Դատաստան ի գործ կը դրուի վճիռի հովիտին մէջ
«Ազգերը թող . . . Յովսափատի հովիտը գան, քանզի բոլոր շրջակայ ազգերը դատելու համար հոն պիտի նստիմ»։—ՅՈՎԵԼԵԱՅ 3։12
1. Յովէլ ինչո՞ւ կը տեսնէ որ բազմութիւններ կը հաւաքուին «Վճիռի հովիտին մէջ»։
«ԲԱԶՄՈՒԹԻՒՆՆԵՐ, բազմութիւններ կը հաւաքուին Վճիռի հովիտին մէջ»։ Այս սրտացունց խօսքերը կը կարդանք Յովելեայ 3։14–ի մէջ։ Իսկ այս բազմութիւնները ինչո՞ւ կը հաւաքուին։ Յովէլ կը պատասխանէ. ‘Եհովայի օրը մօտ է’։ Անիկա Եհովայի ջատագովման մե՛ծ օրն է. օր մը՝ երբ Աստուած դատաստան ի գործ պիտի դնէ այն բազմութիւններուն վրայ, որոնք Քրիստոսի հաստատուած Թագաւորութիւնը մերժած են։ Վե՜րջապէս, Յայտնութիւն 7–րդ գլուխի «չորս հրեշտակներ»ը, պիտի արձակեն «երկրին չորս հովերը»՝ զորս բռնած են՝ որու հետեւանքով, «այնպիսի մեծ նեղութիւն պիտի ըլլայ, որու նմանը աշխարհի սկիզբէն մինչեւ հիմա եղած չէ, ո՛չ ալ պիտի ըլլայ»։—Յայտնութիւն 7։1. Մատթէոս 24։21
2. (ա) Եհովայի դատաստանի գործադրման վայրը ինչո՞ւ տեղին ըլլալով կոչուած է ««Յովսափատի հովիտը»։ (բ) Յովսափատ ի՞նչպէս հակազդեց, երբ յարձակումի ենթարկուեցաւ։
2 Յովելեայ 3։12–ի մէջ, այս դատաստանի գործադրութեան վայրը կոչուած է «Յովսափատի հովիտը»։ Յուդայի պատմութեան փոթորկալից մէկ շրջանին, Եհովա այս վայրին մէջ դատաստան ի գործ դրաւ Յովսափատ բարի Թագաւորին ի նպաստ, որու անունը կը նշանակէ՝ «Եհովան Դատաւոր Է»։ Այդ ժամանակ պատահածը նկատի առնելը, մեզի պիտի օգնէ որ աւելի լաւ հասկնանք մեր օրերուն պատահելիքը։ Այս արձանագրութիւնը կը գտնուի Երկրորդ Մնացորդաց 20–րդ գլուխին մէջ։ Այդ գլուխին առաջին համարին մէջ կը կարդանք թէ «Մովաբի որդիները ու Ամմոնի որդիները ու անոնց հետ Ամմոնացիներէն ալ Յովսափատին հետ պատերազմելու եկան»։ Յովսափատ ի՞նչպէս հակազդեց։ Ան ըրաւ այն ինչ որ Եհովայի հաւատարիմ ծառաները միշտ կ’ընեն նեղութեան ժամանակ։ Ան առաջնորդութեան համար Եհովայի դարձաւ ու ջերմեռանդօրէն աղօթեց. «Ո՛վ մեր Աստուածը, անոնց դատաստան չե՞ս ըներ. քանզի մեր վրայ եկող այս մեծ բազմութեանը դէմ դնելու զօրութիւն չունինք ու չենք գիտեր ի՛նչ ընելու ենք. ուստի մեր աչքերը քեզի կ’ուղղենք»։—Բ. Մնացորդաց 20։12
Եհովա Աղօթքի մը կը Պատասխանէ
3. Երբ Յուդա դրացի ազգերուն կողմէ յարձակումի ենթարկուեցաւ, Եհովա ի՞նչ հրահանգներ տուաւ անոր։
3 Մինչ «բոլոր Յուդայեանները իրենց ընտանիքներովը, կիներովն ու տղաքներովը Տէրոջը առջեւ կեցեր էին», Եհովա պատասխանեց։ (Բ. Մնացորդաց 20։13) Ճիշդ ինչպէս որ ներկայիս «հաւատարիմ ու իմաստուն ծառան» կը գործածէ, Մեծագոյն աղօթքի Լսողը զօրացուց Ղեւտացի Յազիէլը, որպէսզի հոն հաւաքուած ամբոխին Իր պատասխանը տայ։ (Մատթէոս 24։45) Կը կարդանք. «Տէրը ձեզի այսպէս կ’ըսէ. ‘Դուք մի՛ վախնաք ու այս մեծ բազմութեանը երեսէն մի՛ զարհուրիք, քանզի պատերազմը ձերը չէ, հապա Աստուծոյն է։ . . . Այս պատերազմին մէջ դուք պիտի չպատերազմիք. դուք երեւցէք ու կեցէ՛ք, որպէսզի Տէրոջը ձեզի ըրած փրկութիւնը տեսնէք։ . . . Մի՛ վախնաք ու մի՛ զարհուրիք. վաղը անոնց դէմ ելէ՛ք ու Տէրը ձեզի հետ պիտի ըլլայ’»։—Բ. Մնացորդաց 20։15-17
4. Երբ իր ժողովուրդը թշնամիին մարտահրաւէրին դիմաց կը գտնուէր, Եհովա ի՞նչ կերպով ուզեց որ իր ժողովուրդը գործի լծուի եւ ո՛չ թէ ձեռնածալ նստի։
4 Եհովա Յովսափատ Թագաւորէն եւ իր ժողովուրդէն չէր ակնկալեր որ ձեռնածալ նստին ու սպասեն որ հրաշքով փրկուին։ Անոնք նախաքայլը պէտք էր առնէին, թշնամիին մարտահրաւէրը դիմագրաւելու համար։ Թագաւորը եւ ‘բոլոր Յուդայեանները, նոյնիսկ անոնց մանուկները, կիներն ու տղաքը’ զօրաւոր հաւատք ցոյց տուին, երբ հլու–հնազանդ առաւօտ կանուխ ելան ու ներխուժող բազմութեան դէմ գացին։ Ճամբու ընթացքին, թագաւորը շարունակեց աստուածպետական հրահանգներ տալ ու զանոնք խրախուսել, հետեւեալ յորդորը տալով. «Ձեր Տէր Աստուծոյն հաւատացէք ու ապահով պիտի ըլլաք։ Անոր մարգարէներուն հաւատացէ՛ք ու յաջողութիւն պիտի ունենաք»։ (Բ. Մնացորդաց 20։20) Եհովայի հաւատալ. իր մարգարէներուն հաւատալ. ասոր մէջ կը կայանար յաջողութիւնը։ Այսօր ալ, եթէ Եհովայի ծառայութեան մէջ շարունակենք աշխոյժ մնալ, բնա՛ւ չկասկածինք որ Ան մեր հաւատքը յաղթութեամբ պիտի պսակէ։
5. Եհովայի Վկաները ներկայիս ի՞նչպէս աշխուժօրէն Եհովան կը գովաբանեն։
5 Յովսափատի օրուան Յուդայեաններուն նման, պէտք է ‘Եհովայէ գոհանանք, վասն զի անոր ողորմութիւնը յաւիտեան է’։ Այս գոհութիւնը կամ փառաբանութիւնը ի՞նչպէս կրնանք տալ։ Թագաւորութեան նախանձախնդիր քարոզչութեամբ։ Ինչպէս որ Յուդայեանները «ցնծութեան երգն ու օրհնութիւնը սկսան», մենք ալ մեր հաւատքին վրայ գործեր պէտք է աւելցնենք։ (Բ. Մնացորդաց 20։21, 22) Այո, մենք ալ անոնց նման հարազատ հաւատք ցուցաբերենք, մինչ Եհովա մեր թշնամիներուն դէմ յարձակումի կը պատրաստուի։ Կրնայ ըլլալ որ ճամբան մեզի երկար թուի, բայց վճռենք տոկալ ու հաւատքի մէջ աշխոյժ ըլլալ, ինչպէս որ մեր յաղթական եղբայրները կ’ընեն աշխարհի կարգ մը դժուար շրջաններու մէջ։ Կարգ մը երկիրներու մէջ, ուր հալածանք, բռնութիւն, սով եւ տնտեսական խիստ պայմաններ կան, Աստուծոյ հաւատարիմ ծառաները աչքառու յաւելում մը կ’արձանագրեն, ինչպէս Եհովայի Վկաներու 1998–ի Տարեգիրք–ը կը տեղեկագրէ։
Եհովա կը Փրկէ Իր Ժողովուրդը
6. Զօրաւոր հաւատք մը ի՞նչպէս կ’օգնէ մեզի այսօր որ հաւատարիմ մնանք։
6 Յուդայի շուրջ գտնուող ամբարիշտ ազգերը փորձեցին կլլել Աստուծոյ ժողովուրդը, բայց Եհովայի ծառաները օրինակելի հաւատքով, Եհովայի փառաբանութիւնները երգելով դիմադրեցին։ Այսօր ալ, նոյնանման հաւատք մը կրնանք ցոյց տալ։ Մեր կեանքը Եհովան փառաբանող գործերով լեցնելով, մեր հոգեւոր սպառազինութիւնը ամրապնդած կ’ըլլանք, առիթ չտալով որ Սատանայի խորամանկ կերպերը ներթափանցեն։ (Եփեսացիս 6։11) Զօրաւոր հաւատքը՝ մեզ շրջապատող մահացող աշխարհը յատկորոշող նուաստացուցիչ ժամանցներով, նիւթապաշտութիւնով եւ անտարբերութիւնով մտացիր ըլլալու փորձութիւնը պիտի ջախջախէ։ Այս անպարտելի հաւատքը մեզի պիտի օգնէ որ շարունակենք հաւատարմօրէն ծառայել՝ «հաւատարիմ ու իմաստուն ծառայ»ին հետ, մինչ շարունակաբար կը կերակրուինք «ատենին» հայթայթուած հոգեւոր սնունդով։—Մատթէոս 24։45
7. Եհովայի Վկաները իրենց դէմ եղած բազմաթիւ յարձակումներուն ի՞նչպէս հակազդած են։
7 Աստուածաշունչի վրայ հիմնուած մեր հաւատքը մեզ պիտի պաշտպանէ այն ատելավառ արշաւներէն, որոնք Մատթէոս 24։48-51–ի «չար ծառայ»ին հոգին ցուցաբերողներու կողմէ խրախուսուած են։ Այս մարգարէութիւնը յատկանշական կերպով կատարելով, մեր օրերուն հաւատուրացները ժրաջանութեամբ սուտեր ու պրոպականդներ կը ցանեն շատ մը երկիրներու մէջ, նոյնիսկ ազգերուն մէջ հեղինակաւոր անհատներու հետ ձեռք ձեռքի գործելով։ Երբ յարմար տեսած են, Եհովայի Վկաները հակազդած են, ինչպէս բացատրուած է Փիլիպպեցիս 1։7–ի մէջ՝ «աւետարանին ջատագովութեանը ու հաստատութեանը» համար։ Օրինակ, 26 Սեպտեմբեր 1996–ին, Յունաստանէն եկած դատի մը առթիւ, Սթրազպուրկի մէջ գտնուած Մարդկային Իրաւանց Եւրոպական Ատեանի ինը դատաւորները միաձայնութեամբ հաստատեցին թէ «Եհովայի Վկաները՝ ‘ընդունուած կրօնք’ սահմանումին մէջ կ’իյնան», եւ մտածումի, խղճի ու հաւատքի ազատութիւն վայելելու եւ իրենց հաւատքը ուրիշներուն գիտցնելու իրաւունք ունին։ Իսկ հաւատուրացներուն մասին, Աստուծոյ դատաստանը կը նշէ. «Անոնց պատահեցաւ հին ճշմարիտ առակը, որ կ’ըսէ. ‘Շունը նորէն իր փսխածին կը դառնայ ու լուացուած խոզը՝ ցեխի մէջ թապլտկելու’»։—Բ. Պետրոս 2։22
8. Յովսափատի օրերուն, Եհովա ի՞նչպէս դատաստան ի գործ դրաւ Իր ժողովուրդին թշնամիներուն վրայ։
8 Յովսափատի օրերուն Եհովա դատաստան ի գործ դրաւ Իր ժողովուրդին վնասել ուզողներուն վրայ։ Կը կարդանք. «Յուդայի վրայ եկող Ամմոնին ու Մովաբին որդիներուն ու Սէիր լերանը բնակիչներուն դէմ Տէրը դարանակալներ հանեց եւ անոնք կոտորուեցան։ Քանզի Ամմոնի ու Մովաբի որդիները Սէիր լերանը բնակիչներուն վրայ յարձակեցան, որպէս զի զանոնք ջարդեն ու բնաջնջեն։ Երբ Սէիրի բնակիչները հատցուցին, մէկզմէկ կոտորելու սկսան»։ (Բ. Մնացորդաց 20։22, 23) Յուդայեանները այդ վայրը կոչեցին Օրհնութեան Հովիտ։ Արդի ժամանակներուն ալ, երբ Եհովա դատաստան ի գործ դնէ իր թշնամիներուն վրայ, անիկա մեծ օրհնութիւն մը պիտի ըլլայ իր ժողովուրդին համար։
9, 10. Որո՞նք Եհովայի դատապարտութեան արժանի ըլլալնին փաստած են։
9 Թերեւս հարցնէք. Մեր օրերուն, որո՞նք Եհովայի աննպաստ դատավճիռին պիտի արժանանան։ Պատասխանը ստանալու համար, Յովէլի մարգարէութեան պիտի երթանք։ Յովելեայ 3։3–ը կը խօսի իր ժողովուրդին թշնամիներուն մասին, որոնք «տղան պոռնիկի վարձքի տեղ տուին, աղջիկը գինիի համար ծախեցին»։ Այո, անոնք Աստուծոյ ծառաները իրենցմէ շա՜տ նուաստ կը սեպեն, անոնց տղաքը պոռնիկի մը վարձքէն կամ կուժ մը գինիէն աւելի արժէքաւոր չեն նկատեր։ Ասոր համար հաշիւ պիտի տան։
10 Եհովայի աչքին նո՛յնքան զզուելի են հոգեւոր պոռնկութիւն ընողները։ (Յայտնութիւն 17։3-6) Մանաւանդ այպանելի են անոնք որոնք քաղաքական հեղինակութիւնները կը դրդեն, որպէսզի հալածեն Եհովայի Վկաները եւ խափանեն անոնց գործունէութիւնը, ինչպէս ամբոխը ոտքի հանող կղերական առաջնորդներէն ոմանք կ’ընեն ներկայիս Արեւելեան Եւրոպայի մէջ։ Այսպիսի ամբարշտութիւն գործողներուն դէմ քայլեր առնելու իր վճռակամութիւնը յայտնած է Եհովա։—Յովելեայ 3։4-8
‘Պատերազմը Սրբացուցէք’
11. Եհովա իր թշնամիները ի՞նչպէս մարտահրաւէրի կը կանչէ։
11 Ապա, Եհովա կոչ կ’ընէ իր ժողովուրդին, որ ազգերուն մէջ այս մարտահրաւէրը ծանուցանեն. «Պատերազմ յայտարարեցէ՛ք [«սրբացուցէ՛ք», ՆԱ], զօրաւորները արթնցուցէ՛ք, բոլոր պատերազմիկները թող մօտենան ու ելլեն»։ (Յովելեայ 3։9) Ասիկա արտասովոր պատերազմի մը, արդար պատերազմի մը ծանուցումն է։ Եհովայի հաւատարիմ Վկաները հոգեւոր զէնքերով դէմ կը դնեն ստախօս պրոպականդին, ստութիւնը ճշմարտութեամբ չէզոքացնելով։ (Բ. Կորնթացիս 10։4. Եփեսացիս 6։17) Աստուած, պիտի սրբացնէ «Ամենակալ Աստուծոյ այն մեծ օրուանը պատերազմ»ը։ (Յայտնութիւն 16։14) Անիկա երկիրը պիտի մաքրէ Աստուծոյ գերիշխանութեան բոլոր հակառակորդներէն։ Երկրի վրայ իր ժողովուրդը անոր մէջ ֆիզիքական մասնակցութիւն պիտի չբերեն։ Անոնք բառացիօրէն եւ այլաբանօրէն «իրենց սուրերէն խոփեր եւ իրենց նիզակներէն յօտոցներ շին[ած]» են։ (Եսայեայ 2։4) Բայց ասոր հակառակը, Եհովա ազգերուն հետեւեալ մարտակոչը կու տայ. «Ձեր խոփերը սուրեր շինեցէ՛ք ու ձեր յօտոցները՝ նիզակներ»։ (Յովելեայ 3։10) Անոնց հրաւէր կու տայ որ իրենց ամբողջ ռազմամթերքը եւ արդիական զէնքերը պատերազմի մէջ գործածեն։ Բայց չեն կրնար յաջողութիւն գտնել, քանի որ պատերազմը եւ յաղթանակը Եհովայի կը պատկանի։
12, 13. (ա) Հակառակ որ Պաղ Պատերազմը վերջացած է, շատ մը ազգեր ի՞նչպէս ցոյց տուած են որ տակաւին պատերազմը կը սիրեն։ (բ) Ազգերը ի՞նչ բանի համար պատրաստուած չեն։
12 1990–ական թուականներուն սկիզբը, ազգերը յայտարարեցին որ Պաղ Պատերազմը վերջ գտած էր։ Սակայն, Միացեալ Ազգերու՝ խաղաղութեան ու ապահովութեան գլխաւոր նպատակակէտը իրագործուա՞ծ է։ Անկասկած ոչ։ Պուրունտիի, Քոնկօ Դեմոկրատական Հանրապետութեան, Իրաքի, Լիպերիայի, Ռուանտայի, Սոմալի եւ նախկին Եուկոսլաւիոյ իրադարձութիւնները ի՞նչ կ’ըսեն այս մասին։ Երեմեայ 6։14–ի բառերով, անոնք «‘խաղաղութիւն, խաղաղութիւն է’ կ’ըսեն, երբ խաղաղութիւն չկայ»։
13 Թէեւ կարգ մը վայրերու մէջ անմիջական պատերազմները դադրած են, սակայն ՄԱԿ–ի անդամ ազգերը տակաւին իրարու հետ կը մրցին, աւելի արդիական զէնքեր շինելու մէջ։ Անոնցմէ ոմանք կը շարունակեն կորիզային զինամթերք դիզել։ Ուրիշներ քիմիական կամ մանրէաբանական զէնքեր կը շինեն, զանգուածային կործանումի համար։ Մինչ այդ ազգերը Արմագեդոն կոչուած խորհրդանշական վայրին մէջ կը հաւաքուին, Եհովա անոնց մարտահրաւէր կը կարդայ. «Տկար եղողը՝ ‘Ես զօրաւոր եմ’, թող ըսէ։ Շուտով եկէ՛ք, ո՛վ բոլոր շրջակայ ազգեր ու հաւաքուեցէ՛ք»։ Հոս Յովէլ կը միջամտէ իր անձնական կոչով. «Քու մարտիկներդ, ո՛վ Տէր, հոն իջեցուր»։—Յովելեայ 3։10, 11
Եհովա Իրենները կը Պաշտպանէ
14. Որո՞նք են Եհովայի մարտիկները։
14 Որո՞նք են Եհովայի մարտիկները։ Աստուածաշունչին մէջ շուրջ 280 անգամ մեր Աստուածը կոչուած է զօրքերու Եհովա։ (Դ. Թագաւորաց 3։14) Այս բանակները երկնային հրեշտակային գունդերն են, որոնք կազմ ու պատրաստ կեցած են Եհովայի հրամանները կատարելու։ Երբ Ասորիները ջանացին Եղիսէն բռնել, Եհովա վերջապէս Եղիսէի ծառային աչքերը բացաւ, որպէսզի անոնց անյաջողութեան պատճառը տեսնէ. «Ահա լեռը Եղիսէին չորս կողմը հրեղէն ձիերով ու կառքերով լեցուն էր»։ (Դ. Թագաւորաց 6։17) Յիսուս ըսաւ որ կրնար իր Հօրը աղաչել, որպէսզի «տասներկու գունդէն աւելի հրեշտակներ» ղրկէ։ (Մատթէոս 26։53) Արմագեդոնին, դատաստան ընելու համար Յիսուսի արշաւը նկարագրելով, Յայտնութիւնը կը նշէ. «Երկնքի մէջ եղող զօրքերը անոր ետեւէն կ’երթային ճերմակ ձիերով, ճերմակ ու մաքուր բեհեզներ հագած։ Անոր բերնէն սրած սուր մը կ’ելլէր, որպէս զի անով ազգերը զարնէ ու ինք երկաթէ գաւազանով պիտի հովուէ զանոնք ու Ամենակալ Աստուծոյ սաստիկ բարկութեանը գինիին հնձանը ինք պիտի կոխէ»։ (Յայտնութիւն 19։14, 15) Այդ այլաբանական հնձանը վառ կերպով նկարագրուած է որպէս «Աստուծոյ բարկութեան մեծ հնձան»ը։—Յայտնութիւն 14։17-20
15. Յովէլ ի՞նչպէս կը նկարագրէ ազգերուն դէմ Եհովայի պատերազմը։
15 Արդ, Եհովա ի՞նչպէս կը պատասխանէ, Աստուծոյ մարտիկները իջեցնելու Յովէլի խնդրանքին։ Հետեւեալ այս պատկերաւոր խօսքերով. «Ազգերը թող աճապարեն ու Յովսափատի հովիտը գան, քանզի բոլոր շրջակայ ազգերը դատելու համար հոն պիտի նստիմ։ Մանգաղը երկնցուցէ՛ք, քանզի հունձքը հասած է։ Եկէ՛ք, իջէ՛ք, քանզի հնձանը լեցուեցաւ, աւազանները կը յորդին. քանզի անոնց չարութիւնը մեծ է։ Բազմութիւններ, բազմութիւններ կը հաւաքուին Վճիռի հովիտին մէջ։ Արեւն ու լուսինը պիտի խաւարին, աստղերը իրենց պայծառութիւնը պիտի կորսնցնեն։ Տէրը Սիօնէն պիտի գոչէ ու Երուսաղէմէն իր ձայնը պիտի բարձրացնէ, երկինք ու երկիր պիտի սարսին»։—Յովելեայ 3։12-16
16. Եհովայի դատաստանի գործադրութիւնը որո՞նց վրայ ալ պիտի գայ։
16 Ճիշդ ինչպէս որ Յովսափատի անունը կը նշանակէ՝ «Եհովան Դատաւոր Է», այնքան վստահօրէն մեր Աստուածը Եհովան դատաստան գործադրելով լիովին պիտի ջատագովէ իր գերիշխանութիւնը։ Մարգարէութիւնը կը նկարագրէ որ դատավճռի արժանի եղողները ‘բազմութիւններ, բազմութիւններ են, վճիռի հովիտին մէջ’։ Սուտ կրօնքէն մնացած ոեւէ ջատագով, անոնց մէջ պիտի գտնուի։ Անոնց մէջ պիտի ըլլան նաեւ՝ երկրորդ Սաղմոսին մէջ նկարագրուած անհատները՝ ազգերը, ժողովուրդները, երկրի թագաւորները եւ իշխանները, որոնք այս աշխարհի ապականած դրութիւնը նախընտրած են, քան թէ՝ ‘երկիւղով Տէրոջը ծառայել’։ Անոնք չեն ուզեր ‘որդին համբուրել’։ (Սաղմոս 2։1, 2, 11, 12) Անոնք Յիսուսը չեն ընդունիր որպէս Եհովայի ընկերակից Թագաւորը։ Ասկէ զատ, կործանումի համար նշանակուած այդ բազմութիւններուն մէջ պիտի ըլլան այն բոլոր անհատները, զորս փառաւոր Թագաւորը որպէս «այծեր» պիտի որակէ։ (Մատթէոս 25։33, 41) Երբ երկնային Երուսաղէմէն Եհովայի գոչելու ժամանակը գայ, թագաւորներու Թագաւոր եղող իր ընկերակիցը այդ դատաստանը գործադրելու համար պիտի արշաւէ։ Այս ատեն վստահաբար երկինքն ու երկիր պիտի սարսին։ Բայց մեզի հետեւեալ երաշխիքը տրուած է. Եհովա «իր ժողովուրդին՝ ապաւէն ու Իսրայէլի որդիներուն ամրութիւն պիտի ըլլայ»։—Յովելեայ 3։16
17, 18. Որո՞նք բնորոշուած են որպէս մեծ նեղութենէն վերապրողներ, եւ անոնք ի՞նչպիսի պայմաններ պիտի վայելեն։
17 Յայտնութիւն 7։9-17–ն կը նշէ «մեծ բազմութիւն մը», որոնք Յիսուսի արեան փրկարար զօրութեան հաւատք ընծայելուն պատճառաւ ‘մեծ նեղութենէն եկած են’։ Ասոնք Եհովայի օրուան ընթացքին պիտի պաշտպանուին, մինչ Յովէլի մարգարէութեան մեծ բազմութիւնները վճիռի հովիտին մէջ աննպաստ դատավճիռ պիտի ստանան։ Վերապրողներու՝ Յովէլ կ’ըսէ. «Պիտի գիտնաք թէ ես եմ ձեր Տէր Աստուածը, որ իմ սուրբ լերանս վրայ՝ Սիօնի մէջ՝ կը բնակիմ», որ իր պաշտամունքի բարձր վայրն է։—Յովելեայ 3։17ա
18 Հոս մարգարէութիւնը կը տեղեկացնէ որ երկնային Երուսաղէմի շրջանը «սուրբ պիտի ըլլայ, անգամ մըն ալ օտարներ պիտի չանցնին անկէ»։ (Յովելեայ 3։17բ) Այդ երկնային Թագաւորութեան երկնային ու երկրային ծիրին մէջ օտարականներ պիտի չըլլան, քանի որ բոլորն ալ մաքուր պաշտամունքով իրարու միացած պիտի ըլլան։
19. Յովէլ ի՞նչպէս նկարագրած է Աստուծոյ ժողովուրդին ներկայ դրախտանման վիճակը։
19 Նոյնիսկ հիմա, երկրի վրայ գտնուող Եհովայի ծառաներուն մէջ մեծ խաղաղութիւն կը տիրէ։ Անոնք միակամօրէն կը ծանուցանեն իր դատաստանները աւելի քան 230 երկիրներու մէջ եւ աւելի քան 300 լեզուներով։ Յովէլ գեղեցիկ կերպով կը նկարագրէ անոնց բարգաւաճումը. «Այն օրերը լեռները քաղցու պիտի կաթեցնեն, բլուրները կաթ պիտի վազցնեն, Յուդայի բոլոր ձորերը ջուրեր պիտի հոսեցնեն»։ (Յովելեայ 3։18) Այո, Եհովա պիտի շարունակէ իր երկրային փառաբանողներուն վրայ տեղացնել առատ օրհնութիւններ, բարգաւաճութիւն եւ թանկագին ճշմարտութեան երթալով աւելցող հեղեղներ։ Եհովայի գերիշխանութիւնը լիովին ջատագովուած պիտի ըլլայ Վճիռի հովիտին մէջ եւ ուրախութիւնը մեծ պիտի ըլլայ, մինչ ան իր փրկուած ժողովուրդին մէջ յաւիտեան պիտի բնակի։—Յայտնութիւն 21։3, 4
Կը Յիշէ՞ք
◻ Եհովա իր ժողովուրդը ի՞նչպէս ազատեց Յովսափատի օրերուն։
◻ Եհովա որո՞նք կործանումի արժանի կը սեպէ «Վճիռի հովիտին մէջ»։
◻ Որո՞նք են Աստուծոյ մարտիկները, եւ անոնք ի՞նչ մասնակցութիւն պիտի ունենան վերջնական պայքարին մէջ։
◻ Հաւատարիմ երկրպագուները ի՞նչ ուրախութիւն կը վայելեն։
[Նկար՝ էջ 14]
Աստուածաշունչը մեծ նեղութենէն վերապրողներու մեծ բազմութիւն մը կը բնորոշէ