Es is woer tas mer troye tiiner fon Yeehoowa sin; awer soo wii ti anere layt, sin mer net fray fon xwiirichkheete un krankheete. Meyer khene aach opositsyoon orer yachtung mit mache fon te layt woo Kot sayn folek hase. Yeehoowa pefrayt uns net too tefun, awer tee ferxprecht uns helfe. (Isa. 41:10) Mit tëm sayn hilef, khene mer uns froo hale, kuute ëntxlise mache un troy tsu Tëm plaype, soo kaar wën mer torich ti xlimste proope keen. Yeehoowa ferxprecht uns kepe was ti Piipel nënt wii “Kot sayn friit”. (Fili. 4:6, 7) Tiise friit is ti ruu woo mer xpiire wayl mer een ticht fraayntxaft mit Yeehoowa hon. Tiise friit “keet iwer ales woo ti mënxe ferxteen khene” — es wil saan, is wunerlicher wii mer uns foer xtele khene. Host tuu xon een mool hërtslich tsu Yeehoowa kepeet un tan een unkeweenlich ruu kexpiirt? Wën yaa, tuu host “Kot sayn friit” kexpiirt. (w24.01 s. 20 ap. 2; s. 21 ap. 4)

Tii woo Yeehoowa liipe, wole Sayn naame mit kans hërts loope. Te kheenich Tawi wust tas wën mer Yeehoowa sayn naame loope, loope mer Yeehoowa selepst. Wën mer Kot sayn naame heere, tenke mer aan te sort persoon woo tee is — aan al sayn xeene kwaliteete un wunerliche aktsyoone. Tawi wolt Yeehoowa sayn naame wii haylich siin un tëm loope. Tee wolt tas mache mit ‘ales was eyer waar’ — es wil saan, mit sayn kanse hërts. Ti lewiiter hon aach te eyerste xrit kep fer Yeehoowa loope. Tii hon mit teemuut erkhënt tas sayn wërter khente nii kenuuch wëre fer Yeehoowa sayn naame te loop kepe woo eyer fertiint. (Nee. 9:5) Sicher, tiise teemuutich un hërtslich loop hot Yeehoowa kefrayt. (w24.02 s. 9 ap. 6)

Yeehoowa tenkt net tas tuu xwach pist wëns tuu net een tsiil trefst woo unmeechlich fer tich waar. (2 Kor. 8:12) Lërn etwas fon te propleeme woo xon pasiirt sin. Ti Piipel saat: “Kot is net unkerecht. Soo ferkest eyer sich net fon [tayn] aarwayt.” (Hep. 6:10) Un tuu solst tas aach net ferkese. Tenk triwer noo aan te tsiile woos tuu xon ketrof host — een fraayntxaft mit Yeehoowa ëntwikele, mit te anere iwer tëm xpreche, sich taafe lose… Yawool, tuu pist xon foran kang un host xon tsiile ketrof. Soo, mit Yeehoowa sayn hilef, khanst tuu wayter foran keen un anere tsiile trefe. Fray tich wiis tuu mërkst wii Yeehoowa tich helft un seechent in tayn “rees” fer tayn tsiil trefe. (2 Kor. 4:7) Wëns tuu net uf kepst, tuust tuu noch kreeser seechen kriin! (Kal. 6:9) (w23.05 s. 31 ap. 16-18)