Հրատարակութիւններու սայլակ գործածելով ինչպէ՛ս վկայել

Հրատարակութիւններու սայլակի կամ ցուցասեղանի միջոցաւ վկայելը շատ ազդու կերպ մըն է՝ ազնուասիրտ անհատները ճշմարտութեան քաշելու (Յովհ. 6։44)։ Անոր համար, երէցներուն քաջալերութիւն տրուած է որ հանրային վկայութիւն կազմակերպեն ժողովքին թաղամասին այն շրջանները, որոնք մարդոցմով խճողուած են։ Քանի որ հրատարակութիւններու սայլակները շարժական են, ընդհանրապէս հարկ չկայ հեղինակութիւններէն արտօնութիւն խնդրելու։ Որո՞նք որակեալ են ծառայութեան այս երեսակին մասնակցելու։ Որակեալ են այն հրատարակիչները, որոնք լաւ դատողութիւն ունին, իրենք զիրենք յարգալից կերպով կը ներկայացնեն եւ զրուցելու հմտութիւն ունին։ Հետեւեալները կարգ մը ցուցմունքներ են, որոնք հրատարակիչներուն պիտի օգնեն որ յաջողութեամբ իրենց ծառայութիւնը կատարեն։

Ի՛նչ ընել։

• Անցորդները բարեկամաբար դիմաւորէ եւ անոնց օգտակար դարձիր։ Կարգ մը հրատարակիչներ ջերմ ու անկեղծ ժպիտով մը կը բարեւեն։ Երբ անցորդ մը սայլակին նայի, կրնաս ըսել. «Եթէ բան մը կ’ուզես, կրնաս առնել»։

• Քու եւ սայլակին միջեւ հեռաւորութիւնը թող ըլլայ այն ինչ որ թաղամասիդ մէջ յարմար է։ Կարգ մը տեղեր, հրատարակիչները յաջողութիւն կը գտնեն, երբ սայլակին մօտ կը կենան։ Ուրիշներ կը նկատեն թէ երբ այսպէս ընեն անցորդը կենալու կ’երկմտի, անոր համար անոնք սայլակէն քիչ մը հեռու կը կենան եւ կը սպասեն, մինչեւ որ մէկը սայլակին մօտենայ։ Երբ անհատ մը սայլակին մօտենայ, փորձէ իրեն հետ խօսակցութիւն մը սկսիլ, թերեւս հարցնելով. «Ասկէ առաջ այս հարցումին մասին մտածա՞ծ ես»։

• Կարելի եղածին չափ Աստուածաշունչը գործածէ։

• Երբ անհատ մը առնէ մեր ուսումնասիրելիք հրատարակութիւններէն մէկը, ինչպէս՝ Աստուածաշունչը կը սորվեցնէ գիրքը, խօսէ Աստուածաշունչի ուսումնասիրութեան կարգադրութեան մասին։ Առաջարկէ ելեկտրոնային սարքէ մը իրեն ցոյց տալ Ինչո՞ւ Աստուածաշունչը ուսումնասիրել տեսաերիզը։

• Եթէ կարելի ըլլայ, հետաքրքրուած անհատին հեռաձայնի թիւը կամ հասցէն ձեռք ձգէ։ Եթէ անհատը թաղամասիդ մէջ չի բնակիր, Հաճեցէք այցելել (S-43) պատճէնը լեցուր, եւ կարելի եղածին չափ շուտ քարտուղարին տուր։

Ի՛նչ չընել։

• Յարձակողական, պնդող կամ պարտադրող մի՛ ըլլար եւ սայլակին քով պահակի պէս մի՛ կայնիր։

• Վկայութեան այս տեսակը մի՛ նկատեր պարզապէս հրատարակութիւն բաշխելու կերպ մը։ Երբ ծառայութեան մէջ ենք, մեր նպատակն է Աստուածաշունչի ուսումնասիրութիւններ սկսիլ, անոր համար պէտք է փորձենք մարդոց հետ խօսակցութիւն մը սկսիլ։

• Սայլակին առջեւ մի՛ կայնիր, կամ ծառայակիցիդ հետ անդադար մի՛ խօսիր։ Եթէ հարկ ըլլայ հեռախօսիկդ գործածելու, ընդհանրապէս լաւ կ’ըլլայ որ սայլակէն հեռանաս։

• Հակառակորդներուն հետ մի՛ վիճաբանիր։ Եթէ հակառակորդ մը նախատական խօսքեր ըսէ, թերեւս անհրաժեշտ ըլլայ ուրիշ վայր մը փոխադրուիլ։