Juli

Jesus aa horere komeripura nongaro ya Ihe moviṋa avihe mbyaa hungire nokutjita, nu imbyo vi kamburira mo ovihimise mbya tjita. (Joh. 14:9) Ovihimise Jesus mbya tjita mavi tu hongo tjike? Jesus na Ihe ve tu suvera tjinene. Indu Jesus tja ri kombanda yehi, eye wa raisa omuano mbwa suvera ovandu mokuungurisa omasa ye okuvatera imba mba ri mouzeu. Otjikando tjimwe, ovarumendu vevari mba poṱuparere ve mu ningira kutja me ve vatere. (Mat. 20:​30-34) Jesus “we ve ṱira ondjenda,” nu okuzambo e ve verukisa. Omambo nga “we ve ṱira ondjenda” mOtjigrike ye heya kutja okuṱotjari tjiri okuza komutima. Otjari otja iho, wina tja hinga Jesus okuraisa orusuvero kovandu mokuparura imba mba ṱire ondjara, nokuverukisa omundu ngwa verere omutjise wongana. (Mat. 15:32; Mar. 1:41) Eṱe tu nongamburiro kutja Jehova Mukuru “omunatjari,” nOmuna we ve tu suvera tjinene nu ve hihamwa indu ovandu tji mave munu omauzeu. (Luk. 1:78; 1 Petr. 5:7) Owo tjiri ve undja nonḓero okukaisa po omauzeu ayehe nge ṱuna kovandu. w23.04 3 ¶4-5

Eṱe matu sokukondja nomasa okuyepa okulesa nokupuratena koumune woposyo mbu tjiukwa mouye wa Satan. Eṱe matu yenene okuurisa omeripura wetu noviṋa oviwa mokulesa nokukonḓonona Ombeibela. Okuyenda kozombongarero zombongo nokukara norupa motjiungura tjokuzuvarisa ku tjevera omeripura wetu. Jehova we tu kwizikira kutja, ke nokututarera ama tu rorwa okukapita omasa wetu. (1 Kor. 10:​12, 13) Auhe wetu ma hepa okukumba tjinene kutja ma rire omuṱakame ku Jehova momayuva omazeu omasenina inga. Jehova u vanga kutja tu ‘Mu raere omaumba wetu aehe’ mongumbiro. (Eps. 62:8) Raisa ondangi nokutanga Jehova ku imbi avihe mbye tjita. Ningira kutja me ku vatere okukara nouvanḓe motjiungura tjokuzuvarisa. Riheka ku ye kutja me ku vatere okutuurunga omauzeu nokurwisa omarorero ngu mo munu. O yandjere otjiṋa poo omundu okukutjaera okukumba ku Jehova eyuva arihe. w23.05 7 ¶17-18

Ongwaye tji tu kara pozombongarero zombongo? Epu enenenene, okutanga Jehova. (Eps. 26:12; 111:1) Eṱe wina tu kara pozombongarero zombongo kokutja tu yenene okuyanḓiparisasana moruveze oruzeu ndwi. (1 Tes. 5:11) Indu tji matu ziri pozombongarero zombongo, eṱe tu yenenisa oviṋa vivari mbyo. Posi yokutja, mape ya ape kara oviṋa mbi mavi tjiti kutja i rire ouzeu kweṱe okuzira. Eṱe mape ya atu tira okuzira poo mape ya atu vanga okuyandja omaziriro povikando ovingi, posi yokutja ingwi ngu ma hongorere po a ha yenene okutupura indu tji twa yere eke. Ovikwaye mbi mavi yenene okutuvatera? Omuapostele Paulus wa tja matu sokuyandja ombango ‘okupanḓiparisasana.’ Indu tji matu tjiwa kutja varwe mave yenene okuyanḓiparisiwa i yongamburiro yetu, nandarire tji matu yandja eziriro esupi, eṱe katu kara nemuma tjinene. Nu indu tji tu ha ningirirwe potuingi okuzira, eṱe matu yenene okukara nondjoroka kutja varwe mombongo va yenene okuzira.—1 Petr. 3:8. w23.04 20 ¶1-3

Ombara ya pitisa omatjivisiro. Ovajuda mba ri ovahuurwa moBabilon oure wozombura 70, va pewa ouyara okuyaruka kehi rawo, Israel. (Esra 1:​2-4) Jehova erike ongwaa yenene okuyenenisa otjiṋa ho. Babilon kaatji isa ovahuurwa vatjo. (Jes. 14:​4, 17) Posi yokutja Babilon tja haverwa, nomunane omupe wa yandjera Ovajuda okupita moBabilon. Omujuda auhe, nu tjinene oviuru vyomaṱunḓu aavi sokutoora omukambo wokupita poo wokukara moBabilon. Omukambo mbwo mape ya ka wa ri omupupu okutoora. Ovandu ovengi mape ya va ri notjiwondo otjinene okutoora ouyenda oure mbwo. Nu mena rokutja Ovajuda ovengi va kwaterwa moBabilon, oyo ongari omaturiro ngaave tjiwa. Ku wo, Israel ra ri ehi rooihe mukururume. Nu pe munika tjimuna Ovajuda tjiva va ka rira ovatumbe moBabilon. Ku nao, mape ya owo aave munu ko ouzeu okuisa omaturiro wawo omawa poo ozongetjefa zawo nokukatura mehi ndi ve hi nokutjiwa. w23.05 14 ¶1-2

Embo ra Mukuru ri tu tunduuza okukurisa onḓarorure, otjari, norusuvero. Lukas 21:19 mari tja: “Panḓereye po, nu indino otji mamu yama omiinyo vyeṋu.” Ovakolose 3:12 mari tja: “Otji mamu sokukara notjari.” Nu 1 Ovatesalonika 4:​9, 10 mari tja: “Eṋe oveni mwa hongwa i Ndjambi okusuverasana . . . nungwari matu riyarikaṋa ku eṋe, vakwetu, kutja mu ryamene ko tjinene moviṋa mbi.” Omambo ayehe nga ya tjangwa kovahongewa mba ve raisa onḓarorure, otjari, norusuvero. Posi ya, owo aave sokukayenda komurungu okukurisa ovikaṋena mbi. Eṱe matu sokutjita nao wina. Kutja vi ku vatere, tara komuano Ovakriste ovakuru mu va raisa ovikaṋena mbi. Nu okuzambo mo kamuna omuano mu mo yenene okuhorera kovahongewa mbo, nokuraisa kutja we rirongerera ozombamisiro ozonene tjinene. Nu indu ozombamisiro ozonene tjinene tji za utu, ove tjandje we rihonga okupanḓera po nu mo rimanene okukayenda komurungu okutuurunga. w23.07 3 ¶4, 8

Kainatja kutja oweṱe ovatwirisiwa poo ‘ozonḓu zarwe,’ eṱe matu hepa okupanḓera ‘mOndjira yOuyapuke.’ Ihi matji tu vatere okukayenda komurungu okurikotamena ku Jehova nai na moruyaveze, indu Ouhona wa Mukuru tji ma u eta ozongaro ozosemba kombanda yehi. (Joh. 10:16) Okuza mo-1919 O.Z., ovarumendu, ovakazendu, novanatje ovengi ve pita mu Babilon Otjinene tji tji kuramena po ozongamburiro azehe zoposyo mouye, nu owo va uta okuryanga mondjira ndja sasanekwa otjondjira youyapuke. Indu Ovajuda tji va pita moBabilon, Jehova wa isa mo oviputarise avihe mondjira yawo. (Jes. 57:14) “Ondjira yOuyapuke” ya ṱunwa vi moruveze rwetu? Oure wozombura ozengi komurungu wombura ndji 1919, Jehova wa ungurisa ovandu mba ri nondira ku ye okuvatera varwe okupita mu Babilon Otjinene. (Sasaneka Jesaja 40:3.) Owo va ungura otjiungura otjinanḓengu okutjita kutja ovandu vomitima omiwa ve ise ozongamburiro zoposyo nu ve rikotamene ku Jehova pu novakarere ve. w23.05 15-16 ¶8-9

Jehova u vanga kutja tu mu karere nondjoroka nokuhinokuṋiṋikiziwa. (2 Kor. 9:7) Hapo matu sokukayenda komurungu okuyenenisa ondando motjiungura tja Jehova indu tji tu hi nonḓero okutjita nao? Tara kotjihorera tjomuapostele Paulus. Eye wa tja: “Ami mbi tona orutu rwandje ru tindire, nu mbi ru ete kehi youkarere.” (1 Kor. 9:​25-27) Nandarire kutja Paulus kaari nonḓero yokutjita imbi Jehova mbyaa vanga kutja ma tjite, eye wa kondja nomasa okutjita nao. Hapo Jehova wa ri nonyuṋe na imbi Paulus mbye mu tjitira? Ii, otjiperi. Nu Jehova we mu pa outoṋi mena rozongondjero ze. (2 Tim. 4:​7, 8) Momuano tjingewo, Jehova u kara nonyuṋe indu tji me tu munu tji matu kondjo okuyenenisa ondando yetu, nandarire kutja katu nonḓero okutjita nao. Nandarire kutja katu ya suvera otjiungura tji matu kondjo okuungura, eye u kara nonyuṋe indu tji matu tjiti otjiṋa mena rorusuvero ndu tu na rwo ku na ye. Tjimuna Jehova tja sera Paulus ondaya, eye me tu sere ondaya mena rozongondjero zetu. (Eps. 126:5) Otja tji matu munu ozondaya za Jehova, eṱe mape ya atu kara nonḓero. w23.05 29 ¶9-10

Omuapostele Paulus wa sasaneka imba mbe hi nokutuurunga eyuva ra Jehova ku novandu mba rara. Owo kave tjiwa oviṋa ongondoroka na wo poo omakayendero woiri. Ku nao, owo kamaave tjiwa indu tji pa tjitwa otjiṋa otjinanḓengu nu kamaave yenene okutjita ko otjiṋa. Ovandu ovengi ndino ve ri tjimuna ovandu mba rara. (Rom. 11:8) Owo kave kambura moviraisiro mbi raisa kutja tu hupa “momayuva omasenina” nokutja ozombamisiro ozonene tjinene maze ya moruveze rwopopezu. (2 Petr. 3:​3, 4) Posi yokutja, eyuva arihe i rira ounahepero kweṱe okukara katumba. (1 Tes. 5:6) Ku nao, eṱe matu sokuporimana nokuhinokuyaraara. Omena raye? Kokutja atu ha kara norupa moviṋa vyopolotika poo omauzeu wotjiwaṋa. Oṋiṋikizire yokukara nomunda moviṋa otja imbyo mai ririre ko onḓeu otja eyuva ra Jehova tji mari tumbuka popezu. Posi ya, katu nokuhepa okurikenda ohunga nokutja matu tjiti vi. Ombepo ya Mukuru mai yenene okutuvatera okuporimana nokuhinokuyaraara nokutjita kutja tu twe po ozondando ozombwa.—Luk. 12:​11, 12. w23.06 9-10 ¶6-7

Mo ripura ohunga na iye indu tji wa zuu ena ndi Simson? Ove mape ya o ripura ohunga nomurumendu ngwa ri omunamasa tjinene. Otjingaperi. Posi yokutja Simson wa toora omukambo mbwe mu etera omihihamo omingi. Nungwari, Jehova wa yandja ombango kongamburiro onḓakame ya Simson, neye wa tjita kutja ongamburiro ye onḓakame i tjangwe mOmbeibela kokutja tu mune mo ouwa. Jehova wa ungurisa Simson okuyenenisa oviṋa ovihimise okuvatera ovakarere ve Ovaisrael. Ozombura ozengi kombunda yonḓiro ya Simson Jehova wa hinga omuapostele Paulus okutjanga ohunga novandu mba ri nongamburiro, mu mamu kamburire mo Simson. (Hebr. 11:​32-34) Otjihorera tja Simson matji yenene okutuyanḓiparisa. Eye we riyamekere ku Jehova, nandarire kehi yozongaro ozonḓeu ma ri. Matu yenene okurihongera ku Simson nomuano otjihorera tje mu matji yenene okutuyanḓiparisa. w23.09 2 ¶1-2

Eṱe matu yenene okukurisa onḓarorure yetu mokukumba ku Jehova aruhe nokumuraera ozongendo zetu azehe. (1 Tes. 5:17) Ngahino nai ko nomauzeu omanene. Nandarire nao, hapo u ningira ombatero ya Jehova indu tji wa pindike poo tji u hi nokutjiwa kutja ngo tjite vi? Indu tji wa ningire ombatero ya Mukuru nai ngunda au nomauzeu omaṱiṱi, ove komoo keyakeya okutjita nao indu tji wa kamuna omauzeu omanene moruyaveze. Ove mo kara nongamburiro kutja ma tjiwa kutja oruṋe tji me ku vatere nokutja me ku vatere vi. (Eps. 27:​1, 3) Eṱe mape ya atu tuurunga ozombamisiro ozonene tjinene moruyaveze indu tji twa tuurunga omauzeu ngu tu muna ndino. (Rom. 5:3) Omena raye tji matu yenene okutja nao? Ovakambure ovakwetu ovengi ve tja otjikando atjihe tji va tuurunga omauzeu omanene, ku ve vatera okutuurunga omauzeu yarwe. Indu tji va tuurunga ouzeu nombatero ya Jehova, owo ve kara nongamburiro onyingi kutja Jehova u nonḓero okuvevatera. Nu mena rokutja ve nongamburiro mu Jehova, owo ve yenena okutuurunga ouzeu warwe.—Jak. 1:​2-4. w23.07 3 ¶7-8

Otjari tja Jehova nomerisusuparisiro we ye mu hinga kutja ma puratene koumune wavarwe. Otjotjihorera, Jehova wa raisa omerisusuparisiro we indu tjaa sokunyona ovandu ovarunde va Sodom. Jehova wa pitira movaengeli ve, okuraera omurumendu omusemba Lot kutja nga taurire kozondundu. Lot aa tira okuyenda ngo. Ku nao, eye we riheka kutja eye neṱunḓu re ve yandjerwe okutaurira koSoar, okarongo okaṱiṱi kaake sokunyonwa wina. Jehova atja yenena okuṋiṋikiza Lot kutja a tjite otja pe mu raere. Posi yokutja Jehova wa yandjera Lot okuyenda koSoar, nu eye ka nyonene okarongo ngo. (Gen. 19:​18-22) Ozombura ozengi kombunda yanao, Jehova wa raisa otjari kovature va Ninive. Eye wa hinda omuprofete Jona okukaraera ovandu ovarunde va Ninive kutja owo notjihuro tjawo mave yekunyonwa. Posi yokutja indu ovature va Ninive tji ve ritanaura, Jehova we ve ṱira otjari na ha nyono otjihuro ho.—Jona 3:​1, 10; 4:​10, 11. w23.07 21 ¶5

Matu rihongere ko ye kotjihorera tja Joas? Eye wa ri tjimuna omize vyomuti mbi ha hitire oukoto mehi, mbi vaterwa i yotjiunda tjomuti. Kombunda ya indu Jojada ngwee mu vatere tja ṱa, Joas wa uta okupuratena kovapirukire neye ka karere nouṱakame ku Jehova rukwao. Otjihorera hi matji raisa kutja eṱe katu sokukara nonḓuviro ku Mukuru mena rokutja oveṱunḓu retu na varwe mombongo va twa po otjihorera otjiwa kweṱe okutjita nao. Kokutja tu kare popezu na Jehova, eṱe matu sokukurisa orusuvero rwetu nondengero yetu ku ye mokukonḓonona Ombeibela aruhe, okuripurira ko oukoto nokukumba. (Jer. 17:​7, 8; Kol. 2:​6, 7) Jehova ka undjire ko ovingi ku eṱe. Imbi mbye undjira ko kweṱe vi ri mOmuzuvarise 12:​13, ndi mari tja: “Kara nondira ku Ndjambi, nu u ṱakamise omatwako we; orondu ihi otjiṋa tji tji sokutjitwa i omundu auhe.” Indu tji tu nondira ku Mukuru, eṱe matu panḓere pouṱakame ku Jehova, nandarire kutja kwa tjitwa tjike moruyaveze. Kape notjiṋa tji matji yenene okuteya oupanga wetu ku na Jehova. w23.06 18-19 ¶17-19

Omakwizikiro wa Mukuru ya uta nomambo nga mezeva oritjatano: “Nu Ingwi ngu ri kotjihavero tjouhona arire tja tja.” (Omavan. 21:5a) Omambo nga i yemwe yovikando vitatu mbi ri membo rOmavandururiro indu Jehova tji ma hungire movirimunikise. Omakwizikiro ngo kaye yandjerwe i yomuengeli omunamasa poo i Jesus ngwa pendurwa, nungwari ya yandjewa i Jehova omuini. Iho tji raisa kutja omambo nga kongorera ko matu yenene okukambura mo. Omena raye? Mena rokutja Jehova ‘oNdjambi ngu ha wovisa.’ (Tit. 1:2) Ku nao, omambo nge ri mOmavandururiro 21:​5, 6 tjiri maye yenenisiwa. Ngatu tare kembo ndi “Tara.” Embo rOtjigrike ku kwa za embo ndi “tara” ra ungurisiwa povikando ovingi membo rOmavandururiro. Omambo yeṋe nga kongorera ko? Eye wa tja: “Ami me yarura avihe koupe!” Otjiperi kutja Jehova ma hungire ohunga nomarundurukiro ngu ma katjita moruyaveze. Posi yokutja, ku ye omakwizikiro ngo tjiri maye yenenisiwa, neye opa zokuhungira aayo omakwizikiro ngo ya yenenisiwa rukuru.—Jes. 46:10. w23.11 3-4 ¶7-8

Omuapostele Petrus aa kondjo nomaungundipare we nandarire kutja wa muna nokuzuva ovingi ohunga na Jesus. Tara kovihorera tjiva. Indu Jesus tja hungira ohunga nomuano mu ma hihamisiwa nokuṱa otja komaprofetero wOmbeibela, Petrus wa vyura na raere Jesus kutja ape ha tjitwa nao ku ye. (Mar. 8:​31-33) Ovikando pekepeke Petrus novaapostele varwe va ri nozombata zokutja owaṋi pu wo avehe ngu ri omunenenene. (Mar. 9:​33, 34) Ongurova osenina komurungu yonḓiro ya Jesus, Petrus wa konda okutwi komurumendu. (Joh. 18:10) Ongurova ndjo, Petrus wa ri nemuma na pataṋa epanga re Jesus ovikando vitatu. (Mar. 14:​66-72) Iho tja tjita kutja Petrus ma rire tjinene. Jesus ke na wa isa omuapostele we nga wire momuinyo. Kombunda yaindu Jesus tja za nokupendurwa, eye wa yandja oruveze ku Petrus kutja Petrus me mu raisire kutja ngamba we mu suvera. Jesus wa ṋanga Petrus okukarera nomerisusuparisiro otjomurise wozonḓu ze. (Joh. 21:​15-17) Petrus we riyandjera okutjita imbi Jesus mbye mu raera. Meyuva ra Pentekoste, eye wa ri moJerusalem mokati ka imba mba ri ovatenga okutwirisiwa nombepo ondjapuke. w23.09 22 ¶6-7

Omuapostele Petrus wa rakiza ovanene vombongo ovakwao na tja ‘riseye orupanda Ndjambi ndwa yandja ku eṋe.’ (1 Petr. 5:​1-4) Indu tji u ri omunene wombongo, eṱe matu tjiwa kutja wa suvera ovakambure ovakweṋu nu u vanga okuvetjevera. Posi yokutja, povikando tjiva mape ya o munu kutja u noviungura ovingi poo wa urwa nu ko nokuyenena okuyenenisa otjiungura ho. Ove mo yenene okutjita vi? Raera Jehova oviṋa avihe mbi mo rikende na vyo nokutja ovakambure ovakweṋu mo vanga okuvevatera pu pe ṱa pi. Petrus wa tja: “Ngamwa ngu ma karere mombongo nga karere yo nomasa ngu ma pewa i Ndjambi.” (1 Petr. 4:11) Ovakambure ovakweṋu mape ya ve muna omauzeu nge hi nokuyenena okuzengururwa mouye mbwi. Posi ya, zemburuka kutja ‘Omurise Omunene’ Jesus Kristus ma yenene okuvevatera okukapita ngamwa. Eye ma yenene okutjita nao ndino na wina mouye oupe. Otjiṋa Jehova tje vanga kutja ovanene vombongo ve tjite, okusuvera ovakambure ovakwao, okuvetjevera nokurira “otjihorera korupanda.” w23.09 30 ¶13-14

Matu sokunakaura omeripura waimba mbe ha ṱakamisa omatwako wa Jehova. Indu tji matu ripura tjimuna ovandu mbe ha ṱakamisa omatwako wa Jehova, eṱe wina matu tu utu okunakaura Jehova nomatwako we. (1 Kor. 3:19) “Ounongo wouye mbwi” u tjita kutja ovandu ave ha kara nonḓuviro ku Mukuru. Ovakriste tjiva moPergamum no Tiatira aave horere kovandu ongondoroka na wo mbaave tjiti oruvakiro nokurikotamena koomukuru wovisenginina. Jesus wa yandja erakiza ekukutu kozombongo mbari nḓo mena rokutja aave yandjere oruvakiro. (Omavan. 2:​14, 20) Ndino, ovandu ongondoroka na eṱe mape ya ave kondjo okutjita kutja tu kare nomeripura omavi. Ouṋepo weṱunḓu novazamumwe mape ya ave kondjo okuturaera kutja tu nozoveta ozongukutu nokutja tu katuke omatwako wa Jehova. Otjotjihorera, owo mape ya ave tja katjiṋa otjinanḓengu okuritjinda oukohoke nokutja omirari vyOmbeibela kavi ungurisiwa rukwao. Povikando tjiva, mape ya atu munu kutja omirari mbi tu muna okuza ku Jehova kavikahu nawa. Eṱe mape ya atu rorwa kutja tu ‘katuka omaraerero Ndjambi nga zikamisa.’—1 Kor. 4:6. w23.07 16 ¶10-11

Maria, ina ya Jesus aa hepa omasa. Eye aa sokurira otjingundi nandarire kutja wa ri e hi ya kupwa. Eye kaari nondjiviro yokukurisa ovanatje, posi ya aa sokukurisa okanatje okazandu ku make karira Messias. Eye ke na pa kara nomahakaeneno womonyama ku nomurumendu, posi ya aa sokuraera Josef kutja otjingundi. Iho mape ya tja ri otjiṋa otjizeu okutjita. (Luk. 1:​26-33) Omomuano uṋe Maria ma muna omasa? Eye wa paha ombatero okuza ku varwe. Otjotjihorera, eye wa ningira omuengeli Gabriel okumupa ondjivisiro yokomurungu ohunga notjiungura hi. (Luk. 1:34) Ousupi kombunda yanao, eye wa toora ouyenda na i “kotjirongo tji tja ri mehi rovivanda” raJudea okukavarura omuzamumwe we Elisabet. Elisabet wa tanga Maria nu wa hingwa i yombepo ya Jehova okuraera Maria omaprofetero ohunga nomuatje we ngwa ri mezumo. (Luk. 1:​39-45) Maria wa tja Jehova “wa ungura ovyomasa nokuoko kwe.” (Luk. 1:​46-51) Jehova wa yandja omasa ku Maria okupitira mu Gabriel na Elisabet. w23.10 14-15 ¶10-12

Otjivarero otjiṱiṱi tjovahongewa va Kristus va twirisiwa nombepo ondjapuke, nu owo ve yorokera oupanga wapeke ku na Jehova. Ovandu mba 144 000, mave kakarera otjovapristeri meyuru pu na Jesus. (Omavan. 14:1) Otjouyapuke tjondanda yomaturiro tji kuramena po kutja owo va toororwa otjovanatje va Mukuru ngunda ave ri kombanda yehi. (Rom. 8:​15-17) Otjouyapukeyapuke tjondanda yomaturiro tji kuramena po eyuru Jehova katura. “Onguyu ondjizikize” ndjaai haṋa Otjouyapuke kOtjouyapukeyapuke i kuramena po orutu rwonyama rwa Jesus ndwaaru tjiti kutja a ha yenene okuhita meyuru otjOmupristeri Omunene otjiuru wondyero yomerikotameneno wouatjiri. Jesus wa tjita kutja ovatwirisiwa avehe Ovakriste ve kahupe meyuru mokupunguhira ovandu orutu rwe rwonyama. Owo wina mave sokuisa otutu twawo twonyama kokutja ve kamune ondjambi yawo meyuru.—Hebr. 10:​19, 20; 1 Kor. 15:50. w23.10 28 ¶13

Gideon kapindikire indu Ovaefraim tji ve mu posisa tjinene. (Ovapang. 8:​1-3) Eye ke ve zirire nomazenge. Eye wa raisa omerisusuparisiro indu tja puratena komaunaunino wawo nokuhungira ku na wo momuano omuwa. Iho tja tjita kutja omapindi wawo ye we pehi. Ovanene vombongo mbe nounongo ve horera ku Gideon mokupuratena nawa nokuzira momuano omuwa indu tji mave kwekururwa. (Jak. 3:13) Ku nao owo ve tjita kutja mu kare ohange mombongo. Indu varwe tjaave tanga Gideon mena rokuhavera Ovamidian, eye wa yandja ondangu ndjo ku Jehova. (Ovapang. 8:​22, 23) Hapo ovarumendu mba zikwa mounane mave yenene vi okuhorera ku Gideon? Owo mave sokuyandja ohiviro ku Jehova koviṋa mbi va yenenisa. (1 Kor. 4:​6, 7) Otjotjihorera, indu omunene wombongo tja pewa ohiviro mena romahongero we omawa, eye ma yenene okutja omahongero ngo ya zire kEmbo ra Mukuru nokutja eṱe atuhe tu hongwa i yotjira tja Jehova. Ovanene vombongo mave yenene okuripura ohunga nomuano mbu ve honga kutja u yandja ohiviro ku Jehova poo ku wo oveni. w23.06 4 ¶7-8

Indu tji tu hi na twa munu oviṋa mbi twa ningire mongumbiro, eṱe mape ya atu ripura oveni kutja, ‘Hapo ami mbi kumbira otjiṋa tji tji ri tjo?’ Potuingi, tu ripura kutja eṱe matu tjiwa imbi mbi ri ovisemba kweṱe. Posi yokutja mape ya oviṋa mbi matu ningire kavi nokutuetera ouwa. Indu tji twa kumbire ouzeu kaaṋi, eṱe mape atu munu omazengururiro omasemba okukapita inga ngu twa ningire mongumbiro. Nu oviṋa tjiva mbi twa ningire mape ya avi ha hitasana nombango ya Jehova. (1 Joh. 5:14) Otjotjihorera, tara kotjihorera tjovanene mba ningira Jehova okutjita kutja omuatje wawo ma kare mouatjiri. Iho matji pose tjimuna ovanene mbo va ningira otjiṋa otjiwa. Posi yokutja, Jehova kemee tu ṋiṋikiza okumukarera. Eye u vanga kutja eṱe atuhe novanatje vetu wina tu toorere oveni okurikotamena ku ye. (Deut. 10:​12, 13; 30:​19, 20) Ku nao, ovanene aave sokuningira Jehova okuvevatera kutja ve yenene okuṱuna komutima womuatje wawo kokutja omuatje omuini ma yenene okusuvera Jehova nokurira epanga re.—Omiano 22:6; Ef. 6:4. w23.11 21 ¶5; 23 ¶12

Ongwaye okuyanḓiparisa poo okuyarura pehi omitima vyavarwe tje ri omuano omusemba wokuraisa kutja twe ve suvera? Omambo nga ‘okuyarurasana pehi omitima’ Paulus nga ungurisa ye heya “okukurama posi yomundu nokumutunduuza indu tje ri mouzeu ounene.” Indu tji matu wisa omutima womukambure omukwetu pehi ngu ri mouzeu, tu mu vatera kutja ma kayende komurungu okukarera Jehova nouṱakame. Otjikando atjihe tji matu wisa omutima womukambure omukwetu pehi, tu mu raisira kutja twe mu suvera. (2 Kor. 7:​6, 7, 13) Okuraisa otjari nokuyarura pehi omitima, omambo nge yenda kumwe. Omomuano uṋe? Omundu ngu ma ṱotjari na warwe ngu ri mouzeu u vanga okuyarura omutima we pehi nokumuvatera. Ku nao, indu tji matu ṱotjari, ku tjita kutja tu huhumiṋe varwe. Paulus wa raisa kutja otjari Jehova tje natjo kovandu, tji mu hinga kutja me ve vatere. Paulus wa tja Jehova “olhe younyaṋutima, nu oNdjambi womayaruriro pehi aehe womutima.”—2 Kor. 1:3. w23.11 9-10 ¶8-10

Ovakongorere va Kristus avehe mave sokuundjira ko ondatumisire. Ngatu tare kotjihorera tjomuapostele Paulus. Eye wa hungira ku imba mba ri moTesalonika kutja: “Tji twa ri pu na eṋe, twe mu raerera po kutja matu tatumisiwa; notja tjinga amamu tjiwa nawa opunga apa tjitwa nao.” (1 Tes. 3:4) Eye wa tjanga nai kovakambure mOkorinte: “Eṱe, vakwetu, matu vanga kutja mu tjiwe omauzeu eṱe ngu twa ri na wo . . . nga tji twe rihahiza nangarire ingwi okukara nomuinyo.” (2 Kor. 1:8; 11:​23-27) Ovakriste ndino wina mave sokuundjira ko ondatumisire momuano umwe poo omukwao. (2 Tim. 3:12) Otja tji mo kambura mu Jesus nu o utu okumukongorera, omapanga novazamumwe mape ya ave ku tjindi navi. Mape ya omuhona woye poo ovandu mbu mu ungura pamwe ve ku pirukira mena rokutja u nouatjiri moviṋa avihe. (Hebr. 13:18) Hapo ove u muna omapirukiro okuza kohoromende mena rokutja u zuvarisa ku varwe ohunga nomaundjiro woye? Paulus wa tja matu sokukara nondjoroka, kainatja kutja matu munu ondatumisire iṋe. w23.12 10-11 ¶9-10

Jakob wa tuurunga omauzeu omengi. Ovanatje ovazandu vevari va Jakob, Simeon na Levi, va yamburura eṱunḓu rawo nokuzunḓa ena ra Jehova. Kombanda yanao, omukazendu omusuverwa wa Jakob Rahel wa ṱa ngunda ama panduka omuatje wawo omutjavari. Mena rourumbu mbwa ri ko, Jakob wa ṋiṋikiziwa okuyenda kehi ra Engipte moukurundu we. (Gen. 35:​16-19; 37:28; 45:​9-11, 28) Momauzeu ayehe ngo, Jakob kena pa pandjara ongamburiro ye mu Jehova na momakwizikiro we. Nu Jehova wa raisa kutja wa ri nonyuṋe mu Jakob. Otjotjihorera, Jehova we mu pere omauini omengi. Jakob wa ri nondangi tjinene ku Jehova indu tja muna omuatje we Josef rukwao, ngwaa munu kutja wa ṱa rukuru. Oupanga wopopezu Jakob mbwaari na wo ku na Jehova we mu vatera kutja ma tuurunge omauzeu nga ri mo. (Gen. 30:43; 32:​9, 10; 46:​28-30) Tji twa kara noupanga wopopezu ku na Jehova, eṱe wina matu yenene okutuurunga omauzeu ngu tu hi nokuundjira ko. w23.04 15 ¶6-7

MEpsalme ekondwa 23 David wa raisa kutja Jehova we mu suvera nu ee mu tjevere. Eye wa hungirira koupanga wopopezu pokati ke na Jehova, ngwa isana kutja Omurise we. David aa yandjere Jehova okumuhongorera po nu eye ee riyameke ku ye. David aa tjiwa kutja Jehova me mu raisire orusuvero eyuva arihe mehupo re. Otjikeṋa tji tja tjita kutja ma kare noumune mbwo? David aa munu kutja Jehova me mu tjevere nawa mena rokutja ee mu parura nawa. David aa tjiwa nawa kutja Jehova epanga re nokutja Jehova wa ri nonyuṋe mu ye. Ku nao, opa zokukambura kutja nandarire kutja pa tjitwa tjike moruyaveze, Jehova me mu parura noviṋa avihe mbi ma hepa. Mena rokutja David wa ri nongamburiro morusuvero rwa Jehova nokutja me mu parura, iho tja tjita kutja ehe rikende posi ya a kare nondjoroka nokukowa mu imbi mbye na vyo.—Eps. 16:11. w24.01 28-29 ¶12-13

Okuza kOvita vyOuye Ovitjavari, ovakarere va Jehova momahi omengi ve nouyara wokuzuvarisa. Ovandu ovengi va uta okutjiwa Jehova nu ovakarere ve ve zuvarisa mouye auhe. Ndino ouṋepo wOrutu Orunane u kayenda komurungu okupaha omuhunga wa Kristus. Owo ve vanga kutja omuhunga auhe mbu mave yandja kovakambure ovakwao u raise oumune wa Jehova na Kristus. Nu wina owo ve ungurisa ovatarere votukondwa novanene vombongo okuyandja omuhunga kozombongo. Ovanene vombongo ovatwirisiwa ve ri “meke [ra Kristus] rokunene.” (Omavan. 2:1) Otjingaperi kutja ovanene vombongo avehe kahomonena nu ve tjita ozondataiziro. Moses, Josua novaapostele wina povikando tjiva aave tjiti ozondataiziro. (Num. 20:12; Jos. 9:​14, 15; Rom. 3:23) Posi ya, eṱe tu muna oukahu kutja Jesus u hongorera po omukarere omuṱakame novanene vombongo, nu eye ma kayenda komurungu okutjita nao. Ku nao, eṱe matu sokukambura momuhunga auhe mbu mau zuu ku imba mba zikwa okutuhongorera po. w24.02 23-24 ¶13-14

Ndino eṱe matu yenene okuyorokisa Jehova mokuhungira ohunga na ye momuano mu matu raisa ondangi norusuvero. Indu tji matu zuvarisa, ondando yetu oyokuvatera varwe okutumbuka popezu na Jehova, nokukara noumune tjimuna owetu ohunga Tate wetu worusuvero. (Jak. 4:8) Eṱe tu nonyuṋe okuraisira ovandu omuano Ombeibela mu i vandurura orusuvero rwa Jehova, ousemba we, ounongo we, omasa we, novikaṋena vye vyarwe oviwa. Eṱe wina tu tanga Jehova nokumuyorokisa, mokukondja okuhorera ku ye, otja pu matu yenene. Indu tji twa tjiti nao, varwe mape ya ave munu kutja twa panguka kovandu mouye ourunde mbwi. (Mat. 5:​14-16) Otja tji matu ungura pu na wo, eṱe mape ya atu ve kahurure kutja ongwaye tji tu ritjinda nao. Mena ranao, imba vomitima omiwa ve tumbuka popezu na Mukuru wetu. Indu tji matu tanga Jehova momiano mbi, eṱe tu yorokisa omutima we.—1 Tim. 2:​3, 4. w24.02 10 ¶7

Kutja u rire omurumendu ngu noupanga ouwa ku na Jehova, ove mo hepa okurihonga oviṋa mbi mavi ku vatere mehupo. Iho matji ku vatere okuyakura omerizirira mombongo, okumuna nokuṱiza oviungura mbi mavi ku vatere omuini poo eṱunḓu roye nokukara noupanga ouwa ku na varwe. Otjotjihorera, rihonga okulesa nokutjanga nawa. Ombeibela i tja omurumendu ngu lesa Embo ra Mukuru eyuva aruhe nokuripurira ko oukoto u kara nondjoroka nu u ṋingapara. (Eps. 1:​1-3) Indu tji ma lese Ombeibela eyuva arihe, ma tjiwa omeripura wa Jehova ngu maye mu vatere okuripura nawa nokuṱakamisa Omatjangwa. (Omiano 1:​3, 4) Ovakambure ovakwetu ve hepa ovarumendu mbu mave yenene okuhonga nokuyandja ondunge okuza mOmbeibela. Ove tji we rihonga okulesa nokutjanga nawa, mo yenene okurongerisa omahungi nomaziriro ngu maye vatere varwe nokuzeuparisa ongamburiro yawo. Ove wina mo yenene okutjanga oviṋa mbi mavi ku vatere kutja u kare nongamburiro yomasa nokutunduuza varwe. w23.12 26-27 ¶9-11

Indu tji mo tira, ripurira ko oukoto ku imbi Jehova mbi ma katjita moruyaveze, indu Satan tja isapewa. Pomaworonganeno wotukondwa wombura ndji 2014, otjihorera tjovitjitwa tja raisa omurumendu omukambure neṱunḓu re amave hungirire komuano omambo nge ri mu 2 Timoteus 3:​1-5 mu maye yenene okutanaurwa kutja ye hitasane nomakwizikiro ngu maye yenenisiwa mOparadisa. Eye wa tja: “Tjiwa nawa kutja mouye oupe mamu kara ondjoroka. Ovandu mave suverasana, mave suvere ouatjiri, mave rire overisusuparise, mave tanga Mukuru, mave kara nonḓuviro kovanene vawo, mave raisa ondangi, mave rire ovaṱakame, mave kara norusuvero komaṱunḓu wawo, mave rire ovandu mbe hangana nu mbe ha yamburura ovakwao, mave rire ovandu mbe nomeritjaerero nu ozongozu, mba tonda ouvi, mave rire ovanauatjiri mbe puratene ku varwe, mbe he ritongamisa, mba suvera Mukuru komeho yokusuvera oviṋa, ovandu mba ve raisa kutja ve nongamburiro. Kara popezu novandu mbe ri nai.” Hapo u hungira ku neṱunḓu roye poo ovakambure ovakweṋu kutja ehupo mari kasana pi mouye oupe? w24.01 6 ¶13-14

Tjiri otjiṋa otjiyanḓiparise okutjiwa kutja Jehova u nonyuṋe movakarere ve. Ombeibela i tja: “Muhona u nonyuṋe motjiwaṋa tje.” (Eps. 149:4) Posi yokutja, povikando tjiva mape ya ave kara nomakeyakeyero wokutja Jehova u nonyuṋe mu wo kourike wawo. Ovakarere va Jehova ovengi ovaṱakame mba tamunwa mOmbeibela va ri nouzeu wokukambura kutja Jehova u nonyuṋe mu wo. (1 Sam. 1:​6-10; Job 29:​2, 4; Eps. 51:11) Ombeibela i raisa oukahu kutja Jehova ma yenene okumuna onyuṋe movandu mbe he ri ohomonena. Omomuano uṋe? Eṱe matu sokukara nongamburiro mu Jesus nokupapitisiwa. (Joh. 3:16) Tji twa tjiti nao, tu raisira varwe kutja twe ritanaura komauvi wetu nu twa tjita omakwizikiro wokutjita ombango ya Mukuru. (Oviung. 2:38; 3:19) Jehova u tjaterwa indu tji matu toora omikambo vyokutja tu kare noupanga ouwa ku na ye. Indu tji matu ungura oukukutu mokuyenenisa omakwizikiro wetu wokumukarera, Jehova ma kara nonyuṋe mweṱe nu me tu vara otjomapanga we wopopezu.—Eps. 25:14. w24.03 26 ¶1-2

Eṱe matu yenene okuhorera kovahongewa mokukayenda komurungu okuzuvarisa nandarire indu ohoromende tji ye tu tjaere. Eṱe wina matu yenene okukara nongamburiro kutja Jehova me tu vatere okuyenenisa otjiungura tjetu tjokuzuvarisa. Ku nao, kumbira okukara nouvanḓe nounongo, nokutja Jehova me ku vatere okutuurunga omauzeu. Otjingi tjetu tu kondja nomauzeu mena romitjise poo ouzeu momuinyo, tjimuna okuzepaisa omusuverwa woye, ouzeu meṱunḓu, ondatumisire poo omauzeu warwe. Nu omitjise mbi handjauka mouye novita vi tjita kutja i rire ouzeu okutjinda ongaro ndjo. Raera Jehova ongaro mu u ri otja tjo tjo raera epanga roye ropopezu. Kara nongamburiro kutja Jehova “me ku vatere.” (Eps. 37:​3, 5) Okupanḓera pongumbiro maku tu vatere ‘okukara nomuretima’ indu tji tu ri momauzeu. (Rom. 12:12) Jehova u tjiwa ongaro yovakarere ve ndji ve tuurunga “nu u zuva ondjuriro yawo.”—Eps. 145:​18, 19. w23.05 5-6 ¶12-15

Indu tji matu sokutoora omikambo ominanḓengu, eṱe matu hepa ‘okutjiwa imbi Muhona mbi ma vanga kutja tu tjite’ nokutoorera ko omukambo. (Ef. 5:17) Indu tji twa paha omirari vyOmbeibela mbi matu yenene okuungurisa mongaro mu tu ri, eṱe mouatjiri tu paha ouripura wa Mukuru. Nu tji twa ṱakamisa omirari vye, tu yenena okutjita ozondando ozosemba. Satan ngu ri “umwe Omunaurunde” nomunavita na eṱe, u vanga kutja tu ungure ovingi mouye kokutja atu ha kara noruveze motjiungura tja Mukuru. (1 Joh. 5:19) Omukriste mape ya a utu okuripurira kovimariva, omerihongero, poo oviungura, pendje nokuungurira Jehova momiano omingi pekepeke. Eye tja tjiti nao, iho otjiraisiro tjokutja eye wa utu okuripura tjimuna ovandu mbe ha karere Jehova. Otjingaperi kutja oviṋa mbi kavivi, posi ya kavi sokurira oviṋa ovinanḓengu mehupo retu okukapita okukarera Jehova. w24.03 24 ¶16-17