Hereva Momokani ese Ia Ruhadia
UNITED States lalonai, taunimanima milioni ta mai kahana be dibura rumadia ai idia koua. Kota ese idia tausen toi edia davana be mase ia gwauraia vadaeni. Mani oi laloa, bema oi be idia ta, emu hemami be edena bamona? Momokani, oi moale lasi. To, dala ta ai, taunimanima iboudiai edia noho be unai bamona. Baibel ia gwau: “Ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) Oibe, ita be Adamu ena bese taudia dainai, kara dika ese ita ia “guia.” (Roma 5:12) Dina ta ta iboudiai ita ia guia gauna ena mamina ita abia, Keristani aposetolo Paulo ese ia abia hegeregerena; ia gwau: “Lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.”—Roma 7:23.
Ita be mai eda kara dika dainai, ita ta ta ibounai be kota ese edia davana be mase ia gwauraia vadaeni taudia bamona, badina be Baibel ia gwau: “Kara dika ena davana be mase.” (Roma 6:23) Salamo torea tauna Mose ese iseda noho ia gwauraia maoromaoro, ia gwau: “Aiemai mauri lagani be 70 sibona. Bema ai be goada neganai sedira lagani 80 do ai abia, to inai lagani ibounai lalonai, hekwarahi bona lalohisihisi ai abia noho. Aiemai mauri be idia ore haraga, vadaeni ai boio.”—Salamo 90:10; danu Iamesi 4:14 itaia.
Kara dika bona mase ese taunimanima idia guia. Iesu ese unai ia laloa dainai, ia murinai idia raka taudia ia hamaoroa, ia gwau: “Hereva momokani ese umui do ia ruhaia.” (Ioane 8:32) Unai hereva amo, Iesu ese helaro ta ia henidia, Roma ena lohia siahuna amo ruhadia karana ia hereaia gauna unai—gauna be edia dika do ia gwauatao bona mase amo idia do ia ruhaia! Unai be edena bamona do ia karaia? Iesu ese ia hamaorodia, ia gwau: “Bema Natuna ese umui do ia ruhaia neganai, umui be do ia ruhaia momokani.” (Ioane 8:36) Oibe, “Natuna,” Iesu, ese ena mauri ia henia, unai amo ia be boubou gauna ai ia lao, Adamu ese ia haboioa gauna ena davana do ia karaia totona. (1 Ioane 4:10) Unai ese kamonai taudia iboudiai be kara dika bona mase edia igui amo ruhaia dalana ia kehoa. Dirava ena Natuna, ia sibona ia havaraia natuna tamona, be ia mase, “do idia abidadama henia taudia ibounai be do idia mase lasi, to mauri hanaihanai do idia abia.”—Ioane 3:16.
Unai dainai, ita ia ruhaia diba hereva momokanina be Iesu Keriso herevana. Iena aena gabudia ai idia raka taudia edia helaro be, Dirava ena Basileia ese tanobada do ia biagua vaitani neganai, kara dika bona mase amo idia do ia ruhaia. Hari inai negai danu, Dirava ena Hereva momokani idia abia dae taudia ese ura kwalimu korikorina idia davaria. Edena dala idauidau ai?
Mase Garina amo Ia Ruhadia
Hari inai negai taunimanima milioni momo be mase taudia garina idia gari. Badina be dahaka? Badina be edia tomadiho oreadia ese idia hadibadia, ta ia mase neganai ena soul ese ena tauanina ia rakatania bena lauma gabuna ia lao. Unai dainai tano haida lalodiai mase taudia edia varavara ese aria idia karaia ela bona dina bona hanuaboi haida idia ore. Unai aria momo ai, ane idia abia badabada bona gaba idia botadia. Mase idia taitailaia taudia idia laloa unai ese mase tauna do ia hamoalea bona ena lauma do ia koua, do ia lou mai bona mauri taudia do ia hagaria garina. Kerisendom ena hahediba hereva koikoidia, mase taudia herevadia, dainai unai kastom idia badinaia noho.
To, Baibel ese mase taudia herevana momokanina ia hahedinaraia. Ia hahedinaraia goevagoeva oiemu soul be oi, ia be oiemu tauanina lalonai ia noho hehuni gauna lasi, oi mase murinai ia mauri noho gauna lasi. (Genese 2:7; Esekiela 18:4) Inai danu, mase taudia be hel lahina lalonai idia hahisidia lasi, lauma gabuna ai idia noho lasi, bona mauri taudia idia hanamoa o idia hadikaia diba lasi. Baibel ia gwau: “Mase taudia be gau ta idia diba lasi. . . . Edia gabu [gara gabuna], oi lao gabuna, dekenai be kara ta lasi, laloa ta lasi, diba bona aonega ta lasi.”—Hadibaia Tauna 9:5, 10.
Unai hereva momokanidia Baibel lalonai ese taunimanima momo be mase garina amo ia ruhaia. Dava bada boubou gaudia idia henia lou lasi, edia sene taudia edia lalona hakerua totona, bona edia lalokau taudia be edia kara dika dainai hisihisi idia ania noho herevana idia lalo-hekwarahilaia noho lasi. Idia diba Baibel ese helaro namona ia gwauraia, ia gwau Dirava ese ia gwauraia hidi vadaeni negana ai “mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15; Ioane 5:28, 29) Vadaeni, mase taudia be hari idia laga-ani noho, idia mahuta mase bamona.—Ioane 11:11-14 itaia.
Mase taudia herevana momokanina bona toreisi lou helarona ese mase dainai ia vara dara-dokona amo ita ia ruhaia diba. United States ai, tau ta bona ena adavana edia natuna, lagani hani merona, be aksiden ai ia mase neganai, unai helaro ese idia ia hagoadaia. Mero ena sinana ia gwau: “Emai mauri lalonai gau ta ia boio vadaeni bona emai mauri do ia hegeregere lou lasi ela bona toreisi lou amo emai natuna do ai itaia lou. To ai diba emai hisihisi be do ia noho hanaihanai lasi, badina be Iehova ia gwauhamata vadaeni, iseda mata ranudia, lalohisihisi dainai idia vara gaudia, be do ia dahua oho.”—Apokalupo 21:3, 4.
Nega Vaira Garina amo Ia Ruhadia
Nega vairai dahaka do ia vara? Iseda tanobada be niuklia tuarina ai do idia gabua ore, a? Tanobada idia hadikaia dainai, do ita noholaia diba lasi, a? Kara maoromaoro idia badinaia lasi dainai, gavamani ese do ia biagudia diba lasi bona heiriheiri bada do ia vara, a? Hari inai negai taunimanima momo ese unai idia garilaia.
To, Baibel ese unai gari dikana amo ita ia ruahaia diba. Ia gwau: “Tanobada be ia noho hanaihanai.” (Hadibaia Tauna 1:4, NW) Iehova ese tanobada ia karaia lasi, kara kava taudia ese do idia hadikaia totona. (Isaia 45:18) Lasi, Iehova ese ia karaia, paradaiso ai do ia lao bona taunimanima mai edia lalo-tamona ese do idia noholaia totona. (Genese 1:27, 28) Iena palani ia haidaua lasi. Baibel ese ita ia hamaoroa Dirava ese ‘tanobada idia hadikaia vadaeni taudia do ia alaia ore.’ (Apokalupo 11:18) Baibel be ma ia gwau, unai murinai “manau taudia ese noho gabuna tano do idia abia, do idia helai namonamo, mai moale bona mai maino danu.”—Salamo 37:11.
Unai gwauhamata be momokani, badina be Dirava ia koikoi diba lasi. Iehova be ena peroveta tauna Isaia ena amo ia gwau: “Lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.” (Isaia 55:11; Tito 1:2) Unai dainai, ita diba momokani Dirava ena gwauhamata 2 Petero 3:13 dekenai ena anina be nega vairai do ia vara; ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”
Taunimanima Garina amo Ia Ruhadia
Baibel ese tatau bona hahine, Dirava idia badinaia mai edia gari lasi taudia, edia kara namo ia gwauraia. Idia haida edia ladadia be inai: Gideona, Baraki, Debora, Daniela, Eseta, Ieremia, Abigaila, bona Iaele. Unai tatau bona hahine mai edia kamonai ese idia hahedinaraia edia lalohadai be salamo torea tauna ta ena hegeregerena; ia gwau: “[Dirava] sibona lau abidadama henia, vadaeni do lau gari lasi. Taunimanima sibona be edena bamona lau idia hadikaia diba?”—Salamo 56:11.
Aposetolo edia negai, tomadiho gunalaia taudia ese aposetolo Petero bona Ioane idia hagania do idia haroro lasi neganai, idia danu idia gari lasi. Idia hamaorodia, idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” Petero bona Ioane idia gini auka dainai, gabeai dibura rumana ai idia koudia. Dirava ese hoa dalana amo idia ia ruhaia, bena edia gaukara idia karaia lou, “Dirava ena hereva idia gwauraia, mai goada danu.” Nega daudau lasi haida ese Petero bona aposetolo oredia idia hakaua vareai, Iuda edia Kaunsolo taudia edia vairanai idia gini. Hahelaga tauna badana ese ia hamaorodia, ia gwau: “Ai ese taravatu ai atoa, umui hadibaia lasi inai ladana dekenai. To hari emui hadibaia hereva dekenai Ierusalema ibounai umui hahonua vadaeni, bona inai tau ena mase badina umui atoa ai dekenai.” Petero bona aposetolo oredia idia haere idia gwau: “Dirava ai kamonai henia be namo, taunimanima ai kamonai henia be dika.”—Kara 4:16, 17, 19, 20, 31; 5:18-20, 27-29.
Dirava ena Basileia sivarai namona harorolaia gaukarana lalonai, Iehova ena Witness taudia hari inai negai ese Keristani taudia ginigunadia edia lalo-goada idia tohotohoa. Edia orea memero bona kekeni danu be nega momo idia hahedinaraia idia gari lasi; idia abia dae herevadia be ma haida dekenai idia herevalaia. Idia haida edia kara mani oi laloa.
Stacie, lagani 15 bamona kekenina, be vaia ia hemarai. Unai dainai, ia abia dae herevadia ma haida dekenai ia gwauraia be matamana ai ia auka. Dahaka ia karaia, iena hemarai haorea totona? Ia gwau: “Baibel lau stadilaia, lau herevalaia gaudia do lau lalo-pararalaia totona. Unai ese lau ia durua, bona egu lalona ia hagoadaia.” Stacie ena hanua ena niuspepa lalonai iena kara namo ia herevalaia. Unai sivarai, iena sikuli tisa ta ese ia torea, ia gwau: “[Stacie] ena abidadama ese ia hagoadaia, memero bona kekeni badadia momo ese idia davaria hedibaganidia momo do ia dadaraia totona. . . . Ia laloa Dirava ena hesiai lao henia karana do ia laloa bada be namo.”
Tommy ena mauri laganidia be ima neganai, iena tamana bona sinana ese Baibel ena hereva idia hadibaia matamaia. Ia do maragi neganai, tomadiho momokani ia badinaia mai ena goada ida. Iena klas memerodia ese dina helaga laulaudia idia torea lalonai, Tommy ese Dirava ia gwauhamatalaia Paradaisona ena laulau ia toredia. Ena mauri laganidia be 15 bamona neganai, Tommy ia itaia iena klas taudia momo ese Iehova ena Witness taudia idia abia dae herevadia idia daradaralaia. Ia gari lasi, to iena tisa ta ia noia gwaumaoro do ia henia, ia be ena klas taudia ida do idia hebou bona edia henanadai iboudiai be nega tamona ai do ia haerelaia. Tisa ese gwaumaoro ia henia, bena Tommy ese ia hadibadia namonamo.
Markietta ena mauri laganidia be 17 neganai, ia abia dae herevadia be iena klas taudia dekenai do ia gwauraia dalana ia davaria. Ia gwau: “Tisa ese ai ia henia gaukarana ta be ai ta ta ese hereva ta do ai gwauraia hedinarai. Lau abia hidi herevana be Memero Kekeni Edia Henanadai—Haere Maorodia bukana amo.a Buka ena karoa ima lau abia hidi, bena edia sinado be blakbod dekenai lau torea. Klas taudia lau hamaoroa, edia lalohadai hegeregerena unai hereva, mai anina bada ela bona mai anina maragi herevadia, be do idia gwauraia hidi.” Unai murinai unai hereva be klas taudia ida ia herevalaia. Markietta ia gwau: “Klas dekenai buka lau hahedinaraia. Sikuli taudia haida ese kopi ta idia noia. Lauegu tisa danu ia gwau ia ura ta do ia abia.”
Hereva Momokani ese Oi Ia Ruhaia Diba
Ita itaia vadaeni hegeregerena, hereva momokani Baibel lalonai ia noho ese Baibel idia stadilaia bona ena hereva idia abia dae taudia, badadia bona maragidia, ia ruhaia. Mase taudia garina, nega vaira garina, bona taunimanima garina amo ia ruhadia. Dokonai, Iesu ena boubou ese kamonai taudia be kara dika bona mase amo do ia ruhadia. Moale bada gauna be inai: Adamu ena amo ita abia kara dikana ese ita do ia guia noho lasi, to paradaiso tanobadana ai do ita noho hanaihanai!—Salamo 37:29.
Oi ura Dirava ese ia gwauhamatalaia hahenamodia ma haida do oi dibaia, a? Bema unai oi ura, dahaka do oi karaia be namo? Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Vadaeni, bema oi ura Iesu ese iena hahediba taudia dekenai ia gwauhamatalaia ura kwalimuna do oi abia, namona be Iehova Dirava bona ena Natuna do oi dibadia. Namona be Dirava ena ura do oi diba bena do oi karaia, badina be Baibel ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
[Footnotes]
a Watchtower Bible and Tract Society of New York, Inc. ese ia halasia.
[Picture on Page 7]
Dirava ena Basileia henunai, taunimanima be kara dika bona mase amo do ia ruhadia