Toupatou sou tè a nou pral fè efò pou nou envite moun nan kongrè distri “ Suiv Kris ! ” la
Pwoklamatè yo pral distribye yon feyè espesyal ankò
1 Ane pase, kanpay mondyal nou te fè pou anonse kongrè distri “ Delivrans lan toupre ! ” a te gen bonjan efè sou moun ki enterese yo. Moun ki te aksepte envitasyon espesyal la e ki te asiste kongrè a te patisipe pou premye fwa nan yon bèl festen espirityèl ak Temwen Jewova yo (Iza. 65:13). Yo te kontan pwofite bonjan konpayi frè ak sè nou yo ki ini antre yo (Sòm 133:1). Nan objektif pou nou ede plis moun posib asiste kongrè distri a ki gen kòm tèm “ Suiv Kris ! ”, yon lòt fwa ankò, nou pral patisipe nan distribisyon yon feyè espesyal, yon distribisyon ki pral fèt nan lemonnantye.
2 Rezilta nou te jwenn ane pase : Rapò ki soti tout kote sou tè a, fè nou konnen nou te jwenn bonjan rezilta grasa kanpay nou te fè pou envite moun nan kongrè distri “ Delivrans lan toupre ! ” a. Gen plizyè kote medya yo te pale an byen de kanpay la. Pa egzanp, nan yon vil, gen yon jounal ki te pale sou kanpay la nan yon atik ki pran sis kolòn. Li te di : “ Pou Temwen yo ka rive kontakte tout moun nan zòn nan atan, yo fè yon efò espesyal. Yo pase plis tan ap preche, y al preche pi lwen pase kote yo abitye ale e yo pran mwens tan pou yo pale ak moun yo rankontre yo. ” Distribisyon sa a ki te byen òganize te eveye enterè medya yo nan yon lòt vil, e medya sa yo te pale anpil de sa. Te gen omwen twa jounal ki te fè repòtaj sou aktivite sa a ki te fèt anvan kongrè a. Gen yon jounalis ki te ekri plizyè atik byen long ki pran plis pase de paj nan edisyon dimanch yon jounal. Li te bay anpil detay sou kwayans nou, sou fratènite ki genyen pami nou, sou distribisyon feyè envitasyon an e sou kongrè a. Lè yon pwoklamatè te rive nan yon pòt e li te prezante feyè a bay moun ki te nan kay la, moun nan pa t menm kite l fin pale, li kouri di l : “ Wi, mwen te fèk ap li sa nan jounal ! ” Nan yon lòt kay menm, gen yon dam ki te di : “ Mwen te fèk ap li yon jounal ki pale de nou, epi gade nou gentan la a ! Èske se envitasyon pa m nan sa ? ” Apre sa li di : “ Sa se yon bon travay Temwen Jewova yo ap fè. ”
3 Te gen anpil moun ki te vini nan kongrè a avèk feyè envitasyon yo nan men yo. Gen lòt moun ki enterese ki te soti nan zòn ki byen lwen pou yo vin asiste kongrè a. Bonjan efò nou te fè pou nou envite moun nan kongrè a te kontribye pou ogmante kantite moun ki te prezan. Pa egzanp, gen yon peyi ki te gen 27 pousan moun anplis pase ane pase.
4 Fason pou nou kouvri tèritwa a : Nou ka kòmanse distribye feyè envitasyon an twa semèn anvan kongrè a. Nou ta dwe fè tout efò nou pou nou kouvri tout tèritwa kongregasyon an nèt. Pou kongregasyon ki gen anpil tèritwa, nan dènye semèn anvan kongrè a, pwoklamatè yo kapab kite feyè a nan kay kote ki pa gen moun yo. Y ap mete l yon kote moun k ap pase pap ka wè. Kongregasyon yo ta dwe fè tout efò yo pou yo distribye tout feyè yo resevwa yo e pou yo kouvri plis tèritwa posib. Si gen feyè anplis, pyonye yo kapab distribye yo.
5 Sa nou ka di : Ou kapab di : “ N ap distribye feyè sa a nan lemonnantye pou nou envite moun yo nan yon evènman espesyal nou pral genyen talè konsa. Feyè sa a se pou ou. W ap jwenn plis enfòmasyon ladan l. ” Si nou prezante feyè a yon fason ki brèf, sa ap pèmèt nou fè yon pi gwo distribisyon. Natirèlman, si moun n ap pale avè l la poze nou kesyon, nou dwe pran tan pou nou reponn. Lè nou jwenn yon moun ki montre li enterese, pran nòt epi retounen wè l osito sa posib.
6 Li vrèman esansyèl pou nou fè efò pou nou suiv Kris (Jan 3:36) ! Kongrè distri k ap vini an pral ede tout moun ki vin asiste l yo pou yo rive fè sa. Se sèten efò nou pral fè pou nou anonse kongrè distri “ Suiv Kris ! ” la pral pèmèt nou bay yon gwo temwayaj ankò. Kidonk, se pou nou zele pou nou envite plis moun posib vin asiste kongrè a. Nou swete pou Jewova beni efò nou chak pral fè, etan n ap patisipe nan kanpay mondyal sa a.