amo Iehova ese ita dekenai iena ura do ia hahedinaraia. Mani singul taihu ta ena ekspiriens ita laloa, ia guriguri Basileia Evanelia Sikuli dekenai ia lao totona. Ia ura unai sikuli dekenai ia lao unai amo pablisa be momo lasi gabuna dekenai ia heduru diba. Unai sikuli ia lao totona ia guriguri lalonai, namona Iehova ia noia iena hesiai gaukara do ia habadaia daladia haida do ia hahedinaraia. (Kara 16:​9, 10) Bena ena guriguri hegeregerena, sekit naria tauna do ia nanadaia bema kahirakahira idia noho kongrigeisen haida dekenai ia painia diba. Eiava brens ofesi do ia tore henia bona ia henanadai bema pablisa be momo lasi gabuna ta dekenai do ia lao.e

16. Dahaka ita diba momokani?

¹⁶ Inai stadi amo ita diba momokani, Iehova ese iseda guriguri be mai lalokau bona dalana maorona ai do ia haerelaia. (Sal. 4:3; Isa. 30:18) Nega haida ita laloa lasi dalanai iseda guriguri do ia haerelaia. To Iehova be iseda guriguri ia dadaraia diba lasi. Ita ia lalokau henia bada. Bona ita do ia rakatania lasi. (Sal. 9:10) Unai dainai, “nega ibounai ia dekenai [ita] abidadama,” bona ita laloa gaudia ibounai do ita gwauraia.—Sal. 62:8.