Ki sa n ka aprann nan sa Jezi te fè nan 40 dènye jou li te pase sou tè a?

1-2. Ki sa k te rive pandan de nan disip Jezi yo t ap mache pou y al Emayis?

NOU nan jou 16 Nizan ane 33 epòk nou an. Disip Jezi yo tris e yo pè. De nan yo kite Jerizalèm pou y al Emayis, yon bouk ki nan yon distans anviwon 11 kilomèt parapò ak Jerizalèm. Mesye sa yo vrèman dekouraje akoz yo fèk touye Jezi, moun yo t ap suiv la. Yo te espere Mesi a t apral fè anpil bèl bagay pou Juif yo, men kounye a li mouri. Sepandan, gen yon bagay yo pa t atann ki rive.

² Gen yon mesye yo pa rekonèt ki vin bò kote yo e k ap mache avèk yo. Disip yo rakonte mesye a tout bagay terib ki te rive Jezi. Mesye a kòmanse pale sou yon seri bagay yo pa t ap janm bliye. Li “kòmanse depi sou liv Moyiz yo ak tout pawòl pwofèt yo te ekri yo”, li esplike poukisa Mesi a te dwe soufri e l te dwe mouri. Lè twa mesye yo rive Emayis, mesye a fè konnen kiyès li ye: li se Jezi ki resisite! Nou ka imajine jan disip yo te kontan aprann Mesi a vivan! — Lik 24:​13-35.

3-4. Lefètke Jezi te ankouraje disip li yo, ki efè sa te gen sou yo, e ki sa nou pral aprann nan atik sa a? (Travay 1:3).

³ Jezi te parèt devan disip li yo plizyè fwa pandan 40 dènye jou li te pase sou tè aa. (Li Travay 1:3.) Pandan tan sa a, Jezi te ankouraje disip li yo ki te tris e ki te pè, e yo te vin gen kè kontan. Yo te gen kouraj pou yo preche e pou yo anseye bon nouvèl konsènan Wayòm nan.

⁴ Nou ka jwenn anpil byenfè lè n egzamine sa Jezi te fè pandan tan sa a. Nan atik sa a, nou pral wè ki jan Jezi te sèvi ak tan sa a: 1) pou l te ankouraje disip li yo, 2) pou l te ede yo pi byen konprann Ekriti yo, e 3) pou l te fòme yo pou yo kapab gen pi gwo responsablite. Nan chak sitiyasyon nou pral wè ki jan nou kapab suiv egzanp Jezi.

ANKOURAJE LÒT MOUN

5. Poukisa disip Jezi yo te bezwen ankourajman?

⁵ Disip Jezi yo te bezwen ankourajman. Poukisa? Gen ladan yo ki te kite kay yo, fanmi yo ak biznis yo pou yo te suiv Jezi nèt (Mat. 19:27). Gen lòt, moun te mal aji avè yo paske yo te vin disip Jezi (Jan 9:22). Yo te fè sakrifis sa yo paske yo te kwè Jezi se Mesi Bondye te pwomèt la (Mat. 16:16). Men, lè yo te touye Jezi, yo te vin tris e yo te dekouraje paske yo pa t konnen ki sa k t apral pase.

6. Ki sa Jezi te fè apre l fin resisite?

⁶ Jezi te konprann se te yon bagay ki nòmal pou disip li yo santi yo tris lè l te mouri a, e l te konnen se pa paske yo te manke lafwa ki fè yo te santi yo konsa. Donk, jou l te resisite a, li te kòmanse ankouraje zanmi l yo. Pa egzanp, li te parèt devan Mari, moun Magdala a, pandan Mari t ap kriye bò tonm li an (Jan 20:​11, 16). Li te parèt tou devan de disip nou te pale de yo nan kòmansman atik la. Epi, li te parèt devan apot Pyè (Lik 24:34). Ki sa nou ka aprann nan egzanp Jezi? Ann wè sa k te rive lè l te parèt devan Mari, moun Magdala a.

7. Selon Jan 20:​11-16, ki sa Jezi te wè Mari t ap fè byen bonè nan maten nan jou ki te 16 Nizan an, e ki sa l te fè pou li? (Gade foto a tou.)

⁷ Li Jan 20:​11-16. Byen bonè nan maten nan jou ki te 16 Nizan an, gen kèk medam fidèl ki te vin nan tonm kote yo te met Jezi a (Lik 24:​1, 10). Annou konsantre sou eksperyans youn nan medam sa yo te fè, anpalan de Mari, moun Magdala. Lè Mari te rive nan tonm nan, li te wè l vid. Li te kouri al di Pyè ak Jan sa epi l te suiv mesye yo pandan yo t ap kouri al nan tonm nan. Lè mesye yo te wè tonm nan vid, yo te retounen lakay yo. Men, Mari te rete la e li t ap kriye. Li pa t konnen si Jezi t ap gade l. Jezi te wè dam sa a ki te fidèl t ap kriye, e l te vle konsole l. Donk, li te parèt devan Mari e li te di yon bagay tou senp ki te ankouraje l anpil. Li te pale avè l e li te ba l yon travay enpòtan: li te voye l al di frè l yo li resisite. — Jan 20:​17, 18.

8. Ki jan nou ka imite Jezi?

⁸ Ki jan nou ka imite Jezi? Nou ka fè anpil bagay pou n ankouraje frè n ak sè n yo pou yo kontinye sèvi Jewova. Menm jan ak Jezi, nou bezwen chèche wè pwoblèm lòt moun genyen, eseye konprann jan yo santi yo epi konsole yo. Ann wè eksperyans yon sè ki rele Jocelyne ki gen yon sè l ki mouri nan yon aksidan terib te fè. Men sa l di: “Pandan plizyè mwa mwen te nan gwo lapenn.” Sepandan, yon frè ak madanm li te envite sè a lakay yo. E yo te pran tan pou yo te koute l, yo te aji avèk jantiyès avè l. E yo te fè l konnen jan li gen anpil valè pou Bondye. Men sa Jocelyne di: “Mwen te santi m sanzespwa. Se kòmsi m t ap neye nan yon gwo lanmè ki move anpil. Men, Jewova te sèvi ak frè ak sè sa a pou pote m sekou. Yo te ede m vin gen anvi pou m kontinye sèvi Jewova.” Nou menm tou nou kapab ankouraje lòt moun lè nou pran tan pou n koute yo pandan y ap di nou sa yo santi, konsa n ap kapab konsole yo epi ede yo pou yo kontinye sèvi Jewova. — Wom. 12:15.

EDE LÒT MOUN KONPRANN PAWÒL BONDYE A

9. Ki difikilte disip Jezi yo te jwenn, e ki jan Jezi te ede yo?

⁹ Disip Jezi yo te kwè nan Pawòl Bondye a e yo te fè gwo efò pou yo aplike l nan lavi yo (Jan 17:6). Men, yo pa t ka konprann poukisa Jezi te mouri sou yon poto tankou yon kriminèl. Jezi te konnen disip li yo gen lafwa e yo renmen Jewova, men, li te rann li kont yo te bezwen pi byen konprann Ekriti yo (Lik 9:​44, 45; Jan 20:9). Se sa k fè li te ede yo konprann sa yo te li nan Ekriti yo. Annou wè jan l te fè sa lè l te parèt devan de disip ki t apral Emayis yo.

10. Ki jan Jezi te ede disip li yo gen konviksyon li se Mesi a? (Lik 24:​18-27).

¹⁰ Li Lik 24:​18-27. N ap remake Jezi pa t fè mesye yo konnen kiyès li ye lapoula. Olye l te fè sa, li te poze yo kesyon. Poukisa l te fè sa? Petèt li te vle yo di sa k nan panse yo ak sa k nan kè yo. E yo te fè sa. Yo te fè l konnen yo te panse Jezi t ap vin delivre pèp Izrayèl la anba jouk Women yo. Apre mesye yo te fin fè Jezi konnen sa k t ap trakase yo, li te itilize Ekriti yo pou ede yo konprann gen anpil pwofesi ki deja reyalizeb. Pita nan aswè, Jezi te pase tan ak lòt disip yo pou l te esplike yo sans pwofesi sa yo genyen (Lik 24:​33-48). Ki sa nou ka aprann nan istwa sa a?

11-12. a) Ki sa nou ka aprann nan fason Jezi te anseye verite ki nan Bib la? (Gade foto yo tou.) b) Ki jan moun ki t ap etidye Labib ak Nortey a te ede l?

¹¹ Ki jan nou ka imite Jezi? Premyèman, lè n ap anseye moun n ap etidye Labib avè yo, poze yo kesyon avèk tak pou n rive wè sa k nan lespri yo ak nan kè yo (Pwo. 20:5). Apre nou fin konprann sa yo santi, montre yo ki jan yo kapab jwenn vèsè k ap ede yo ak sitiyasyon yo ladan l lan. Eseye pa di yo sa pou yo fè. Olye n fè sa, ede yo reflechi sou sa yo li nan Bib la pou yo ka wè ki jan yo kapab aplike prensip biblik yo nan lavi yo. Annou pale sou eksperyans yon frè nan peyi Gana ki rele Nortey te fè.

¹² Lè Nortey te gen 16 an, li te kòmanse etidye Labib. Men, sa pa t pran tan pou fanmi l te opoze avè l. Ki sa k te ede l kontinye etidye Bib la? Moun ki t ap etidye Labib avè l la te sèvi ak Matye chapit 10 pou esplike l vrè kretyen yo t ap jwenn pèsekisyon. Men sa Nortey di: “Donk, lè pèsekisyon te kòmanse, m te gen konviksyon m te jwenn laverite.” Moun ki t ap etidye Labib avè l la te ede l reflechi sou Matye 10:16 ki montre li dwe pridan e l dwe montre respè lè l ap pale ak fanmi l sou kwayans li. Apre Nortey te fin batize, li te vle vin pyonye, men papa l te vle l al nan inivèsite. Moun ki t ap etidye Labib ak Nortey a pa t di l sa pou l fè, okontrè, li te poze l kesyon e li te ede l reflechi sou prensip ki nan Bib la. Ki rezilta sa te bay? Nortey te deside antre nan sèvis aplentan. Papa l te mete l deyò nan kay la. Ki jan Nortey te santi l lè sa te rive? Men sa l di: “Mwen gen konviksyon m te fè bon chwa a.” Lè nou pran tan pou n ede moun yo konprann Ekriti yo, nou kapab ede yo vin gen yon lafwa solid epi kontinye sèvi Jewova. — Efe. 3:​16-19.

EDE FRÈ YO VIN KALIFYE POU YO VIN “GASON KÒM KADO”

13. Ki sa Jezi te fè pou l te ka gen asirans travay predikasyon an t ap kontinye apre l fin retounen nan syèl la? (Efezyen 4:8).

¹³ Lè Jezi te sou tè a li te byen fè travay Papa l te ba l fè yo (Jan 17:4). Jezi pa t panse se li menm sèlman ki kapab fè travay Jewova bay fè. Pandan twazan edmi li te pase ap preche sou tè a li te bay lòt moun fòmasyon. Anvan Jezi te retounen nan syèl la, li te bay disip li yo responsablite pou yo pran swen mouton Jewova yo ki gen anpil valè pou Li e pou yo pran latèt nan travay preche ak anseye a. Sanble kèk nan disip sa yo te nan ventèn yo. (Li Efezyen 4:8.) Mesye sa yo te travay di avèk Jezi, yo te fidèl avè l. Pandan 40 dènye jou Jezi te pase sou tè a , li te ba yo plis fòmasyon toujou pou yo te ka vin “gason kòm kado”. Ki jan l te fè sa?

14. Ki jan Jezi te ede disip li yo vin gen pi bon relasyon ak Jewova pandan 40 dènye jou li te pase sou tè a? (Gade foto a tou.)

¹⁴ Jezi te bay disip li yo konsèy ki t ap bon pou yo, men li te fè sa avèk lanmou. Pa egzanp, li te wè gen kèk nan yo ki te gen tandans gen dout, li te ba yo konsèy sou sa (Lik 24:​25-27; Jan 20:27). Li te di yo tou pou yo plis konsantre sou pran swen pèp Jewova a olye yo konsantre sou fè lajan (Jan 21:15). Li te fè yo sonje pou yo pa konpare sa yo ka fè nan sèvis Jewova a ak sa lòt moun ka fè (Jan 21:​20-22). Li te korije kèk ide ki pa t kòrèk yo te genyen sou Wayòm nan, e l te ede yo pou yo konsantre sou preche bon nouvèl la (Tra. 1:​6-8). Ki sa ansyen yo ka aprann nan egzanp Jezi?

15-16. a) Esplike fason ansyen yo ka imite Jezi. b) Ki jan konsèy Patrick te jwenn nan te ede l?

¹⁵ Ki jan ansyen yo ka imite Jezi? Yo dwe bay frè yo fòmasyon, san wete jèn frè yo, epi ede yo vin kalifye pou yo vin gen pi gwo responsablite nan kongregasyon anc. Ansyen yo pa atann pou moun y ap bay fòmasyon yo pafè. Yo bezwen bay jèn frè yo konsèy avèk lanmou, konsa y ap aprann gen imilite, moun ap ka fè yo konfyans, e y ap vle ede lòt moun. — 1 Tim. 3:1; 2 Tim. 2:2; 1 Pyè 5:5.

¹⁶ Ann wè ki jan yon frè ki rele Patrick te jwenn yon konsèy ki te ede l. Lè l te pi jèn li te gen tandans pale yon fason ki di e l te konn aji fason ki pa janti, menm ak sè yo. Gen yon ansyen ki gen matirite ki te wè Patrick te bezwen chanje. Li te ba l konsèy ki klè, men l te fè sa avèk lanmou. Men sa Patrick di: “Mwen kontan li te fè sa. M te konn santi m dekouraje lè m wè lòt frè jwenn privilèj m ta renmen genyen. Men, konsèy ansyen an te ban m nan te ede m wè mwen bezwen konsantre sou ede frè m ak sè m yo avèk imilite olye m konsantre sou jwenn responsablite oswa privilèj nan kongregasyon an.” Kòm rezilta, Patrick te vin ansyen nan kòmansman ventèn li. — Pwo. 27:9.

17. Ki jan Jezi te montre li te fè disip li yo konfyans?

¹⁷ Jezi te bay disip li yo responsablite nonsèlman pou yo preche, men tou, pou yo anseye. Disip yo te ka santi yo pa kalifye pou travay sa a. Sepandan Jezi pa t gen dout yo t ap ka fè travay sa a e li te di yo sa. Li te tèlman gen konfyans nan yo, men sa l te di: “Menm jan Papa m te voye m nan, mwen menm tou, m ap voye nou.” — Jan 20:21.

18. Ki jan ansyen yo kapab imite Jezi?

¹⁸ Ki jan ansyen yo ka imite Jezi? Ansyen ki gen eksperyans yo bay lòt moun responsablite (Flp. 2:​19-22). Pa egzanp, ansyen yo ka mande jèn frè yo pou yo ede nan netwayaj ak nan antretyen Sal Wayòm nan. Apre ansyen yo fin chwazi frè pou fè yon travay, yo ka ba yo fòmasyon sou fason pou yo fè l epi montre yo fè yo konfyans. Yon frè ki fèk ansyen ki rele Matthew fè konnen li te vrèman apresye lefètke ansyen ki te gen eksperyans te ba l bonjan fòmasyon pou l te fè yon travay yo te ba l fè e yo te gen konfyans li t ap kapab fè l byen. Men sa l di: “Lè m te fè erè, yo te ede m wè m ka aprann nan erè m yo pou m amelyore.”d

19. Ki sa n ta dwe detèmine pou n fè?

¹⁹ Jezi te sèvi ak 40 dènye jou li te pase sou tè a pou l ankouraje lòt moun, pou l anseye yo e pou l ba yo fòmasyon. Ann pran detèminasyon pou n suiv egzanp li pye pou pye (1 Pyè 2:21). L ap ede n fè sa. Epitou, men pwomès li fè: “Mwen avèk nou toule jou rive jis nan fen sistèm nan.” — Mat. 28:20.