Penerang ke Bup Kereja Pengidup enggau Pengawa Kristian
4-10 MAC
RETA ARI BUP KUDUS | ROME 12-14
“Pengerindu ke Patut Dipandangka Orang Kristian”
(Rome 12:10) rinduka pangan diri enggau ati ti angkun laban kita diri menyadi enggau pangan diri; awakka kita berebut ngayanka basa ngagai pangan diri.
it-1 55
Penyayau
Pengerindu (jaku Gerika, phi·la·del·phiʹa, reti iya, “penyayau ke menyadi”) patut dikembuan semua menyadi ba eklisia Kristian. (Rom. 12:10; Heb. 13:1; peda mega 1 Pet. 3:8.) Nya alai, kaul ba eklisia patut baka diri sebilik iya nya rapat, tegap sereta manah. Taja pan bala menyadi udah mandangka pengerindu, sida diperansang majak ngereja lebih agi ari nya.—1 Tes. 4:9, 10.
Leka jaku Gerika phi·loʹstor·gos, ke mai reti “rinduka,” ditujuka ngagai dua iku orang ke bisi kaul ti rapat. Leka jaku sterʹgo, suah dituju ngagai penyayau ke dipandang entara diri sebilik. Rasul Paul meransang orang Kristian ngembuan kualiti tu. (Rom. 12:10) Paul mega madahka ba hari ti penudi, orang deka “kasar enggau orang” (jaku Gerika, aʹstor·goi) lalu sida ke ngereja nya patut dibunuh.—2 Tim. 3:3; Rom. 1: 31, 32.
(Rome 12:17-19) Anang malas penyai ngena penyai, tang kereja utai ti ngena dipeda semua orang. 18 Enti ulih, seagi-agi utai nya bepanggai ba kita, diau bebaik enggau semua orang. 19 Menyadi, anang malas, tang awakka Petara ngayanka pengeringat Iya; laban endang udah ditulis, “Aku ke malas, Aku deka mayar, ku Tuhan bejaku.”
w09 15/10 8 ¶3
“Diau Bebaik enggau Semua Orang”
3 Bacha Rome 12:17. Paul madahka lebuh orang jai enggau kitai, kitai enda patut malas penyai nya. Jaku lalau Paul amat beguna ba ruang bilik ti enda sama pengarap. Laki tauka bini ke dalam pemendar nyeliahka ari ngena jaku ti kasar tauka ulah ti jai ngagai pangan diri. “Malas penyai ngena penyai” enda meri penguntung tang deka ngasuh laya nya balat agi.
w07 1/7 24-25 ¶12-13
“Anang Malas Penyai Ngena Penyai”
12 Keterubah iya Paul madah: “Begedika penyai.” Udah nya iya nangkan, “Anang malas penyai ngena penyai.” Jaku Paul endang amat. Kitai enda ulih ngumbai diri begedika penyai enti kitai ngena penyai malas penyai orang ngagai kitai. Ulah baka nya jauh limpang ari pengerindu ti “pengabis ati.” Udah nya Paul madahka: “Kereja utai ti ngena dipeda semua orang.” (Rome 12:9, 17) Baka ni kitai ulih ngena jaku lalau tu?
13 Sebedau tu ba surat ke ditulis Paul ngagai menyadi di Korint, iya nyebut pasal pemerinsa ke ditapi bala rasul. Sida dipeda semua dunya, melikat enggau mensia. Paul madahka, “Lebuh orang mechat kami, kami merekatka sida. Lebuh orang merinsaka kami, kami tan natka diri diperinsa. Lebuh orang bejai kami, kami nyaut sida ngena jaku ti siru.” (1 Korint 4:9-13) Pia mega, orang Kristian kemayaharitu dipeda semua orang ba dunya. Lebuh orang jai enggau kitai, lalu kitai enda malas penyai sida, orang ke meda pemadas pengawa kitai engka deka nerima pesan ke dibai kitai.—1 Peter 2:12.
(Rome 12:20, 21) Anang. “Enti munsuh kita lapar, beri iya makai. Enti iya aus, beri iya ngirup, laban lebuh kita ngereja nya, kita nugungka bara api ba puchuk pala iya.” 21 Anang alah laban penyai, tang alahka penyai ngena pemadas.
w12 15/11 29 ¶13
Sedia Ngampun Pangan Diri
13 Nuan ulih nulung orang ke ngemediska ati nuan ngambika iya ulih nerima prinsip Bup Kudus. Rasul Paul nulis: “‘Enti munsuh kita lapar, beri iya makai. Enti iya aus, beri iya ngirup, laban lebuh kita ngereja nya, kita nugungka bara api ba puchuk pala iya.’ Anang alah laban penyai, tang alahka penyai ngena pemadas.” (Rom. 12:20, 21) Enti nuan terus manah enggau orang taja pan sida ngasuh nuan ringat, nuan engka ngasuh iya lembut ati sereta meransang iya ngembuan ulah ti manah. Iya engka deka nerima pemendar laban nuan udah meretika asai ati iya sereta ngayanka pengasih ngagai iya. Ulah nuan ti nelap meri peluang ngagai iya berundingka kebuah nuan enda malas penyai iya.—1 Pet. 2:12; 3:16.
Ngulihka Penemu Bup Kudus ti Berega
(Rome 12:1) Nya alai, menyadi, ulih pengasih Petara, aku minta kita nyerahka tubuh kita nyadi pemeri ti idup, ti kudus, ti dikerinduka Petara. Nya meh jalai kita patut nyembah Iya.
Baka Ni Milih Pemerindang ti Badas
5 Semua utai ke digaga kitai ba pengidup bekaul enggau sembah kitai ngagai Jehovah. Dalam surat iya ngagai orang Rome, Paul ngena leka jaku ti ulih meransang bala sama pengarap. Ku iya: ‘Aku minta kita nyerahka tubuh kita nyadi pemeri ti idup, ti kudus, ti dikerinduka Petara. Nya meh jalai kita patut nyembah Iya.’ (Rome 12:1) Tubuh kitai nyengkaum runding, ati, enggau pengering. Semua tu dikena kitai nyembah Petara. (Mark 12:30) Paul ngumbai sembah ti pengabis ati nya pemeri. Jaku tu bisi reti. Nitihka Adat Moses, pemeri ti bisi penimpang enda diterima Petara. (Adat Lewi 22:18-20) Baka nya mega, enti sembah kitai enda tuchi, iya mega enda diterima Petara. Nama kebuah?
6 Paul ngelalau orang Kristian ba Rome: “Anang . . . nyerahka tubuh kita ngagai dosa.” (Rome 6:12-14) Ba Rome 3:13-18, Paul nerangka pengawa ti ngasuh tubuh bedosa. Pasal mensia ti bedosa, ku Bup Kudus: “Nyawa sida penuh laban jaku sumpah.” Orang Kristian ngasuh tubuh iya enda tuchi enti iya ngena tubuh iya ngereja pengawa ti bedosa. Chunto, enti orang Kristian kemaya hari tu sengaja meda utai ti enda manah, baka pornografi tauka cherita ti ngayanka pengawa balat ngemedis orang bukai, iya “nyerahka [mata iya] ngagai dosa,” lalu ngasuh tubuh enda tuchi. Sembah iya ke enda agi tuchi enda diterima Petara. (Ulang Adat 15:21; 1 Peter 1:14-16; 2 Peter 3:11) Naka meh pengerugi enti milih pemerindang ti jai!
(Rome 13:1) Awakka semua orang nunduk ngagai perintah ti megai menua; laban perintah nadai tau bisi enti enda ari Petara, lalu perintah ti bisi nya didudukka Petara.
w08 15/6 31 ¶4
Penerang Ari Bup Rome
13:1—Baka ni perintah ti megai menua ‘didudukka Petara’? Perintah ti megai menua ‘didudukka Petara’ laban Petara ngemendarka sida megai perintah. Pia mega Petara udah nemu sapa ke deka merintah. Tu ulih dipeda lebuh Bup Kudus nyebut pasal sekeda raja sebedau sida megai perintah.
Macha Bup Kudus
(Rome 13:1-14) Awakka semua orang nunduk ngagai perintah ti megai menua; laban perintah nadai tau bisi enti enda ari Petara, lalu perintah ti bisi nya didudukka Petara. 2 Nya alai barang sapa ngelaban perintah, ngelaban utai ti udah didudukka Petara, lalu orang ke ngelaban perintah deka diukum. 3 Laban orang ke megai perintah ukai ngenakutka orang ke manah ulah, tang ngenakutka orang ke jai. Kati kita enggai ke diri takutka orang ke megai perintah? Enti pia, kereja utai ti badas. Nya baru kita deka nerima puji, 4 laban orang ke megai perintah nya ulun Petara, bekereja ke penguntung kita. Tang enti kita ngereja penyalah, kita patut takut, laban iya ukai bisi kuasa ngapa. Iya ulun Petara ke bejalaika ukum Petara ba orang ke ngereja penyalah. 5 Nya alai, kita enda tau enda nunduk ngagai perintah, ukai semina laban kita deka nyeliahka pengeringat Petara, tang laban kita beresi ati. 6 Nya mega kebuah kita mayar chukai, laban orang ke megai perintah bekereja ke Petara, bejalaika pengawa nya. 7 Bayar ngagai sida utai ti patut dibayar kita. Bayar chukai ngagai orang ke patut alai kita mayar chukai, duit pupu ngagai orang ke patut alai kita mayar duit pupu, lalu beri basa ngagai orang ke patut dibasa kita. 8 Anang berutang ba orang, kelimpah ari berutang pengerindu ba pangan diri, laban orang ke rinduka pangan diri, udah ngamatka Adat. 9 Pesan ti nyebut, “Anang butang; anang munuh orang; anang ngenchuri; anang inginka utai orang,” enggau semua pesan bukai, tau disimpul ngena jaku tu, “Rinduka pangan diri baka nuan ke rinduka diri empu.” 10 Pengerindu enda ngemediska orang. Nya alai pengerindu ngamatka Adat. 11 Kelimpah ari nya, kita nemu, tu meh maya alai kita enda tau enda dani. Laban pengelepas diatu nyau datai semak agi ngagai kitai ari lebuh kita ke terubah arap suba. 12 Hari nyau udah jauh malam, lalu nyau deka siang. Nya alai aram kitai muai semua pengawa pemetang, lalu ngerasukka senyata penampak; 13 aram kitai diau menyana baka ke diau lebuh siang hari, ukai berami enda beiga-iga, ukai mabuk, ukai ngereja ulah ti kamah, ukai jai ulah, ukai belaya, ukai kepapas. 14 Tang rasukka Tuan Jesus Kristus, lalu anang berundingka jalai ngemuaska pengingin dosa.
11-17 MAC
RETA ARI BUP KUDUS | ROME 15-16
“Giga Jehovah Kena Ngulihka Pengeliat Ati enggau Peransang”
(Rome 15:4) Laban semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.
“Nyabak Enggau Orang ke Nyabak”
11 Cherita pasal Jesus ke balat tusah ati lebuh Lasarus mati nya siti ari pemayuh ayat dalam Bup Kudus ke ulih ngelantangka ati. Tu enda ngasuh kitai tekenyit, laban “semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.” (Rom. 15:4) Enti nuan benung tusah ati, nuan mega tau bulih pengelantang ba ati ari ayat di baruh tu:
▪ ‘Jehovah diau semak orang ke tusah ati lalu ngidupka sida ke nadai agi pengadang.’—Mas. 34:18, 19.
▪ “Lebuh ati aku mayuh pengirau, Nuan [Jehovah] merindang aku, lalu ngasuh ati aku gaga.”—Mas. 94:19.
▪ ‘Awakka Jesus Kristus Tuan kitai, enggau Petara ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya, meransang sereta ngeringka ati kita.’—2 Tes. 2:16, 17.
(Rome 15:5) Awakka Petara, ke pun pengeliat ati enggau peransang, ngiring kita idup seati enggau pangan diri, nitihka teladan Jesus Kristus,
“Awakka Ati ti Tan Nya Nembuka Pengawa Iya”
5 Minta pengering ari Jehovah. Jehovah nya “pun pengeliat ati enggau peransang.” (Rom. 15:5) Semina Iya aja ke nemu gaya kitai, asai ati kitai sereta chara pengidup kitai. Nya alai Iya nemu utai ti diguna kitai ngambika ulih tan. Bup Kudus madahka: “Iya meri utai ti dipeguna orang ke ngemesaika Iya. Iya ninga sabak sida, lalu nyelamatka sida.” (Mas. 145:19) Tang, baka ni Petara deka nyaut sampi kitai ke minta pengering ngambika ulih tan?
(Rome 15:13) Awakka Petara, ti pun pengadang, ngemenuhka kita enggau semua pengaga enggau pemaik ketegal pengarap kita, ngambika ulih kuasa roh kudus kita penuh laban pengadang.
w14 15/6 14 ¶11
‘Rinduka Jehovah Petara Nuan’
11 Jehovah meri ‘pengadang ti ngemenuhka kitai enggau semua pengaga enggau pemaik.’ (Rom. 15:13) Pengadang ari Petara nulung kitai betan napi penguji. Orang Kristian ke dipilih ngagai serega patut nunjukka diri “tetap ati datai ke mati” ngambika ulih nerima “makota pengidup.” (Pem. 2:10) Nembiak Petara ke bukai ti tetap ati bisi pengadang diau belama ba dunya Paradais. (Luk. 23:43) Nama asai ati nuan pasal pengadang tu? Kitai tentu berasai gaga, likun sereta rindu ngagai Petara ke meri “semua pemeri ti menyana, ti pemadu badas.”—Jas. 1:17.
Ngulihka Penemu Bup Kudus ti Berega
(Rome 15:27) Sida gaga ati ngereja nya. Iya ti bendar, sida berutang-budi ba orang Judah, laban enti orang Judah udah magi berekat roh ngagai orang bansa bukai, orang bansa bukai patut mega ngena pengaya sida merekatka orang Judah.
w89 1/12 24 ¶3
“Pengerindu ti Bendar Diuji”
Amat, bala menyadi bansa bukai “berutang-budi” enggau menyadi Kristian ba Jerusalem. Sida ulih nerima pemendar ketegal menyadi Kristian di Jerusalem. Nya alai sida patut nulung. Ku Paul: ‘Laban orang Judah udah magi berekat ari roh kudus ngagai orang bansa bukai, nya alai orang bansa bukai ti arap patut nulung orang Judah ngena berekat ti diterima sida di dunya tu.’—Rome 15:27, Bup Kudus Ka Rebak Diatu.
(Rome 16:25) Aram kitai ngemuliaka Petara ke ulih ngeringka kita, nitihka Berita Manah ti ditusui aku enggau nitihka ajar Jesus Kristus, nitihka pemandang pasal misteri ti lama udah dilalaika dulu kelia
it-1 858 ¶5
Nemu Utai ti Deka Nyadi
Messiah tauka Kristus nya Anak ti disemaya ngambika semua orang ti lurus bulih berekat. (Gal. 3:8, 14) Keterubah kali “anak” disebut iya nya pengudah Adam enggau Hawa angkat ngelaban Petara di kebun Eden, tang sebedau Abel ada. (P-kal. 3:15) Tu nyadi urung 4,000 taun sebedau pemandang pasal “misteri” diayanka ari jaku sida nabi pasal Messiah. Nya alai misteri tu “lama udah dilalaika dulu kelia.”—Rom. 16:25-27; Eps. 1:8-10; 3:4-11.
Macha Bup Kudus
(Rome 15:1-16) Kitai ke kering patut sabar enggau orang ke lemi, lalu ukai deka ngelantangka diri empu aja. 2 Genap iku kitai patut ngelantangka ati pangan kitai, kena nulung sida mansang. 3 Laban Kristus ukai datai ngelantangka diri tang, munyi ti udah ditulis, ‘Jaku orang ke mechat kita, udah ninggang aku.’ 4 Laban semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang. 5 Awakka Petara, ke pun pengeliat ati enggau peransang, ngiring kita idup seati enggau pangan diri, nitihka teladan Jesus Kristus, 6 ngambika semua kita ngemuliaka Petara ti Apai Jesus Kristus Tuan kitai. 7 Nya alai, sambut pangan diri, baka Kristus ke udah nyambut kita, kena ngemuliaka Petara. 8 Laban, aku madah ngagai kita, Kristus bekereja ke orang Judah, kena mandangka Petara endang tau dikarapka, ngambika Iya ngamatka semaya ti udah digaga Iya enggau aki ini sida, 9 sereta ngambika orang bansa bukai ulih ngemuliaka Petara ketegal pengasih Iya. Munyi ti udah ditulis, “Nya alai aku deka ngaku Nuan di mua orang bansa bukai, lalu belagu muji nama Nuan.” 10 Bup Kudus mega bisi nyebut, “Rami gaga ati meh kita orang bansa bukai, sama enggau bala nembiak Tuhan!” 11 Lalu Bup Kudus mega nyebut, “Puji meh Tuhan, semua kita orang bansa bukai, lalu awakka semua mensia muji Iya!” 12 Lalu Isaiah mega nyebut, ‘Siku peturun Jesi deka datai. Iya ke angkat lalu merintah orang bansa bukai. Sida deka manggaika pengadang sida ba iya.’ 13 Awakka Petara, ti pun pengadang, ngemenuhka kita enggau semua pengaga enggau pemaik ketegal pengarap kita, ngambika ulih kuasa roh kudus kita penuh laban pengadang. 14 Menyadi, aku nemu kita penuh laban pemadas, ngembuan semua penemu, lalu ulih ngajar pangan diri. 15 Tang ba pasal sekeda pekara, aku bisi udah nulis ngagai kita enggau nadai bepampul penemu, ngambika kita ingat, laban pengasih ti udah diberi Petara ngagai aku, 16 ngasuh aku bekereja ke Kristus ba orang bansa bukai, ngereja pengawa imam betusuika Berita Manah Petara, ngambika orang bansa bukai nyadi pemeri ti dikerinduka Petara, ti dituchi roh kudus.
18-24 MAC
RETA ARI BUP KUDUS | 1 KORINT 1-3
“Kati Nuan Ngembuan Runding Dunya tauka Diiring Roh Kudus?”
(1 Korint 2:14, NW) Orang ke ngembuan runding dunya enda ulih nerima pemeri ari roh kudus Petara, laban utai nya baka ke beli ba iya, lalu iya enda ulih meretika utai nya, laban utai nya semina ulih ditemu ari tulung roh kudus.
Nama Reti Ngembuan Runding Petara?
4 Orang ke ngembuan runding dunya suah nitihka ulah dunya ti beberatka pengingin diri. Paul madahka ulah tu baka ‘roh ti benung bekereja ba orang ke enda ngasika Petara.’ (Eps. 2:2) Nya kebuah mayuh orang betundaka ulah pangan diri. Sida ngereja utai ti dikumbai sida betul, lalu enda ibuhka standard Petara. Kelebih agi sida ngenuluka utai ba dunya lalu ngasaika penuduk, duit, tauka hak sida berat agi ari utai bukai.
5 Runding dunya mega ngasuh orang ngereja pengingin ti bedosa. (Gal. 5:19-21) Dalam surat Paul ti keterubah ngagai orang Kristian ba Korint, iya nyebut pasal utai bukai ti dikereja orang ke ngembuan runding dunya. Sida nyukung orang belaya, nguji mechah-belahka orang, meransang orang ngelaban, mai pangan diri ngagai kot, enda bebasaka ketuai, sereta beberatka pemakai enggau ai irup ba pengidup. Sida enda ngelaban lebuh diuji ngereja utai ti salah. (J-lam. 7:21, 22) Jude madahka sida kelalu beberatka runding dunya nyentukka sida lenyau roh kudus Jehovah.—Jud. 18, 19.
(1 Korint 2:15, 16) Orang ke [“diiring,” NW] roh kudus nemu semua utai, tang iya empu enda ulih diakim orang. 16 “Laban sapa nemu runding Tuhan, datai ke iya ulih ngajar Tuhan?” Tang kitai bisi runding Kristus.
Nama Reti Ngembuan Runding Petara?
6 Orang ke ngembuan runding Petara bebida enggau orang ke ngembuan runding dunya. Iya beberatka kaul enggau Petara, nitihka iring roh kudus, lalu bebendar deka neladan Jehovah. (Eps. 5:1) Iya enggau naka ulih deka nemu chara Jehovah berunding sereta beratika siti-siti utai. Ba iya, Petara nya nyata. Enda baka orang ke ngembuan runding dunya, orang ke ngembuan runding Petara bebasaka standard Jehovah dalam pengidup. (Mas. 119:33; 143:10) Iya enda ngereja pengingin ti bedosa tang ngayanka ‘buah roh kudus.’ (Gal. 5:22, 23) Kena nerangka tu, uji perundingka: Orang ke landik ba dagang dikumbai pedagang, lalu orang ke amat ibuhka sembah iya ngagai Petara dikumbai orang ke ngembuan runding Petara.
Nama Reti Ngembuan Runding Petara?
15 Baka ni kitai ulih neladan Jesus? Ayat Bup Kudus ba 1 Korint 2:16 madahka kitai patut ngembuan “runding Kristus.” Lalu ayat ba Pilipi 2:5 meransang kitai ‘ngaga runding kitai sebaka enggau runding Jesus Kristus.’ Nyadi enti deka neladan Jesus, kitai patut belajar pasal runding, asai ati, sereta ulah iya. Jesus ngemeratka kaul iya enggau Petara lebih agi ari utai bukai. Enti kitai neladan Jesus, reti nya kitai neladan Jehovah. Nya kebuah kitai patut belajar berunding baka Jesus.
Ngulihka Penemu Bup Kudus ti Berega
(1 Korint 1:20) Ni orang ke bepenemu-dalam? Ni orang ke bepelajar? Ni orang ke landik belabanka penemu di dunya tu? Kati Petara nadai udah nunjukka pemeli penemu-dalam ti datai ari dunya?
it-2 1193 ¶1
Penemu-dalam
Penemu dunya ngumbai tebus ke udah disediaka Petara nengah Kristus nya nadai guna nyentukka sida munuh Jesus. (1 Kor. 1:18; 2:7, 8) Tang Petara nunjukka penemu ba dunya tu nadai guna, lalu ngemaluka orang ti pintar. Iya enda ngena sida ngereja peneka Iya, tang ngena orang ke dikumbai sida ‘beli, lemi enggau baruh pendiau.’ (1 Kor. 1:19-28) Paul ngingatka menyadi Kristian di Korint, “penemu-dalam dunya” enggau pemerintah dunya deka lesap. Nya alai iya ukai ngajar pasal penemu-dalam mensia. (1 Kor. 2:6, 13) Iya nangkan menyadi Kristian di Kolosi, anang ditipu “penemu [phi·lo·so·phiʹas, iya nya rinduka penemu] enggau kelakar ti nadai reti, ti datai ari ajar mensia.”—Kol. 2:8; bandingka enggau ayat 20-23.
(1 Korint 2:3-5) Lalu aku datai ngagai kita mai pengelemi, sereta getar-getar nangi. 4 Jaku enggau pesan aku ukai disebut ngena jaku ti datai ari penemu-dalam, tang ngayanka kuasa enggau roh Petara, 5 ngambika pengarap kita ukai dipanggaika ba penemu-dalam mensia, tang ba kuasa Petara.
w08 15/7 27 ¶6
Penerang Ari Bup Korint
2:3-5. Korint nya endur pengajar Gerika ngajar pasal penemu mensia. Lebuh meri saksi ba endur nya, Paul engka irau sekalika iya ulih negu ati sida ke ningaka iya. Taja pia, iya enda nejuka pengelemi tauka asai irau ngachau iya ngereja peneka Petara. Pia mega enggau kitai. Kitai mega enda nejuka nama-nama utai nagang kitai nusui berita manah pasal Perintah Petara. Kitai andalka Jehovah nulung kitai baka Paul.
Macha Bup Kudus
(1 Korint 1:1-17) Ari Paul, ke dikangauka nyadi rasul Jesus Kristus nitihka peneka Petara, enggau ari menyadi kitai Sostenes, 2 Ngagai eklisia Petara di Korint, ngagai orang ke dikuduska dalam Jesus Kristus, ke dikangauka nyadi nembiak Tuhan sama enggau semua orang di semua endur ke ngangauka nama Tuan Jesus Kristus, ti Tuan sida enggau Tuan kitai: 3 Awakka Petara ti Apai kitai enggau Tuan Jesus Kristus meri kita berekat enggau pemaik. 4 Aku endang seruran meri terima kasih ngagai Petara ke kita, ketegal pengasih ti udah diberi Iya ngagai kita dalam Jesus Kristus, 5 laban dalam Jesus Kristus kita udah nyadi kaya dalam semua jaku enggau penemu, 6 laban saksi kami pasal Kristus udah dikamatka ba kita, 7 datai ke kita nadai kurang ba pemeri ti diberi roh kudus, lebuh kita nganti Jesus Kristus Tuan kitai dipandangka. 8 Iya deka mega negapka kita datai ke ujung, ngambika kita nadai penyalah lebuh Hari Jesus Kristus Tuan kitai. 9 Petara endang tau dikarapka. Kita udah dikangauka Iya ngambika kita bekaul enggau Anak Iya Jesus Kristus Tuan kitai. 10 Diatu, dalam nama Jesus Kristus Tuan kitai aku minta kita, menyadi, sama besetuju enggau pangan diri, enda beserekang, tang begempung enggau pangan diri, sama seati, sama sepenemu, sama juluk ati enggau pangan diri. 11 Laban sida Kloi sebilik bisi udah madah ngagai aku, menyadi, pasal kita ke belaya enggau pangan diri. 12 Utai ti ku aku nya siku nyebut, “Aku nitihka Paul,” siku nyebut, “Aku nitihka Apollos,” siku nyebut, “Aku nitihka Peter”, lalu siku nyebut, “Aku nitihka Kristus.” 13 Kati Kristus udah dibagi? Kati Paul udah [dibunuh ba tiang, NW] ngarika kita? Tauka, kita udah dibaptisa dalam nama Paul? 14 Aku meri terima kasih ngagai Petara ke diri ke nadai udah maptisa kita, kelimpah ari maptisa Krispus seduai Gaius, 15 enggai ke orang ngumbai kita udah dibaptisa dalam nama aku. 16 Aku udah mega maptisa sida Stepanas sebilik. Tang kelimpah ari nya, aku enda ingat enti aku bisi udah maptisa orang bukai. 17 Laban Kristus ukai ngasuh aku maptisa orang, tang ngasuh aku nusui Berita Manah - ukai ngena pengelanchar bejaku ti datai ari penemu-dalam mensia, enggai ke kuasa [tiang perinsa, NW] Kristus lenyau ngapa.
25-31 MAC
RETA ARI BUP KUDUS | 1 KORINT 4-6
“Semina Mimit Aja Ragi Ulih Ngasuh Semua Tekang Tepung Kembai”
(1 Korint 5:1, 2) Orang bisi udah madah, sekeda bala kita bisi udah ngaga ulah ti kamah. Indah orang kapir deh enda ngaga ulah ti kamah baka nya. Laban siku lelaki tinduk enggau indai-tiri iya empu! 2 Lalu kita temegahka nya! Enda ka kita patut tusah ati lalu muai orang ke udah ngaga ulah nya ari bala kita?
(1 Korint 5:5-8) kita enda tau enda nyerahka orang nya ngagai Sitan, ngambika tubuh iya dirusak, tang roh iya diselamatka lebuh Hari Tuhan. 6 Kita enda patut temegah! Kati kita enda nemu, ka semina mimit aja ragi diguna kena ngasuh semua tekang tepung kembai? 7 Buai semua ragi ti lama, ngambika kita amat tuchi. Nya baru kita deka nyadi baka tekang tepung ti enda beragi, laban aku nemu kita sigi baka nya. Laban Pengerami Paska kitai udah sedia, laban Kristus, iya nya anak domba Pengerami Paska kitai, udah diserahka ngagai Petara nyadika pemeri. 8 Nya alai aram kitai ngintu Pengerami Paska kitai, ukai ngena ragi ti lama, iya nya ragi pemenchi enggau penyai, tang ngena roti ti enda beragi, iya nya ati ti tuchi enggau pemendar.
(1 Korint 5:13) Petara Empu ke deka ngakim orang ke ari luar eklisia. “Buru orang ke jai nya ari bala kita.”
it-2 230
Ragi
Rasul Paul ngena sempama pasal ragi lebuh iya ngasuh eklisia Kristian di Korint muai orang ke ngereja ulah ti kamah ari eklisia. Ku iya: ‘Kati kita enda nemu, ka semina mimit aja ragi diguna kena ngasuh semua tekang tepung kembai? Buai semua ragi ti lama, ngambika kita amat tuchi. Nya baru kita deka nyadi baka tekang tepung ti enda beragi, laban aku nemu kita sigi baka nya. Laban Pengerami Paska kitai udah sedia, laban Kristus, iya nya anak domba Pengerami Paska kitai, udah diserahka ngagai Petara nyadika pemeri.’ Udah nya iya madahka reti “ragi”: ‘Nya alai aram kitai ngintu Pengerami Paska kitai, ukai ngena ragi ti lama, iya nya ragi pemenchi enggau penyai, tang ngena roti ti enda beragi, iya nya ati ti tuchi enggau pemendar.’ (1 Kor. 5:6-8) Ba ayat tu Paul ngena chunto Pengerami Roti ti Enda Beragi, ti diintu pengudah pengerami Paska. Baka ragi ke mimit ngasuh semua tekang tepung kembai, eklisia mega deka nyadi enda tuchi ba mata Jehovah enti sida enda muai orang ke ngereja penyalah nya. Sida patut muai “ragi,” baka orang Israel ke nadai nyimpan ragi ba rumah sida maya Pengerami Roti ti Enda Beragi.
it-2 869-870
Sitan
Nama reti “nyerahka orang nya ngagai Sitan, ngambika tubuh iya dirusak”?
Lebuh Paul ninga pasal seiku menyadi di Korint beleman enggau indai tiri iya empu, Paul ngasuh eklisia: “[Serahka] orang nya ngagai Sitan, ngambika tubuh iya dirusak.” (1 Kor. 5:5) Reti iya, eklisia patut muai orang nya lalu enda begulai agi enggau iya. (1 Kor. 5:13) Lebuh sida muai iya ari eklisia, tu bakaka nyerahka iya ngagai Sitan, petara enggau pemerintah dunya tu. Baka “ragi” ke mimit ba “semua tekang tepung,” orang nya “tubuh” ti ngembuan runding dunya dalam eklisia. Lebuh lelaki nya dibuai ari eklisia, tu reti iya menyadi Kristian ke ngembuan runding Petara ngerusak “tubuh” nya. (1 Kor. 5:6, 7) Baka nya mega, Paul udah nyerahka Himinius enggau Aleksander ngagai Sitan, laban seduai iya udah limpang ari pengarap.—1 Tim. 1:20.
(1 Korint 5:9-11) Aku bisi udah nulis nagang kita begulai enggau orang ke kamah ulah. 10 Aku ukai bejakuka pasal orang dunya ke ngereja ulah ti kamah, tauka orang ke amu, tauka penchuri, tauka orang ke nyembah engkeramba, laban enti kita deka nyeliahka sida, kita enda tau enda pansut ari dunya tu. 11 Tang diatu aku nulis ngagai kita, enda nyagi kita begulai enggau orang ke ngaku diri orang Kristian, tang ngereja ulah ti kamah, tauka amu, tauka nyembah engkeramba, tauka bejai orang, tauka pemabuk, tauka penchuri. Indah makai enggau orang ke baka nya, deh kita enda tau.
Rinduka Sida ti Dikerinduka Petara
19 Bisi maya kitai enda diasuh begulai enggau orang ke kala sama pengarap enggau kitai. Tu nyadi enti sida agi ngulang penyalah ti ngelanggar ukum Petara, tauka agi nitihka ajar pengarap pelesu, sereta madahka diri enggai agi nyadi Saksi-Saksi Jehovah. Bup Kudus ngasuh kitai badu “begulai” enggau sida. (Bacha 1 Korint 5:11-13; 2 John 9-11) Tu engka tusah enti orang nya diri sebilik, tauka kala begulai rapat enggau kitai. Tang, kitai patut ngayanka diri tetap ati ngagai Jehovah enggau ukum Iya lebih agi ari semua utai. Kingatka, tetap ati enggau ngasika Jehovah patut dikemeratka kitai.
Ngulihka Penemu Bup Kudus ti Berega
(1 Korint 4:9, Bup Kudus Ka Rebak Diatu) Gaya dipeda aku, Petara udah meri endur ti penudi bendar ngagai kami rasul, baka orang ti kena ukum bunuh ba mua orang mayuh, ngambika dipeda semua dunya, melikat enggau mensia.
w09 15/5 24 ¶16
Bala Melikat—Dianjung Petara Nulung Kitai
16 Bala melikat meda lebuh orang Kristian napi penguji. (1 Kor. 4:9) Bala melikat puas ati lebuh meda penetap ati kitai sereta gaga ati lebuh meda orang ke bedosa nesal ati. (Luk. 15:10) Sida mega meratika ulah manah menyadi Kristian ke indu. Bup Kudus madahka, “ketegal sida melikat, indu enda tau nadai tanda kuasa ba pala iya.” (1 Kor. 11:3, 10) Endang amat, bala melikat gaga ati meda nembiak Petara nitihka atur teokratik sereta ketuai. Ulah ti ngasi nya nyadi teladan ke bala melikat.
(1 Korint 6:3) Kati kita enda nemu kitai deka ngakim melikat? Anang kenang pasal ngakim utai ti dalam pengidup tu!
it-2 211
Ukum
Ukum ke Bala Melikat. Penuduk bala melikat tinggi agi ari mensia, tang sida dibaruh kuasa sereta ukum Petara. (Heb. 1:7, 14; Mas. 104:4) Jehovah mega nangkan sereta meri tatak ngagai Sitan. (Jop 1:12; 2:6) Tuai melikat, iya nya Mikael, nemu sereta bebasaka penuduk Jehovah ke nyadi Hakim ti Pemadu Tinggi. Maya iya bekelikuh enggau Sitan, iya madah: “Tuhan ngerara nuan!” (Jud. 9; bandingka Sek. 3:2.) Petara Jehovah meri Jesus Kristus kuasa, lalu semua melikat dibaruh kuasa iya. (Heb. 1:6; 1 Pet. 3:22; Mat. 13:41; 25:31; Plp. 2:9-11) Nya alai, Jesus ulih nganjung melikat ngagai John. (Pem. 1:1) Tang ba 1 Korint 6:3, rasul Paul madahka orang ti dipilih ke serega deka ngakim bala melikat laban sida deka nerima kuasa ngukum bala melikat ti jai.
Macha Bup Kudus
(1 Korint 6:1-14) Enti kita bisi laya enggau pangan diri, kati kita berani mai pekara nya ngagai kot lalu minta diri diatur orang kapir, lalu enda minta diri diatur bala nembiak Tuhan? 2 Kati kita enda nemu, nembiak Tuhan deka ngakim dunya? Lalu enti kita deka ngakim dunya, nama kebuah kita enda ulih ngatur pekara ti mit? 3 Kati kita enda nemu kitai deka ngakim melikat? Anang kenang pasal ngakim utai ti dalam pengidup tu! 4 Nya alai, enti kita bisi pekara ti baka nya, indah orang ke baruh pangkat dalam eklisia deh tau diasuh kita ngakim pekara nya! 5 Aku nyebut tu kena aku ngemaluka kita. Nyangka meh kita nadai orang ke chukup bepenemu-dalam ngatur pekara entara kita ke diri menyadi dalam Tuhan, 6 ti ngujungka kita ke sama Kristian mansang ngagai kot, lalu minta diri diatur orang ke ukai orang Kristian? 7 Enti kita nyara pangan diri, nya nunjukka kita endang udah alah. Nama kebuah enda nejuka orang ngereja utai ti salah ngagai kita? Nama kebuah enda nejuka sida ngakal kita? 8 Tang kita empu ngereja utai ti salah lalu nipu orang. Indah menyadi kita ke dalam Kristus deh ditipu kita! 9 Kati kita enda nemu, orang ke jai enda ulih bempu Perintah Petara? Anang nipu diri! Orang ke ngereja ulah ti kamah, tauka nyembah engkeramba, tauka butang, tauka lelaki beleman enggau lelaki, 10 tauka ngenchuri, tauka amu, tauka pemabuk, tauka bejakuka orang, tauka perumpak, enda ulih bempu Perintah Petara. 11 Baka nya meh sekeda bala kita suba. Tang kita udah dituchi, udah dikuduska, udah digaga lurus dalam nama Tuan Jesus Kristus enggau ulih roh Petara kitai. 12 Nyangka orang bisi nyebut, “Aku tau ngereja semua utai.” Amat, tang ukai semua utai nya tau mai penguntung ngagai aku. “Aku tau ngereja semua utai.” Amat, tang aku enggai nyadi ulun utai. 13 Nyangka bisi mega orang deka nyebut, “Pemakai ke perut, lalu perut ke pemakai.” Tang Petara deka ngerusak utai dua bengkah nya. Tubuh ukai dikena ngereja ulah ti kamah, tang dikena ngereja utai ke Tuan, lalu Tuan ngintu tubuh nya. 14 Lalu Petara udah ngangkatka Tuan ari mati, lalu Iya deka mega ngangkatka kitai ari mati ngena kuasa Iya.