Կրնաս հալածանքին դիմանալ

Ուշ կամ կանուխ, բոլոր քրիստոնեաները հակառակութեան դիմաց պիտի գտնուին, եւ նոյնիսկ պիտի հալածուին։ Ասիկա պէ՞տք է մեզ վախցնէ։

1. Ինչո՞ւ պիտի հալածուինք

Սուրբ Գիրքը յստակօրէն կ’ըսէ. «Ամէն անոնք որ կ’ուզեն աստուածպաշտութեամբ ապրիլ Քրիստոս Յիսուսով՝ հալածանք պիտի կրեն» (Բ. Տիմոթէոս 3։12)։ Յիսուս հալածուեցաւ, քանի որ Սատանայի աշխարհին մէկ մասը չէր։ Մենք ալ աշխարհի մէկ մասը չենք, անոր համար չենք զարմանար, երբ կառավարութիւնները եւ կրօնական կազմակերպութիւնները մեզ կը հալածեն (Յովհաննէս 15։18, 19)։

2. Ինչպէ՞ս կրնանք հալածանքին համար հիմակուընէ պատրաստուիլ

Պէտք է Եհովայի հանդէպ մեր վստահութիւնը հիմակուընէ աւելցնենք։ Ամէն օր ժամանակ տրամադրէ, որ իրեն աղօթես եւ իր Խօսքը կարդաս։ Կանոնաւորաբար ներկայ եղիր ժողովներուն։ Այս բաները ընելով զօրութիւն պիտի հաւաքես՝ քաջութեամբ դիմանալու հալածանքին, նոյնիսկ եթէ անիկա ընտանիքի անդամներուն կողմէ ըլլայ։ Պօղոս առաքեալ, որ յաճախ կը հալածուէր, գրեց. «Տէրը իմ օգնականս է, ուստի ես պիտի չվախնամ» (Եբրայեցիս 13։6)։

Նաեւ աւելի քաջութիւն պիտի ունենանք, երբ կանոնաւորաբար կը քարոզենք։ Քարոզելով կը սորվինք Եհովային վստահիլ եւ մարդոցմէ չվախնալ (Առակաց 29։25)։ Եթէ սորվիս հի՛մա քաջութեամբ քարոզել, լաւ պատրաստուած պիտի ըլլաս քարոզելու, նոյնիսկ երբ կառավարութիւնը մեր գործը արգիլէ (Ա. Թեսաղոնիկեցիս 2։2)։

3. Հալածանքին դիմանալով ինչպէ՞ս կ’օգտուինք

Անշուշտ, մենք հալածուելէ հաճոյք չենք առներ, բայց երբ հալածանքին կը դիմանանք, մեր հաւատքը կը զօրանայ։ Եհովային աւելի կը մօտենանք, քանի որ ան մեզի կ’օգնէ, երբ կը զգանք թէ այլեւս չենք դիմանար (կարդա՛ Յակոբոս 1։2-4)։ Եհովան ցաւ կը զգայ մեր չարչարանքը տեսնելով, բայց իր սիրտը կ’ուրախանայ, տեսնելով որ չենք յանձնուիր։ Սուրբ Գիրքը կ’ըսէ. «Եթէ բարիք գործելով չարչարուիք ու համբերէք, ասիկա Աստուծոյ քով շնորհք մըն է» (Ա. Պետրոս 2։20)։ Եհովան հաւատարիմ մնացողներուն պիտի տայ յաւիտենական կեանք աշխարհի մը մէջ, ուր մէ՛կը ճշմարիտ պաշտամունքին պիտի չհակառակի (Մատթէոս 24։13)։

ԱՒԵԼԻ՛ ՊՐՊՏԷ

4. Կրնաս ընտանիքիդ հակառակութեան դիմանալ

Յիսուս ըսաւ, որ թերեւս մեր ընտանիքը չընդունի մեր որոշումը, որ Եհովան պաշտենք։ Կարդացէ՛ք Մատթէոս 10։34-36 եւ քննարկեցէ՛ք այս հարցումը.

• Ի՞նչ կրնայ պատահիլ, երբ ընտանիքի մէկ անդամը որոշէ Եհովային ծառայել։

ՎԻՏԷՕ. Եհովան մեզ ընդունեց (5։13)

• Ի՞նչ պիտի ընես, եթէ ազգական մը կամ բարեկամ մը ճնշէ վրադ, որ Եհովային չծառայես։

Կարդացէ՛ք Սաղմոս 27։10 եւ Մարկոս 10։29, 30։ Ամէն մէկ համար կարդալէ ետք, քննարկեցէ՛ք այս հարցումը.

• Այս համարը ինչպէ՞ս կրնայ քեզի օգնել, եթէ ընտանիքդ կամ բարեկամներդ քեզի հակառակին։

5. Շարունակէ Եհովան պաշտել հակառակ հալածանքին

ՎԻՏԷՕ. Քաջ ըլլալ՝ հակառակ հալածանքին (6։27)

• Այս վիտէոյին մէջի օրինակները ինչպէ՞ս քեզ կը զօրացնեն։

Կարդացէ՛ք Գործք 5։27-29 եւ Եբրայեցիս 10։24, 25։ Ամէն մէկ համար կարդալէ ետք, քննարկեցէ՛ք այս հարցումը.

• Ինչո՞ւ շատ կարեւոր է, որ շարունակենք Եհովան պաշտել, նոյնիսկ եթէ կառավարութիւնը ըսէ, որ չքարոզենք կամ ժողովներ չընենք։

6. Եհովան քեզի պիտի օգնէ, որ դիմանաս

ՎԻՏԷՕ. Եհովա Աստուած ինծի ոյժ պիտի տայ (3։40)

• Վիտէոյին մէջ, ի՞նչը այդ Վկաներուն օգնեց որ դիմանան։

Կարդացէ՛ք Հռովմայեցիս 8։35, 37-39 եւ Փիլիպպեցիս 4։13։ Ամէն մէկ համար կարդալէ ետք, քննարկեցէ՛ք այս հարցումը.

• Այս համարը ինչպէ՞ս քեզ կը վստահեցնէ, որ կրնաս դիմանալ որեւէ փորձութեան։

Կարդացէ՛ք Մատթէոս 5։10-12 եւ քննարկեցէ՛ք այս հարցումը.

• Ինչո՞ւ կրնաս ուրախ ըլլալ, նոյնիսկ երբ հալածուիս։

ԱՄՓՈՓՈՒՄ

Եհովան կ’արժեւորէ մեր ջանքերը, որ իրեն ծառայենք հակառակ հալածանքին։ Իր օգնութեամբ, կրնա՛նք դիմանալ։

Վերաքաղ

• Քրիստոնեաները ինչո՞ւ կը հալածուին։

• Հիմակուընէ ի՞նչ կրնաս ընել, որպէսզի պատրաստ ըլլաս երբ հալածանքը գայ։

• Ի՞նչ բան կրնայ քեզի օգնել, որ վստահ ըլլաս թէ կրնա՛ս Եհովային ծառայել հակառակ որեւէ փորձութեան։

ԱՒԵԼԻ՛Ն ԳԻՏՑԻՐ

Նկատի առ երիտասարդ եղբայր մը, որ կը բացատրէ թէ ինչպէ՛ս Եհովան իրեն օգնեց որ դիմանայ, երբ բանտարկուեցաւ, քանի որ ուզեց չէզոք մնալ։

Տոկալ հակառակ՝ հալածանքին (2։34)

Տե՛ս թէ ի՛նչ բան զոյգի մը օգնեց, որ երկար տարիներ հաւատարմօրէն Եհովային ծառայեն՝ հակառակութեան դիմաց։

Եհովային կը ծառայենք փոփոխութիւններով լեցուն ժամանակի մէջ (7։12)

Տե՛ս թէ ինչպէ՛ս կրնաս քաջ ըլլալ, երբ կը հալածուիս։

«Հիմակուընէ հալածանքին պատրաստուէ» (Դիտարան յուլիս 2019)

Ինչպէ՞ս պէտք է նկատենք ընտանեկան հակառակութիւնը, եւ ի՞նչ կրնանք ընել որ Եհովային հաւատարիմ մնանք։

«Ճշմարտութիւնը չի բերեր ‘խաղաղութիւն, հապա՝ սուր’» (Դիտարան հոկտեմբեր 2017)