Tuu khanst tayn kaystliche tsiile trefe

1. Was is xweyer fer fiile fon uns mache?

HOST tuu xon een kaystlich tsiil kextelt, woos tuu tan xweyer kefun host fer se trefe?b Wën yaa, tuu pist net aleen. Tsum payxpiil: Philip wolt sayn kepeete ferpesere un tas eftas mache. Awer es waar tëm xweyer tsayt fine fer se peete. Erika sayn tsiil waar phinktlich sin fer ti preetich aarwayt fersamlunge; awer tii hot sich neekst imer ferxpeet. Tomáš hot fiil mool fersuucht ti kans Piipel leese. Tee saat: “Es hot mich aynfach net kefalt ti Piipel leese. Ich hon 3 mool fersuucht, awer ich sin imer ploos pis Lewitikus khom…”

2. Warom sole mer net oone muut plaype wën mer een kaystlich tsiil hon woo mer noch net ketrof hon?

² Wëns tuu een tsiil host woos tuu noch net ketrof host, playp net oone muut. Soo kaar een keweenlich tsiil trefe, khost tsayt un fiil aanxtrengung. Awer wayls tuu tich wayter too traan aan xtrengst, tsaychst tuu tas tuu weyert fer tayn fraayntxaft mit Yeehoowa kepst un tas tuu wilst Tëm tayn pestes kepe. Un Yeehoowa kept weyert fer tayn aanxtrengung. Sicher, waart Eyer net mee fon tich wiis tuu kepe khanst. (Psal. 103:14; Mik. 6:8) Soo xtel tsiile woos tuu trefe khanst un woo mit tayn situatsyoon phase. Awer, noo een tsiil xtele, was khanst tuu mache fer tas trefe? In tiise artikel, kuke mer etliche itee.

EEN XTARKE WUNX HON, IS AARICH WICHTICH

3. Warom is es wichtich een xtarke wunx hon fer unser tsiile trefe?

³ Een xtarke wunx hon fer kaystliche tsiile trefe, is aarich wichtich. Soo een sort wunx tuut een persoon uf muute sich aan xtrenge fer sayn tsiile trefe. Tiise wunx is wii te wint woo een xif pis sayn tsiil xupt. Wën te wint wayter ploost, tuut tas xif tsiimlich sicher pis sayn tsiil hin khome. Un wën te wint xtark is, khan tas xif soo kaar eente tat hin khome. Kraat soo, woo xtërker unser wunx is, woo kreeser is unser xans fer unser tsiil trefe. David, een pruuter in El Salwatoer saat: “Wën tayn wunx xtark is, tuust tuu tich noch mee aan xtrenge. Tuu lost niks tich um hale tayn tsiil trefe.” Soo, wii khanst tuu tayn wunx ferxtërke fer een kaystlich tsiil trefe?

4. Was khene mer im kepeet ferlange? (Filiper 2:13) (Kuk aach tas pilt.)

⁴ Peet fer tayn wunx ferxtërke. Torich sayn hayliche kayst, khan Yeehoowa tich uf muute tayn tsiil trefe. (Lees Filiper 2:13.)c Als mool, xtele mer een tsiil wayl mer tenke: ‘Ich sol tas mache.’ Un tas is was kuutes. Awer khan sin tas mer net wërklich te wunx hon fer tas trefe. Tas is mit Norina pasiirt, een xwester in Ukanta. Tëne sayn tsiil waar een Piipel xtuutyum fiire. Awer sayn wunx fer tiise tsiil trefe, waar net soo xtark, wayl se ketenkt hot tas se net een kuut leerin waar. Was hot se keholef? Tii saat: “Ich hon yeete taach tsu Yeehoowa ferlangt mayn wunx ferxtërke fer een Piipel xtuutyum fiire. In te selwich tsayt, hon ich mich aan kextrengt fer mayn apiliteete wii leerin ferpesere. Noo phaar moonate, hon ich kemërkt tas mayn wunx is kreeser kep. Im selwiche yoer, hon ich 2 Piipel xtuutye aan kefang.”

5. Fer unser wunx ferxtërke fer een tsiil trefe, aan was khene mer triwer noo tenke?

⁵ Tenk triwer noo aan was Yeehoowa xon fer tich kemacht hot. (Psal. 143:5) Te aphostel Phaul hot triwer noo ketenkt aan te unfertiint kuutheet woo Yeehoowa tëm ketsaycht hat; un tas hot tëm uf kemuut xtram fer Yeehoowa xafe. (1 Kor. 15:9, 10; 1 Tim. 1:12-14) Kraat soo, woo mee tuu triwer noo tenkst aan was Yeehoowa xon fer tich kemacht hot, woo kreeser wërt tayn wunx fer tayn tsiil trefe. (Psal. 116:12) Een xwester in Hontuuras hat tas tsiil fer rekulaar pyoneerin sin. Kuk mool was se keholef hot tas trefe: “Ich hon triwer noo ketenkt aan wii fiil Yeehoowa mich liipt — saat se. — Tee hot mich keholef sayn folek fine. Tee phast mich uf un xitst mich. Wii ich too triwer noo ketenkt hon, is mayn liip tsu Yeehoowa xtërker kep un ich wolt mich mee aan xtrenge fer een pyoneerin sin.”

6. Was noch khan uns helfe unser wunx ferxtërke fer een tsiil trefe?

⁶ Hal tich traan aan te nutse woos tuu kriist wëns tuu tayn tsiil trefst. Eente, hon mer iwer Erika kexproch, woo tas tsiil hat fer phinktlicher sin. Kuk mool was se keholef hot: “Ich hon kemërkt tas ich fiil am ferliire waar wii ich mich tsu te preetich aarwayt ferxpeet hon. Awer wën ich eente khome teet, khent ich ti priiter un xwestere kriise un tsayt mit tëne plaype. Ich khent aach nutsliche itee heere woo mich helfe teete mayn preetich aarwayt ferpesere un tas kërn mache.” Erika hot sich traan kehal aan wii phinktlich sin, tëne nutse pringe teet. Un soo, hot se sayn tsiil ketrof. Aan was fer seechen khanst tuu tich konsentriire? Tsum payxpiil, wën tayn tsiil se tuun hot mit tayn Piipel leesung orer kepeete, tenk wii tas tayn fraayntxaft mit Yeehoowa ferxtërke tuut. (Psal. 145:18, 19) Wën tayn tsiil een kristlich kwaliteet ëntwikele is, tenk wii tas tayn fraayntxaft mit anere ferxtërke tuut. (Kol. 3:14) Fiilaycht khanst tuu een list mache mit al ti uersache warom tuu een tsiil trefe wilst. Tan tuu tiise list ofts noo kuke. Tomáš, iwer weem mer foner traan kexproch hon, saat: “Mayn aanxtrengung fer een tsiil trefe is kreeser wën ich fiile uersache hon fer tas mache.”

7. Was hot Julio un sayn fraa keholef sayn tsiil trefe?

⁷ Fertrayp tsayt mit layt woo tich uf muute tayn tsiil trefe. (Xpr. 13:20) Tas tsiil fon Julio un sayn fraa waar mee in te preetich aarwayt mache. Kuk mool was se keholef hot tas trefe. Tee saat: “Meyer hon fraaynte raus kesuucht woo uns uf kemuut hon unser tsiil trefe un meyer hon mit tëne too triwer fertseelt. Fiile fon tëne hate xon eenliche tsiile ketrof; tes weeche khonte se uns nutsliche itee kepe. Unser fraaynte hon uns aach imer kefroot wii unser pleen am ap laafe waare. Un wëns neetich waar, hon se uns uf kemuut.”

WËN ES FEELT UNS TI MUUT

8. Was khan pasiire wën mer uns aan xtrenge fer een tsiil trefe ploos wën mer muut hon? (Kuk aach tas pilt.)

⁸ Fer ti woerheet saan, meyer al hon taache woo uns ti muut feelt. Wil tas saan tas mer khene uns net aan xtrenge fer unser tsiil trefe? Nee. Wole mer een ferklaychung mache. Te wint khan een xtark kraft sin woo een xif tsu sayn tsiil xupt. Awer te wint khan sich ferxweeche un khene etliche taache khome woo es khee wint ploost. Wil tas saan tas, too teweeche, khan tas xif net foran keen? Net imer. Tsum payxpiil, etliche xif hon een motoer; anere hon reeme. Te xifsman khan tas penutse fer tas xif foran lenke. Unser muut khan wii te wint sin: als mool is tas xtark; als mool is tas xwach. Un in etliche taache, khan sin mer khee muut hon fer unser tsiile trefe. Soo, wën mer uns ploos aan xtrenge fer unser tsiile trefe wën mer muut hon, im xtant tuun mer se nii trefe. Soo wii een xifsman khan anere aate fine fer een xif pis sayn tsiil lenke, khene mer uns aach aan xtrenge fer unser tsiil trefe soo kaar wën uns te wunx feelt. Sicher es is net laycht, awer ti resultaate loone sich. Eep mer xpreche iwer was mer mache khene, wole mer een frooch antworte woo foer khome khan.

9. Is es ferkheert uns wayter aan xtrenge fer een tsiil trefe aach wën mer net te wunx hon fer tas mache? Lee tas aus.

⁹ Yeehoowa wil hon tas mer tëm froo un mit muut tiine. (Psal. 100:2; 2 Kor. 9:7) Tes weeche, khene mer uns frooe: ‘Sole mer uns wayter aan xtrenge fer een kaystlich tsiil trefe, aach wën mer net te wunx hon fer tas mache?’ Kuk mool te aphostel Phaul sayn payxpiil. Tee hot kesaat: “Ich tuun mayn khërper xtreng tisipliniire un mache tëm mayn sklaaw.” (1 Kor. 9:25-27, xtuutyum noote im wersikel 27) Phaul hot sich ketswung fer se mache was richtich is, soo kaar wën eyer net te wunx hat fer tas mache. Waar Yeehoowa froo mit Phaul sayn aarwayt? Ia, sicher. Un Yeehoowa hot tëm peloont weeche sayn aanxtrengung. (2 Tim. 4:7, 8)

10. Was fer seechen khene mer kriin wën mer uns aan xtrenge fer een tsiil trefe, aach wën uns ti muut feelt?

¹⁰ Kraat soo, wërt Yeehoowa froo wën eyer siit unser aanxtrengung fer unser tsiile trefe, aach wën uns ti muut feelt. Tee kefalt sich wayl eyer wees tas, soo kaar wën mer net imer liipe was mer am mache sin, mache mer tas wayl mer tëm liipe. Soo wii Yeehoowa Phaul keseechent hot, tuut Eyer uns weeche unser aanxtrengung seechne. (Psal. 126:5) Un wën mer Yeehoowa sayn seechen xpiire, khene mer aan fange mee muut hon. Lucyna, een xwester fon Poole, saat: “Als mool wil ich net in te preetich aarwayt keen, hauptseechlich wën ich miit sin. Awer ti frooheet woo ich xpiire wën ich keen, is een wunerlich kexenk.” Soo wole mer yets siin was mer mache khene wën uns ti muut feelt.

11. Wii khan Yeehoowa uns helfe mee selepst kontrol hon?

¹¹ Peet fer selepst kontrol hon. Selepst kontrol is ti apiliteet woo een persoon hot fer sayn aychne xpiirunge un aktsyoone kontroliire. Als mool, hot tas se tuun mit sich kontroliire fer net tas xlechtes mache. Awer anere mool, mise mer selepst kontrol hon fer uns tswinge se mache was richtich is, aach wën mer khee muut hon. Eriner tich tas te selepst kontrol is een teel fon te frucht fon Kot sayn kayst. Soo peet un ferlang Kot sayn hayliche kayst fer tiise wichtich kwaliteet ëntwikele. (Luk. 11:13; Kal. 5:22, 23) David, iwer weem mer foner traan kexproch hon, leet aus wii tas kepeet tëm keholef hot sayn tsiil trefe — sayn perseenlich xtuutyum eftas mache. Tee saat: “Ich hon fer Yeehoowa ferlangt mich helfe selepst kontrol ëntwikele. Mit tëm sayn hilef, khont ich een kuut prokram fer ti Piipel xtutiire aan fange un hale.”

12. Wii tuut Eklesyastes 11:4 uns helfe unser tsiile trefe?

¹² Waart net ti perfekt situatsyoon. In tiise welt, tuun mer tsiimlich sicher nii een perfekt situatsyoon hon. Wën mer soo was waarte, im xtant tuun mer unser tsiil nii trefe. (Lees Eklesyastes 11:4.)d Een pruuter, woo Dayniel heest, saat: “Es kept khee perfekt situatsyoon. Tes weeche, sole mer tas net waarte, awer noore aan fange.” Een pruuter fon Ukanta, woo Paul heest, xprecht iwer een aner uersach warom mer sole net ti tinge uf xupe: “Wën mer noore aan fange, aach wën tas xweyer is, kepe mer etwas fer Yeehoowa seechne.” (Mal. 3:10)

13. Warom weyers kuut mit kleene tsiile aan fange?

¹³ Fang aan mit kleene tsiile. Fiilaycht es feelt uns ti muut wayl es aus siit tas unser tsiil tsu xweyer is fer se trefe. Wën tas tayn situatsyoon is, khenst tuu tayn tsiil in kleene tsiile teele? Tsum payxpiil, wën tayn tsiil een kristlich kwaliteet ëntwikele is, was mënst tuu eyerst tich aan xtrenge fer tiise kwaliteet in kleene tinge tsayche? Wën tayn tsiil is ti kans Piipel leese, khenst tuu eyerst tich orkanisiire fer een kleen pisye tsayt hoole fer tas mache? Fer Tomáš, iwer weem mer am aanfang fom artikel kexproch hon, waar es xweyer sayn tsiil trefe fer ti Piipel in een yoer leese. Tee saat: “Ich hon kemërkt tas was ich kepleent hat, waar tsu fiil fer mich. Soo hon ich ëntxlist tas noch mool mache, awer yets teet ich ploos phaar wersikele yeete taach leese un too triwer noo tenke. Te resultaat waar tas ich aan kefang hon mayn leesung kërn hon.” Wayl Tomáš aan kefang hot sayn leesung kërn hon, wolt eyer mee tsayt hoole fer tas mache. Mit te lëngt, hot eyer ti kans Piipel kelees.e

PLAYP NET OONE MUUT WËN PROPLEEME FOER KHOME

14. Was khent es xweyer fer uns lose unser tsiil trefe?

¹⁴ Es is xaat, awer ekaal wii fiil muut un selepst kontrol mer hon, khene tinge pasiire woo es xweyer lose unser tsiil trefe. Tsum payxpiil: “tinge woo mer net waarte” khene ti tsayt xteele woo mer penutse teete fer unser tsiil trefe. (Ekl. 9:11) Orer khan sin tas mer een propleem mit mache woo uns oone muut un mit weenich kraft lost. (Xpr. 24:10) Weeche unser imperfektsyoon, khene mer uns in een aat aan xtele woo es noch xweyer lost unser tsiil trefe. (Rom. 7:23) Orer khan sin tas mer ploos miit sin. (Mat. 26:43) Was khan uns helfe torich soo sorte propleeme triwer wech khome?

15. Wën etwas uns xteert unser tsiil trefe, warom sole mer net uf kepe? (Psalm 145:14)

¹⁵ Los net noo tich aan xtrenge wën etwas tich xteert tayn tsiil trefe. Ti Piipel lost es taytlich tas, aach wën mer propleeme noo un noo mit mache, khene mer uns noch mool uf xtele, hauptseechlich mit Yeehoowa sayn hilef. (Lees Psalm 145:14.)f Te pruuter Philip, iwer weem mer foner traan kexproch hon, saat: “Ich hale mich net traan aan wii fiil mool ich kefal sin, awer aan wii fiil mool ich mich wiiter uf kextelt hon un foran kang sin.” David, iwer weem mer foer heyer kexproch hon, saat: “Wën etwas mich um halt mayn tsiil trefe, fersuuche ich tas siin net wii een propleem, awer wii een keleechenheet fer se tsayche tsu Yeehoowa wii fiil ich tëm liipe.” Yawool, wën mer uns wayter aan xtrenge fer unser tsiile trefe, aach wën tas xweyer is, tsayche mer tsu Yeehoowa wii fiil mer tëm kefale wole. Yeehoowa wërt aarich froo wën eyer siit tayn aanxtrengung fer tayn tsiil trefe!

16. Wën etwas tich um halt tayn tsiil trefe, was khanst tuu too temit lërne?

¹⁶ Lërn etwas fon te propleeme woo xon pasiirt sin. Tenk iwer warom te propleem pasiirt is un froo tich: ‘Was khan ich mache tas es net noch mool pasiire tuut?’ (Xpr. 27:12) Awer khan aach sin tas te propleem tsaycht tas tayn tsiil net meechlich fer tich is. Wën tas tayn situatsyoon is, tuu tayn tsiil wiiter noo kuke un froo tich: ‘Meecht tas noch meechlich fer mich sin?’g Yeehoowa tenkt net tas tuu xwach pist wëns tuu net een tsiil trefst woo unmeechlich fer tich waar. (2 Kor. 8:12)

17. Warom sole mer wayter tenke aan te tsiile woo mer xon ketrof hon?

¹⁷ Tenk aan te tsiile woos tuu xon ketrof host. Ti Piipel saat: “Kot is net unkerecht. Soo ferkest eyer sich net fon [tayn] aarwayt.” (Hep. 6:10) Un tuu solst tas aach net ferkese! Tenk triwer noo aan te tsiile woos tuu xon ketrof host — een fraayntxaft mit Yeehoowa ëntwikele, mit te anere iwer tëm xpreche, sich taafe lose… Yawool, tuu pist xon foran kang un host xon tsiile ketrof. Tas tsaycht tas tuu khanst wayter foran keen un anere tsiile trefe. (Fili. 3:16)

18. Was sole mer mache soo lang wii mer uns aan xtrenge fer unser tsiil trefe? (Kuk aach tas pilt.)

¹⁸ Mit Yeehoowa sayn hilef, tuu khanst tayn tsiil trefe, soo wii een xifsman woo pis sayn tsiil hin khomt. Awer ferkes tich net: fiile xifsmëner tuun sich aach mit te rees fraye. Kraat soo, fray tich wiis tuu mërkst wii Yeehoowa tich helft un seechent in tayn “rees” fer tayn tsiil trefe. (2 Kor. 4:7) Wëns tuu net uf kepst, tuust tuu noch kreeser seechen kriin! (Kal. 6:9)