Jehovah Amat Sayauka Nuan

1. Nama utai ke datai ba runding nuan lebuh nuan berunding pasal Jehovah?

KATI nuan kala ngambarka baka ni gaya Jehovah? Lebuh nuan besampi ngagai Iya, nama utai ke datai ba runding nuan? Taja pan Jehovah enda ulih dipeda, tang Bup Kudus ngena mayuh macham chara ngambarka Iya. Bup Kudus madahka, Jehovah nya “baka mata hari enggau baka terabai,” sereta “baka api ke ngemunaska utai abis lengis.” (Mas. 84:11; Heb. 12:29) Dalam utai ke dipandangka Petara ba runding Esekiel, Esekiel ngambarka Jehovah baka batu nilam, logam ti beperenching, sereta pelangi ti terang. (Esk. 1:​26-28) Sekeda ari gambaran tu engka ngasuh kitai berasai amat kagum tauka ngasuh kitai berasai enda layak deka datai semak ngagai Iya.

2. Nama utai ti engka ngasuh kitai tusah deka datai semak ngagai Jehovah?

² Kitai enda ulih meda Jehovah. Nyadi, kitai engka tusah deka pechaya Iya rinduka kitai. Tauka kitai engka napi mayuh utai ti jai ba pengidup kitai. Tu mega engka ngasuh kitai tusah deka pechaya Jehovah amat rinduka kitai. Bisi mega enda kala ngasaika pengerindu ari siku apai. Jehovah meretika asai ati kitai, lalu Iya mega nemu nama kebuah kitai tusah deka datai semak ngagai Iya. Nyadi, ngambika ulih nulung kitai ngelala Iya enggau manah agi, Iya ngena Bup Kudus.

3. Nama kebuah kitai patut belajar mayuh agi pasal pengerindu Jehovah?

³ Leka jaku ti pemadu manah kena ngambarka Jehovah iya nya, pengerindu. Bup Kudus madahka: “Petara nya pengerindu.” (1 Jhn. 4:8) Iya ngereja semua utai ketegal pengerindu Iya. Pengerindu Jehovah amat besai sereta kering. Iya ngayanka pengerindu nya ukai semina ngagai orang ke rinduka Iya, tang mega ngagai orang ke enda rinduka Iya. (Mat. 5:​44, 45) Dalam artikel tu, kitai deka belajar mayuh agi pasal Jehovah enggau pengerindu Iya. Majak kitai belajar pasal Petara kitai, majak agi kitai rinduka Iya.

JEHOVAH AMAT SAYAUKA KITAI

4. Baka ni asai ati nuan pasal penyayau Jehovah? (Peda mega gambar.)

⁴ “Jehovah bisi . . . penyayau ti besai.” (Jas. 5:11) Dalam Bup Kudus, Jehovah nyemaka diri baka siku indai ti amat rinduka anak iya. (Isa. 66:​12, 13) Gambarka siku indai ke benung nyaga anak iya ti agi mit. Iya nudukka anak iya ba pah iya, lalu bejaku enggau anak iya ngena nyawa ti nelap sereta lembut. Lebuh anak iya nyabak tauka benung pedis, indai nya tentu ngereja utai ke ulih iya kena nulung anak iya. Baka nya mega, lebuh kitai benung tusah ati tauka napi pemedis, kitai ulih pechaya, ketegal pengerindu Jehovah, Iya deka nyaga kitai. Siku penulis masmur madahka: “Lebuh ati aku mayuh pengirau, Nuan merindang aku, lalu ngasuh ati aku gaga.”—Mas. 94:19.

5. Nama reti pengerindu Jehovah ti setia ba nuan?

⁵ Jehovah nya Petara ti setia. (Mas. 103:8) Iya enda kala badu rinduka kitai, taja pan kitai bisi ngereja penyalah. Orang Israel mayuh kali ngasaka ati Jehovah. Tang lebuh sida nesal ati lalu badu agi ngereja penyalah, Jehovah ngayanka pengerindu ti setia ngagai sida. Ku Iya madah ngagai sida: “Aku sayauka kita enggau laban Aku rinduka kita lalu meri kita basa.” (Isa. 43:​4, 5) Indah diatu, pengerindu Jehovah enda kala berubah. Ketegal pengerindu nya, indah lebuh kitai ngereja penyalah ti besai pan, Jehovah enda kala deka ninggalka kitai. Lebuh kitai nesal ati lalu pulai baru ngagai Jehovah, kitai agi ulih ngasaika pengerindu Iya ke kitai. Dalam Bup Kudus, Jehovah besemaya, Iya deka “jampat ngampun.” (Isa. 55:7) Lalu Bup Kudus mega ngambarka pengampun tu baka ‘Jehovah Empu ke meri kitai maya alai kitai bulih pengering baru.’—SKR. 3:19.

6. Nama ulih dipelajarka kitai pasal Jehovah ari Sekariah 2:8?

⁶ Bacha Sekariah 2:8. Ketegal Jehovah sayauka kitai, Iya jampat beratika asai ati kitai sereta keran deka nyaga kitai. Lebuh kitai berasai tusah ati, Iya mega berasai tusah ati. Nya alai, kitai ulih andal Iya deka nyaut kitai lebuh kitai besampi: “Lindung aku baka Nuan ke nyaga mata Nuan Empu.” (Mas. 17:8) Mata nya begian ti amat sensitif sereta penting ba tubuh kitai. Ketegal kitai dibandingka baka mata Jehovah, kitai ulih andal, barang sapa ke ngemediska kitai, ngemediska utai ti berega ba Jehovah.

7. Nama kebuah kitai patut negapka pengandal kitai ngagai pengerindu Jehovah?

⁷ Jehovah deka kitai andal Iya sayauka tiap iku kitai. Tang Iya mega nemu, ketegal utai ti kala nyadi ba pengidup kitai, kitai engka berunding, ‘Kati Jehovah amat sayauka aku?’ Tauka kitai engka napi situasi ti tusah diatu ke ngasuh kitai kakang ati enggau pengerindu Jehovah. Nyadi, nama ulih nulung kitai negapka agi pengandal kitai? Belajar meh chara Jehovah ngayanka pengerindu ngagai Jesus, sida ke dipilih ke serega, sereta semua kitai.

CHARA JEHOVAH NGAYANKA PENGERINDU

8. Nama kebuah Jesus andal Apai iya rinduka iya?

⁸ Jehovah enggau Jesus udah begulai lama agi ari orang bukai. Pengelama bebiliun taun seduai iya begulai ba serega, seduai iya nyadi amat rapat lalu ngembuan pengerindu ti dalam ngagai pangan diri. Baka ke ulih dipeda ba Matthew 17:​5, Jehovah enggau terang madahka pengerindu Iya ke Jesus. Jehovah ulih madah, ‘Aku gaga ati ke iya.’ Tang ketegal Iya deka kitai nemu pemesai pengerindu Iya ke Jesus, Iya madah: “Tu Anak ti dikesayauka Aku.” Jehovah amat temegah ati ke Jesus sereta utai ti deka digaga iya. (Eps. 1:7) Lalu Jesus enda kala kakang ati enggau pengerindu Apai iya. Iya nemu Jehovah amat sayauka iya. Iya suah nyebut enggau yakin, Apai iya rinduka iya.—Jhn. 3:35; 10:17; 17:24.

9. Nama rambai jaku ke dikena ngambarka pengerindu Jehovah ngagai sida ti dipilih ke serega? Terangka. (Rome 5:5)

⁹ Jehovah mega ngayanka pengerindu ngagai sida ti dipilih ke serega. (Bacha Rome 5:5.) Peratika rambai jaku “udah dituangka.” Dalam jaku asal, ayat tu mai reti, pengerindu Jehovah ke sida ti dipilih ke serega amat kuat nyentukka iya ulih disemaka baka sungai ti benung mengalir. Sida ti dipilih ke serega nemu sida “dikerinduka Petara.” (Jud. 1) Rasul John madahka asai ati sida lebuh iya nulis: “Peda pemesai pengerindu Apai ngagai kitai nyentukka kitai patut dikumbai bala anak Petara!” (1 Jhn. 3:1) Kati Jehovah semina rinduka sida ti dipilih ke serega? Enda, Jehovah rinduka semua kitai.

10. Nama bukti ti pemadu besai ke nunjukka Jehovah rinduka nuan?

¹⁰ Nama bukti ti pemadu besai ke nunjukka Jehovah rinduka nuan? Bukti iya nya, genselan tebus Jesus. Semina Jehovah aja ke udah ngayanka pengerindu ti pemadu besai nengah genselan tebus tu. (Jhn. 3:16; Rom. 5:8) Jehovah meri Anak ti dikesayauka Iya ngambika mati ke semua mensia. Enggau nya, dosa kitai ulih diampun, lalu kitai mega ulih nyadi pangan Petara. (1 Jhn. 4:10) Lebuh kitai belematika pemesai rega ti udah dibayar Jehovah enggau Jesus, kitai deka meretika agi pemesai pengerindu seduai iya ke tiap iku kitai. (Gal. 2:20) Genselan tebus nya diberi, ukai semina ketegal Jehovah nya Petara ti adil, ke dekaka rega tebus ti sama, tang nya mega tanda pengerindu Jehovah. Jehovah nejuka Anak Iya merinsa sereta mati ke kitai. Lebuh Jehovah meri Anak ti dikesayauka Iya, Jesus, nyadika genselan tebus ke kitai, tu bukti ke nunjukka Iya amat rinduka kitai.

11. Nama ulih dipelajarka kitai ari Jeremiah 31:3?

¹¹ Baka ke udah diperatika kitai, Jehovah ukai semina ngasaika pengerindu ke kitai, tang Iya mega mantaika pengerindu Iya ke kitai nengah jaku. (Bacha Jeremiah 31:3.) Jehovah udah mai kitai datai semak ngagai Iya laban Iya rinduka kitai. (Banding Ulang Adat 7:​7, 8.) Nadai nama-nama utai tauka sapa-sapa ke ulih nyeraraka kitai ari pengerindu Petara. (Rom. 8:​38, 39) Nama asai ati nuan pasal pengerindu tu? Bacha Masmur 23 lalu peratika asai ati David pasal pengerindu Jehovah sereta baka ni tu ulih meransang nuan.

NAMA ASAI ATI NUAN PASAL PENGERINDU JEHOVAH?

12. Masmur 23 bejaku pasal nama?

¹² Bacha Masmur 23:​1-6. Ba Masmur 23, David madahka, iya andal Jehovah rinduka iya sereta deka nyaga iya. Iya madahka pasal kaul ti rapat ti dikembuan iya enggau Pengibun iya, iya nya Jehovah. David berasai likun laban Jehovah ngiring iya, lalu iya bepanggai ba Jehovah enggau pengabis ati. David nemu Jehovah deka ngayanka pengerindu ngagai iya sepemanjai pengidup iya. Nama kebuah iya amat yakin?

13. Nama kebuah David yakin Jehovah deka nyaga iya?

¹³ “Aku nadai suntuk utai.” David berasai dijaga laban Jehovah seruran nyediaka semua utai ke diguna iya. David mega bisi kaul ti rapat enggau Jehovah, lalu iya mega nemu Jehovah gaga ati enggau iya. Nya kebuah iya yakin, enda ngira nama utai ti deka nyadi ngagai iya dudi hari, Jehovah deka nyediaka semua utai ti diguna iya. Ketegal David yakin enggau pengerindu Jehovah, tu nulung iya enda irau tang berasai gaga sereta puas ati.—Mas. 16:11.

14. Baka ni Jehovah deka nyaga kitai?

¹⁴ Jehovah enggau bepengerindu deka nyaga kitai, kelebih agi lebuh utai ti enda manah nyadi ba pengidup kitai. Peratika pengalaman Claire,a ke udah gawa ba Bethel lebih ari 20 taun. Iya berasai nadai daya lebuh diri sebilik iya enda ngetu-ngetu napi penusah. Apai iya kena strok, siku ari menyadi indu iya dibuai ari gerempung, sida sebilik patut nutup bisnis sida, lalu bank pan narit rumah sida. Baka ni Jehovah nyaga sida? Ku Claire madahka: “Jehovah nyediaka utai ti diguna diri sebilik aku ninting hari. Mayuh kali Jehovah udah nyediaka utai lebih agi ari ke diguna kami. Aku seruran berundingka chara Jehovah udah nulung kami sebilik, lalu aku deka seruran ingatka pengerindu Iya. Kenangan ke baka tu udah nulung aku terus nyembah Jehovah enggau gaga ati, taja pan bisi napi penanggul ba pengidup aku.”

15. Nama kebuah David berasai dikeringka baru? (Peda mega gambar.)

¹⁵ “Iya ngasuh aku kering baru.” Bisi maya iya, David berasai tusah ati ketegal penanggul enggau penguji ti ditapi iya. (Mas. 18:​4-6) Taja pia, pengerindu enggau pengibuh Jehovah ngeringka iya baru. Jehovah mai David ngagai “padang rumput ti galak” sereta “ngagai ai ti tenang.” Ketegal nya, David dikeringka baru sereta ulih terus nyembah Jehovah enggau gaga ati.—Mas. 18:​28-32.

16. Baka ni pengerindu Jehovah udah ngeringka nuan?

¹⁶ Baka nya mega kemayaharitu, ketegal ‘pengerindu enggau pengasih Jehovah enda nemu abis,’ kitai ulih tan lebuh napi penanggul ba pengidup. (Sab. 3:22; Kol. 1:11) Peratika pengalaman Rachel. Ati iya balat anchur lebuh laki iya ninggalka iya enggau Jehovah maya pandemik COVID-19. Baka ni Jehovah nyaga iya? Ku Rachel: “Jehovah nentuka aku berasai dikesayau. Iya nganjung bala kaban ti deka meri awak begulai enggau aku, mai ke aku pemakai, nganjung mesej tauka ayat Bup Kudus ti meransang, tuchum ngagai aku, sereta seruran ngingatka aku Jehovah ibuhka aku. Aku seruran beterima kasihka Jehovah laban udah meri aku siti ruang bilik ti bepengerindu.”

17. Nama kebuah David “enda takut”?

¹⁷ “Aku enda takut, laban Nuan bisi enggau aku.” David suah dalam bahaya, lalu iya mega bisi mayuh munsuh ti kering. Tang pengerindu Jehovah ngasuh iya berasai likun sereta dijaga. David ulih ngasaika Jehovah bisi enggau iya ba tiap iti situasi, lalu nya ngelantangka ati iya. Nya kebuah iya ulih belagu: “[Jehovah] ngelepaska aku ari semua penakut aku.” (Mas. 34:4) Taja pan bisi maya iya David berasai takut, tang iya ulih mutarka asai ati nya laban iya nemu Jehovah rinduka iya.

18. Lebuh nuan berasai takut, baka ni nuan ulih dikeringka lebuh nemu Jehovah rinduka nuan?

¹⁸ Lebuh nuan berasai takut, baka ni nuan ulih dikeringka lebuh nemu Jehovah rinduka nuan? Siku pengerintis ke benama Susi, madahka asai ati iya enggau laki iya pengudah anak lelaki seduai iya munuh diri. Ku iya madahka: “Lebuh utai ti balat jai nyadi ba pengidup nuan, nuan berasai nadai daya sereta baka ke nadai agi harapan. Tang pengerindu Jehovah ngasuh kami duai berasai likun sereta dijaga.” Rachel, ke dipadah tadi, ngenang baru: “Bisi sekali, aku enda ulih tinduk laban aku berasai amat tusah ati, irau sereta takut. Aku nyabak enggau inggar ngagai Jehovah. Tekala nya, aku ulih ngasaika Iya ngelantangka ati aku sereta ngasuh aku tenang, baka ke digaga siku indai ngagai anak iya ke agi mit. Udah nya, aku ulih tinduk. Nya meh utai ke seruran deka dikingatka aku.” Siku tuai gempuru ke benama Tasos, diukum jil pengelama empat taun laban enggai nyadi soldadu. Baka ni iya ngasaika pengerindu Jehovah? Ku iya: “Jehovah meri aku lebih ari utai ti diguna aku. Tu ngasuh aku andal agi, aku ulih pechayaka Iya enggau pengabis ati. Pia mega, nengah kuasa kudus Iya, Jehovah ngasuh aku gaga ati taja pan napi situasi ti tusah. Tu nulung aku nemu, majak aku arapka Jehovah, majak agi aku deka ngasaika pengerindu Iya ke aku. Ketegal nya, aku nyadi pengerintis biasa indah lebuh aku ba rumah jil.”

DATAI SEMAK NGAGAI PETARA TI BEPENGERINDU

19. (a) Baka ni kitai deka besampi enti kitai nemu Petara rinduka kitai? (b) Ni bagi ayat Bup Kudus pasal pengerindu Jehovah ti negu ati nuan? (Peda kutak “Ayat Bup Kudus ke Nulung Kitai Ngasaika Pengerindu Jehovah.”)

¹⁹ Semua pengalaman ke udah dikerandauka kitai nunjukka Jehovah, “Petara ti penuh enggau pengerindu,” bisi enggau kitai! (2 Kor. 13:11) Iya ibuhka kitai siku-siku. Kitai andal kitai benung “dijaga ulih pengerindu Iya ti meruan belama iya.” (Mas. 32:10) Lebuh kitai suah berundingka chara Iya ngayanka pengerindu ngagai kitai, kitai deka majak agi ngasaika pengibuh Iya. Lalu tu deka meransang kitai majak semak enggau Iya. Kitai ulih besampi ngagai Iya ba sebarang maya, lalu madahka kitai amat begunaka pengerindu Iya. Kitai ulih mantaika semua pengirau kitai ngagai Iya laban kitai yakin Iya meretika kitai sereta keran deka nulung kitai.—Mas. 145:​18, 19.

20. Baka ni pengerindu Jehovah mai kitai majak semak ngagai Iya?

²⁰ Baka api ke ulih ngangatka tubuh kitai maya hari chelap, pengerindu Jehovah ulih ngelantangka ati kitai lebuh kitai bisi mayuh penanggul. Nyadi, terima meh pengerindu Jehovah ti deka ngelantangka ati nuan sereta ngasuh nuan berasai nyamai. Udah nya, balas meh pengerindu Iya lalu nyebut: ‘Aku rinduka Jehovah’!—Mas. 116:1.