Eert Yeehoowa

1. Mit was tuun fiile hayt sich khimere?

HOST tuu xon kemërkt tas fiile layt hayt khimere sich mee mit sich selepst wii mit te anere? Tsum payxpiil, etliche penutse ti sotsyaale weepe fer sich proose iwer sich selepst un was se mache. Awer weeniche layt hayt wole Yeehoowa eere. In tiise artikel, siin mer wii mer Yeehoowa eere khene un warom sole mer tas mache. Meyer lërne aach wii Yeehoowa sayn naame im futuer eere tuut.

WII EERE MER YEEHOOWA?

2. Was hot Yeehoowa kemacht ufm përich Sinaay? (Kuk aach tas pilt.)

² Ti Piipel tsaycht tas Yeehoowa een mechtiche Kot is. Tee hot tas taytlich kelos ploos phaar taache noo tas eyer ti natsyoon fon Israël fon Ejipt pefrayt hot. Iwerlee tich milyoone israeliiter foer te përich Sinaay fersamelt, am waarte fer se heere was Yeehoowa tëne saan tuut. Een tik wolk is iwer te përich. Pletslich, tamp tekt tëm. Tan khome aach een kroos eyertxuter, plitse, tunere un te hart ratau fon een horn. (Eeks. 19:16-18; 24:17; Psal. 68:8) Wii Yeehoowa tiise pewaysunge fon kraft kep hot, hon ti israeliiter sich tsiimlich sicher ferwunert.

3. Wii khene mer Yeehoowa eere?

³ Yeehoowa is een mechtiche Kot un meyer khene ti anere helfe tas aach siin. Wën mer mit tëne xpreche iwer ti wunerliche tinge woo Kot xon kemacht hot un sayn xeene kwaliteete, eere mer Yeehoowa. Meyer eere aach Yeehoowa wën mer tëm loope weeche ales was tee uns helft se mache. (Isa. 26:12) Te kheenich Tawi waar een xeen payxpiil fon yemant woo Yeehoowa keert hot. In een kepeet woo eyer foer ti israeliiter kemacht hot, hot eyer fer Kot kesaat: “Oo Yeehoowa, ti kroosheet, ti kraft, ti eer, ti xeenheet un ti autoriteet sin tayn; wayl ales woos im himel un uf te eyert kept keheert tsu tich.” Noom kepeet, “ti kanse layt hon Yeehoowa (…) keloopt”. (1 Kro. 29:11, 20)

4. Wii hot Yeesus Yeehoowa keert?

⁴ Wii Yeesus uf te eyert waar, hot eyer kesaat tas Yeehoowa tëm ti kraft kep hot fer wunere mache. Soo hot eyer Kot keert. (Mar. 5:18-20) Yeesus hot tas aach kemacht torich ti aat wii eyer iwer sayn Fater kexproch hot un ti aat wii eyer ti anere pehantelt hot. Tsum payxpiil, een mool waar Yeesus ti layt in een sinakook am in lërne. Tswixich tëne waar een fraa kewees woo xon 18  yoore een temoon in sich hat. Tes weeche, waar se krum un tii khont sich net richt xtele. Yeesus wust tas ti fraa fiil kelit hot un tee wolt se helfe. Soo is eyer pay tëne khom un hot liiplich kesaat: “Fraa, tuu pist fon tayn krankheet pefrayt.” Too, hot Yeesus “sayn hënt uf te fraa ketuun un tii hot sich klaych richt kextelt un hot aan kefang Kot loope”. Tii waar aarich petanklich tas Kot se noch mool kesunt kemacht hot. (Luk. 13:10-13) Ti fraa hat kuute uersache fer Yeehoowa eere — un meyer aach!

WAROM EERE MER YEEHOOWA?

5. Warom tuun mer Yeehoowa respektiire?

⁵ Meyer eere Yeehoowa wayl mer tëm tiif respektiire. Es kept fiile uersache fer Kot respektiire. Tee is te Ale Mechtiche — sayn kraft hot khee krëns. (Psal. 96:4-7) Sayn kluucheet is taytlich in ales was eyer kemacht hot. Tee hot uns tas leepe kep un ales was neetich is fer tas hale. (Apo. 4:11) Tee is leaal. (Apo. 15:4) Ales was eyer macht, tuut kuut ap laafe un tee halt imer sayn ferxpreche. (Yos. 23:14) Tes weeche hot te profeet Yeeremias iwer Yeehoowa kesaat: “Tswixich al ti kluuche fon te natsyoone un fon sayn kanse rayche, kepts nimant soo wiis tuu.” (Yee. 10:6, 7) Sicher hon mer kuute uersache fer unser himlixe Fater respektiire. Awer mee wii tëm respektiire, tuun mer tëm liipe.

6. Warom liipe mer Yeehoowa?

⁶ Meyer eere Yeehoowa wayl mer tëm fiil liipe. Meyer liipe tëm weeche sayn xeene kwaliteete. Tee is parmhërtslich un mitlaytich. (Psal. 103:13; Isa. 49:15) Wën mer layte, tuut eyer unser phayn xpiire. (Sak. 2:8) Tee helft uns tëm khëne lërne un sayn fraaynte wëre. (Psal. 25:14; Aph. 17:27) Un tee is teemuutich. “Tee tuut sich pike fer te himel un ti eyert aan kuke, tuut te teemuutiche fom xtaap uf heepe.” (Psal. 113:6, 7) Weeche al tiise uersache, wole mer unser kroose Kot eere. (Psal. 86:12)

7. Was fer ekstra oportuniteet hon mer?

⁷ Meyer eere Yeehoowa wayl mer wole hon tas ti anere tëm khëne lërne. Fiile wise net ti woerheet iwer Kot. Tas is soo wayl Satanaas fiile liie iwer Yeehoowa aus keprayt hot un ti layt klaape too traan. (2 Kor. 4:4) Satanaas hot ti layt rom kepapelt se klaape tas Yeehoowa wuutich is, tas eyer sich net mit uns khimert un tas eyer hinich fiile propleeme fon te welt is. Awer meyer wise ti woerheet iwer unser Kot! Tes weeche hon mer een ekstra oportuniteet: fer ti anere saan wii Kot wërklich is un tëne helfe Kot aach loope. (Isa. 43:10) Te Psalm 96 halt sich traan aan Yeehoowa eere. In tëm, lërne mer wii noch khene mer tsu Yeehoowa kepe ti eer woo eyer fertiint.

WII NOCH KEPE MER YEEHOOWA TI EER WOO EYER FERTIINT?

8. Wii khene mer Yeehoowa eere? (Psalm 96:1-3)

⁸ Lees Psalm 96:1-3.a Meyer khene Yeehoowa eere torich was mer iwer tëm saan. In tiise wersikele is tas folek uf kemuut tsu Yeehoowa singe, sayn naame loope, ti kuute notisye fon sayn retung aus xpreche un sayn eer fer ti natsyoone pekhant mache. Tas sin aate wii mer khene Yeehoowa torich unser wërter eere. Yeehoowa sayn tiiner fon te friirixe tsayte wolte fer ti anere saan wii Yeehoowa wërklich is un ti kuute tinge woo eyer tëne kemacht hat. (Tan. 3:16-18; Aph. 4:29) Wii khene mer tas selwiche mache?

9-10. as host tuu mit Angelena sayn speryens kelërnt? (Kuk aach tas pilt.)

⁹ Mërk mool ti speryens fon Angelena,b een xwester woo in te Fereenichte Xtaate fon Amërika leept. Mit koraaj, hot se iwer Yeehoowa in sayn aarwayt kexproch. Wayl se kraat aan kefang hot tat xafe, waar se in kelaat tsu een fersamlung mit anere woo aach nay waare. Too khente al een pisye iwer sich selepst xpreche. Angelena hot kepleent etliche pilter foer xtele woo sayn frooheet ketsaycht hon wii Yeehoowa sayn Tsayer. Awer kraat foer tas mache, hot een koleke kesaat tas sayn eltere tëm wii Yeehoowa sayn Tsayer kroos ketsoo hate. Tee hot aan kefang xlecht iwer uns un unser klaape xpreche. “Ich sin mechtich ëngstlich kep — saat Angelena. — Awer ich wust tas was eyer iwer Kot kesaat hot, net woer waar. Ich hon ketenkt: ‘Ich khan net ruych plaype. Ich mus tëne saan wii Yeehoowa wërklich is.’”

¹⁰ Wii tee noo kelos hot se xpreche, hot Angelena een ruych kepeet fiks kemacht. Tan hot se mit kuutheet kesaat: “Ich sin aach wii Yeehoowa sayn Tsayer kroos ketsoo kep. Un tas is soo pis hayt.” Opwool ti situatsyoon net laycht waar, is Angelena in ruu keplip. Tii hot ti pilter fer sayn koleke ketsaycht. In tëne, khonte se siin Angelena un sayn fraaynte Yeehoowa froo am tiine. Angelena hot aach sayn klaape mit respekt aus keleet. (1 Phe. 3:15) Te resultaat? Wii Angelena fërtich waar, hat te man sich xon peruycht. Tee hot soo kaar erkhënt tas eyer kuute erinerunge hat fon te tsayt woo eyer keselxaft mit Yeehoowa sayn Tsayer hat. Angelena saat: “Yeehoowa fertiint kexitst wëre. Es is een eer ti woerheet iwer tëm saan.” Meyer khene aach Yeehoowa loope wën ti anere khee respekt tëm tsayche. Tas is een kroos eer fer uns!

11. Wii hon ti woere aanpeeter imer te funtament im Psalm 96:8 aan kewënt?

¹¹ Lees Psalm 96:8.c Meyer khene Yeehoowa eere mit unser materyaalixe tinge. Kot sayn woere aanpeeter hon tëm imer soo keert. (Xpr. 3:9) Ti israeliiter, tsum payxpiil, hon kontripuytsyoone kemacht fer te thempel paue un uf phase. (2 Khe. 12:4, 5; 1 Kro. 29:3-9) Etliche fon Yeesus sayn tisipele hon fon “sayn aychne tinge” kep soo tas Yeesus un ti aphostele tas neetiches hëte. (Luk. 8:1-3) Un ti Piipel saat tas, wii etliche priiter kelit hon weeche een hungernoot, hon priiter fon anere pletse tëne kelt kexikt. (Aph. 11:27-29) Hayt khene mer aach Yeehoowa eere torich unser fraywiliche kontripuytsyoone.

12. Wii khene unser kontripuytsyoone Yeehoowa eere? (Kuk aach tas pilt.)

¹² Mërk mool ploos een speryens woo tsaycht wii unser kontripuytsyoone Yeehoowa eere. In 2020, is een lange troknung in Simpaapue pasiirt. Milyoone khonte xtërpe wayl se net ese hate, too tepay een xwester woo Prisca heest. Opwool ti situatsyoon aarich xweyer waar, hot Prisca wayter yeete mitwoch un fraytaach kepreeticht, soo kaar torich ti tsayt fer tas lant tsakere. Ti noch­pere hon Prisca ferxpot wayl se kepreeticht hot xtats in te plantaaj xafe. Tii hon kesaat: “Tuu tuust weeche ti hungernoot xtërpe.” Prisca waar sich sicher tas Yeehoowa se uf phase teet. Soo hot se imer keantwort: “Yeehoowa hot sayn tiiner nii im xtich kelos.” Klaych tëm noo hot se ti neetiche tinge fon te Orkanisatsyoon kriit. Ti Orkanisatsyoon khont Prisca un anere helfe weeche unser kontripuytsyoone. Prisca sayn nochpere hon sich ferwunert un hon kesaat: “Kot tuut tich imer helfe. Soo meyer wole iwer tëm lërne.” Siwe fon sayn nochpere hon aan kefang tsu te fersamlunge keen.

13. Tëm noo Psalm 96:9, was sole mer mache fer Yeehoowa eere?

¹³ Lees Psalm 96:9.d Meyer khene Yeehoowa eere wën unser aanxtelung haylich, orer sauwer, is. Ti priister woo in Yeehoowa sayn thempel ketiint hon, miste sich wexe un sauwer hale. (Eeks. 40:30-32) Awer noch wichticher wii een sauwer khërper hon, is een rayn aanxtelung hale. (Psal. 24:3, 4; 1 Phe. 1:15, 16) Ti Piipel saat tas mer sole ti “alt personaliteet” aus tuun un ti “nay personaliteet” aan tsiie. Es wil saan, meyer sole uns aan xtrenge fer uns wech hale fon ferkheerte ketanke un aanxtelunge woo Yeehoowa net kefale. Meyer xtrenge uns aach aan fer Yeehoowa un sayn xeene kwaliteete noo mache in unser ketanke un aanxtelung. (Kol. 3:9, 10) Mit Yeehoowa sayn hilef, soo kaar layt woo xlime tinge kemacht hon, khonte sich ënere un ti nay personaliteet aan tsiie.

14. Was host tuu mit Jack sayn speryens kelërnt? (Kuk aach tas pilt.)

¹⁴ Mërk mool Jack sayn speryens. Tee waar een wyolënt kriminoos kewees un waar soo kaar kekhënt wii Te Taywel. Weeche sayn kriime, hot tas kericht ëntxlist tas Jack solt um keprung wëre. Awer soo lang wii Jack tas am waarte waar, hot een pruuter, woo ti katee pesuucht hot, tëm een Piipel xtuutyum aan kepoot. Jack hot es aan kenom. Opwool eyer fiile xlime tinge kemacht hat, hot eyer sich keënert un, mit te tsayt, hot eyer sich taafe kelos. Jack hat sich soo fiil keënert tas, im taach woo eyer um keprung waar, hon etliche katee wachter “auf wiiter siin” mit treene in sayn aue kesaat. Een soltaat woo in te katee kexaft hot, hot kesaat: “Friier, waar Jack eene fon te xlimste inkexpërtner too. Awer yets is eyer eene fon te peste.” In te woch noo Jack sayn toot, sin ti priiter tsurik tsu te katee khom fer een fersamlung fiire. Awer tat es waar een inkexpërtner woo tas eyerste mool tsu te fersamlung khom is. Warom is eyer kang? Tee hot sich ferwunert mit te ënerung woo Jack in sayn aanxtelung kemacht hat un tee wolt wise was eyer mache must fer Yeehoowa tiine. Yawool, unser aanxtelung khan unser himlixe Fater eere. (1 Phe. 2:12)

WII TUUT YEEHOOWA SAYN NAAME IM FUTUER EERE?

15. Wii tuut Yeehoowa klaych tsayche tas eyer eer fertiint? (Psalm 96:10-13)

¹⁵ Lees Psalm 96:10-13.e Ti letste wersikele fom Psalm 96 tuun Yeehoowa wii eene kerechte Richter un Kheenich pexraype. Yeehoowa tuut sayn naame im futuer eere, wën eyer kerechtichkheet pringt. Weeche ti xlime aktsyoone un xrekliche liie fon te falxe relichyoone, tuut Kot klaych Papiloon ti Kroos fernichte. (Apo. 17:5, 16; 19:1, 2) Fiilaycht etliche woo tas siin, ëntxlise aan fange Yeehoowa mit uns aan peete. Tsum xlus, im Armaxeton, tuut Yeehoowa Satanaas sayn kanse sisteem fernichte. Ale layt woo sich keeche Yeehoowa xtele un liie iwer tëm fertseele, wëre fernicht. Awer Yeehoowa tuut rete ale woo tëm liipe, foliche un eere. (Mar. 8:38; 2 The. 1:6-10) Noo te letste proop, am ën fon Yeesus Kristus sayn Tausent Yoore Rechiirung, wërt Yeehoowa xon pewayst hon tas eyer fertiint aanpeetung kriin. (Apo. 20:7-10) In tiise tsayt, “wërt [ti eyert] fol mit te khëntnis iwer Yeehoowa sayn hërlichkheet, soo wii tas waser tas meer tekt”. (Hap. 2:14)

16. Was pist tuu pextimt se mache? (Kuk aach tas pilt.)

¹⁶ Es wërt een xeen tsayt sin wën al Yeehoowa loope tuun soo wii eyer es fertiint. Awer pis tiise tsayt khomt, tuun mer unser pestes mache fer iwer unser Kot xpreche un uns aan xtele in een aat woo tëm eer pringt. Fer uns helfe uns too traan konsentriire, hot te Rechiirente Khërperxaft Psalm 96:8 raus kesuucht wii unser yoers tekst fer 2025: “Kept Yeehoowa ti eer woo sayn naame fertiint.”