Ուրիշներուն կարեկցէ

Խնդիրը

Եթէ չափէ դուրս կեդրոնանանք այն բանին վրայ, թէ ուրիշներ մեզմէ որչա՛փ տարբեր են, այդ տարբերութիւնները թերեւս թերութիւններ կամ տկարութիւններ նկատենք։ Ատիկա պատճառ կրնայ դառնալ, որ մեզմէ տարբեր եղողները ստորադաս սեպենք։ Երբ այսպիսի ժխտական աչքով դիտենք ուրիշները, դժուար պիտի ըլլայ անոնց կարեկցիլ։ Կարեկցութեան պակասը կրնայ ցոյց տալ, որ աւելի խոր խնդիր կայ՝ նախապաշարում։

Սուրբ Գիրքէն սկզբունք

«Խնդացողներուն հետ խնդացէ՛ք եւ լացողներուն հետ լացէ՛ք» (ՀՌՈՎՄԱՅԵՑԻՍ 12։15)։

Ի՞նչ կը նշանակէ։ Այս սկզբունքը կրնանք երկու բառով արտայայտել՝ կարեկից ըլլալ։ Կարեկից ըլլալը այն կարողութիւնն է, որ մեր անձը ուրիշին տեղը դնենք եւ անոր հետ զգանք։

Կարեկցութիւնը ինչպէ՞ս կ’օգնէ

Երբ մէկու մը հետ կը զգանք, կը սկսինք գիտակցիլ թէ որչա՜փ նման ենք իրեն։ Կ’անդրադառնանք, որ ինք կրնայ մեզի պէս զգալ եւ մեզի պէս հակազդել։ Կարեկցութիւնը կ’օգնէ, որ հասկնանք թէ բոլոր մարդիկը,– ի՛նչ ալ ըլլայ անոնց ենթահողը,– մէկ ընտանիքի մաս կը կազմեն։ Ո՛րքան աւելի կեդրոնանանք այն բանին վրայ, թէ որչա՜փ մեզի նման են, ա՛յդքան աւելի քիչ հաւանականութիւն պիտի ըլլայ, որ զանոնք ժխտականօրէն դատենք։

Ասկէ զատ, երբ մէկու մը հետ զգանք, դիւրաւ զինք պիտի յարգենք։ Սենեկալէն եղող Էն–Մարին ատեն մը ցած աչքով կը դիտէր այն մարդիկը, որոնք շատերու կարծիքով՝ ստորադաս խաւի կը պատկանէին։ Ան կը բացատրէ, թէ կարեկցութիւնը իրեն ինչպէ՛ս օգնեց. «Երբ տեսայ ստորադաս խաւի պատկանողներուն կրած դժուարութիւնները, ես ինծի հարցուցի, որ եթէ անոնց տեղը ըլլայի, ի՛նչ պիտի զգայի։ Այդպիսով սկսայ գիտակցիլ, որ այդ մարդոցմէն բարձր չեմ։ Բան մը չէի ըրած, որ անոնցմէ աւելի լաւ սեպուիմ»։ Իրապէս, երբ ջանանք ուրիշներուն դժուարութիւնները հասկնալ, աւելի պիտի մղուինք կարեկցելու, քան քննադատելու։

Ի՞նչ կրնաս ընել

Ջանա՛ տարբերութիւններէն անդին նայիլ եւ գտիր նմանութիւններ քու եւ այն մարդոց միջեւ, որոնց մասին ժխտական տեսակէտ ունիս։ Օրինակ, երեւակայէ թէ ինչպէ՛ս կը զգան, երբ՝

• իրենց ընտանիքին հետ կը ճաշեն

• ամբողջ օրը ծանր կ’աշխատին

• իրենց բարեկամներուն հետ ժամանակ կ’անցընեն

• իրենց նախասիրած երաժշտութիւնը մտիկ կ’ընեն

Ետքը, փորձէ ինքզինքդ երեւակայել անոնց պարագային մէջ։ Դուն քեզի հարցուր.

• ‘Ինչպէ՞ս պիտի հակազդէի, եթէ մէկը ինծի անարժէք զգացնէր’։

• ‘Ինչպէ՞ս պիտի զգայի, եթէ ուրիշներ զիս դատէին՝ առանց նոյնիսկ զիս ճանչնալու’։

• ‘Եթէ անոնց խումբէն ըլլայի, ինչպէ՞ս պիտի ուզէի, որ ուրիշներ հետս վարուէին’։